Dongo Lirem Macok ki Omege ki Lumege Ber Piwa!

1-2. Gin ango ma pire tek bot Jehovah, dok en mito ni watim gin ango?

KIT ma watero kwede jo mukene pire tek adada bot Jehovah. Yecu opwonyowa ni omyero wamar luwotwa kit macalo wamaro komwa kenwa. (Mat. 22:​37-39) Timo man kwako nyuto cwiny me kica kadi wa bot jo ma pe gitiyo pi Jehovah. Ka wanyuto cwiny me kica nongo watye ka lubo lanen pa Jehovah Lubangawa, ma “miyo cengnge tuc bot jo maraco ki jo mabeco bene, dok miyo kot cwer bot dano ma kitgi atir, ki bot jo ma pe kitgi atir.”—Mat. 5:45.

² Kadi bed ni Jehovah maro dano ducu, ento en maro jo ma gitiyo gin ma atir makato. (Jon 14:21) En mito ni walub lanenne. Pi meno, en cuko cwinywa me nyuto bot utmegiwa ni ‘wamarogi ki cwinywa ducu macalo omego.’ Mar ma kit meno, rom ki mar ma wabedo kwede pi watwa mo macok nyo laremwa ma wapoko kwede pye ngwen.—1 Pet. 4:8; Rom. 12:10.

3. Ka odok i kom mar, gin ango ma omyero wiwa opo iye?

³ Kit macalo mitte ni igwok kodi ma ipito i poto wek odong maber, mitte bene ni imedde ki tic matek wek lirem i kin in ki jo mukene odong matek. Lakwena Paulo omiyo tira ki Lukricitayo ni: “Wumedde ki mar i kinwu kekenwu macalo omego.” (Ibru 13:1) Jehovah mito ni wamedde ki dongo marwa pi jo mukene. Pwony man binyamo pingo omyero wadong lirem macok ki luye luwotwa ki kit ma waromo medde ameda ki timo meno.

PINGO OMYERO WADONG LIREM MACOK KI LUYE LUWOTWA?

4. Kit ma kitito kwede i Jabuli 133:​1, watwero medde ki dongo pwoc pi note ma tye i kin utmegiwa nining? (Nen bene cal.)

⁴ Kwan Jabuli 133:1. Wan bene waye lok ma laco jabuli ocoyo ni mako lirem ki jo ma gimaro Jehovah “ber” dok kelo “yomcwiny.” Pol kare ka wangi ki neno gin moni, pe watero calo gin ma pire tek dok mwonya. I yo acel-lu, wiwa twero wil woko kit ma note ma tye i kin utmege pire tek kwede. Man twero timme pien wacwalo cawa kacel ki utmegiwa tyen mapol cabit ki cabit. Watwero gwokke nining wek pe warweny pwoc ma watye kwede pi note ma tye i kinwa? Marwa pi omegiwa ki lumegiwa bidongo matek ka wakwanyo kare me tamo kit ma ngat acel acel pire tek kwede botwa kacel ki kacokke.

5. Mar ma wanyuto i kinwa twero gudo jo mukene nining?

⁵ Neno mar ma tye i kinwa gudo cwiny jo ma gubino pi tyen me acel i cokkewa matek adada. Mar ma kit meno twero weko gimoko ni ginongo ada woko. Yecu owaco ni: “Pi man dano ducu bingeyo ni wun lupwonnyena, ka mer tye i kinwu.” (Jon 13:35) Nen kong gin mutimme i kom Catherine,a latin kwan me univaciti ma onongo tye ka kwano Baibul kacel ki Lacaden pa Jehovah mo. En ojolo lwongo me bino i gure madit me rijon. Inge tyeko yub me nino me acel, en owaco ki lapwonnye me Baibul ni: “Ma naka yang ki nywalla, lunyodona peya gugwako kora. Ento i gurewu man, dano 52 kulu gugwako kora i nino acel keken. Amito bedo i kin jo me ot man.” Catherine omedde ki dongo i yo me cwiny ci onongo batija i mwaka 2024. Ki lok ada, ka jo mukene gineno tic mabeco ma watimo kacel ki mar ma wanyuto i kinwa, ci man twero tugo cwinygi me cako tic pi Jehovah.—Mat. 5:16.

6. Dongo wat macok ki omege ki lumege twero gwokowa i yo ma nining?

⁶ Dongo wat macok ki omege ki lumege twero gwokowa i yo me cwiny. Paulo ocuko cwiny Lukricitayo ni: “Wujing cwinywu kekenwu kare ducu . . . wek ngat mo i kinwu pe cwinye odok nwang pi bwola me bal.” (Ibru 3:13) Ka cwinywa otur matek ma weko wanongo ni pe yot me medde ki timo gin ma atir, ci Jehovah twero tic ki laye lawotwa mo ma oneno gorowa me miniwa tira. (Jab. 73:​2, 17, 23) Kony ma kit meno ber piwa.

