Dano Milion 6 Dong Guto Woko ki Two Korona—Baibul Waco Ningo?

Dul ma Loyo Lok me Yoto Kom (WHO), owaco ni nio i nino dwe 23, me dwe me Abic, mwaka 2022, dano milion 6.27 dong guto woko ki two Korona. Ento, i lok angeya ma kicwalo woko i nino dwe 5, me dwe me Abic, mwaka 2022, dul me WHO owaco ni wel dano ma guto ki Korona dwong makato milion 6. I lok angeya meno, dul me WHO owaco ni i mwaka 2020 ki 2021, “wel dano ma guto macalo adwogi me two Korona . . . tye i kine ka milion 14.9.” Baibul waco gin ango i kom pekki malit macalo man?

Baibul otito pi two ma bineko dano mapol

•  Baibul otito ni i “kare me agikki,” two ma kobo oyotoyot nyo “two maraco” ma neko dano mapol bibedo tye.—Luka 21:11, Contemporary English Version; 2 Temceo 3:1.

Lok pa Yecu tye ka cobbe i kare-ni. Me nongo ngec mapol, kwan pwony ma wiye tye ni “Ngo ma Nyuto ni Watye ka Kwo i Kare me Agikki?“

Baibul miyo kwecwiny

•  “Lubanga ma kweyo cwiny dano ducu. En kweyo cwinywa i can ducu ma walimo.”—2 Jo Korint 1:3, 4.

Jo mapol ma gurwenyo jogi me amara gunongo kwecwiny ki i lok ma tye i Baibul. Pi ngec mapol, kwan pwony ma wiye tye ni “Ngo ma Itwero Timone Tin ka Itye ka Kumu“ ki pwony mukene ma wiye tye ni “Kony Maber Loyo pi Jo ma Gitye ka Kumu.“

Baibul tito gin ma bicobo peko me two matwal

•  “Ker meri obin; giti gin ma imito i lobo kit ma gitiyo i polo.”—Matayo 6:10.

Cokcok-ki, “Ker pa Lubanga” bineno ni “pe tye dano mo ma bedo i lobowa ma biwaco ni, ‘An koma lit.’” (Marako 1:14, 15; Icaya 33:24) Nen vidio ma wiye tye ni Ker pa Lubanga Obedo Gin Ango? me nongo ngec i kom gamente man me polo-ni ki gin ma bitimone.

Wacuko cwinyi me pwonyo gin ma Baibul waco wek in kacel ki jo gangwu wunong adwogi maber ki i tam me ryeko ma Baibul miyo, kacel ki i cikkene ma kweyo cwinywa.