Nong Batija Labongo Galle

1. Tyen lok mabeco ango ma oweko omyero inongo batija?

TIKA imaro Lubanga Jehovah, ma en aye miyo mot ducu mabeco, kadi wa mic me kwo? Tika imito nyuto marri pire? Yo maber loyo me timo meno aye ki dyero kwoni bote kacel ki nongo batija. Timo man biweko idonyo i kin jo me ot pa Jehovah. Macalo adwogine, Jehovah bidoko Woru ki Laremi dok bitirri kun gwoki pien dong itye dano ma mege. (Jab. 73:24; Ic. 43:​1, 2) Dyere kacel ki nongo batija bene weko ibedo ki gen me nongo kwo ma pe tum.—1 Pet. 3:21.

2. Gin ango ma wabinyamo i pwony man?

² Tika tye gin mo ma tye ka gengi ki nongo batija? Ka tye kit meno, ci pe itye keni. Dano milion mapol ata dong gutimo alokaloka i kwogi kacel ki tamgi wek gibed ma gipore me nongo batija. I kare-ni dong, gitye ka tic pi Jehovah ki mit kom dok ma cwinygi yom. Pwony ango ma itwero nongone ki bot jo ma gunongo batija i cencwari me acel? Kong dong wanyamu pekki mogo ma gukemme kwede kacel ki pwony ma watwero nongone ki i labolgi.

LUCAMARIA GUNONGO BATIJA

3. Ariya ango ma twero bedo ni Lucamaria gukemme kwede ma peya gunongo batija?

³ Lucamaria onongo gubedo jo me dini mo ma gukwo i kare pa Yecu. Lucamaria mapol onongo gikwo i boma me Camaria ki mukene onongo gibedo cok ki boma me Cekem ma weng tye tung kumalo me lobo Judaya. Ma peya Lucamaria magi gunongo batija, onongo mitte ni kong guye Lok pa Lubanga ducu dok gupwony jami mapol ki iye. I dini pa Lucamaria, onongo giye ni bukke abic keken mukwongo, cakke ki i Acakki me o i Nwoyo Cik ki gwok nyo buk pa Yocwa aye ni gubedo bukke ma oa ki bot Lubanga. Dok onongo Lucamaria pud gitye ka kuro bino pa Meciya ma lubbe ki cikke pa Lubanga ma kicoyo i Nwoyo Cik 18:​18, 19 kadi bed Meciya onongo dong obino woko. (Jon 4:25) Onongo mitte ni kong guye ni Yecu aye obedo Meciya ma kiciko pire ka wek gubed ma gupore me nongo batija. “Lucamaria mapol” gutimo meno. (Jon 4:39) Medo i kom meno, pien Lukricitayo mapol onongo gubedo Lujudaya, onongo mitte bene ni Lucamaria mogo gujwa cwiny me apokapoka ma gitye kwede i kom Lujudaya.—Luka 9:​52-54.

4. Ma lubbe ki Tic pa Lukwena 8:​5, 6, 14, Lucamaria mogo gudok i kom tito kwena pa Pilipo nining?

⁴ Gin ango ma okonyo Lucamaria me nongo batija? I kare ma latit kwena Pilipo “otuco botgi pi Kricito,” Lucamaria mogo “guye lok pa Lubanga.” (Kwan Tic pa Lukwena 8:​5, 6, 14.) Kadi bed Pilipo onongo obedo Lajudaya, jo magi pe gukwero winyo lokke. Twero bedo ni wigi opo i kom wang Ginacoya ma waco ni Lubanga pe poko kin dano. (Nwo. 10:​17-19) “Gujolo lok ma Pilipo otito botgi [madok i kom Kricito] ki cwiny acel,” dok gumoko ka maleng gin ma nyuto ni Lubanga aye tye ka tic ki Pilipo. En bene otimo tango mapol, me labolle cango lutwo kacel ki ryemo cen.—Tic 8:7.

