PWONY ME ANYAMA ME 34
WER 3 Kerowa, Genwa, Tekcwinywa
Bed ki Tekcwiny ni Jehovah Otyeko Timmi Kica
“Iweko balla ducu.”—JAB. 32:5.
GIN MA WABIPWONYO
Wabinyamo wang ginacoya mogo ma cuko cwinywa ni Jehovah timiwa kica ka wangut i kom balwa, ki dok pingo pire tek me ye kica pa Jehovah.
1-2. Gin ango ma Jehovah timo ka wangut i kom balwa? (Nen bene cal ma i .)
CWINY Kabaka Daudi obedo ka pide matek pi bal mogo ma en otimogi. (Jab. 40:12; 51:3; lok me ka wiye) Kadi bed kit meno, en ongut ki cwinye ducu dok otimo alokaloka, ci Jehovah otimme kica. (2 Cam. 12:13) Macalo adwogine, Daudi obedo ki yomcwiny madit i kare ma oniang ni Jehovah otyeko timme kica.—Jab. 32:1.
2 Calo Daudi, wan bene watwero bedo ki yomcwiny ka waniang ni Jehovah otyeko timiwa kica pi balwa. Kadi bed watimo bal madit, kweyo cwinywa mada me niang ni Jehovah bitimiwa kica ka wangut i kom balwa, walego bote pi kicane, waloko ki luelda, dok watimo jami ducu ma watwero pe me nwoyo bal meno! (Car. 28:13; Tic 26:20; 1 Jon 1:9) Dok tye me cuko cwiny adada me ngeyo ni ka Jehovah dong otimiwa kica, en pe dok biminiwa pwod pi bal acel-lu!—Ejek. 33:16.
Kabaka Daudi owero wer mapol ma kicoyo i jabuli ma loko i kom kica pa Jehovah (Nen bene paragraf 1-2)
3-4. Laminwa mo acel onongo winyo nining kadi wa i nge nongo batija, dok gin ango ma wabinyamo i pwony man?
3 Ento i kare mukene, watwero bedo ki gung cwiny ka ce Jehovah dong otimiwa kica. Meno aye kit ma laminwa Jennifer bene owinyo kwede. Lunyodone gupwonye ki lok i kom Jehovah cakke ma onongo pud tidi. Ento i kare ma en odoko bulu, en odonyo i tim maraco kun kano tim meno woko ki bot lunyodone. I nge mwaki mapol, en otimo alokaloka i kwone, odyere bot Jehovah, ci onongo batija. En owaco ni: “I kare mukato angec, kwona onongo opong ki tim tarwang ki mero, onongo ager adada, dok tiyo cente aye onongo gin ma pire tek loyo bota. Onongo angeyo ni Baibul waco ni Jehovah timiwa kica kun tiyo ki ginkok pa Yecu Kricito. Ento kadi bed angut i kom balla dok alego Jehovah ni otimma kica, onongo pud pe aye ni en dong otyeko timma kica.”
4 Tika in bene i kare mukene inongo ni tek me ye ni Jehovah dong otyeko timmi kica pi bal ma itimo i kare mukato angec? Ka tye kit meno, ci wii myero opo i kom kit ma Daudi owinyo kwede i kom kica pa Jehovah. En obedo ki tekcwiny ni Jehovah dong otyeko timme kica woko. Jehovah mito ni in bene iwiny kit meno. I pwony man, wabinyamo pingo mitte ni waye ni Jehovah otyeko timiwa kica, ki dong gin ma twero konyowa me ye meno.
PINGO OMYERO WAYE NI JEHOVAH DONG OTYEKO TIMIWA KICA?
5. Gin ango ma Catan mito ni waye iye? Mi labol.
5 Ka waye ni Jehovah marowa dok otyeko timiwa kica, ci pe wabipoto i owic pa Catan. Wii opo ni Catan bitimo gin mo keken me jukowa ki tic pi Jehovah. Me labolle, Catan twero temme me bwolowa wek waye ni Jehovah pe bitimiwa kica pi balwa. Tam kong gin mutimme i kom laco ma i kacokke me Korint macon ma otimo tim kwele ci kikwanye woko ki i kacokke. (1 Kor. 5:1, 5, 13) Lacen en ongut. Ento Catan onongo mito ni lwak me kacokke gukwer timo kica ki laco man dok bene pe gujole i kacokke. Medo i kom meno, ka jo me kacokke gukwero timme kica, laco man onongo twero tamo ni Jehovah bene pe bitimme kica. Onongo en twero bedo ki cwercwiny madit adada ma romo weko en juko tic pi Jehovah woko. Catan peya oloko yubbe kacel ki dirone. Ento “wan pe wakwiya tamme.”—2 Kor. 2:5-11.
