Omege Matino—Wulub Lanen pa Marako ki Temceo

1-2. Ariya macalo mene ma onongo twero gengo Marako ki Temceo me medo ticgi pi Jehovah?

WUN omege matino, tika wumito medo ticwu pi Jehovah wek wukony omege ki lumege ma i kacokkewu? Labongo akalakala mo wangeyo ni wumito. Tye me yomcwiny madit adada me neno omege matino mapol ka gijalle me tic pi jo mukene! (Jab. 110:3) Ento i kine mukene, medo ticci pi Jehovah pe twero bedo yot. Tika itye ki lworo me medo ticci pi Jehovah pien pe ingeyo kit ma kwoni bibedo kwede i anyim nyo pien pe ingeyo ka ma Jehovah bicwali iye? Tika lworo ni pe ibicobo tic moni maber dong ogengi ki jolo mot me tic mo? Ka tye kit meno, nge ni gin ma kit meno pe otimme i komi keken.

² Marako ki Temceo bene gukemme ki ariya meno. Ento kadi bed gin onongo pe gingeyo kit ma kwogi bilokke kwede nyo gwok gutamo ni pe gipore, gin gumoko tamgi me medo ticgi pi Jehovah. I kare ma lakwena Paulo ki Barnaba gulwongo Marako me wot kacel kwedgi macalo lumiconari, Marako onongo nen calo bedo gin ki minne i gang mo maleng adada. (Tic 12:​12, 13, 25) Ento Marako oa ki gangi wek emed ticce pi Jehovah. Mukwongo, en odak i Antiokia. Lacen, en owoto kacel ki Paulo ki Barnaba i kabedo mukene maboco. (Tic 13:​1-5) Marom aroma, Temceo bene onongo nen calo bedo kacel ki lunyodone i kare ma Paulo olwonge me cito kacel kwede i tic me pwony i kabedo mapatpat. Temceo onongo pud awobi matidi, pi meno gwok en otamo ni pe epore me cito i tic man kacel ki Paulo. (Por 1 Jo Korint 16:​10, 11 ki 1 Temceo 4:12.) Kadi bed kit meno, Temceo ojolo lwongo pa Paulo dok onongo adwogi mabeco mapol i ticce pi Jehovah.—Tic 16:​3-5.

3. (a) Wangeyo nining ni Paulo onongo tye ki pwoc madit pi Marako ki Temceo? (2 Temceo 4:​6, 9, 11) (Nen bene cal.) (b) Lapeny mene ma wabinyamogi i pwony man?

³ Marako ki Temceo gupwonyo kit me cobo tic mapol i kacokke i kare ma onongo pud gitye bulu. Paulo onongo tye ki pwoc madit adada i kom omege magi ma oweko en onongo mito ni gubed kacel kwede i kare ma en oniang ni ecok to. (Kwan 2 Temceo 4:​6, 9, 11.) Kit mabeco ango ma Marako ki Temceo gubedo kwede ma oyomo cwiny Paulo? Omege matino i kare-ni gitwero lubo lanen pa Marako ki Temceo nining? Dok omege matino gitwero nongo adwogi maber ki i tam ma Paulo omiyo nining?

LUB LANEN PA MARAKO—BED ATERA ME TIC

4-5. Marako onyuto nining ni etye atera me tic pi jo mukene?

⁴ Tic pi omege ki lumege obedo tic matek dok mitte ni idi cwinyi wek imedde ki konyogi kadi bed timone tek. Marako oweko lanen maber me konyo utmege kun diyo cwinye. Cwiny Marako nen calo ocwer pien Paulo okwero wot kacel kwede ka tito kwena i wotte me aryo macalo lamiconari. (Tic 15:​37, 38) Ento gin meno pe oweko Marako ojuko ticce me konyo omege ki lumege.

⁵ Kadi bed Paulo oweke, Marako pud owoto kacel ki okeyone Barnaba ka tito kwena i kabedo mukene. Dok i nge mwaki ma romo 11, i kare ma Paulo tye i buc i Roma, Marako onongo tye kacel kwede me cuko cwinye. (Pile. 23, 24) Ki lok adada, Paulo obedo ki pwoc madit pi kony ma Marako omine mumiyo en owaco ni Marako ‘okweyo cwinye tutwal.’—Kol. 4:​10, 11.

