Lucaden pa Jehovah Tika Gidiyo Lutinogi me Doko Lucaden?

Pe, pien ngat acel acel myero omok pire kene me woro Lubanga. (Jo Roma 14:12) Lucaden pa Jehovah gipwonyo lutinogi ki cik me Baibul, ento ka latin odongo, myero en omok tamme pire kene kace ebidoko Lacaden pa Jehovah.—Jo Roma 12:2; Jo Galatia 6:5.

Macalo lunyodo, Lucaden pa Jehovah bene gimito ni lutinogi gubed ki kwo maber. Gipwonyo lutinogi ki jami ducu ma gitamo ni bikonyogi i anyim: diro me tic, kit ma myero gukwo kwede, ki dong niyegi. Lucaden pa Jehovah gingeyo ni Baibul konyowa me kwo i yo maber loyo, pi meno gitute matek me pwony lutinogi ki Lok pa Lubanga dok gicito i cokke pa Lukricitayo kacel kwedgi. (Nwoyo Cik 6:6, 7) Dong ka gudongo, ci gin aye myero gumok ka ce gibilubo niye pa lunyodogi nyo pe.

Tika Lucaden pa Jehovah gibatija lutino matino?

Pe. Baibul pe cwako miyo batija ki lutino matino. Me labolle, kinyuto i Baibul ni ma peya ngat moni onongo batija macalo Lakricitayo i cencwari me acel, onongo myero en kong owiny kwena me Baibul, ‘oye kwena meno’ ci ongut i kom balle. (Tic pa Lukwena 2:14, 22, 38, 41) Pi meno, wek ngat moni onong batija, myero en kong odong ma romo niang pwony me Baibul, oye i iye, ci omok tamme pire kene me kwo ma lubbe ki pwony meno. Meno obedo jami ma latin matidi pe romo timone.

Ka lutino giwoto ki dongo, ci gitwero moko tamgi me nongo batija. Ento, wek gunong batija, myero kong guniang kit ma batija pire tek kwede.

Tika Lucaden pa Jehovah gikwero lutinogi woko ka gidag nongo batija?

Pe. Kadi bed lunyodo giwinyo marac ka latingi okwero jolo niyegi, ento nongo pud gimare. Dok wat i kin lanyodo ki latinne pe balle pien ni latin okwero doko Lacaden.

Kitye ka batija awobi mo kun kiluto kome ducu i te pii. — Ngat acel acel myero omok tamme pire kene ka ce ebinongo batija nyo pe

Pingo Lucaden pa Jehovah giwoto kacel ki lutinogi ka tito kwena?

Wawoto ki lutinowa i tic me tito kwena pi tyen lok mapol.a

Baibul miyo tira bot lunyodo me pwonyo lutinogi ki lok i kom Lubanga, wek guwore. (Jo Epeco 6:4) Kit macalo worowa kwako tucu pi niyewa i dye lwak, tito kwena obedo yo ma pire tek me pwonyo lutino wek gunge Lubanga.—Jo Roma 10:9, 10; Jo Ibru 13:15.
Baibul cuko cwiny lutino bene ni myero “gupak nying Rwot.” (Jabuli 148:12, 13) Yo acel ma pire tek me pako Lubanga aye me tito ki jo mukene lok i kome.b
Lutino ginongo adwogi mabeco ka gitito kwena kacel ki lunyodogi. Me labolle, gipwonyo diro me lok bot kwai dano mapatpat, gidongo kit mabeco calo cwiny me kica ki woro, dok gibedo jo ma paro pi luwotgi. Tito kwena bene konyo lutino me medo ngecgi i kom niyegi.

Lucaden pa Jehovah tika ginywako i kwero nino madongo?

Lucaden pa Jehovah pe ginywako i kwer mo keken ma pe yomo cwiny Lubanga, kadi bed obedo kwer me dini.c (2 Jo Korint 6:14-17; Jo Epeco 5:10) Me labolle, pe wanywako i kwero nino me nywal kadi wa karama me nywalo Kricito, pien Baibul pe cwako.

Kadi bed kit meno, wamaro bedo kacel ki jo me gangwa ki luremwa, dok wamaro miyo mot ki lutinowa. Me ka bedo kacel kwedgi nyo minigi mot i nino madongo keken wabedo kacel kwedgi dok waminigi mic i nino mo keken.

Lunyodo mo gitye ka miyo mic ma kiboyo kome woko bot anyakagi ki awobigi. — Lukricitayo gimaro miyo mic bot lutinogi

Jo ma gudoko Lucaden i kare me tinogi giwinyo nining?

“Tito kwena opwonya me woro jo mukene, labongo paro pi dinigi nyo kit ma gitera kwede. Dok ka watye ka tito kwena, pol kare dano gititiwa kit ma giwinyo kwede kacel ki pekkigi. Pi meno, me ka keto cwinya i koma keken, apwonye me paro pi jo mukene ki dok me konyogi.”—Tara.d
“Lunyodona pe gudiya me doko Lacaden. Gubedo ka wacca ni an aye myero amok tamma. Kare ducu ka apenyo mamana ki lapeny mo keken madok i kom niye pa Lucaden, en gamo ni, ‘Tika dong ikwedo lokke?’ Pi meno, akwedo lok i kom jami mapol adada, ci motmot amoko tamma ni man aye dini ma myero an bene abed iye—ento pe lunyodona keken.”—Ellie.
“Pe onongo awinyo calo gin mo orem pien ni pe anywako i kwero nino madongo. Onongo abedo ki yub mapol i tum cabit kacel ki Lucaden mukene. Wacamo, wamyelo, dok watuku kacel. Lutino kwan luwota onongo giwaco ni jami ma atimo kacel ki lurema pol loyo ma gitimo.”—Melissa.
“Kadi bed ni aniang pingo pe wanywako i kwero karama me nywalo Yecu, i kine mukene awinyo calo atye ka keng gin mo. Gin ma okonya me lweny ki cwiny meno aye pien lunyodona gubedo ka lwongo lurema kacel ki wadiwa mukene-ni gangwa. Dok wiya po ni onongo gimina mic.”—Miguel.

a Ki lok ada, Lutino pa Lucaden pe ginywako i tic me tito kwena labongo lunyodogi nyo ngat mo madit.

b Baibul miyo labol pa lutino mapol ma gukelo yomo cwiny bot Lubanga pien gutito pi niyegi bot jo mukene.—2 Luker 5:1-3; Matayo 21:15, 16; Luka 2:42, 46, 47.

c Nen pwony ma wiye tye ni “Pingo Lucaden pa Jehovah Pe Gikwero Nino Madito Mogo?”

d Nying mogo kiloko woko.