Lucaden pa Jehovah Gineno Keto Keny Nining?

Walubo cik me Baibul madok i kom nyom ki keto keny. Lubanga onongo oyubo ni laco ki dako ma gunyomme myero pe guket kenygi. Tyen lok acel keken ma Ginacoya miyo ma weko jo moni giketo kenygi aye ka ngat acel i kingi otimo abor.—Matayo 19:5, 6, 9.

Tika Lucaden gikonyo luot ma gitye ki peko i nyomgi?

Gikonyo, dok gitiyo ki yo mapatpat magi:

• Bukkewa. Bukke magi giloko i kom pwony mapatpat ma jingo nyom, kadi wa nyom ma dong kineno ni pe twero yubbe. Me labolle, nen pwony ma wiye tye ni “Bed Lagen bot Luoti,” “Kit me Cobo Pekki,” ki dong “Kwo me Otti Twero Bedo me Yomcwiny Nining?”

• Cokke. Wanyamo tam ma nonge i Baibul ma konyo jo munyomme. Tam magi wanyamogi ki i cokkewa, gure me nino acel, ki dong i gure madito.

• Luelda. Luelda me kacokke gimiyo tam bot jo munyomme, dok gitiyo ki ginacoya mogo calo Jo Epeco 5:22-25.

Tika luelda me kacokke gimiyo tam bot Lucaden me keto kenygi?

Pe. Kadi bed kipenyogi pi kony me cobo peko me ot, luelda pe gitye ki twero me tito bot luot gin me atima. (Jo Galatia 6:5) Ento ka ngat moni omoko tamme me keto kenye kadi bed Ginacoya pe cwako, en pe bibedo agonya me nyomme odoco.—1 Temceo 3:1, 5, 12.

Lucaden gineno pokke nining?

Baibul cuko cwiny jo munyomme me bedo kacel kadi bed jamine pe tye ka wot maber. (1 Jo Korint 7:10-16) Luot gitwero cobo pekki mapol ma gikemme kwede i nyomgi ka gilego kare ducu, gilubo cik me Baibul, dok ginyuto mar i kingi.—1 Jo Korint 13:4-8; Jo Galatia 5:22.

Kadi bed kumeno, Lukricitayo mukene gumoko tamgi me pokke woko ki luotgi pi tyen lok magi:

• Ka luotte kwero miyo kony akaka.—1 Temceo 5:8.

• Ka luotte ger dok goye matek ma keto kwone ka mading.—Jabuli 11:5.

• Ka luotte pe ye ni en omedde ki woro Lubanga nyo diye tektek me turo cik pa Lubanga. Ka tye kit meno, ci ngat meno twero moko tamme ni yo acel keken ma etwero medde ki bedo “lawiny bot Lubanga makato dano” aye ka epokke woko ki luotte—Tic pa Lukwena 5:29.