Nyut Cwiny me Mwolo ka Tye Jami Mogo ma Pe Ingeyo

1. Kero mapatpat ango ma Jehovah ocweyowa kwede, dok pingo?

JEHOVAH ocweyowa i yo me aura adada: Watye ki kero me tam, pwonyo jami manyen, kacel ki niang kit me keto i tic jami ma wapwonyo. Pingo en ocweyowa kit meno? Pien en mito ni wanong “ngec i kom Lubanga” dok Jehovah mito ni wamok tam maber ma jenge i kom ngec ma atir ka watiyo pire.—Car. 2:​1-5; Rom. 12:1.

2. Gin ango ma pire tek ni wan ducu ki acel acel wange, dok pingo meno pire tek? (Jo Roma 11:​33, 34) (Nen bene cal.)

² Jehovah ocweyowa ki kero me pwonyo jami mapol, ento bene tye jami mogo ma pe wangeyo. (Kwan Jo Roma 11:​33, 34.) Tam kong i kom labol pa Yubu. Jehovah openyo Yubu ki lapeny mapatpat ma okonye me niang ni tye jami mapol ma en pe ngeyo. Lapeny magi ma Jehovah openyo ki Yubu, okonye me niang ni mitte ni ebed mwol dok elok kit ma en tamo kwede. (Yubu 42:​3-6) Pire tek ni wan ducu ki acel acel waye ni tye jami mogo ma pe wangeyo. Ka wiwa po ni tye jami mapol ma pe wangeyo, ci meno bikonyowa me bedo jo mamwol kun wageno ni Jehovah kare ducu bititiwa jami ma mitte ni wange me moko tam ma atir.—Car. 2:6.

3. Gin ango ma wabinyamo i pwony man?

³ I pwony man, wabinyamo jami mogo ma pe wangeyogi kacel ki ariya ma watwero kemme kwede macalo adwogine. Wabinyamo bene pingo ber ni pe wangeyo jami mukene. Nyamo jami magi bikonyowa me jingo genwa ni Jehovah aye “ngat ma dirone dwong mukato kare,” dok en kare ducu tittiwa jami ma mitte ni wange.—Yubu 37:16.

PE WANGEYO AWENE MA AGIKKI BIBINO IYE

4. Ma lubbe ki Matayo 24:​36, gin ango ma pire tek ma pe wangeyo?

⁴ Kwan Matayo 24:36. Pe wangeyo awene ma agikki me lobo man bibino iye. I kare ma Yecu onongo tye i lobo, en bene onongo pe ngeyo “nino meno ki cawa meno.”a Lacen, en otito ki lukwenane ni Jehovah aye tye ki twero me moko kare ma gin moni bitimme iye. (Tic 1:​6, 7) Jehovah dong otyeko moko woko awene ma agikki me lobo man bibino iye, ento wan pe watwero ngeyo ninone kikome.

5. Bedo ma pe wangeyo nino ma agikki bibino iye twero gudowa nining?

⁵ Pe wangeyo pi kare marom mene ma bimitte ni wakur agikki me lobo man. Pi meno, cwinywa twero tur nyo watwero ilo cingwa woko, tutwalle ka onongo dong wabedo ka kuro bino pa nino pa Jehovah pi kare malac. Watwero nongo ni tek me diyo cwinywa ka wadiwa nyo jo mukene ginyerowa pien wakuro agikki pi mwaki mapol dok pud peya oo. (2 Pet. 3:​3, 4) Watwero tamo ni ka onongo wangeyo nino ma agikki bibino iye kikome, ci onongo bibedo yot me diyo cwinywa kacel ki kanyo cac ma dano giketo i komwa.

6. Pingo ber ni pe wangeyo nino ma agikki bibino iye?

⁶ Pien Jehovah pe otitiwa awene ma agikki piny bibino iye kikome, man miniwa kare me nyuto ni watiyo pi Jehovah pien wamare dok wagene. Pe watye ki miti me tic pi Jehovah nio ka agikki piny obino keken, ento me tic pire pi naka. Pi meno, me ka bedo ka tamo tutwal pi awene ma “nino pa Lubanga” bibino iye, bedo ber ka waketo cwinywa i kom jami mabeco ma bitimme i nge nino meno. Man bikonyowa me nyiko cok ki Jehovah, geno en, kacel ki tute matek me yomo cwinye i kare-ni.—2 Pet. 3:​11, 12.

