Yub pa Jehovah Bicobbe!

1, 2. (a) Gin ango ma Jehovah onyuto botwa? (b) Cikke ango ma wanongo i Icaya 46:10, 11 ki 55:11?

LOK me acakki i Baibul miyo ngec mo matut dok ma pire tek ni: “I acakki piny Lubanga oketo polo ki lobo.” (Acakki 1:1) Pud waneno jami manok adada ki i kom jami mapol ma Lubanga ocweyo i lobo kany, dok watye ki ngec manok adada i kom cwec pa Lubanga calo dan polo, dero, ki dong teko ma ywayo jami dwoko piny. (Latitlok 3:11) Ento Jehovah otito yub ma etye kwede pi lobo ki pi dano. En ocweyo dano i calle dok onongo mito ni gunong mit pa kwo i lobo. (Acakki 1:26) Gin onongo gibibedo lutinone dok en bibedo Wongi.

² Cakke i Acakki cura adek, wapwonyo ni kijemo i kom yub pa Jehovah. (Acakki 3:1-7) Ento kadi bed kit meno, pe tye peko mo keken ma Jehovah pe twero cobone. Pe tye ngat mo keken ma twero genge ki timo gin ma iye mito. (Icaya 46:10, 11; 55:11) Watwero bedo ki tekcwiny ni yub pa Jehovah pi lobo bicobo i karene kikome!

3. (a) Pwony ango ma pire tek ma twero konyowa me niang kwena ma tye i Baibul? (b) Pingo wabinyamo pwony man kombeddi-ni? (c) Lapeny ango ma wabinyamogi?

³ Labongo akalakala, wangeyo yub pa Lubanga pi lobo ki pi dano, ki bene gin ma Yecu bitimone me cobo yub meno. Lok ada man me Baibul-li pire tek adada dok twero bedo ni obedo ngec me acel ma wapwonyo i kare ma wacako kwano Lok pa Lubanga. Wan dong watye ki miti me pwonyo jo mukene lok ada man ma pire tek-ki wek gin bene gunge. Watye ki kare mupore me timo meno i mwaka-ni ka nongo watye ka lwongo dano me bino i kwer me Nipo me to pa Kricito. (Luka 22:19, 20) Ka gubino i yub man ma pire tek-ki, gibipwonyo jami mapol madok i kom yub pa Lubanga. Man dong obedo kare maber me tam i kom lapeny ma watwero penyogi kwede wek otug cwinygi me bino i kwer man. I pwony man, wabinyamo lapeny adek: Yub ango ma Lubanga tye kwede pi lobo ki pi dano? Ngo marac mutimme? Ki dok pingo mic me ginkok pa Yecu tye macalo layab wek yub pa Lubanga ocobbe?

YUB PA LACWEC ONONGO TYE NINGO?

4. Ginacweya “ginyuto deyo pa Lubanga” nining?

⁴ Jehovah obedo Lacwec ma ladiro adada. Jami ducu ma en ocweyogi rwomgi lamal adada. (Acakki 1:31; Jeremia 10:12) Gin ango ma wapwonyo ma lubbe ki kit ma cwec nen mwonya kwede kun bene pe gunywene atata? Wapwonyo ni jami ducu ma Jehovah ocweyogi cakke ki i matidine oo kwede i madongone konygi tye. Medde i kom meno, ka itamo i kom nyig dul kom, nyo ineno latin lakerre, nyo kit ma ceng poto kwede i otyeno, iwinyo nining? Waneno jami magi nenogi mit adada pien Jehovah ocweyowa ki kero me niang gin ma nen mamwonya.​—Kwan Jabuli 19:1; 104:24.

5. Gin ango ma Jehovah otimo wek cwecce ducu gubed maber kacel ma pe gunywene?

⁵ Ki diro madit, Jehovah oketo wang coo pi ginaketa ducu. En oketo cik ma doro ginacweya, dok bene oketo cik ma lubbe ki kit me kwo pa dano. En oketo cik magi wek jami ducu gubed kacel maber. (Jabuli 19:7-9) Jami ducu ma i lobo-ni gitye ki ka ma myero gubed iye kacel ki ticgi. Me labolle, teko ma ywayo jami dwoko piny weko yamo bedo cok ki lobo, dok weko pii me nam ki kulu madongo gigik ka ma myero gugik iye. Labongo teko man, onongo pe twere me kwo i lobo. Wang coo ma Jehovah oketogi-ni weko ginaketa ducu gibedo ma pe gunywene ata. Man nyuto ni en tye ki yub pi lobo kacel ki pi dano. I ticwa me pwony, watwero konyo dano wek gunge Lacwec ma ocweyo jami mamwonya magi.​—Niyabo 4:11.