5. Pwony ango ma inongo ki i gin mutimme i kom Lucamaria?

⁵ Lucamaria magi onongo gitwero weko cwiny me apokapoka nyo ngec manok i kom lok pa Lubanga gengogi ki dongo i yo me cwiny. Ento pe guye ni gin ma kit meno otimme i komgi. Lucamaria pe gugalle ki nongo batija i kare ma gumoko ni Pilipo opwonyogi ki lok ada. Ginacoya otito ni: “Ka guye lok me kwena maber ma Pilipo otito i kom ker pa Lubanga ki i kom Yecu Kricito, ci gibatijagi, co wa ki mon.” (Tic 8:12) In tika imoko ni Lok pa Lubanga aye obedo ada? Dok tika ineno ni Lucaden pa Jehovah aye gupwonnye me nyuto mar ma Yecu owaco ni lulub kore me ada gibinyutone? (Jon 13:35) Ka tye kit meno, ci pe ibed ki lworo mo keken me nongo batija. Bed ki tekcwiny ni Jehovah bigoyo laane i komi.

6. Pwony ango ma itwero nongone ki i gin mutimme i kom Ruben?

⁶ Ruben, ma bedo i lobo Germany, odongo i paco ma jone tye Lucaden. Ento i kare ma en pud tidi, onongo tye ki akalakala ka ce Jehovah tye ada. En oloyo akalakala meno nining? En oniang ni etye ki ngec manok i kom lok man, pi meno en omoko tamme me timo kwed matut. Ruben owaco ni: “I kwanna pira kena, atimo kwed me niang lok ada. Onongo mitte ni akwan lok i kom pwony man ni kwo ocakke pire kene tyen mapol.” Ruben okwano buk ma wiye tye ni Is There a Creator Who Cares About You? Buk meno okonyo Ruben matek me jingo niyene i kom Lubanga. Mumiyo en oloko keken ni; ‘Wao! Jehovah kara tye ada.’ Dok i kare ma Ruben gulimo gang kalwa madit, marre odongo matek pi neno ribbe ma tye i kin utmege i wi lobo ducu. I kare ma en odok cen i Germany, Ruben omoko tamme, ci onongo batija ki mwaka 17. Ka inongo ni itye ki akalakala i kom jami ma ipwonyogi, ci tim kwed i bukkewa. “Ngec ma atir” twero konyi me loyo akalakala. (Ep. 4:​13, 14, NWT) Dok ka imedde ki winyo pi jami mutimme ma nyuto mar ki note ma tye i kin jo pa Jehovah i but lobbe mapatpat, dok ineno lanyut man i kacokkewu, ci marri pi utmegiwa bidongo matek.

CAULO ME TARUCO ONONGO BATIJA

7. Kodi tam ango ma onongo mitte ni Caulo otim alokaloka iye?

⁷ Nen kong gin mutimme i kom Caulo me Taruco. En onongo okwano i rwom ma lamal, ngeyo Cik maber, dok onongo tye ka ywek adada i kin Lujudaya. (Gal. 1:​13, 14; Pil. 3:5) I kare meno, pol pa Lujudaya onongo gineno Lukricitayo calo jo mungak woko ki i ada. Pi meno, Caulo oketo aunauna magwar i kom Lukricitayo magi. Ki tung bote, en otamo ni onongo etye ka timo miti pa Lubanga. (Tic 8:3; 9:​1, 2; 26:​9-11) Onongo bimitte ni Caulo bene obed atera me kemme ki aunauna ka en odoko Lakricitayo.

8. (a) Gin ango ma okonyo Caulo me nongo batija? (b) Ma lubbe ki Tic pa Lukwena 22:​12-16, Anania okonyo Caulo nining? (Nen bene cal.)