6. Gin ango ma twero konyowa ka ce wawinyo calo Jehovah peya otimiwa kica pi bal ma watimo i kare mukato angec?
6 Ka waye ni Jehovah dong otyeko timiwa kica, ci cwinywa pe bibedo ka pidowa. Ka watimo bal, cwinywa cwer pi gin ma watimo. (Jab. 51:17) Meno obedo gin maber. Ka cwinywa pidowa, man twero weko waloko kwowa ci wacako timo jami mabeco. (2 Kor. 7:10, 11) Ento, ka cwinywa omedde ki pidowa kadi wa i nge ngut i kom balwa, cwinywa twero tur ma weko wajuko tic pi Jehovah woko. Me ka meno, ka waye ni Jehovah otyeko timiwa kica, ci wabibedo ma cwinywa dong pe pidowa. Dok wacako bedo ki yomcwiny kun wamedde ki tic pi Jehovah ki gen ni cwinye yom i komwa. Meno aye gin ma Jehovah mito piwa. (Kol. 1:10, 11; 2 Tem. 1:3) Dong ngo ma twero konyowa me bedo ki gen ni Jehovah otyeko timiwa kica?
NGO MA TWERO KONYOWA ME BEDO KI GEN NI JEHOVAH OTYEKO TIMIWA KICA?
7-8. Jehovah otitte nining bot Moses, dok tekcwiny ango ma lok meno miniwa? (Nia 34:6, 7)
7 Tam kong i kom kit ma Jehovah oloko kwede i kome kekene. Me labolle, i kare ma Moses onongo mito niang i kom kit pa Jehovah, wii po i kom gin ma Jehovah owacce?a (Kwan Nia 34:6, 7.) Ki i kom kit ducu mamwonya ma onongo Jehovah twero lok iye, en ocako ki tito bot Moses ni En ebedo “Lubanga ma lakica dok maro dano.” Dong itamo ni ka ngat ma maro Jehovah otimo bal ci ongut woko, tika Jehovah bikwero timo kica ki ngat meno? Jehovah pe twero timme kit meno matwal! Ka Jehovah pe otimo kica ki ngat meno, nongo en cwinye col dok pe lakica.
8 Watwero bedo ki tekcwiny ni ka Jehovah owaco ni en lakica, nongo en tye ka waco lok ada. (Jab. 31:5) Pi meno, watwero geno gin ma Jehovah waco. Ka inongo ni tek me ye ni Jehovah dong otyeko timmi kica, ci pennye kekeni ni: ‘Tika an aye ni Jehovah lakica dok weko bal pa ngat mo keken ma ongut ki cwinye ducu?’ Ka iye meno, ci itwero bedo ki tekcwiny ni Jehovah dong otimmi kica woko.
9. Jabuli 32:5 pwonyowa gin ango madok i kom kit ma Jehovah timiwa kwede kica?
9 Tam i kom gin ma Jehovah oweko luco Baibul gucoyo i kom kicane. Me labolle, Daudi otito kit ma Jehovah timo kwede kica. (Kwan Jabuli 32:5.) Daudi owaco ni: “Iweko balla ducu.” Nyig lok me leb Ibru ma kigonyo ni “weko bal” i tyeng magi gonnye atir atir ni “kwanyone woko” nyo “tingone.” Dong i kare ma Jehovah otimo kica ki Daudi, Daudi owinyo calo Jehovah otingo yec mo mapek ki i wi gwoke. Daudi onongo twero bedo ki yomcwiny pien ngeyo ni Jehovah otyeko weko balle woko. (Jab. 32:2-4) Wan bene watwero winyo yomcwiny macalo meno. Ka wangut i kom balwa ki cwinywa ducu, pe dok mitte ni wamedde ki tingo yec mapek ma en aye cwiny ma pidowa. Me ka meno, watwero bedo ki yomcwiny ni Jehovah otyeko tingo yec mapek meno woko.