6, 7. Mot ango ma Jehovah omiyo bot Adam gin ki Kawa?

⁶ Yub pa Jehovah pi dano onongo tye ni dano gubed i lobo pi naka. (Acakki 1:28; Jabuli 37:29) En cinge yot, omiyo ki Adam gin ki Kawa mot mapol mamwonya adada. (Kwan Yakobo 1:17.) Jehovah ominigi mot me bedo agonya ki kero me niang gin moni, me mar, ki dok me bedo ki lirem. Lacwec oloko ki Adam kun titte kit me timo gin matir. Adam bene opwonyo kit me gwokke kene, ki dong gwoko lee ki ngom. (Acakki 2:15-17, 19, 20) Jehovah omiyo ki Adam gin ki Kawa kero me bilo, gudo, neno, winyo ki dong ngweyo jami mabeco ma en ocweyogi. Gin onongo gitwero nongo mit pa kwo i lobo kany. Adam gin ki Kawa onongo gitye ki tic mabeco mapol me atima. Onongo gibimedde ki pwonyo kacel ki niang i kom jami manyen kare ducu.

⁷ Gin ango mukene ma dok obedo but yub pa Lubanga? Jehovah omiyo bot Adam gin ki Kawa kero me nywalo lutino ma gipe ki roc. Lutinogi bene onongo gibinywalo lutino ma gipe ki roc wang ma lobo ducu opong. Jehovah onongo mito ni lunyodo gumar lutinogi kit ma en emaro kwede lutinone mukwongo ma onongo gipe ki roc-ci, Adam gin ki Kawa. En omiyo bot dano lobo kacel ki jami mamwonya ma iye ducu. Man onongo bibedo pacogi matwal dok ngat mo onongo pe bikwanyone ki botgi.​—Jabuli 115:16.

NGO MARAC MUTIMME?

8. Pingo Lubanga omiyo cik ma tye i Acakki 2:16, 17 bot Adam gin ki Kawa?

⁸ Jami pe otimme kit ma Jehovah onongo mito kwede. Ngo mutimme? Jehovah omiyo bot Adam gin ki Kawa cik mayot adada wek gunge ka ma kerogi me moko tam pigi kengi gik iye. En owaco ni: “Yadi ducu ma tye i poto, camgi macalo imito; ento yat me ngeyo gin maber ki marac pe icam, pien i nino ma ibicamo iye, en aye ibito iye bene.” (Acakki 2:16, 17) Niang cik meno onongo pe tek. Dok onongo lubone pe tek pien onongo tye jami mukene mamit mapol ata me acama i poto meno.

9, 10. (a) Goba ango ma Catan omoro i kom Jehovah? (b) Ngo ma Adam gin ki Kawa gumoko tamgi me timone? (Nen cal ma i pot karatac 3.)

⁹ Catan Larac-ci otiyo ki twol me bwolo Kawa wek otur cik pa Wonne, Jehovah. (Kwan Acakki 3:1-5; Niyabo 12:9) Catan okelo pyem i kom cik ma gengo lutino pa Lubanga me camo “yadi ducu ma tye i poto.” Bedo calo en onongo tye ka wacone ni: ‘Man nyuto ni pe dong wutwero timo gin ma cwinywu mito?’ Lacen, en owacce ni: “Pe wubito.” Meno onongo lok goba. Dok en obito Kawa ni pe mitte ni en owiny lok pa Lubanga. Catan owacci: “Lubanga ngeyo ni, ka wucamo, ci wangwu biyabbe woko,” Catan onongo tye ka wacone ni Jehovah pe mito ni gucam yat meno pien lworo ni biweko gidoko ryek ma kato. I agikkine, en ocikke i yo me goba ni: “Wubidoko calo Lubanga, miyo wungeyo gin maber ki gin marac.”