⁸ Gin ango ma okonyo Caulo me nongo batija? I kare ma Yecu oloko ki i polo ki Caulo, wang Caulo oto woko. (Tic 9:​3-9) En obedo i nirii kec pi nino adek, dok labongo akalakala mo, en obedo ka lwodo gin mutimme man. Ada, Caulo omoko ka maleng ni Yecu aye obedo Meciya dok ni lulub kore aye gipwonyo lok ada. Cwiny Caulo nen calo ocwer matek pien ni eweko kineko Citefano! (Tic 22:20) I nge nino adek, lapwonnye mo ma nyinge Anania obino bot Caulo, oyabo wange, dok ocuko cwiny Caulo me nongo batija labongo galle. (Kwan Tic pa Lukwena 22:​12-16.) Ki mwolo madit, Caulo owinyo lok pa Anania dok onongo batija.—Tic 9:​17, 18.

9. Pwony ango ma inongo ki i gin mutimme i kom Caulo?

⁹ Tye pwony mapol ma watwero nongone ki bot Caulo. En onongo twero weko awaka nyo lworo dano me genge ki nongo batija. Ento en pe oye ni gin ma kit meno otimme i kome. Caulo onyuto cwiny me mwolo dok otimo alokaloka i kwone me doko lalub kor Kricito. (Tic 26:​14, 19) Caulo onongo tye atera me doko Lakricitayo kadi bed en onongo ngeyo ni ebikato ki i aunauna magwar bene. (Tic 9:​15, 16; 20:​22, 23) I nge nongo batija, Caulo omedde ki jenge i kom Jehovah wek ebed ki kare me ciro pekki mapatpat. (2 Kor. 4:​7-10) Calo Caulo, in bene kibitemo niyeni dok ibikato ki i aunauna ka inongo batija macalo Lacaden pa Jehovah. Ento iromo bedo ki tekcwiny ni Lubanga kacel ki Kricito gibimini kony ma mitte me ciro pekki kun imedde ki bedo lagen.—Pil. 4:13.

10. Adwogi maber ango ma itwero nongo ki i labol pa Anna?

¹⁰ Anna odongo i lobo mo ma tye tung kunyango me Ulaya. I nge mamane nongo batija, Anna ocako kwano Baibul ki mwaka 9 i kare ma wonne oye. Ento timo man okelo yoko wic i kin lunywalle ki wadine ma gibedo kwedgi i paco acel. Wadine magi onongo gineno ni pe nyuto woro ka ngat moni oweko dini pa kwarine ci odoko Lacaden pa Jehovah. I kare ma Anna oo mwaka 12, en openyo wonne wek oye ki en me nongo batija. Wonne onongo mito niang ka man obedo tam ma Anna aye omoko, nyo obedo pi lyeto ma ngat mo tye ka ketone i komme. Anna owaco ki wonne ni, “Amito timo man pien amaro Jehovah.” Wonne oye ni en twero nongo batija. I ngeye ma Anna onongo batija, wadine gumedde ki tere i yo marac adada. Watte mo acel owacce ni, “Onongo bibedo maber loyo ka idoko malaya nyo lamat taa me ka doko Lacaden pa Jehovah.” Anna okanyo aunauna magi nining? En owaco ni, “Jehovah okonya me cung matek, dok mamana ki babana gukonya matek adada.” Kare ki kare Anna coyo piny yo mapatpat ma Jehovah okonye kwede i kwone. En bene bedo ka kwanone wek wiye pe owil woko i kom kony ma Jehovah omine. Ka ilworo aunauna, ci wi opo ni Jehovah bikonyi bene.—Ibru 13:6.

KORNELIO ONONGO BATIJA

11. Gin ango ma onongo romo gengo Kornelio ki nongo batija?

¹¹ Watwero bene nongo pwony ma pigi tego ki i labol pa Kornelio. En onongo obedo ladit mony me Roma ma telo wi lumony ma welgi romo 100 kulu. (Tic 10:1) Pi meno, oromo bedo ni en onongo ngene adada bot lwak kacel ki lumony luwote. Baibul bene tito ni en onongo “miyo jami mapol me konyo dano.” (Tic 10:2) Jehovah ocwalo lakwena Petero me tito lok me kwena maber bote. Tika rwom ma Kornelio onongo tye kwede oweko en ogalle ki nongo batija?