6. Adwogi maber ango ma Marako onongo pi bedo kacel ki Lukricitayo muteggi? (Nen lok ma tye i tere piny.)

⁶ Marako onongo adwogi mabeco mapol pi bedo kacel ki Lukricitayo muteggi i yo me cwiny. I nge bedo kacel ki Paulo i Roma, Marako ocito i Babilon ka tic kacel ki Petero. Ki kunnu, gin gudongo lirem macok adada mumiyo Petero olwonge ni “woda Marako.” (1 Pet. 5:13) I kare ma onongo gibedo kacel, Petero nen calo otito ki lareme matidi man jami mapol mutimme i kwo pa Yecu kacel ki ticce me pwony. Lacen Marako otiyo ki lok magi me coyo Jirine.a

7. Omego Sam olubo lanen pa Marako nining? (Nen bene cal.)

⁷ Marako omedde ki tiyo tic mapol pi Jehovah kun bedo cok ki omege muteggi i yo me cwiny. Itwero lubo lanen pa Marako nining? Twero bedo ni imito medo ticci pi Jehovah, gwok nyo me tic macalo lakony kor tic nyo laelda, ento pud peya kicimmi. Ka tye kit meno, pe iwek cwinyi otur. Me ka meno, medde ki yenyo jami ma itwero timone pi Jehovah kacel ki omege ki lumege ma i kacokke. Nen kong gin mutimme i kom Sam ma i kare-ni tiyo macalo laelda. I kare ma en onongo pud awobi matidi, en onongo maro pore keken ki omege mukene matino. Omege mogo matino onongo kiminigi mot me tic i kacokke ento Sam onongo pe kimine. Cwiny Sam otur dok owinyo calo pe kiparo pire mumiyo en otito lok man bot luelda. Laelda acel omine tam ni otim jami ma en twero me konyo jo mukene kadi bed pol pa dano pe gineno. Tam meno otugo cwiny Sam me cako konyo utmege muteggi kacel ki jo mukene ma mito kony me giwot i cokke. Sam owaco ni: “Gin mutimme man okonya me niang tyen lok me tic pi jo mukene. Anongo yomcwiny madwong adada pien onongo akonyo omege ki lumege.”

LUB LANEN PA TEMCEO—NYUT NI IPARO PI JO MUKENE

8. Pingo Paulo oyero Temceo me wot kacel kwede? (Jo Pilipi 2:​19-22)

⁸ Paulo onongo mito omege ma cwinygi tek me wot kacel kwede i kare ma en onongo tye ka dok cen i boma ma kiune iye matek. Mukwongo, Paulo oyero Cira ma onongo otiyo pi Jehovah pi mwaki mapol me wot kacel kwede. (Tic 15:​22, 40) Lacen, Paulo bene oyero Temceo me wot kacel kwede. Pingo Paulo oyero Temceo? Tyen lok acel aye ni Temceo onongo tye ki nying maber i kin omege ki lumege. (Tic 16:​1, 2) Temceo bene onongo paro pi jo mukene.—Kwan Jo Pilipi 2:​19-22.

9. Temceo onyuto nining ni eparo pi omege ki lumege?

⁹ Nicakke ma Temceo gubedo ka tic kacel ki Paulo, Temceo onyuto ni eparo pi jo mukene makato pi en kekene. Pi tyen lok meno, Paulo onongo twero weko Temceo i boma me Berea ka cuko cwiny omege ki lumege manyen ma kunnu. (Tic 17:​13, 14) I kare meno, Temceo nen calo opwonyo jami mapol ki bot Cira, ma onongo odong cen i Berea. Pi meno, i nge kare mo Paulo onongo dong twero cwalo Temceo kene me cito i Tecalonika ka cuko cwiny utmege ma i boma meno. (1 Tec. 3:2) Pi mwaki 15 ma lubo, mar pa Temceo pi omege ki lumege odongo matek. Man oweko en onongo ‘kok kacel ki jo ma kok’ ma gitye ka kato ki i pekki. (Rom. 12:15; 2 Tem. 1:4) Omege matino gitwero lubo lanen pa Temceo nining?

10. Omego Walter opwonnye nining me paro pi jo mukene?

¹⁰ Omego mo ma nyinge Walter opwonnye me paro pi jo mukene. I kare ma en tye awobi matidi, Walter onongo nongo ni tek tutwal me boko lok ki omege ki lumege muteggi. Pi meno, ka Walter obino i cokke en onongo motogi ci ling woko. Laelda mo acel omine tam ni ocak ki waco ki omege ki lumege muteggi magi gin mo ma en maro ki botgi. Laelda meno bene ocuko cwinye me tamo i kom gin ma utmege mutegi magi gitwero bedo ki miti iye. Walter oketo tam meno i tic. I kare-ni, Walter dong tiyo macalo laelda. En owaco ni: “I kare-ni dong anongo ni yot me cako boko lok ki dano ma mwakagi patpat. Atye ki pwoc ni atwero lok kwedgi dok man konya me niang kwo ma gitye ka kato ki iye. Man oweko atwero minigi kony ma gimito.”