10-11. Lok man ni en ‘tye atera me weko bal’ tittiwa gin ango i kom Jehovah? (Jabuli 86:5)
10 Kwan Jabuli 86:5. Daudi owaco ni Jehovah tye atera me timo kica. Man tyen lokke ni Jehovah pe keco oyot ka watimo bal, dok kare ducu en bedo ki miti me timo kica ki jo ma gungut i kom balgi. Pingo Jehovah tye kit meno? Bute ma lubo me tyeng meno waco ni: “Mar meri ma pe lokke dwong pi jo ducu ma kok boti.” Kit ma waneno kwede i pwony mukato-ni, Jehovah ocikke me nyuto mar mere ma pe lokke bot jo ma gimare. Dong ka ce ngat mo obalo ci ongut, Jehovah bimedde ki nyutte mar mere ma pe lokke dok “biweko balle woko ducu.” (Ic. 55:7) Ka inongo ni tek me ye ni Lubanga otyeko timmi kica pi bal ma itimo i kare mukato, ci iromo pennye kekeni ni: ‘Tika aye ni Jehovah tye atera me weko bal pa jo ducu ma gungut dok gilego bote pi kicane? Ka aye lok meno, ci atwero bedo ki tekcwiny ni Jehovah bene oweko balla i kare ma alege pi kicane.’
11 Baibul bene wacciwa ni Jehovah niang kit ma ecweyowa kwede dok ni watye ki roc. Meno twero cuko cwinywa. (Jab. 139:1, 2) Kong dong wanenu gin ma Daudi owaco i jabuli mukene ma bene twero konyowa me ye ni Jehovah mito timiwa kica.
WII PE OWIL I KOM GIN MA WI JEHOVAH PO IYE
12-13. Ma lubbe ki Jabuli 103:14, gin ango ma Jehovah wiye po iye, dok man tugo cwinye me timo gin ango?
12 Kwan Jabuli 103:14. Daudi otito tyen lok acel mumiyo Jehovah tye atera me timo kica ki lubalo ma gungut. En owaco ni Jehovah wiye “po ni wan apwa mamwa,” ma meno tyen lokke ni en kare ducu ngeyo ni wan wabedo jo ma tye ki roc. Kong dong wanyamu matut lok pa Daudi meno.
13 Daudi owaco ni Jehovah “ngeyo kit gin ma ecweyowa kwede.” Jehovah ocweyo Adam “ki apwa me ngom.” Dok en ngeyo gin ma wan dano wamito. Me labolle, mitte ni wacam, wanin, dok waywa yamo wek wamedde ki bedo kwo. Kadi wa dano ma gipe ki roc bene gimito jami magi. (Acak. 2:7) Ento pien Adam ki Kawa gubalo, lok man ni “wan apwa” twero bene niange ni watye ki goro pi bal ma walako. Dong Jehovah pe ngeyo mere angeya ni watye ki roc; ento Daudi otito ni wi Jehovah “po ni wan apwa mamwa.” Nyig lok me leb Ibru ma kitiyo kwede kany niange ni Jehovah terowa i yo me kica. Watwero dolo te lok pa Daudi kit man ni: Jehovah niang ni i kare mogo wabitimo bal, dok ka oneno ni wangut ki cwinywa ducu, en nyutiwa kica ki weko balwa.—Jab. 78:38, 39.
14. (a) Gin ango mukene ma Daudi owaco ma lubbe ki kit ma Jehovah timiwa kwede kica? (Jabuli 103:12) (b) Pwony ango ma wanongo ki i kit ma Jehovah otimo kwede kica bot Daudi? (Nen bok ma wiye tye ni “Kit ma Jehovah Timiwa Kwede Kica dok Wiye Wil Woko i kom Balwa.”)
14 Gin ango mukene ma watwero pwonyo ki i Jabuli 103 i kom kit ma Jehovah timiwa kwede kica? (Kwan Jabuli 103:12.) Daudi otito ni ka Jehovah otimiwa kica, En bayo balwa ka mabor “kit macalo tung wokceng tye bor kwede ki tung potoceng-ngi.” Tung wokceng aye kabedo mabor loyo ki tung kupoto ceng; kabedo aryo magi pe gitwero rwatte matwal. Man tittiwa gin ango i kom bal ma Jehovah otimo iye kica? Buk mo acel ma oloko i kom tyeng man otito ni, Lubanga bayo balwa ka mabor adada ki botwa, ma bedo calo ngwec gin mo ma orwenyo woko kwicikwici. Pi meno, watwero bedo ki tekcwiny ni Jehovah pe dok bitamo pi bal meno nyo poyo wiwa pire matwal. I kare mukene, ngwec dek nyo ngwec gin mukene twero poyo wiwa i kom gin mo mutimme i kare mukato angec. Ento ka Jehovah otimiwa kica pi bal moni, nongo tye calo ngwec bal meno dong orwenyo woko matwal, dok wiye pe bipo iye wek ominiwa pwod pire.—Ejek. 18:21, 22; Tic 3:19.