¹⁰ Onongo dong myero Adam gin ki Kawa gumok tamgi i kom ngo ma gibitimone. Tika gibiwinyo dog Lubanga, nyo kece gibiwinyo lok pa twol? Ki cwercwiny madit, gin gumoko tamgi me jemo i kom Lubanga. Gukwero Jehovah macalo Wongi ci guribbe ki Catan i jemone. Man oweko gudong kengi, labongo gwok pa Jehovah.​—Acakki 3:6-13.

11. Pingo Jehovah onongo pe twero jalo bal pa Adam gin ki Kawa-ni ajala?

¹¹ I kare ma Adam gin ki Kawa guturo cik pa Lubanga, gin gudoko luroc. Ki lok ada, gudoko lumone pa Lubanga pien en dag tim maraco. ‘Wange leng, pe romo neno gin marac.’ (Kabakuk 1:13) Ka onongo Jehovah pe otimo gin mo pi bal pa Adam gin ki Kawa, kono onongo kwo pa ginacweyane ducu tye ka mading. Onongo lumalaika kacel ki dano ducu gitwero bedo ki gung cwiny me ye lok pa Lubanga. Ento Jehovah lagen i yone ducu, en pe loko lokke. (Jabuli 119:142) Kadi bed ni Adam gin ki Kawa onongo gitye agonya, onongo pe gitwero gengo adwogi marac ma bibino pi jemogi i kom Jehovah. Ki lok ada, guto ci gudok i apwa ka ma kikwanyogi ki iye.​—Acakki 3:19.

12. Gin ango ma otimme i kom lutino pa Adam?

¹² I kare ma Adam gin ki Kawa gucamo nyig yat man, Jehovah onongo dong pe twero ye ni gumedde ki bedo jo me ode. En oryemogi woko ki i poto me Eden, dok onongo dong pe gitwero dok cen. (Acakki 3:23, 24) Jehovah oweko ni gukemme ki adwogi marac ma bibino pi tam ma gumoko-ni. (Kwan Nwoyo Cik 32:4, 5.) Macalo adwogine, onongo dong pe giromo lubo kit pa Jehovah labongo timo roc mo. Adam obalo anyim mamwonya adada pe pi en keken ento bene pi lutinone. En onongo dong twero miyo roc, bal ki to keken bot lutinone. (Jo Roma 5:12) Adam obalo gen ma onongo lutinone gibibedo kwede me kwo pi naka. Adam gin ki Kawa onongo pe giromo nywalo lutino ma gipe ki roc, ki lutinogi bene onongo pe gitwero nywalo lutino ma gipe ki roc. Nicakke i kare ma Catan oweko Adam gin ki Kawa gudoko lumone pa Lubanga, Larac-ci obedo ka tute me bito dano ducu wek gutim gin acel-li.​—Jon 8:44.

GINKOK WEKO WATWERO BEDO KI WAT MABER KI LUBANGA

13. Ngo ma Jehovah mito pi dano?

¹³ Jehovah onongo pud maro dano. Kadi bed ni Adam gin ki Kawa gukwere, en onongo pud mito ni dano gubed ki wat macok kwede. En onongo pe mito ni ngat mo i kingi oto. (2 Petero 3:9) Pi meno, Lubanga oketo yub cutcut pi dano wek dok gubed ki wat macok kwede. En onongo twero timo man nining labongo turo cikke? Kong wanenu.

14. (a) Ma lubbe ki Jon 3:16, gin ango ma Lubanga otimo me larowa ki i bal kacel ki to? (b) Lapeny ango ma watwero nywakone ki dano?

¹⁴ Kwan Jon 3:16. Dano mapol ma walwongogi i kwer me Nipo gingeyo tyeng man ki wigi. Ento ginkok pa Yecu weko kwo pi naka twere nining? Watye ki kare me konyo dano wek guniang lagam me lapeny man ka watye ka lwongogi me bino i Nipo, ka watye kwedgi i kwer meno, ki dok ka wadok ka limogi i ngeye. Ka guniang maber lok i kom ginkok, ci gibiniang kit ma Jehovah maro dano kwede ki kit ma en ryek kwede. Lok ango ma pire tek madok i kom ginkok ma watwero nywakone kwedgi?