11. Omege matino gitwero nyuto ni giparo pi jo ma i kacokkegi nining? (Nen bene cal.)

¹¹ Omege matino gitwero pwonnye bene me paro pi jo mukene. Ka itye i cokke, lok ki dano ducu, kadi wa jo muteggi nyo jo matino. Peny kit ma gitye kwede, dok ite iti ka winyo lokgi. Man bikonyi me niang kit ma itwero konyogi kwede. Itwero niang ni luot mo muteggi gimito kony me niang kit me tic ki JW Library^® app. Onyo bene, itwero niang ni gipe ki yub me tic ki ngat mo keken i tic me pwony. Tika itwero nyutigi kit me tic ki tabuletgi nyo cito i tic me pwony kacel kwedgi? Ka ikonyo omege ki lumege i yo magi, ibibedo lanen maber bot jo me kacokke.

TAM MA PAULO OMIYO TWERO KONYI

12. Omege matino gitwero nongo adwogi maber ki i tam ma Paulo omiyo ki Temceo nining?

¹² Paulo omiyo tam maber bot Temceo ma twero konye me bedo ki yomcwiny i kwone kacel ki cobo ticce me pwony. (1 Tem. 1:18; 2 Tem. 4:5) Ka ibedo omego matidi, tam ma Paulo omiyo twero konyi. I yo ma nining? Kwan waraga aryo ma Paulo ocoyo bot Temceo calo ocoyo boti, dok inen pwony ma itwero ketone i tic i kwoni. Nen kong labol mogo.

13. Maro ki geno Jehovah kwako timo gin ango?

¹³ “Pwonnye keni i kwo me lworo Lubanga.” (1 Tem. 4:7b) Paulo onongo tye ka waco ki Temceo ni obed lagen bot Jehovah dok otim gin ma yomo Cwinye. Ento, pwonnye me geno ki maro Lubanga mito tute matek ki botwa. Man nen ka maleng i lok ma Paulo owaco. Nyig lok me leb Grik ma kigonyo ni “pwonnye keni” onongo pol kare kitiyo kwede me lok i kom kit ma lungwec gipwonnye kwede matek me cito i pyem ngwec. Onongo mitte ni lungwec magi gugwokke ki i timo jami mogo ma twero gengogi ki loyo ngwec. I yo acel-lu, wan bene omyero wagwokke ki timo jami ma twero balo watwa woko ki Jehovah.

14. Ka watye ka kwano Baibul, mitiwa myero obed me timo ngo? Mi labol.

¹⁴ Pire tek me dongo cwiny me kwano Baibul nino ducu. Dok bene pire tek me niang tyen lok me kwano Baibul nino ducu, ma en aye me konyi nyiko cok ki Jehovah. Me labolle, ket kong ni itye ka kwano lok i kom Yecu kacel ki awobi matidi ma lalonyo. Gin mutimme man pwonyi gin ango i kom Jehovah? (Mar. 10:​17-22) Awobi man onongo ye ni Yecu aye obedo Meciya ento en onongo pe ki niye me doko lalub kor Yecu. Kadi bed kit meno, Yecu onene ci “cwinye omare.” Yecu oloko i yo me kica ki awobi man matidi-ni. Labongo akalakala mo, Yecu onongo mito ni awobi man omok tamme me tic pi Jehovah ma bikelle yomcwiny. Cwiny me mar ma Yecu obedo kwede i kom awobi-ni onyuto cwiny me mar ma Jehovah bene onongo tye kwede pi awobi man. (Jon 14:9) Ka iwoto ki lwodo gin mutimme man kacel ki kwo ma itye ka kato ki iye, pennye kekeni ni, ‘Gin ango ma omyero atim me nyiko cok ki Jehovah ki me tic pi jo mukene?’

