Pwonnye me Tam Calo Jehovah ki Yecu

1-2. (a) Maro Jehovah kwako timo gin ango? (b) Yecu onyuto nining ni emaro Jehovah?

YECU otito ni: ‘Mar Jehovah Lubangani ki cwinyi ducu, ki kwoni ducu, ki tekki ducu, ki tammi ducu.’ (Luka 10:27) Yecu owaco ni man aye cik ma pire tek loyo ducu ki i kin Cik pa Moses. Tyeng man nyuto ni, omyero wamar Jehovah ki cwinywa ducu, ma man kwako mitiwa, kacel ki kit ma wawinyo kwede. Maro Jehovah bene kwako tic pire ki kwowa ducu, ma meno tye iye tekowa ki kerowa. Ento maro Jehovah bene kwako tamwa, ma meno obedo kit ma watamo kwede. Kadi bed pe watwero niang tam pa Jehovah kwicikwici, omyero watute me tam kit ma en tamo kwede. Ento watwero niang maber kit ma Lubanga tamo kwede ka wanyamo matut lok i kom “tam pa Kricito” pien Yecu tamo kit ma Jehovah tamo kwede.—1 Kor. 2:16 ki jami me akwana me nwtsty-E pi “watye ki tam pa Kricito.”

² Yecu maro Jehovah ki tamme ducu. Yecu onongo ngeyo gin ma Jehovah mito ni etim dok en onongo omoko tamme me timo meno kadi bed timone onongo biweko edeno can dok keto kwone ka mading. Pien Yecu onongo omoko tamme me yomo cwiny Wonne, en pe oye ni gin mo keken pire obed tek loyo yomo cwiny Wonne.

3. Gin ango ma lakwena Petero opwonyo ki bot Yecu, dok en ocuko cwiny Lukricitayo luwote me timo gin ngo? (1 Petero 4:1)

³ Petero kacel ki lukwena mukene-ni gubedo ki mot me cwalo cawa malac kacel ki Yecu kun gipwonyo jami mapol ki bote. I kare ma Petero ocoyo waragane mukwongo, en ocuko cwiny Lukricitayo me bedo ki tam acel calo pa Kricito.a (Kwan 1 Petero 4:1.) I leb Grik, nyig lok ma lakwena Petero otiyo kwede ni, “wurukke” obedo nyig lok ma kitiyo kwede ka lumony gitye ka ruko jami lweny mapatpat me cito i dog lweny. Pi meno, ka Lukricitayo gupwonnye me tam calo Yecu, ci gibibedo ki jami lweny mapol ma bikonyogi me lweny ki Catan kacel ki miti me timo jami maraco.—2 Kor. 10:​3-5; Ep. 6:12.

4. Gin ango ma wabinyamo i pwony man?

⁴ Wabinyamo kit ma Yecu tamo kwede ki kit ma watwero lubo kwede lanenne. Lanenne bikonyowa me pwonnye me; (1) tam calo Jehovah, dok man bikonyo wan ducu me bedo ki tam acel i kinwa, (2) bedo jo mamwol, kacel ki (3) bedo ki wic makwiri kun wajenge i kom Jehovah ki lega bote.

PWONNYE ME TAM KIT MA JEHOVAH TAMO KWEDE

5. I kare mene ma Petero pe obedo ki tam acel calo pa Jehovah?

⁵ Nino mo acel, Petero pe otamo kit ma Jehovah tamo kwede. Con onongo Yecu otito ki lupwonnyene ni ebicito i Jerucalem, lutela dini pa Lujudaya gibimake, gibitere marac, dok gibineke woko. (Mat. 16:21) Petero onongo ngeyo ni Yecu obedo Meciya ma kiciko pire dok bilaro jo pa Lubanga. Dong, nen calo pe obedo yot ki Petero me ye ni Jehovah biye ni kinek Yecu. (Mat. 16:16) Pi meno, Petero otero Yecu cen ci owacce ni: “Rwot! Gin macalo man pe bitimme i komi wacel.” (Mat. 16:22) Tam pa Yecu ki pa Petero pe orwatte pien Petero onongo pe tye ka tam calo Jehovah.