12. Gin ango ma okonyo Kornelio me nongo batija?

¹² Gin ango ma okonyo Kornelio me nongo batija? Baibul tittiwa ni Kornelio onongo obedo “laco ma woro Lubanga, en ki jo ma i ode ducu.” Dok Kornelio onongo bene lego bot Lubanga nino ducu. (Tic 10:2) I kare ma Petero otito kwena maber bot Kornelio, Kornelio kacel ki jo me ode guye Kricito dok gunongo batija cutcut. (Tic 10:​47, 48) Labongo akalakala mo, Kornelio onongo tye atera me timo alokaloka mo keken ma mitte wek ewor Jehovah kacel ki jo me ode.—Yoc. 24:15; Tic 10:​24, 33.

13. Pwony ango ma inongo ki bot Kornelio?

¹³ Calo Caulo, Kornelio onongo twero weko rwom ma en tye kwede genge ki doko Lakricitayo. En pe oye ni gin ma kit meno otimme. Tika bimitte ni itim alokaloka madongo i kwoni wek inong batija? Ka tye kit meno, Jehovah bibedo Lakony meri. En bigoyo laane i komi ka imoko tammi me tic pire kun iketo cik ma igi lac me Baibul i tic i kwoni.

14. Pwony ango ma inongo ki i labol pa Fujii?

¹⁴ Onongo mitte ni Fujii, ma bedo i lobo Japan, otim alokaloka i dog ticce wek obed mupore me nongo batija. En aye onongo lubo kor lalo wi lupwonye me gang kwan mo muywek adada ma kipwonyo iye kit me yubo ki cano ature pi yub mapatpat. Pol kare ka onongo lapwony madit pe twero bedo tye i yub me yik mo, en onongo cwalo Fujii me cung me kakare. Dok man onongo kwako nywako i kwer pa dini me Buddha. Ento, i kare ma Fujii opwonyo lok ada madok i kom to, en oniang ni pe ebinongo batija ka pud emedde ki nywako i kwer man. En omoko tamme pe me nywako matwal i kwer mo keken me dini me Buddha. (2 Kor. 6:​15, 16) Fujii otito bot lalo wi lupwonye tam ma en emoko. Adwogine obedo nining? Fujii obedo ki kare me medde ki dog ticce labongo bedo ka nywako i kwer magi. I nge kwano Baibul pi mwaka ma romo acel, en onongo batija.a Ka mitte ni itim alokaloka i dog ticci wek iyom cwiny Lubanga, ci bed ki gen ni Jehovah bimiyo jami ma mitte piri kacel ki lupaconi.—Jab. 127:2; Mat. 6:33.

JO KORINT GUNONGO BATIJA

15. Ariya ango ma onongo twero gengo jo Korint me nongo batija?

¹⁵ Jo ma onongo gikwo i boma macon me Korint onongo gimaro jami me kom dok gikwo carocaro. Pol pa jo magi kwogi onongo pe rwatte ki miti pa Lubanga. Dong, onongo twero bedo tek adada pi jo ma gikwo i boma meno me cako tic pi Jehovah. Kadi bed kit meno, i kare ma lakwena Paulo obino i boma meno ci otito iye kwena maber madok i kom Kricito, ‘lwak jo mapol ma i Korint ma guwinyo lok pa Paulo guye, ci kibatijagi.’ (Tic 18:​7-11) Lacen, Rwot Yecu Kricto onen bot Paulo i ginanyuta ci owacce ni: “Atye ki lwak jo mapol i gang [boma] man.” Pi meno, Paulo omedde ki tito kwena i Korint pi mwaka acel ki nucu.

