Teko Ma Yecu Tye Kwede I Kom Jogi

TIKA wi po pingo lamalaika pa Lubanga acel odoko Catan Larac-ci?— Mitine marac ni myero kiwore aye oweko en ojemo i kom Lubanga. Lumalaika mukene mono bene gulubo kor Catan?— Gulubo. Baibul lwongogi ni ‘lumalaika pa Catan,’ nyo jogi.​—Niyabo 12:9.

Lumalaika nyo jogi maraco magi mono giye ni Lubanga tye?— Baibul wacci, ‘Jogi giye ni Lubanga tye.’ (Yakobo 2:19) Ento i kare-ni gilwor. Lworo man tye pien gingeyo ni Lubanga bipwodogi pi jami maraco ma gutimo. Ngo marac ma gin gutimo?—

Baibul wacci lumalaika magi guweko pacogi maber i polo ci gubino i lobo kany ka kwo calo dano. Gutimo man pien ni onongo gimito donyo i tim me buto ki mon mabeco me lobo man. (Acakki 6:1, 2; Juda 6) Tika ingeyo ngo ma tim me buto obedo?—

Tim buto obedo ribbe macok i kin laco ki dako i yo ma dok pat. Ka ingeye latin romo dongo i i minne. Ento rac pi lumalaika me donyo i tim buto. Lubanga mito ni co ki mon ma gunyomme keken aye gudony i tim buto. I yo ma kit meno, ka gunywalo latin, laco gin ki dakone giromo gwokone.

I kare ma lumalaika gulokke gudoko dano ci gubuto ki mon i lobo kany, lutinogi gudongo gudoko jo Nepil. Jo-nu onongo giger dok giwano dano. Pi meno, Lubanga okelo pi aluka me tyeko jo Nepil woko kacel ki jo ducu maraco. Ento en owacci Nua oyub yeya me laro jo manok ma gitimo jami mabeco-ni. Lapwony Madit owacci pire tek ni wiwa myero opo i kom gin mutimme i kare me Pii Aluka meno.​—Acakki 6:3, 4, 13, 14; Luka 17:26, 27.

Ingeyo ngo mutimme i kom lumalaika magi i kare ma Pii Aluka obino?— Gugiko tic ki kom pa dano adana-ni, ci gudok cen i polo. Ento onongo dong pe giromo medde kibedo lumalaika pa Lubanga, pi meno gudoko lumalaika pa Catan, nyo jogi. Ngo mutimme i kom lutinogi ma gubedo jo Nepil-li?— Gin guto i Pii Aluka. Kadi wa jo mukene ma pe guwinyo Lubanga bene guto.

Cakke wa i kare me Pii Aluka-ni, Lubanga pe dong oye ki jogi magi me lokke me doko calo dano. Kadi bed pe wanenogi, ento jogi magi pud gitute me bwolowa wek watim jami mogo maraco. Gitye ka kelo ayelayela mapol makato kare mukato angec-ca woko. Man tye kumeno pien gibologi woko ki i polo piny i lobo.

I ngeyo pingo pe watwero neno jogi magi?— Pien gubedo cwiny. Ento wangeyo maber ni gikwo. Baibul wacci Catan tye ka ‘bwolo dano i lobo-ni ducu,’ dok jogine gitye ka konyo en.—Niyabo 12:9, 12.

Larac-ci kacel ki jogine mono giromo bwolowa bene?— Giromo bwolowa ka pe wagwokke. Ento omyero pe wabed ki lworo. Lapwony Madit-ti owacci: ‘Larac-ci pe tye ki twer i koma.’ Ka wabedo cok ki Lubanga, ci en bigwokowa ki bot Larac-ci kacel ki jogine.​—Jon 14:30.

Pire tek ni omyero wange jami maraco ma jogi gibitemme me bwolowa wek watim. Tam kong lok man. Jami maraco ango ma jogi gutimo i kare ma gubino i lobo-ni?— Ma peya Pii Aluka obino, gin gubuto ki mon, gin ma lumalaika onongo myero pe gutim. I kare-ni, cwiny jogi bedo yom ka dano pe gilubu cik pa Lubanga i kom tim buto. Wek kong apenyi, Angagi keken mono ma myero gudony i tim buto?— Igamo kakare, jo munyomme keken.

I kare-ni, awobe ki anyira matino gidonyo i tim buto, man rac tutwal pigi. Baibul nyutu ni Lubanga aye ocweyo kom me co ki me mon. Jehovah ocweyo dul kom magi pi tyen lok ma dok pat ma jo munyomme keken aye myero guti kwede. Yomo cwiny jogi ka dano gitimo jami ma Jehovah ogengo. Me laporre, yomo cwiny jogi ka awobi gin ki anyaka mo gituko ki komgi me co nyo me mon. Wan pe wamito yomo cwiny jogi, pe tye kumeno?—

Tye gin mukene bene ma jogi gimaro ento Jehovah dagi. Tika ingeyo gin meno?— Tim bwami. (Jabuli 11:5) Tim bwami aye ka dano gibedo ger dok giwano jo mukene. Wi myero opo ni jo Nepil ma gubedo lutino pa jogi-ni gutimo tim bwami.

Jogi bene gimaro kelo lworo i cwiny dano. I kine mogo giporo bedo calo jo muto. Giromo bene poro dwan jo ma dong guto woko. I yo ma kit man, jogi gibwolo dano mapol wek guye ni jo ma dong guto pud gikwo dok gitwero lok ki jo ma kwo. Ada, jogi gimiyo dano mapol giye ni tipo pa jo muto tye.

Pi meno, myero wabed ma wangwa twolo wek Catan ki jogine pe gubwolwa. Baibul cikowa ni: ‘Catan temme me nen calo lamalaika ma kite ber, kadi wa luticce bene.’ (2 Jo Korint 11:14, 15) Ki lok ada, jogi kitgi raco. Kong wanenu kit ma giromo temme kwede me weko wabedo calo gin.

Kakwene ma dano gipwonyo iye jami mapol ma dok i kom tim gero, tim me buto ma pe opore, lok i kom cwec me cwiny ki dong tipo pa jo muto?— Mono pe gipwonyo ka gineno filim ki yub me telebijon, cito i ot nyutu vidio nyo ki bot lurem maraco i cukul? Timo jami magi mono nyikowa cok bot Lubanga kece bot Larac-ci ki jogine? Itamo ningo?—

Itamo ni nga ma mito ni wawiny dok wanen jami maraco?— Catan ki jogine. Itamo ni an ki in myero watim gin ango?— Mitte ni myero wakwan, wawiny, dok wanen jami ma keliwa adwogi maber dok ma bikonyowa me tic pi Jehovah. Tika iromo tamo jami mogo mabeco ma watwero timogi?—

Ka watimo jami mabeco, pe tye tyen lok mo ma miyo walworo jogi. Yecu tek loyogi, dok jogi gilwore. I nino mo acel, jogi gukok bot Yecu ni: “Dong ibino ka tyekowa bo?” (Marako 1:24) Cwinywa mono pe bibedo yom ka kare bio pi Yecu me tyeko Catan ki jogine?— Ento i kare-ni, watwero bedo ki gen ni Yecu bigwokowa ki i kom jogi ka wabedo cok ki en kacel ki Wonne me polo.