15. Pingo pire tek ni omege matino guwek lanen maber pi jo mukene? Mi labol. (1 Temceo 4:​12, 13)

¹⁵ “Bed lanen maber bot jo muye.” (Kwan 1 Temceo 4:​12, 13.) Paulo ocuko cwiny Temceo me pwonyo kit me kwan maber kacel ki doko lapwony ma ladiro. Medo i kom meno, Paulo bene onongo mito ni en odong kit mogo mabeco calo mar, niye, kacel ki bedo leng labongo gin marac. Pingo? Pien gin maber ma ngat moni timo pire tek kato gin ma en waco awaca. Me labolle, ket kong ni ibimiyo pwony ma loko i kom medo cawawa i tic me tito kwena. Ibimiyo pwony meno agonya dok ki tekcwiny ka in kikomi komi mit i tic me pwony. Lanenni biweko jo ma tye ka winyo pwonyi gibedo ki miti me keto i tic gin ma ipwonyogi kwede.—1 Tem. 3:13.

16. (a) Omege matino gitwero weko lanen maber i kabedo abic mene i kwogi? (b) Omego matidi twero weko lanen maber ‘i lokke’ nining?

¹⁶ I 1 Temceo 4:​12, Paulo otito pi kabedo abic mapatpat ma omege matino gitwero weko iye lanen maber pi kacokke. Ibinongo adwogi maber ka icwalo cawa ka timo kwed i kom kabedo abic magi. Me labolle, ket kong ni imito weko lanen maber “i lokki.” Itwero tam i kom gin ma iromo wacone me cuko cwiny jo mukene. Ka pud ibedo kacel ki lunyodoni, pwogi kare ki kare pi jami mabeco ma gitye ka timo piri. I nge tyeko cokke, tit ki omego nyo lamego mo gin ma imaro dok ipwonyo ki i pwonye. Iromo bene miyo lagam ma a ki i cwinyi kun nongo pe ikwano akwana i cawa me cokke. Tuteni me weko lanen maber i lokki binyuto ni itye ka dongo i yo me cwiny.—1 Tem. 4:15.

17. Timo gin ango ma bikonyo omege matino me cobo yubgi me cwiny? (2 Temceo 2:22)

¹⁷ “Wek miti me awobi obedi, ento ket tammi i bedo ki kit ma atir.” (Kwan 2 Temceo 2:22.) Paulo ocuko cwiny Temceo me lweny matek ki miti maraco ma twero genge cobo yubbe me cwiny nyo balo watte ki Jehovah. Iromo niang ni itye ka cwalo cawa malac tutwal katimo jami me yweyo wic dok ipe ki cawa me timo jami me cwiny. Me labolle, tam i kom cawa ma icwalo ka tuko, tic ki Intanet, nyo tuko tuko me vidio. Pingo pe iti ki cawa ma itero ka timo jami magi me timo jami me cwiny? Itwero tic ki cawa meno me konyo i gwoko lengo me Ot me Ker nyo cwako yub me tito kwena kun itiyo ki lalor bukke. Ka inywako i tic magi, ibimako lirem ma gibikonyi keto ki cobo yubbi me cwiny.

TIC PI JO MUKENE KELO MOT MAPOL

18. Pingo watwero waco ni Marako ki Temceo gunongo yomcwiny i kwogi?

¹⁸ Marako ki Temceo gutimo alokaloka mapol wek giti pi jo mukene dok meno oweko gunongo yomcwiny i kwogi. (Tic 20:35) Marako owoto i kabedo maboco mapol me tic pi omege ki lumege. En ocoyo lok mamwonya dok mamit i kom kwo pa Yecu kacel ki ticce me pwony. Temceo okonyo Paulo me cako kacokke mapol kacel ki cuko cwiny omege ki lumege. Labongo akalakala mo, Jehovah cwinye obedo yom me neno cwiny me jalle ma Marako ki Temceo gunyuto.

19. Pingo omyero omege matino guket cwinygi i tira ma Paulo omiyo ki Temceo, dok adwogine bibedo ningo?

¹⁹ Watwero neno ni Paulo onongo tye ki mar matut i kom Temceo ki i waraga ma en ocoyo bot lareme Temceo. Jehovah aye otiyo ki Paulo me coyo waraga man. Pi meno, jami ma wakwano ki i waraga magi nyuto kit ma Jehovah winyo kwede i kom wun omege matino i kare-ni. Jehovah marowu matek dok en mito ni wunong adwogi maber i kwowu. Dong, wutute matek me keto i tic tira ma Paulo omiyo dok wudong cwiny me tic pi jo mukene. Ka wutimo meno, wubibedo ki kwo maber kombeddi dok wubinongo “kwo ma en aye kwo kikome” i anyim.—1 Tem. 6:​18, 19.