16. Gin ango ma okonyo jo Korint me loyo ariya ma onongo twero gengogi ki nongo batija? (2 Jo Korint 10:​4, 5)

¹⁶ Gin ango ma okonyo jo Korint me nongo batija? (Kwan 2 Jo Korint 10:​4, 5.) Lok pa Lubanga kacel ki teko pa cwiny maleng okonyogi me timo alokaloka oyotoyot i kwogi. (Ibru 4:12) Jo ma gibedo i Korint ma gujolo kwena maber madok i kom Kricito gubedo ki kero me juko tim maraco calo mero, kwalo kwo, kacel ki tim me tek gungu.—1 Kor. 6:​9-11.b

17. Pwony ango ma itwero nongone ki bot jo Korint?

¹⁷ Kadi bed onongo mitte ni jo mogo i Korint gutim alokaloka madongo i kwogi, gin pe gutamo ni timo alokaloka magi tek tutwal wek gidok Lukricitayo. Gutute matek me cako wot i yo ma biterogi i kwo ma pe tum. (Mat. 7:​13, 14) Tika itye ka tute matek me timo alokaloka madongo i kwoni wek ibed ma ipore me nongo batija? Pe iil cingi woko! Leg Jehovah pi cwiny mere maleng wek okonyi me medde ki kwero miti me timo jami maraco.

18. Adwogi maber ango ma itwero nongone ki i labol pa Monika?

¹⁸ Monika, ma bedo i lobo Georgia, otute matek me juko tic ki leb macilo kacel ki galowang ma pe opore wek enong batija. En owaco ni: “Ma peya anongo batija, lega bot Jehovah okonya me timo alokaloka ma mitte. Jehovah onongo ngeyo ni atye ki miti me timo gin ma atir, dok kare ducu en obedo ka konya kun bene mina tira.” Monika onongo batija i kare ma tye ki mwaka 16. Tika tye tim mogo ma mitte ni iwek timogi woko wek iti pi Jehovah i yo mupore? Medde ki lega bote pi teko me timo alokaloka. Jehovah cinge yot dok bimini cwiny mere maleng madwong me konyi.—Jon 3:34.

KA ITYE KI NIYE MATEK, GIN MO PE BILOYI

19. Gin ango ma twero konyi me loyo ariya ma itye ka kemme kwede? (Nen bene cal.)

¹⁹ Bed ki gen ni Jehovah mari adada dok mito ni ibed i kin jo me ode. Meno obedo lok ada, dok Jehovah bikonyi me loyo ariya mo keken ma tye ka gengi ki nongo batija. Yecu otito ki lupwonnyene ni: ‘Ka ce niyewu rom ki nyig kodi karadali, ci wubiwaco ki got man ni, “Dirre i kabedo ma tye loka ca,” kit meno bidirre; ci gin mo keken pe biloyowu.’ (Mat. 17:20) Jo ma gubedo tye i kare ma Yecu owaco lok man, onongo gudoko lupwonnye pa Yecu mwaki mogo manok keken dok niyegi onongo pud tye ka dongo adonga. Ento Yecu ocuko cwinygi ni ka gudongo niye matek, ci Jehovah bikonyogi me loyo ariya mo keken. Dok Jehovah bene twero konyi me timo meno!

20. Labol pa Lukricitayo me cencwari me acel ki me karewa-ni ma kinyamogi i pwony man ocuko cwinyi me timo gin ango?

²⁰ Ka inongo ni ariya mo tye i kwoni ma tye ka gengi ki nongo batija, ci tute matek me loyone oyotoyot. Nong cuko cwiny kacel ki teko ki i labol pa Lukricitayo me cencwari me acel ki me karewa-ni. Walego ni, labolgi ocuk cwinyi me dyero kwoni bot Jehovah ki me nongo batija. Man bibedo tam maber loyo ma ibimokone!