7. Jami mene ma wangeyogi?

⁷ Pire tek ni wabed ka tamo jami ma wangeyo. Wangeyo ni kare me agikki ocakke i mwaka 1914. Lok pa lunebi me Baibul moko lok man. Jehovah bene otitiwa jami mapol ma bitimme i wi lobo i nge mwaka meno. Macalo adwogi me cobbe pa lok pa lunebi magi, dong wamoko atir ni “nino madit pa Rwot [Jehovah] tye cok.” (Jep. 1:14) Wangeyo bene tic ma Jehovah mito ni waket cwinywa ka timone. En mito ni watit ki dano mapol kit ma watwero, “lok man me kwena maber me ker pa Lubanga.” (Mat. 24:14) Watye ka tito lok man me kwena maber i lobe 240 dok i leb makato 1,000 kulu. Dong, me timo tic man ki mit kom, pe mitte ni wange “nino meno ki cawa meno” ma agikki bibino iye-ni.

PE WANGEYO KIT MA JEHOVAH BITIMO KWEDE JAMI MOGO

8. Pwony ango ma wanongo ki i Latitlok 11:5?

⁸ Kwan Latitlok 11:5. Wang ginacoya man pwonyowa ni pol kare pe wangeyo “tic pa Lubanga” kwicikwici nyo gin ma en ye ni otimme wek ocob yubbe. Pi meno, i kare mukene pe watwero ngeyo tyen lok ma omiyo Jehovah oye ni gin moni otimme nyo niang kit ma en bikonyowa kwede. (Jab. 37:5) Baibul oporo ngec manok ma watye kwede i kom “tic pa Lubanga” ki kit ma latin dongo kwede i i minne. Kadi wa i kare-ni, lucayan bene pe giniang maber kit ma latin dongo kwede i i minne. I yo acel-lu, wan bene pe wangeyo kwicikwici kit ma Jehovah timo kwede ki jamine.

9. Ariya ango ma watwero kemme kwede pien pe wangeyo gin ma Jehovah bitimo?

⁹ Pien pe wangeyo gin ma Jehovah bitimo me konyowa, twero bedo tek me moko tam mukene. Watwero nongo ni tek me jalo jami mogo wek wamed cawawa i tic me pwony, nyo dak i kabedo ma can lutit kwena tye iye. Watwero tamo ni warwenyo cwak pa Jehovah woko ka ce yubwa mo me cwiny pe ocobbe kit ma wabyeko kwede. Watwero bene tamo ni Jehovah pe tye ka konyowa ka ce pe watye ka nongo lutino kwan me Baibul. Ariya ma wakemme kwede i tic me gero odiwa me woro bene twero weko wawinyo calo warwenyo cwak pa Jehovah woko.

10. Kit mogo mabeco ango ma watwero dongone pien pe wangeyo gin ma Jehovah bitimone me konyowa?

¹⁰ Pien pe wangeyo gin ma Jehovah bitimone kikome, man miniwa kare me dongo cwiny me mwolo. Man bene konyowa me niang ni Jehovah aye ma ngeyo gin maber loyo piwa. (Ic. 55:​8, 9) Wapwonnye bene me geno Jehovah ki cwinywa ducu pien nongo wangeyo ni Jehovah bikonyowa i yo maber loyo. Pi meno, ka watye ka nongo adwogi mabeco i ticwa me pwony, nyo i ticwa me gedo, wamiyo pak ki deyo bot Jehovah. (Jab. 127:1; 1 Kor. 3:7) Dok ka gin mo marac otimme ma onongo pe wabyeko, omyero wiwa opo ni Jehovah tye ka nenone dok bitimo gin mo me yubone. Niang lok man bikonyowa me medde ki bedo ki kuc i kwowa ka watiyo pi Jehovah. (Ic. 26:12) Omyero wamedde ki timo gin ma watwero kun wageno ni Jehovah bikonyowa. En pe bitimo meno i yo me tango kit ma otimo kwede i kare macon, ento en biminiwa tira ma omyero walubi me konywa.—Tic 16:​6-10.