15. Gin ango ma watwero timone ka cwinywa pud pidowa pi bal ma watimo i kare mukato angec?
15 Lok pa Daudi ma nonge i Jabuli 103 konyowa nining me ye ni Jehovah otyeko timiwa kica? Tam kong kit ma Jehovah winyo kwede. En wiye po ni wan watye ki roc. Dok en timo kica bot jo ducu ma cwinygi cwer pi balgi ci gitimo alokaloka. Meno aye gin ma in bene dong itimo. Wii bene myero opo ni Jehovah oyero pe me tamo pi balli nyo poyo wii i kom bal ma en dong otimo iye kica. Pi meno, en pe dok bikok i komi nyo mini pwod pi bal meno. Jehovah pe keto cwinye i kom bal ma itimo i kare mukato angec, dok in bene omyero wii pe obed ka po i kom bal macon. (Jab. 130:3) Ka waye ni Jehovah otyeko timiwa kica, ci cwinywa pe bimedde ki pidowa dok wabitiyo pi Jehovah ki yomcwiny.
16. Mi labol ma nyuto adwogi marac ma bino ka wabedo ka tamo pi jami maraco ma watimo con. (Nen bene cal.)
16 Tam kong i kom lapor man. Ka ngat mo tye ka dwoyo mutoka, en twero neno maraya ma nyuto gin ma tye ka bino ki i ngeye. En twero timo man kicel kicel, ento ka en tiko neno maraya meno kare ducu, ci twero keto kwone ka mading. Wek en odwo mutoka labongo nongo awano, omyero en oket cwinye ka neno yo ma i nyime. I yo acel-lu, porre i cawa mukene me tamo pi bal ma watimo. Meno twero konyowa pe me nwoyo bal magi. Ento ka waketo cwinywa tutwal i kom bal ma dong Jehovah otimo iye kica, waromo rwenyo yomcwinywa dok pe wabimedde ki tic pire i yo maber loyo. Me ka meno, wamedde wunu ki ciko wangwa i yo ma tye i nyimwa. Watye i yo ma tero dano i lobo manyen, ka ma dano “pe dong gibipo pi jami [maraco] macon.”—Ic. 65:17; Car. 4:25.
Kit macalo ladwo mutoka keto tamme i kom yo ma i nyime ento pe maraya ma nyuto gin ma i ngeye, wan bene myero waket tamwa i kom mot ma tye anyim ento pe bal ma watimo con (Nen paragraf 16)
MEDDE KI JINGO GENNI NI JEHOVAH OTYEKO TIMMI KICA
17. Pingo omyero wabed ki tekcwiny ni Jehovah marowa dok kare ducu tye atera me timiwa kica?
17 Mitte ni wabed ki tekcwiny ni Jehovah marowa dok kare ducu tye atera me timiwa kica. (1 Jon 3:19) Pingo? Pien Catan bimedde ki tutene wek waye ni Jehovah pe marowa dok pe bitimiwa kica. Magi aye obedo yo ma Catan tiyo kwede me jukowa ki tic pi Jehovah. Dok ka wawoto ki nyikke cok ki agikki me lobo-ni, Catan bimedde ki tute matek, pien nongo ngeyo ni edong ki kare manok keken. (Yabo 12:12) Ento omyero walweny matek ki Catan dok wamedde ki tic pi Jehovah ki gen!
18. Gin ango ma itwero timone wek ibed ki tekcwiny ni Jehovah mari dok kare ducu tye atera me timmi kica?
18 Me jingo tekcwiny ma itye kwede ni Jehovah mari, tem keto i tic tam ma kimiyogi i pwony mukato-ni. Me jingo genni ni Jehovah tye atera me timmi kica, tam i kom kit ma Jehovah oloko kwede i kome kekene. Kwany kare me tam matut i kom gin ma Baibul waco ma lubbe ki kica pa Jehovah. Wii pe owil ni kare ducu Jehovah ngeyo ni itye ki roc dok biteri i yo me kica. Dok wii opo ni ka Jehovah otimiwa kica, wiye pe po i kom balwa. Pi meno, itwero bedo ki yomcwiny pien itye ki gen ni en nyutti kica, dok calo Daudi, itwero waco ni, “Apwoyi matek, Jehovah, pien in ‘iweko balla ducu’!”—Jab. 32:5.
WER 1 Kit pa Jehovah
a Nen pwony ma wiye tye ni “Jehovah Tye Atera me Timo Kica” i Wi Lubele me Juni, 2022, para. 4-7