Lapeny pa Lukwan Bukkewa
‘Tam’ ango ma Jehovah biketone i cwiny gamente ducu me lobo man macok cok-ki?
Ma lubbe ki cakke pa twon can madit atika-ni, Niyabo 17:16, 17 waco ni: “Dong tung lee apar ma ineno ca, gin kacel ki lee gibikwero dako-nu ma lakwele-ni woko; gibitenye ata kun giweke dong munero, gibicamo ringo kome ci giwango woko ki mac. Pien Lubanga aye ma oketo mit man i cwinygi, wek gucob tamme kun gibedo ki cwiny acel, ka wek dong gumi twerogi bot lee ca.” I kare mukato angec, bukkewa onongo tito ni ‘tam’ ma Jehovah biketo i cwiny gamente ducu obedo me jwero dini goba.
Ento, mitte ni walok niangowa. ‘Tam’ ma Jehovah biketo i cwiny gamente ducu bibedo me ‘miyo twerogi bot lee ca.’ Me niang kit ma lok man bicobbe kwede, wabigamo lapeny magi.
Angagi ma kitye ka lok i komgi i lok pa lanebi man? ‘Dako ma lakwele-ni’ bene kilwonge ni “Babilon Madit”; en cung pi dini goba ducu ma i wi lobo-ni. ‘Lee makwar-ri’ cung pi dul me United Nations. Kicako dul man i mwaka 1919 ki miti me gwoko kuc i wi lobo ducu dok onongo con kilwongo ni League of Nations. (Yabo 17:3-5) ‘Tung lee apar-ri’ cung pi gamente ducu ma cwako lee makwar-ri.
Wat ango ma tye i kin dako ma lakwele-ni kacel ki lee makwar-ri? Dako ma lakwele-ni “obedo” i wi lee makwar-ri, ma nyuto ni en cwako lee makwar-ri dok mito ni lee man otim mitine.
Gin ango ma bitimme i kom dako man ma lakwele-ni? Lee makwar-ri kacel ki tung lee apar ma gimine cwak-ki, “gibikwero dako-nu ma lakwele-ni woko.” Gibikwanyo lonyone woko ducu dok gibinyuto bot dano ducu kit ma dako meno rac kwede. I nge meno, gibijwero dako meno woko, dok meno aye gin ma Jehovah owaco ni bitimme kikome. (Yabo 17:1; 18:8) Meno aye bibedo agikki pa dini goba ducu. Ento, ma peya gin man otimme, Jehovah biweko gamente ducu gitimo gin mo ma naka peya otimme.
Gin ango ma Jehovah biweko gamente ducu gitimo? En biketo “tamme” i cwiny tung lee apar-ri ni omyero ‘gumi twerogi ki ditogi woko bot lee makwar ca’—ma en aye dul me United Nations. (Yabo 17:13) Man tyen lokke ni, pe gamente aye gibimoko tamgi pigi kengi me miyo twerogi ki ditogi bot lee makwar-ri. Lok pa lanebi man nyuto ni Lubanga kikome aye biweko gitimo meno. (Car. 21:1; por ki Icaya 44:28.) Tika alokaloka man bitimme motmot? Pe tye kit meno! Alokaloka man bitimme atura. Ci lee man ma dong kimine twero-ni bijwero dini goba ducu kwicikwici.
Dong gin ango ma omyero wabed ki gen ni bitimme i anyim? Pe omyero wayeny lok angeya ma nyuto ni lobe dong gucako miyo cwakgi motmot bot dul me United Nations. Gin ma omyero wabed ki gen iye aye ni: Jehovah biweko gamente ducu me lobo man gimiyo twerogi atura bot dul me United Nations. Ka gin man dong otimme, ci omyero wange ni twon can madit atika-ni dong cok cakke. Ka wawoto ki kuro kare meno, omyero “wabed ka neno piny kun wagwokke” pien alokaloka bitimme atura macok cok-ki!—1 Tec. 5:6