Jo mogo ginongo tek tutwal me maro Lubanga. Ki tung botgi, Lubanga nen calo ngat ma kite pe niango dano, bor kwedgi, nyo bene ger. Nen kong lok mogo ma guloko i kom Lubanga:

• “Alego bot Lubanga ni okonya, ento bene abedo ki tam ni en tye ka mabor, ka ma pe kitwero o iye. Onongo atamo ni Lubanga tye ngat mo ma pe paro pi dano.”​—Marco, Italy.

• “Kadi bed ni onongo amito tic pi Lubanga ki cwinya ducu, en onongo nen calo tye ka mabor adada. Onongo atamo ni Lubanga ger dok ticce me pwodowa keken. Onongo pe aye ni en paro piwa.”​—Rosa, Guatemala.

• “I kare ma pud atidi, onongo atamo ni Lubanga ticce me yenyo bal keken, dok tye atera me miniwa pwod ka mitte. Lacen, onongo anene calo ngat mabor kwedwa. Lubanga onongo tye calo puraim minicita ma doro kwo pa jo ma en telogi​—ma pe bene paro pigi.”​—Raymonde, Canada.

In itamo ningo? Tika pe watwero maro Lubanga? Lukricitayo gubedo ka penyo lapeny man pi cencwari mapol. Ki lok ada, cakke i mwaka 500 me o kwede i kine ka mwaka 1500 K.M., pol pa Lukricitayo ata-ni onongo bene dong pe gilego bot Lubanga Won Twer Ducu. Pingo? Dano onongo gilworo Lubanga adada. Lacoc mo me tekwaro Will Durant otito kuman ni: “Twere nining pi labalo me temo lega atema bot Lubanga ma onyo koyo i komwa dok bor kwedwa-ni?”

Dano gucako neno Lubanga calo ngat ma “onyo koyo i komwa dok bor kwedwa” nining? Baibul mono ada pwonyo gin ango madok i kom Lubanga? Tika pwonyo lok ada madok i kom Lubanga bikonyi me bedo ki mar i kome?

LOK ADA MA TYE I BAIBUL Lubanga owaco ni: “An nyinga Rwot [“Jehovah,” NW]. (Icaya 42:8) “Jehovah” aye nying me leb Ibru ma te lokke gonye ni “En Miyo Timme.”

Jehovah mito ni wati ki nyinge. Baibul waco ni, ‘Wulwong nyinge; wumi lurok gunge gin ma en dong otiyo. Wutit pire, ni en Lubanga ma nyinge malo twatwal.’​—Icaya 12:4.

Yecu otiyo ki nying Lubanga. I kare ma Yecu tye ka lega, en owaco bot Jehovah ni: “Amiyo nyingi ongene botgi [lupwonnye], dok abimiyo ngene.” Pingo Yecu omiyo nying Lubanga ongene bot lupwonnyene? En omedo ni: “Wek mar ma imara kwede obed i gin, ki an i igi.”​—Jon 17:26.

PINGO MAN PIRE TEK Walter lowrie ma obedo lapwony dini owacci: “Laco ma pe ngeyo nying Lubanga nongo i ada pe ngeyo nga kikome ma Lubanga obedo dok en pe twero maro Lubanga pien neno en calo ngat mo ata ma pe paro piwa.”

Laco mo ma nyinge Victor onongo cito i kanica ka lega cabit ducu, ento en onongo tamo ni pud pe engeyo Lubanga. En otito ni, “Lacen, aniang ni Lubanga nyinge Jehovah, dok man okonya me ngeyo en.” En omedde ni, “Awinyo ki i cwinya calo iwacci arwatte ki Ngat mo ma awinyo lok mapol i kome. Acako nene macalo Dano Adana ki dok acako dongo wat wacok kwede.”

Jehovah nyikke cok bot jo ma gitiyo ki nyinge. Ma lubbe ki “jo . . . ma gitamo pire [nyinge],” Lubanga ocikke ni: “Abitimogi kica macalo dano timo kwede kica ki wode ma tiyo bote.” (Malaki 3:16, 17) Lubanga bene miyo mot bot jo ma gilwongo nyinge. Baibul wacci: “Jo ducu ma gilwongo nying Rwot [Jehovah] gibilarogi.”​—Jo Roma 10:13.