6. Yecu onyuto nining ni etamo calo Jehovah?

⁶ Yecu onongo ngeyo kit ma Wonne tamo kwede dok en olubo lanen pa Jehovah labongo roc mo. Yecu owaco ki Petero ni: “Dok cen i ngeya in Catan! Idoko ariya woko bota, pien tammi pe lubo pa Lubanga, ento pa dano.” (Mat. 16:23) Yecu onongo ngeyo ni ka wek etim miti pa Jehovah, ci bimitte ni eden can dok eto. Pi meno, Yecu okwero tam pa Petero woko, kadi bed Petero onongo tye ki cwiny maber me konyo Yecu. Gin mutimme man, oweko Petero oniang ni omyero epwonnye me tam calo Jehovah. Man obedo gin ma pire tek adada ma wan bene omyero wapwonnye me timone.

7. Lacen, Petero onyuto nining ni tamme rwatte ki tam pa Jehovah? (Nen cal ma tye i )

⁷ Lacen, Petero onyuto ni emito pwonnye me tam kit ma Jehovah tamo kwede. Kare onongo dong oromo pi Lurok me doko jo me ot pa Jehovah. Lubanga ocwalo Petero ka tito kwena bot Kornelio, ma obedo ngat acel i kin Lurok mukwongo ma gudoko Lukricitayo. Pol kare, onongo Lujudaya pe giribbe ki Lurok, pi meno onongo mitte ni Petero olok nenone ka wek otit kwena bot Lurok. I kare ma Petero oniang kit ma Jehovah neno kwede ki Lurok, en oloko tamme woko. Macalo adwogine, en ocito i gang pa Kornelio i kare ma kiore “labongo pyem mo.” (Tic 10:​28, 29) En otito kwena bot Kornelio kacel ki jo me ode, ci gunongo batija.—Tic 10:​21-23, 34, 35, 44-48.

8. I yo ma nining ma watwero nyutu kwede ni tamwa rwatte ki tam pa Jehovah? (1 Petero 3:8)

⁸ I nge mwaki mogo, Petero ocuko cwiny Lukricitayo luwote ni “wun ducu wubed ki tam acel.” (Kwan 1 Petero 3:8.) Macalo jo pa Jehovah, watwero bedo ki tam acel ka watute me tam kit ma Jehovah tamo kwede, kit ma wapwonyo ki i Baibul. Me labolle, Yecu otito ki lulub kore ni omyero guket pi ker-ri mukwongo i kwogi. (Mat. 6:33) Pi meno, ka omego nyo lamego mo ocako tic macalo painia nyo odonyo i tic pi kare malac, omyero wacuk cwinye. Pire tek ni wagwokke ki miyo tam ma twero weko en pe cobo yubbe me tic pi Jehovah pi kare malac. Bedo ber ka waloko i kom jami mabeco ma lubbe ki yubbe kacel ki mine kony ma mitte.

BED NGAT MAMWOL

9-10. Yecu onyuto cwiny me mwolo i yo me aura nining?

⁹ I dyewor ma peya kineke, Yecu opwonyo Petero kacel ki lukwenane mukene-ni pwony mo ma pire tek adada madok i kom mwolo. Con, Yecu onongo ocwalo Petero kacel ki Jon ka yubo jami ma mitte me camo cam me agikki me kwone i lobo kany kacel ki lupwonnyene. Onongo mitte ni gunong becen ki taulo ma kibitic kwede me lwoko tyen wele ma peya gucamo. Ento, anga ma onongo binyuto cwiny me mwolo ci lwoko tyen wele magi?