11. Jami ma pigi tego mene ma wangeyo?

¹¹ Labongo akalakala mo, wangeyo ni Jehovah maro dano, ngolo kop atir, dok ryek adada. Wangeyo bene ni en kare ducu tye ki pwoc pi gin ma watimo pire kacel ki pi utmegiwa. Dok wangeyo ni Jehovah kare ducu miyo mot bot jo ma gitye lugen bote.—Ibru 11:6.

PE WANGEYO GIN MA BITIMME DIKI

12. Ma lubbe ki Yakobo 4:​13, 14, gin ango ma pe wangeyo?

¹² Kwan Yakobo 4:​13, 14. Lok ada tye ni, wan ducu pe wangeyo gin ma bitimme i kwowa diki. I lobo man marac-ci, “kare kacel ki jami ma gitimme atura” pe watwero gengone. (Latit. 9:​11, NWT) Macalo adwogine, pe watwero ngeyo ka pulanwa bicobbe kit ma wagoyo kwede, nyo ka gwok wabibedo kwo me cobone.

13. Jami ango ma twero weko warwenyo yomcwinywa woko?

¹³ Jami maraco ma pe wabyeko twero timme i komwa atura. Pekki magi twero weko wabedo ki par kacel ki keccwiny. Dok ka genwa pe ocobbe kit ma wabyeko kwede, cwinywa twero tur adada. (Car. 13:12) Jami ma kit magi twero weko wabedo ki par kare ducu pi gin marac mukene ma twero timme. Macalo adwogine, watwero nongo ni tek adada me ciro pekkiwa dok warwenyo yomcwinywa woko.

14. Gin ango ma omyero wange dok watim wek wabed ki yomcwiny i kwo? (Nen bene cal.)

¹⁴ Ka waciro pekkiwa labongo ilo cingwa, wanyuto ni watiyo pi Wonwa me polo pien wamare. Jami mutimme ma kicoyogi i Baibul nyutiwa ni pe omyero watam ni Jehovah bigengo pekki ducu ki poto i komwa. Dok omyero wagwokke ki kodi tam ni jami ducu ma timme i kwowa nongo Lubanga dong oyubo woko con. Watwero medde ki bedo ki yomcwiny kadi bed pe wangeyo jami mogo ma bitimme i anyim. Jehovah ngeyo ni yomcwinywa pe jenge i kom ngeyo jami ma bitimme i anyim, ento jenge i kom yenyo tira ki bote kacel ki ketone i tic i kwowa. (Jer. 10:23) Ka wayenyo tira ki bot Jehovah ma peya wamoko tam, nongo watye ka waco ni, ka “[Jehovah] oye, wabibedo kwo, wabitimo man nyo maca.”—Yak. 4:15.

15. Gin ango ma wangeyo ni bitimme i anyim?

¹⁵ Wan pe wangeyo gin ma twero timme i kwowa diki, ento wangeyo ni Jehovah ocikke me miniwa kwo ma pe tum—i polo nyo i lobo. Wangeyo ni Jehovah pe loko lok goba dok pe tye gin mo ma twero genge ki cobo cikkene. (Tito 1:2) En keken aye ma twero ‘nyuto kit ma gin moni bitimme kwede ki kit ma bigik kwede bene.’ Jami ducu ma Jehovah ociko ni bitimme i kare me Baibul gucobbe kakare, dok cikkene pi anyim bene bicobbe kore ki kore. (Ic. 46:10) Wangeyo ni pe tye gin mo keken ma twero gengo Jehovah ki marowa. (Rom. 8:​35-39) En biminiwa ryeko, cukocwiny, kacel ki teko ma wamito me ciro peko mo keken ma wakemme kwede. Watwero bedo ki gen ni Jehovah bikonyowa dok biminiwa mot.—Jer. 17:​7, 8.