7. Mar kubbe ki note nining? (Jo Kolocai 3:​13, 14)

⁷ Pi mar ma wan ducu watute me nyutone i kinwa, omiyo wanongo adwogi mabeco mapol. (1 Jon 4:11) Me labolle, mar tugo cwinywa me ‘medde ki diyo cwinywa i kom luwotwa’ dok timo meno weko note bedo tye i kinwa. (Kwan Jo Kolocai 3:​13, 14; Ep. 4:​2-6) Pi meno, ka watye i cokkewa, waworo Jehovah ki yomcwiny dok mar man pe nonge i kin jo mo keken i lobo-ni.

NYUT WORO BOT NGAT ACEL ACEL

8. Jehovah konyowa nining me bedo ma wanote i kinwa?

⁸ Note ma tye i kin omege ki lumege i wi lobo ducu obedo tango madit adada. Jehovah keken aye oweko twere me bedo ma wanote kadi bed watye ki roc. (1 Kor. 12:25) Baibul waco ni ‘Lubanga dong opwonyowa woko ni wamarre kekenwa.’ (1 Tec. 4:9) Man tyen lokke ni Jehovah tiyo ki Baibul me tittiwa gin ma mitte me dongo wat macok ki utmegiwa. ‘Lubanga pwonyowa’ ka wakwano Baibul dok waketo i tic jami ma wapwonyo. (Ibru 4:12; Yak. 1:25) Dok meno aye gin ma Lucaden pa Jehovah ducu gitute me timone i kwogi.

9. Pwony ango ma wanongo ki i Jo Roma 12:​9-13 ka odok i kom nyuto woro nyo miyo deyo bot jo mukene?

⁹ Lok pa Lubanga pwonyowa nining kit me nyiko cok ki jo mukene? Nen kong gin ma Paulo ocoyo i kom lok man i Jo Roma 12:​9-13. (Kwan.) Ki i tyeng man en owaco ni ‘dano acel acel omi deyo [woro] bot lawote.’ Meno tyen lokke ngo? Omyero wabed atera me nyuto ‘mar’ bot jo mukene ki timmigi kica, nyuto botgi cwiny me jolo welo, bedo ma cingwa yot, ki yo mukene mapol. (Ep. 4:32) Pe omyero ikur ni omeru nyo lameru aye myero ocak dongo wat macok kwedi. In aye itwero cako ‘miyo deyo bot lawoti.’ Ka itimo meno ci ibineno ada pa lok ma Yecu owaco ni: “Miyo mot kelo gum [yomcwiny] makato gamo agama.”—Tic 20:35.

10. I yo ma nining ma watwero nyuto kwede ni komwa pe wac ka odok i kom ‘miyo deyo bot lawotwa’? (Nen bene cal.)

¹⁰ I nge wacciwa ni wami deyo bot luwotwa, Paulo ocuko cwinywa ni omyero ‘komwa obed mit labongo wackom.’ Ngat ma kome mit tiyo matek dok bed ki arima madwong i ticce. Ka ngat ma kome mit kimiye tic me atima, en cobo tic meno ki diro. Carolok 3:​27, 28 tittiwa ni: “Pe ikwer tiyo gin maber bot dano ma mito ni ikonye, ma nongo itye ki twero me tiyone.” Pi meno, ka waniang ni ngat mo mito kony, cutcut watimo gin ma watwero me konye. Ngat ma kome mit bene pe diro cawa me timo tic moni ci timo i cawa me agikki; dok pe tamo ni ngat mo mapat bitimo tic meno.—1 Jon 3:​17, 18.

11. Ngo ma twero konyowa me dongo wat macok ki jo mukene?

¹¹ Yo mukene ma watwero nyuto kwede woro bot jo mukene aye ki timmigi kica ka gucwero cwinywa. Jo Epeco 4:26 waco ni: “Ceng pe myero opoti ma nongo pud wujul wutye ki kiniga i cwinywu.” Pingo? Tyeng me 27 waco ni ka watimo meno ci nongo watye ka miyo “kare ki Catan.” I Baibul, Jehovah owacciwa tyen mapol ni omyero watim kica ki luwotwa. Jo Kolocai 3:13 bene cuko cwinywa ni “Wudi cwinywu kekenwu, ngat acel acel odi cwinye i kom lawote, kun wutimo kica ki luwotwu i kinwu kekenwu pi balwu.” Weko bal pa jo mukene obedo yo acel maber adada me dongo wat macok kwedgi. Ka watimo kica ki luwotwa, wakonyo me ‘gwoko ribbe ma cwiny maleng omiyowa wek wabed acel i twec me kuc.’ (Ep. 4:3) I yo macek, timo kica konyo me gwoko kuc kacel ki ribbe ma tye i kinwa.

