Lapeny pa Lukwan Bukewa

Lakwena Paulo ocoyo ni Jehovah “pe biye ni gibitwu matek makato ma wuromo cirone.” (1 Jo Korint 10:13) Tika man te lokke ni Jehovah moko jami ducu ma bitimme i komwa con jami ma watwero cirone ci dong yero atematema ma wabikemme kwede?

Ka man tye ada, ci tam kong i kom kit ma bigudowa kwede. Me labolle, latin pa omego mo odene kene. Cwiny wonne ocwer adada. En obedo ka tam ka ce Jehovah onongo ongeyo pi peko meno con ci omoko ni en gin ki dakone gitwero cirone. I lobo man, jo mapol i kinwa gibikemme ki can. Ci dong tika myero watam ni Jehovah doro jami ducu ma timme i kwowa?

Ka wangiyo matut lok ma i 1 Jo Korint 10:13, wabiniang ni Baibul pe cwako tam man ni Jehovah ngeyo atematema ma watwero cirone ci dong moko mene ma wabikato ki iye. Pingo wawaco kuman? Kong dong wanyamo tyen lok angwen.

Me acel, Jehovah oweko dano gitye agonya, gitwero moko tam mo keken ma igi mito. En mito ni wamok tamwa piwa kenwa. (Nwoyo Cik 30:19, 20; Yocwa 24:15) Ka wayero me moko tam ma yomo cwiny Jehovah, ci watwero jenge i kome pi nongo telane. (Carolok 16:9) Ento ka wamoko tam marac, ci wabirego ki adwogine i ngewa. (Jo Galatia 6:7) Pi meno, ka Jehovah yero atematema mene ma myero wakat ki iye, tika nongo en oweko watye agonya ada?

Me aryo, Jehovah pe gwokowa ki i kom ‘can ma poto atura.’ (Latitlok 9:11) Ngat mo twero kato ki i can malit adada pien nongo obedo ka ma rac i cawa marac bene. Yecu oloko i kom jo 18 ma guto i kare ma ot mo opoto i komgi. En owaco ka maleng ni Lubanga aye ma pe okelo to meno. (Luka 13:1-5) Pe pore me tam ni ma peya gin mo marac otimme nongo dong Lubanga omoko anga ma obito nyo ma obikwo.

Me adek, ngat acel acel myero ogwok gennene bot Jehovah. Catan owacci lutic pa Jehovah gitiyo bot Jehovah pi rwot ineka. Catan owacci pe wabigwoko gennewa bot Jehovah ka watye i atematema. (Yubu 1:9-11; 2:4; Niyabo 12:10) Ka Jehovah gwokowa ki i kom jami marac ducu ci twero nen calo lok pa Catan-ni tye ada.

Me angwen, Jehovah pe yero me ngeyo jami ducu ma bitimme i komwa i anyim. Ki lok ada, Jehovah twero ngeyo gin ma bitimme i anyim ka ce mito. (Icaya 46:10) Ento Baibul nyuto ni en pe yero me ngeyo jami ducu ma bitimme i anyim. (Acakki 18:20, 21; 22:12) Jehovah lamar dok kite atir, pi meno en mito ni wabed agonya me moko tamwa.​—Nwoyo Cik 32:4; 2 Jo Korint 3:17.

Ngo kono ma dong Paulo onongo tye ka wacone i kare ma oloko ni Jehovah “pe biye ni gibitwu matek makato ma wuromo cirone”? Ki kany, Paulo onongo tye ka tito gin ma Jehovah timo ka watye i atematema, ento pe ma pud peya wakato ki iye.a (Nen lok ma tye i tere piny.) Ka wajenge i kom Jehovah, ci en bikonyowa i kare ma watye i atematema mo keken. (Jabuli 55:22) Kombeddi dong wabinyamo tyen lok aryo muweko Paulo owaco lok man.

Tyen lok me acel tye ni atematema ma wakato ki iye “mako dano ducu.” Ka pud watye i te loc pa Catan ngene kene ni wabikato ki i kwo matek, nyo bene can malit adada. Ento ka wajenge i kom Jehovah, ci wabiciro atematema magi dok wabigwoko gennewa. (1 Petero 5:8, 9) I 1 Jo Korint cura 10, Paulo kong oloko i kom atematema mogo ma Luicrael gukato ki iye i tim. (1 Jo Korint 10:6-11) Jo ma gujenge i kom Jehovah guciro atematema meno. Ento Luicrael mogo pe gubedo luwiny bot Jehovah. Pe gugwoko gennegi pien pe gujenge i kome.

Tyen lok me aryo tye ni ‘Lubanga genne.’ Man te lokke ngo? Ka waneno kit ma Jehovah obedo ka gwoko kwede jone cakke wacon, waniang ni en konyo “jo ma gimare ki ma gimako lok ma en ociko ducu.” (Nwoyo Cik 7:9) Wapwonyo ni Jehovah gwoko cikkene kare ducu. (Yocwa 23:14) Watwero bedo labongo akalakala ni (1) Jehovah pe biye ni atematema odiwa ma pe watwero cirone, ki dok (2) en “bimiyowu yo ma myero wubwot kwede.”

I yo ma nining ma Jehovah ‘miyo yo bot jo ma gijenge i kome wek gubwot kwede’ ki i atematema? Ki lok ada, en twero kwanyo atematema woko. Ento wi opo ni, Paulo owaco ni Jehovah “bimiyowu yo ma myero wubwot kwede, wek wubed ki twero me ciro.” Pi meno, Jehovah pol kare weko wabedo ki kero me cirone wek wamedde ki bedo lugen bote. Kong dong wanyam yo mogo ma en timo man.

• Jehovah “kweyo cwinywa i can ducu ma walimo.” (2 Jo Korint 1:3, 4) En twero kweyo cwinywa, tamwa, ki kit ma wawinyo kwede kun tiyo ki Baibul, cwiny mere maleng, ki dong lagwok ot ma lagen.​—Matayo 24:45; Jon 14:16; Jo Roma 15:4.

• Jehovah twero tic ki cwiny mere maleng me telowa. (Jon 14:26) Cwiny maleng twero konyowa me po i kom wang Baibul mogo kacel ki cik ma iye lac me Baibul ma twero konyowa me moko tam me ryeko.

• Jehovah twero tic ki lumalaikane me konyowa.​—Jo Ibru 1:14.

• Jehovah twero tic ki utmegiwa me konyowa. Gitwero jingo cwinywa i lokgi kacel ki ticgi.​—Jo Kolocai 4:11.

Pi meno, ngo ma dong wapwonyo ki i lok pa Paulo ma kicoyo i 1 Jo Korint 10:13? Jehovah pe yero atematema mene ma myero wakat ki iye. Ento watwero bedo ki gen ni ka wajenge i kom Jehovah, watwero ciro atematema mo keken. Wangeyo ni Jehovah wang ma ominiwa kero me cirone wek wamedde ki bedo lugen bote.