I Yo ma Nining ma Yecu Larowa Kwede?
Lagam ma Baibul miyo
Yecu olaro jo ma lugen i kare ma en omiyo kwone macalo ginkok. (Matayo 20:28) Pi meno, Baibul lwongo Yecu ni “Lalar me lobo.” (1 Jon 4:14) Baibul bene wacci: “Pe tye larre mo i ngat mukene, pien pe tye nying mo mukene i wi lobo man ma gimiyo ki wan dano ma myero walarre iye.”—Tic pa Lukwena 4:12.
Yecu ‘obilo to pi jo ducu’ ma ginyuto niye i kome. (Jo Ibru 2:9; Jon 3:16) I ngeye, “Lubanga ocere woko ki i kin jo muto,” ci Yecu odok cen i polo macalo cwec me cwiny. (Tic pa Lukwena 3:15) Ki kunnu, Yecu “tye ki twer me laro jo ma nyiko cok bot Lubanga, kun giwok ki bote, pien en bedo kwo kare ducu ka bako doge pigi.”—Jo Ibru 7:25.
Pingo mitte ni Yecu obak doge piwa?
Wan weng lubalo. (Jo Roma 3:23) Bal keto kigeng i kinwa ki Lubanga, ci i agikkine kelo to. (Jo Roma 6:23) Ento Yecu tye calo “lakony” bot jo ma ginyuto niye i kom ginkok ma en omiyo. (1 Jon 2:1) En bako doge ma kakargi, kun penyo Lubanga me winyo legagi ki timmigi kica i kom balgi kun jenge i kom ginkok ma Yecu omiyo. (Matayo 1:21; Jo Roma 8:34) Lubanga winyo bako dog pa Yecu pien meno rwatte ki miti pa Lubanga. Lubanga ocwalo Yecu i lobo “wek lobo olarre pi en.”—Jon 3:17.
Tika nongo larre cung i kom ye i kom Yecu keken?
Ku. Kadi bed omyero waye i kom Yecu me nongo larre, jami mukene pud mitte. (Tic pa Lukwena 16:30, 31) Baibul wacci: “Kit macalo ka yweyo dong pe i kom, nongo kom dong oto woko, kit meno bene, niye ka pe giketo i tic, nongo dong oto woko.” (Yakobo 2:26) Me nongo larre, omyero:
Wapwony lok i kom Yecu ki Wonne, Jehovah.—Jon 17:3.
Wadong niye i komgi.—Jon 12:44; 14:1.
Wanyut niyewa ki lubo cikgi. (Luka 6:46; 1 Jon 2:17) Yecu opwonyo ni pe dano ducu ma gilwonge ni “Rwot” gibilarogi, ento jo ma ‘gitimo gin ma Wonne ma i polo mito’ aye gibilarogi.—Matayo 7:21.
Wamedde ki nyuto niyewa kadi bed kwo tek. Yecu owaco meno ka maleng i kare ma en otito ni: “Ngat ma biciro nio wa i agikki bilarre.”—Matayo 24:13.