TEK ME NIANG KIT MA JEHOVAH NGEYOWA KWEDE

16. Ngec ango ma Jehovah tye kwede i komwa, dok man weko iwinyo nining? (Jabuli 139:​1-6)

¹⁶ Kwan Jabuli 139:​1-6. Lacwecwa ngeyo jami ducu madok i komwa. En ngeyo jami ducu ma otimme i kwowa ma oweko watamo dok watimo jami i yo moni. Jehovah winyo lok ducu ma wawaco dok ngeyo jami ma tye i cwinywa. En bene ngeyo ticwa ducu kacel ki tyen lok ma oweko watimo gin meno. Kabaka Daudi owaco ni Jehovah tye ki teko dok kare ducu tye atera me konyowa. Ngeyo ni Lubanga ma Malo Twal ma ocweyo jami ducu paro piri, miyo iwinyo nining? In bene nen calo iwinyo calo Daudi ma owaco ni: ‘Ngec ma itye kwede tye me aura mada ki tung bota; tye malo tutwal ma pe atwero niang iye.’—Jab. 139:6.

17. Pingo i kare mogo watwero nongo ni tek me ye ni Jehovah ngeyowa maber?

¹⁷ Jami mogo ma otimme i pacowa, tekwaro, nyo i diniwa macon, twero weko bedo tek me neno Jehovah calo wego ma lamar ma paro piwa. Nyo watwero tamo ni Jehovah tye bor kwedwa dok pe mitowa macalo adwogi me bal ma watimo i kare ma okato angec. Kadi wa Daudi bene owinyo kit meno i kare mogo. (Jab. 38:​18, 21) Ngat mo ma bene tye ka tute matek me loko kwone wek eyom cwiny Jehovah twero pennye kekene ni, ‘Ka ada Lubanga niang an maber, ci pingo en mito ni akwer timo jami ma anongo ni timone yot dok mit?’

18. Pingo pire tek ni waye ni Jehovah ngeyowa maber ma loyo kit ma wan wangene kwede kekenwa? (Nen bene cal.)

¹⁸ Omyero waniang ni Jehovah ngeyowa maber ma loyo kit ma wangene kwede kekenwa, dok en neno kitwa mabeco ma wan pe waneno. Kadi bed en neno gorowa, ento en bene neno tutewa me bedo jo mabeco, dok man weko en marowa matek. (Rom. 7:15) Ka waniang ni Jehovah kare ducu keto cwinye i kom kodi dano maber ma watwero doko i anyim, man biminiwa kero ma wamito me medde ki tic pire ki gen dok ki yomcwiny.

19. Gin ango ma wangeyo labongo akalakala mo i kom Jehovah?

¹⁹ Wangeyo ni Jehovah aye mar. Meno obedo lok ada. (1 Jon 4:8) Wangeyo ni jami ducu ma en wacciwa ni watim nyo pe watim, tye pi mar ma en marowa kwede dok mito ni wabed ki kwo maber. Wangeyo bene ni Jehovah mito ni wanong kwo ma pe tum. Pi meno, en ominiwa mic me ginkok ma oweko twere piwa me nongo kwo ma pe tum. Mic me ginkok cuko cwinywa ni watwero tic pi Jehovah i yo ma yomo cwinye kadi bed watye ki roc. (Rom. 7:​24, 25) Medo i kom meno, “wangeyo ni Lubanga dit kato cwinywa woko, dok ngeyo lok ducu.” (1 Jon 3:​19, 20) Jehovah neno jami ducu ma timme i kwowa, dok en mito ni wabed ki gen ni watwero timo mitine.

20. Gin ango ma bikonyowa pe me bedo ki par mapol?

²⁰ Jehovah pe okano ngec mo keken ki botwa ma mitte ni wange. Dong pe mitte ni wabed ki par mapol pi gin ma pe wangeyo. Me ka meno, omyero waket cwinywa i kom jami ma wangeyo dok ma pigi tego. Ka watimo meno, wanyuto ni wabedo jo mamwol dok wageno Jehovah, “Ngat ma tye ki ngec madwong.” (Yubu 36:​4, NWT) Kadi bed i kare-ni pe waniang jami mogo, wangeyo ni Jehovah bimedde ki pwonyowa jami manyen. Dok watye ki yomcwiny pien wabimedde ameda ki pwonyo jami manyen i kom Jehovah pi naka.—Latit. 3:11.