LOK ADA MA TYE I BAIBUL

Yecu, Wod pa Lubanga pe owaco ni girom gin ki Wonne. Ento, en owaco ni: “Pien acito bot Won; pien Won dit kata.” (Jon 14:28) En bene owaco bot lalub kore acel ni: “Acito bot Wora ki Wonwu, bot Lubangana ki bot Lubangawu.”​—Jon 20:17.

Cwiny maleng pe obedo Lubanga. Lukricitayo i kare macon “gupong ki cwiny maleng,” dok Jehovah owaco ni: ‘Abionyo cwiny mera maleng i kom jo ducu.’ (Tic pa Lukwena 2:1-4, 17) Cwiny maleng pe obedo Triniti. Ento obedo teko pa Lubanga.

PINGO MAN PIRE TEK

Karl Rahner gin ki Herbert Vorgrimler , ma gukwano matut lok i kom Katoli-ni guwacci trinity “pe kitwero niang iye labongo kony pa Lubanga, ento kadi bed Lubanga otitiwa pud pe kitwero niang iye ki pete tere ducu.” Tika twere me maro ngat mo ma ngeyo nyo niang lok i kome tek? Pi meno, pwony me Triniti tye ariya ma gengo dano ngeyo ki dok maro Lubanga.

Marco, ma kiloko i kome i pwony me acel-li, owaco ni pwony me Triniti tye macalo ariya. En owacci, “Onongo atamo ni Lubanga pe mito ni angeye, man oweko acako nene macalo ngat ma pe waromo niang kite, ki dok pe watwero nyikke cok bote.” Ento, “Lubanga pe ticce me kelo anyobanyoba.” (1 Jo Korint 14:33) En pe okanne ki botwa ento mito ni wange en. Yecu owaco ni: “Wan waworo gin ma wangeyo.”​—Jon 4:22.

Marco owaco ni, “I kare ma aniang ni Lubanga pe obedo Triniti, acako bedo ki wat macok kwede.” Ka waneno Jehovah calo iwacci Ngat ma waromo niang kite, man weko bedo yot botwa me bedo ki mar i kome. “Ngat ma pe ki mar, nongo en pe ngeyo Lubanga, pien Lubanga aye mar.”​—1 Jon 4:8.

LOK ADA MA TYE I BAIBUL

‘Dano ma timo bal bito.’ (Ejekiel 18:4) Jo muto “pe gingeyo gin mo.” (Latit lok 9:5) Ka dano muto pe ngeyo gin mo, ci en deno can i “mac me kapiny pi naka” nyo cwinye cwer pi bedo bor ki Lubanga nining?

Baibul loko i kom “nam me mac ki gweng calfa ma mac oliyo.” (Niyabo 20:10) Ento, Baibul tito gin ma nam man obedo. Baibul wacci: “Nam ma tye ka lyel mac ki gweng calfa; meno aye to me aryo.” (Niyabo 20:14; 21:8) Pi meno, man pe obedo ka ma dano wang iye nyo mac kikome. Bedo ka ‘wang pi naka’ i nam me mac-ci te lokke ni “to me aryo,” labongo gen me nicer.

PINGO MAN PIRE TEK

Ka Lubanga cwinye col, man weko pe wamarre ento wabedo bor kwede. Rocío, ma bedo i lobo Mexico owaco ni, “Cakke wa i kare ma pud atidi, kibedo ka pwonya lok i kom mac me kapiny, abedo ki lworo madit adada muweko onongo atamo ni Lubanga pe ki kit mabeco. Onongo atamo ni en cwinye kec dok wiye ding.”

Gin ma Baibul waco i kom ngolo kop pa Lubanga kacel ki kit ma jo muto gitye kwede oloko kit ma Rocío neno ki Lubanga. En owaco ni, “Awinyo agonya calo iwacci kitingo yec mapek ki i wiya.” En omedde ni, “Acako bedo ki gen ni Lubanga pe mito ni gin mo marac otimme i komwa dok bene ni en marowa, ma an bene atwero cako maro en. En tye calo lanyodo ma mako cing lutinone dok mito jami mabeco keken pigi.”​—Icaya 41:13.