¹⁰ Labongo galle, Yecu onyuto cwiny me mwolo ci olwoko tyengi. Neno ka Yecu timo tic mapol kare opii aye onongo gitimo nen calo ocungo wi lukwenane matek adada. Yecu olunyo kanyine, otweyo taulo i pyere, oonyo pii i becen, ci ocako lwoko tyengi. (Jon 13:​4, 5) Yecu olwoko tyen lupwonnyene 12 ducu. Timo man nen calo orii, dok en olwoko kadi wa tyen Juda ma lacen odobe-ni. Kadi bed kit meno, Yecu onyuto mwolo ci otimo tic man. Yecu odiyo cwinye i komgi dok openyogi ni: “Wuniang gin ma atimo i komwu? Wulwonga ni Lapwony dok ni Rwot; meno ber, pien atye kit meno. Ka an a Rwotwu ki Lapwonywu, alwoko tyenwu, wun bene myero wulwok tyenwu kekenwu.”—Jon 13:​12-14.

11. Petero onyuto nining ni epwonnye me bedo ngat mamwol? (1 Petero 5:5) (Nen bene cal.)

¹¹ Petero opwonnye me bedo ngat mamwol ki bot Yecu. I ngeye ma Yecu odok cen i polo, Petero otimo tango ci ocango laco ma obedo langolo nicakke ma kinywale. (Tic 1:​8, 9; 3:​2, 6-8) Lwak mapol ma guneno tango man, gucokke i nget Petero. (Tic 3:11) Ento Petero onongo pe tye ki miti me ywayo tam pa lwak magi i kome kadi bed en odongo i tekwaro ma dano maro yweka adada. Me ka meno, en onyuto cwiny me mwolo ci otito ki lwak ni omyero gupak Jehovah kacel ki Yecu. Ci Petero otito ki lwak ni: “Pi nyinge [Yecu], ki pi ye nyinge, en aye omiyo kom laco man odoko tek.” (Tic 3:​12-16) Lacen, Petero ocoyo waraga bot Lukricitayo kun tittigi pingo mwolo pire tek adada. En owaccigi ni omyero gurukke ki mwolo calo obedo bongo. Lok man poyo wiwa i kom kit ma Yecu otweyo kwede taulo i pyere ci olwoko tyen lukwenane.—Kwan 1 Petero 5:5.

12. Bedo ngat mamwol kwako gin ango?

¹² Watwero lubo lanen pa Petero kun wamedde ki pwonnye me bedo jo mamwol. Wi opo ni, ngat mamwol pe loko i yo ma nyuto cwiny me mwolo keken. Nyig lok me leb Grik ma Petero otiyo kwede ni “mwolo,” nyuto bene ni mwolo kwako kit ma watamo kwede i komwa kekenwa kacel ki i kom jo mukene. Mwolo weko watimo jami pi jo mukene pien wamaro Jehovah ki dano luwotwa, ento pe ni pien wamito nongo yweka ki botgi. Wanyuto ni wabedo jo mamwol ka watiyo pi Jehovah ki yomcwiny dok watimo jami pi jo mukene kadi bed pol pa dano pe gineno.—Mat. 6:​1-4.

WUBED KI WIC MAKWIRI

13. Bedo ki “wic makwiri” kwako gin ango?

¹³ Bedo ki “wic makwiri” kwako gin ango? (1 Pet. 4:​7, NWT; 2 Kor. 5:13) Lakricitayo ma tye ki wic makwiri tute matek me moko tam maber ma rwatte ki tam pa Jehovah. Lakricitayo ma kit meno ngeyo ni watte ki Jehovah aye obedo gin ma pire tek loyo ducu. En bedo ki neno mupore i kome kekene dok niang ni tye jami mogo ma pe engeyo. Dok nyuto ni ebedo ngat ma jenge i kom Lubanga ki lega kare ducu pi tirane.b