12. Jehovah konyowa nining me bedo jo ma gitimo kica?

¹² Tye lok ada ni timo kica pe yot ka ngat mo ocwero cwinywa. Ento watwero timmigi kica ki kony pa cwiny maleng pa Lubanga. Baibul miniwa tira ni “wumarre kekenwu ki cwinywu ducu macalo omego” dok “komwu obed mit, labongo wackom.” Ginacoya bene waco ni: “Wubed lyet i cwinywu.” Ngat ma “lyet” obedo ngat ma “tye ki mit kom kacel ki arima madwong macalo adwogi me” teko pa cwiny maleng. (Nen jami me akwana me nwtsty-E pi Jo Roma 12:11.) Pi meno, cwiny maleng pa Lubanga twero konyowa me nyuto mar pi utmegiwa kacel ki timmigi kica. Meno aye tyen lok mumiyo walego Jehovah ni okonywa.—Luka 11:13.

“APOKAPOKA MO PE MYERO OBED TYE I KINWU”

13. Jami mene ma twero kelo apokapoka i kinwa?

¹³ Kacokke tye ki kwa “jo ducu” ma gia ki i tekwaro ki kwo mapatpat. (1 Tem. 2:​3, 4) Pi tyen lok man, ngat acel acel twero moko tam mapatpat ka odok i lok kom ruk ki kit ma ginen kwede, yo me cango two, nyo galowang ma giyero. Ka pe wagwokke, jami magi twero kelo apokapoka i kinwa woko. (Rom. 14:4; 1 Kor. 1:10) Ento pien Lubanga dong opwonyowa woko ni wamarre kekenwa, omyero wagwokke ki dido jo mukene me ye ni tamwa aye ber loyo.—Pil. 2:3.

14. Gin ango ma omyero watute me timone, dok pingo?

¹⁴ Watwero gengo apokapoka i kacokke ka watute me cukocwiny jo mukene kun bene wakonyogi kare ducu. (1 Tec. 5:11) I mwaki mogo ma okato angec macok cok-ki, jo mapol ma onongo ticgi pi Jehovah okwe nyo kikwanyogi woko, gudwogo cen i kacokke. Wajologi ki mar madit! (2 Kor. 2:8) Nen kong gin mutimme i kom laminwa mo ma obino i Ot me Ker i nge mwaki apar ma ticce okwe woko. En owaco ni, “Dano ducu gubwunyo kweda dok gumoto cinga ki yomcwiny.” (Tic 3:19) Cwiny me kica ma kacokke onyutte ogude nining? Laminwa-ni owaco ni, “Kica man oweko awinyo calo Jehovah tye ka konya me nongo yomcwiny odoco.” Ka watute me cukocwiny jo mukene, ci Kricito romo tic kwedwa me kweyo cwiny ‘jo ducu muol ki ma yec onurogi.’—Mat. 11:​28, 29.

15. Gin ango ma omyero watute me timone? (Nen bene cal.)

¹⁵ Gin mukene ma twero konyowa me gengo apokapoka i kacokke aye ki gwokke ki lok ma waloko. Yubu 12:11 otito ni: “It dano pe ye lok ducu, ento bilo abila, macalo dano bilo cam ki lebe.” Kit macalo latedo ma ladiro kong bilo dek ma peya otero i nyim lwak me niang ka mit, wan bene omyero watam matut i kom lok ma wamito wacone ma peya waloko. (Jab. 141:3) Omyero wanen ni lok ma wamito wacone bidongo dano, bikweyo cwinygi, dok jo mukene binongo “kony ki iye.”—Ep. 4:29.

16. Tutwalle jo mene ma omyero gunen ni lokgi tye me cuko cwiny?

¹⁶ Luwi odi ki lunyodo omyero gugwokke tutwalle ki lok ma giloko wek obed me cuko cwiny jo mukene. (Kol. 3:​19, 21; Tito 2:4) Luelda bene omyero gunen ni lokgi tye me kwe cwiny ki cukocwiny bot romi pa Lubanga. (Ic. 32:​1, 2; Gal. 6:1) Carolok mo me Baibul poyo wiwa ni: ‘Lok ma kiloko i kare ma mitte kikome, ber mada!’—Car. 15:23.

“WAMAR DANO KI MAR ME ADA MA NEN I TIC”

17. I yo ma nining ma watwero nyuto ni marwa pi utmegiwa a ki i cwinywa?

¹⁷ Lakwena Jon ocuko cwinywa ni omyero “wamar dano ki mar me ada ma nen i tic.” (1 Jon 3:18) Pe omyero wapor odenge ni wamaro omegiwa nyo lumegiwa, ento marwa myero oa ki i cwinywa. Marwa pi utmegiwa twero a ki i cwinywa nining? Wat i kinwa ki utmegiwa bimedde ki dongo matek ka watero cawa kacel kwedgi. Pi meno, ket macalo yubbi me cwalo cawa kacel ki utmege, me labolle i cokke ki tic me pwony. Nong kare me limo jo mukene. Ka watimo jami magi, wanyuto ni ‘Lubanga dong opwonyowa woko ni wamarre kekenwa.’ (1 Tec. 4:9) Dok wabimedde ki neno ni “bedo ber ki me yomcwiny ka omego gibedo kacel ki mer i kingi!”—Jab. 133:1.