Dano mapol gitemme me bedo ludini ki dok bedo ki kit ma atir pien gilworo wang i mac me kapiny, ento Lubanga pe mito ni iti pire pienni ilworo en. Ento, Yecu owaco ni: ‘Mar Rwot [Jehovah] Lubangani.’ (Marako 12:29, 30) Pi meno, ka waniang ni Lubanga pe ngolo kop alenga i kareni, man weko wabedo ki gen i kom ngolo koppe i kare me anyim. Calo larem Yubu, Eliu, watwero waco ki tekcwiny ni: “Lubanga pe twero timo gin marac kadi ki acel. Won Twer Ducu pe timo gin mo ma pe tye atir.”​—Yubu 34:10.

I nino mo acel ma en tye i Jerucalem, Yecu obedo ka tito pi Wonne, Jehovah, kun bene loko i kom lupwonye dini goba me kare ca. (Jon 8:12-30) Gin ma en owaco i nino meno konyowa me ngiyo pwony mogo muywek i kareni madok i kom Lubanga. Yecu owaco ni: “Ka wumoko i lokka, ci wun lupwonnyena adada; miyo wubingeyo lok me ada, lok me ada bigonyowu.”​—Jon 8:31, 32.

‘Wumok i lokka.’ Ki lok man, Yecu oweko lanen maber piwa wek wamok ka ce pwony me dini mogo tye “lok me ada.” Ka iwinyo lok mo i kom Lubanga, penye kekeni ni, ‘Tika lok man rwatte ki gin ma Yecu owaco ki dok lok mukene ma tye i Ginacoya Maleng?’ Lub lanen pa jo ma guwinyo lok pa lakwena Paulo kun “gingiyo ginacoya ma yam gicoyo nino ducu pi neno ka lok ducu tye kit meno ada.”​—Tic pa Lukwena 17:11.

Marco, Rosa, ki Raymonde ma kiloko i komgi i pwony me acel-li, gungiyo matut pwony me dinigi kun gikwano Baibul ki Lucaden pa Jehovah. Ngo ma gin gupwonyo?

Marco: “Lapwonywa me Baibul otiyo ki Ginacoya me gamo lapeny ducu ma wan ki dakona wapenye kwede. Man oweko marwa pi Jehovah ocako dongo, dok wanyikke cok kacel macalo laco ki dako!”

Rosa: “Pi tyen mukwongo, onongo atamo ni Baibul tye buk mo ma opong ki tam pa dano adana i kom Lubanga. Ento motmot, Baibul ogamo lapeny ducu ma onongo atye kwede. Kombeddi-ni, aneno Jehovah calo ngat ma tye ada. En tye Ngat ma aromo bedo ki gen i kome.”

Raymonde: “Alego bot Lubanga ni okonya wek apwony lok madok i kome. I nge kare manok keken, wan ki cwara wacako kwano Baibul. Man okonyowa me pwonyo lok ada madok i kom Jehovah! Cwinywa obedo yom adada me pwonyo lok i kom anga ma en obedo.”

Baibul yaro ka maleng goba madok i kom Lubanga ki dok bene tito lok ada i kom kite mabeco ma gigudo cwinywa. Lokke konyowa wek “waniang i kom kit mot ducu ma Lubanga miyowa pi kicane.” (1 Jo Korint 2:12) Pingo pe kong ikwan piri keni kit ma Baibul gamo kwede lapeny ma pigi tego dok ma dano gimaro penye kwede madok i kom Lubanga, yubbe, ki dong anyimwa? Kwan lagam pi lapeny magi i te wi lok ma wacci “Pwony me Baibul “Bible Teachings > Lapeny ma Kigamo me Baibul” i www.pr2711.com. Iromo penyone wek kikwan Baibul kwedi kun itiyo ki kabedo meno me Intanet nyo peny Lacaden pa Jehovah mo keken. Watye ki gen ni ka itimo meno, ci ibinongo ni maro Lubanga yot adada kato kit ma onongo itamo kwede.