15. Yecu onongo pat ki Adam nining?

¹⁵ Jehovah omiyo wode ma pe ki roc wek otyer kwone macalo ginkok. Ngat meno ma pe ki roc-ci onongo myero obed lagen bot Jehovah. Onongo myero obed atera me miyo kwone pi dano. (Jo Roma 5:17-19) Jehovah onako kwo pa Yecu, cwecce mukwongo ki i polo wek kinywale i lobo. (Jon 1:14) Pi meno, Yecu odoko dano ma pe ki roc kit macalo Adam kong i acakkine onongo pe ki roc-ci. Ento Yecu dok onongo pat ki Adam, pien en otimo jami ducu kit ma Jehovah onongo mito ki bot dano ma pe ki roc. Kadi bed ni en onongo tye ka kemme ki atematema magwar adada, ento en pe oturo cik pa Lubanga kadi ki acel.

16. Pingo ginkok obedo mot ma pire tek adada?

¹⁶ Pi tone macalo ngat ma pe ki roc, Yecu onongo twero laro dano ki i kom bal ki to. Kwone onongo rwatte litap ki pa Adam ma onongo pud pe obalo. Yecu onongo pe ki roc, lagen adada dok onongo lawiny bot Lubanga. (1 Temceo 2:6) En oto piwa, dok gityer ma en omiyo oweko twere bot dano ducu me kwo pi naka. (Matayo 20:28) Ginkok obedo macalo layab wek yub pa Lubanga ocobbe.​—2 Jo Korint 1:19, 20.

JEHOVAH OYABO YO WEK WADOK BOTE

17. Gin ango ma dong twere pi ginkok?

¹⁷ Jehovah omiyo ginkok ma wele dit adada. (1 Petero 1:19) En marowa adada dok man omiyo en oye ni Wode me amara oto piwa. (1 Jon 4:9, 10) Man oweko Yecu odoko wonwa ma ka Adam. (1 Jo Korint 15:45) Yecu oweko twere botwa pe me kwo pi naka keken ento bene me doko jo me ot pa Lubanga i nino mo. Pi ginkok, kibikwanyo roc woko ki i kom dano ci Jehovah dong bijologi me bedo lutinone kun nongo dong pe gibituro cikke. Go kong kit ma bibedo mwonya kwede ka jo ducu ma lugen bot Jehovah dong gipe ki roc! Me agikkine, ginacweya ducu ma gitye i polo ki lobo dong gibinote kacel calo jo me ot acel. Wan ducu wabidoko litino pa Lubanga.​—Jo Roma 8:21.

18. Jehovah ‘bicoko jami ducu i te locce’ awene?

¹⁸ Kadi bed ni lunyodowa mukwongo gukwero bedo luwiny bot Jehovah, en pud omedde ki nyuto mar bot dano, dok omiyo ginkok. Kadi bed ni watye ki roc, Catan pe twero gengowa me bedo lugen bot Jehovah. Pi ginkok, Jehovah bikonyowa me bedo jo ma kitgi atir. Go kong kit ma kwo bibedo kwede ka “dano ducu ma neno Wod, ma ye en” gibibedo ki kwo ma pe tum! (Jon 6:40) Wonwa ma Lamar dok maryek bicobo yubbe me konyo dano wek gubed labongo roc. Jehovah dong ‘bicoko jami ducu i te locce.’​—1 Jo Korint 15:28.

19. (a) Pwocwa pi ginkok myero ocuk cwinywa me timo gin ango? (Nen bok ma wiye tye ni “Wamedde ki Yenyo Jo ma Gitye ki Miti.”) (b) Gin ango ma wabinyamo i pwony ma lubo man?

¹⁹ Pwocwa pi ginkok myero ocuk cwinywa me tito bot jo mukene lok madok i kom mot man ma pire tek-ki. Dano myero gunge ni ki cwiny me mar, Jehovah otiyo ki ginkok wek wakwo pi naka. Ento ginkok timo jami mapol makato. Omiyo lagam i kom adot ma Catan omoro i poto me Eden. Wabineno kit ma man otwere kwede i pwony ma lubo man.