Tim Gero Tye ka Medde pi Lok me Wibye—Gin Ango ma Baibul Waco?

Tim gero tye ka medde pi lok me wibye, dok man tye ka kelo par madwong bot dano i wi lobo ducu.

• I lobo Mexico, kineko lucungo wibye 39 ma onongo gitye ka bito kwir, dok man aye wel ma pud dong lamal loyo. Medo i kom neko lucungo wibye magi, tim gero mukene ma lubbe ki lok me wibye ocungo wi dano ma pe larre dok owiro tamgi ki i yer me mwaka 2023-2024.

• Cokcok-ki i Ulaya, tim gero ma lubbe ki lok me wibye obedo ka timme mapol, ma i kine tye iye temme me neko Minista Madit me lobo Slovakia i nino dwe 15 me Mai, mwaka 2024.

• Dano ma i lobo Amerika wigi ocung adada i kare ma kitemo neko preciden macon me Amerika ma nyinge Donald Trump i nino dwe 13 me Julai, mwaka 2024.

Pingo tim gero ma lubbe ki lok me wibye tye ka medde matek adada? Tika bigik? Gin ango ma Baibul waco?

Kitito wacon ni apokapoka bibedo tye ma lubbe ki lok me wibye

Baibul otito ni i karewa-ni, ma obedo “kare me agikki,” dano mapol gibibedo ki kit maraco ma nyayo tim gero ki yoko wic.

• “I kare me agikki, piny bibedo marac i kare mogo. Pien dano. . . pe gibimiyo pwoc mo, gibibedo jo ma pe leng, . . . gibibedo jo ma pe timo kica bot dano, . . . jo ma ger, . . . luroro, jo ma tye atata ma pe giparo piny, jo ma gikette malo kengi ki wakke.”—2 Temceo 3:1-4.

Baibul bene otito ni arubaruba ki jemo i kom gamente bitimme teretere i kare man. (Luka 21:9) Kadi bed kumeno, tim gero ma lubbe ki lok me wibye, ki apokapoka pe bibedo tye pi naka.

Agikki me tim gero ma lubbe ki lok me cungo wibye

Baibul tito ni Lubanga bileyo kaka gamente ducu pa dano ki gamente ma mege me polo.

• “Lubanga me polo biketo ker mukene ma . . . bituro ker magi ducu ngidogi woko matitino, ci tyekogi woko ducu, en aye dong bicung bedo matwal.”—Daniel 2:44.

Ker pa Lubanga biribo dano dok bikelo kuc i wi lobo ducu.

• Lalocce, Yecu Kricito, kilwongo ni “Laloc ma kelo kuc,” dok en bineno ni ‘kuc pe ogik.’—Icaya 9:6, 7.

• Kadi wa i kare-ni, jo ma gitye i te loc me Ker man gitye ka pwonyo kit me kwo ki kuc. Macalo adwogine, Baibul waco ni: “Gibiteto pala lucwangi doko lak kweri dyang, ki tongigi doko pala me ngolo jang olok; rok mo pe bitingo pala lucwan i kom rok wadigi, pe dong gibimedde ki pwonyo lweny.”—Icaya 2:3, 4.

Me nongo ngec matut, kwan pwony ma wiye tye ni “Gin Ango ma Ker pa Lubanga Bicobone?” dok inen vidio ma wiye tye ni Ker pa Lubanga Obedo Gin Ango?