Tika Kabedo me Nywako Lok i Intanet Tye ka Kelo Adwogi Marac i kom Latinni?—Kit ma Baibul Twero Konyo Kwede Lunyodo

“Peko me two wic tye ka medde ameda i kin jo matino—dok waniang ni kabedo me nywako lok i intanet tye i kin jami ma tye ka nyayo peko man.”—Dr. Vivek Murthy, U.S. surgeon general, New York Times, Juni 17, 2024.

Lunyodo gitwero gwoko lutinogi nining ki i kom adwogi marac ma twero bino ki i tic ki kabedo me nywako lok i intanet? Baibul miyo tam mabeco.

Gin ma lunyodo gitwero timone

Nen kong pwony magi me Baibul.

“Ngat maryek kong ngiyo ka kwene ma en ecito iye.”—Carolok 14:15.

Kit macalo kabedo me nywako lok i intanet twero kelo adwogi marac i kom latinni, pe itam ni pire tek ni latinni myero oti kwede. Ma peya iye ni latinni oti ki kabedo me nywako lok i intanet, omyero inen ni en dong romo lubo cikki i kom cawa ma myero en oter iye, romo medde ki bedo ki lurem mabeco, dok romo gwokke ki i neno jami maraco.

• Me nongo ngec matut, kwan pwony ma wiye tye ni “Tika Omyero Latinna Oti ki Kabedo me Nywako Lok i Intanet?” ki dong “Pwonyo Latinni me Gwokke ka Tye ka Tic ki Kabedo me Nywako Lok i Intanet.”

“Kare ma tye myero iti kwede i yo maber.”—Jo Epeco 5:16.

Ka iye ni latinni oti ki kabedo me nywako lok i intanet, ci ket cik i kom kit ma myero en oti kwede, dok ititte kit ma cik magi bigwokke kwede. Bed ma wangi twolo me neno alokaloka mo keken i kom kit latinni ma twero nyuto ni omyero iket kigeng mo i kom ticce ki kabedo me nywako lok i intanet.

• Ti ki vidio me cal ma kigoyo agoya ma wiye tye ni Ti ki Kabedo me Nywako Lok i Intanet i Yo Maber me konyo latinni niang pingo omyero wagwokke ki kit ma watiyo kwede ki kabedo me nywako lok i intanet.

Nong ngec matut

Baibul waco ni watye ka kwo i ‘kare ma piny-nye rac.’ (2 Temceo 3:1-5) Medo i kom meno, bene miniwa tam mabeco ma twero konyowa me kanyo kare man. Pwony ma romo 20 ma jenge i Baibul pi lunyodo ki lutinogi twero nonge i pwony man madok i kom two wic ma yelo bulu.