14. I nino mo acel Petero pe ojenge i kom Jehovah nining?

¹⁴ I dyewor ma peya kineke, Yecu ociko lupwonnyene ni: “I dyewor matin, wun ducu wubitenya woko kena.” Petero otamo ni etek dok ogamo lok pa Yecu ni: “Kadi ka jo mukene ducu gibitenyi woko, ento an pe abitenyi ata.” I dyewor meno bene, Yecu omiyo tam bot lupwonnyene mogo ni: ‘Wuki piny dok wumedde ki lega.’ (Mat. 26:​31, 33, 41) Petero pe olubo tira meno kulu. Ka onongo en olubo tira meno, ci onongo bibedo ki tekcwiny me waco ka maleng i nyim lwak ni ebedo lakwena pa Yecu. Me ka meno, Petero okwero woko lajwac ni pe engeyo Yecu dok man oweko en okoko ange matek.—Mat. 26:​69-75.

15. Yecu omedde ki bedo ki wic makwiri nining i dyewor me agikki ma peya kineke?

¹⁵ Yecu ojenge i kom Jehovah ki cwinye ducu. Kadi bed Yecu onongo pe ki roc, en olego matek teretere i dyewor ma peya kineke. Meno omine tekcwiny me timo jami ma rwatte ki miti pa Jehovah. (Mat. 26:​39, 42, 44; Jon 18:​4, 5) Labongo akalakala mo, Petero wiye pe owil i kom kit ma Yecu obedo ka lega kwede teretere i dyewor me agikki.

16. Petero onyuto nining ni epwonnye me bedo ki wic makwiri? (1 Petero 4:7)

¹⁶ I nge kare mo, Petero opwonnye me jenge i kom Jehovah ki lega. I nge cer pa Yecu, Yecu ocuko cwiny Petero kacel ki lupwonnye mukene-ni ni kibiminigi cwiny maleng wek gubed ki kare me cobo ticgi me tito kwena maber-ri. Kadi bed kit meno, Yecu otittigi ni gumedde ki bedo i Jerucalem nio wang ma kicwalo botgi cwiny maleng. (Luka 24:49; Tic 1:​4, 5) Gin ango ma Petero obedo ka timone ka en woto ki kuro cwiny maleng man? Petero kacel ki Lukricitayo luwote “gumine ka lega ki cwiny acel.” (Tic 1:​13, 14) Lacen, i kare ma en ocoyo waragane mukwongo, Petero ocuko cwiny Lukricitayo luwote me bedo ki wic makwiri kun gijenge i kom Jehovah i lega. En owaco ni: “Agikki me jami ducu dong cok. Pi meno, wubed ki wic makwiri, dok wubed ki wang ma twolo i lok kom lega.” (1 Pet. 4:​7, NWT) Petero opwonnye me jenge i kom Jehovah dok obedo ki kare me konyo utmegine kacel ki jingogi.—Gal. 2:9.

17. Gin ango ma omyero wabed ka timone kare ducu? (Nen bene cal.)

¹⁷ Me medde ki bedo ki wic makwiri, omyero kare ducu wabed ka lega matek bot Jehovah. Pire tek me niang ni omyero wabed ka lega bot Jehovah pi kony kadi bed wanongo ni timo gin moni yot adada botwa. Dong, ka mitte ni wamok tam mo ma pire tek, omyero waleg bot Jehovah pi tira, kun wabedo ki gen ni Jehovah ngeyo gin maber loyo piwa.

18. Gin ango ma omyero wamedde ki timone wek tamwa orwatte ki pa Jehovah?

¹⁸ Watye ki pwoc madit adada ni Jehovah ocweyowa ki kero me poro kite mapatpat. (Acak. 1:26) Tye lok ada ni pe watwero lubo lanen pa Jehovah kwicikwici labongo roc mo. (Ic. 55:9) Dong, calo Petero, omyero wamedde ki pwonnye me tam calo Jehovah kun wadongo cwiny me mwolo, kacel ki bedo ki wic makwiri.