Onongo Amaro Tuku Baseball Makato Gin mo Keken!

KWONA MACON

Adongo i Puerto Limón, boma ma tye i wang wat tung kunyango me cula nam me Costa Rica. Lunyodona onongo gitye ki lutino aboro, dok an latin me abirone. Babana oto woko ma atye ki mwaka aboro. Dok i ngeye, mamana ogwoko wan ducu kene.

Onongo amaro tuku baseball adada dok acako tukune ma pud atidi. Ma atye mwaka apar ki wiye, adonyo i gurup pa lutuku mo ma onongo gituku mere me galo wanggi. Ma atye mwaka pyeraryo ki wiye dok onongo pud atye i gurup meno, ngat mo ma pwonyo lutuku owacci adony i gurup pa lutuku mo ma gituku me cente i Nicaragua. Ento onongo pe amito cito i Nicaragua pien kom mama onongo lit i kare meno dok onongo atye ka gwoke. Pi meno, pe acito. Lacen, lapwony mukene dok olwonga me donyo i gurup mo madit i lobo Costa Rica, dok onongo kiyero lutukune ki i kin gurup matinotino pa lutuku ma gituko me nono. I wang-ngi, aye cito. Abedo i gurup meno nicakke i 1949 me o wa i 1952, dok atuku tuku mapol i Cuba, Mexico, ki dong Nicaragua. Onongo an latuku mucwiny adada. Cwinya onongo bedo yom adada ka dano gitye ka dangnge ki nyinga i bar tuku!

Adonyo bene i tim tarwang. Kadi bed ni onongo atye ka winye ki anyaka acel keken, ento onongo adonyo i tim me buto ki mon mapol. Onongo amato bene kongo wa i labyel kweri. I ningo mo amer adada dok ma aco orwone, onongo wiye pe po kit ma ao kwede gang ki kit ma abuto kwede i wi kabutona! Onongo amaro tuku luguma ki tuku mogo mukene me goyo cente.

I kare meno, mamana odoko Lacaden pa Jehovah. Dok otemme me ywayo mitina i niyene, ento tutte meno pe onyako nyige i acakki-ne pien onongo alungo wiya adada i tuku. Ka atye ka pwonnye i bar tuku i cawa me cam, onongo pe awinyo bene kec mo keken! Onongo aketo cwinya ducu i tuku. Dok onongo amaro tuku Baseball makato gin mo keken!

Ma atye mwaka 29, anongo awano mo marac adada ma atye ka temme me mako odilo i kare ma atye ka tuku. Ma acang, ajuko tuku woko. Ento amedde ki pwonyo gurup mogo matinotino pa lutuku macok ki ganga.

KIT MA BAIBUL OLOKO KWEDE KWONA

I mwaka1957, aye lwongo mo me cito i gure madit pa Lucaden pa Jehovah ma onongo bibedo i bar tuku mo ka ma atuku bene baseball iye. I kare ma abedo i kin lwak, acako neno apokapoka ma tye i kin Lucaden pa Jehovah ma onongo gubedo ki woro-ni ki dong lwak ma guding ma onongo gicokke ka neno tuku. Gin ma aneno i gure madit meno otugo cwinya me cako kwano Baibul ki Lucaden ki dong me cito i cokkegi.

Pwony mapol me Baibul ma onongo atye ka pwonyone ogudo cwinya. Me labolle, Yecu otito con ni i kare me agikki, lupwonnyene gibitito kwena maber me Ker pa Lubanga i twok lobo ducu. (Matayo 24:14) Apwonyo bene ni Lukricitayo me ada pe gitito kwena ki miti me nongo cente. Yecu owaco ni: “Wugamo nono labongo cul mo, wumi bene nono labongo cul.”—Matayo 10:8.

Ma atye ka kwano Baibul, abedo ka poro gin ma Baibul waco ki gin ma aneno i kin Lucaden pa Jehovah. Amaro tutegi me tito lok me kwena maber me Ker pa Lubanga i wi lobo ducu. Aneno bene yot cing ma gitye kwede kit ma Yecu ociko Lukricitayo ni myero gunyutti. Pi meno, ma akwano Marako 10:21 dok aneno lwongo pa Yecu ni, ‘bin icak lubo kora,’ ocako bedo ki miti me doko Lacaden.

Otera kare mo me keto tam meno i tic. Me labolle, pi mwaki mapol, onongo atuku tuku me nongo gum cabit ducu. Ento apwonyo ki i Baibul ni Lubanga pe cwako jo ma woro ‘jok wek ominigi gum,’ ki jo ma luworo. (Icaya 65:11; Jo Kolocai 3:5) Pi meno, amoko tamme me juko tuku luguma. I Ceng Cabit meno cutcut ma ajuko kwede tuku luguma-ni, namba ma jwi abolo me nongo gum aye oloyo! Dano gungala adada pien ni pe atuku i cabit meno, dok gubedo ka diya me medde ki tuku, ento pe aye. Pe dong adok cen i tuku luguma.

I nino ma anongo batija kikome ki i gure madit pa Lacaden pa Jehovah, akemme dok ki ariya mukene ma onongo temo “kit pa dano manyen” ma dong aruko-ni. (Jo Epeco 4:24) I otyeno meno ma adwogo i otel ma apango, anongo anyaka ma onongo abedo ka winye kwede con-ni ocung woko i nyim doggola me rumma. En obedo ka wacca ni: “Bin ya Sammy, bin wek waywe wiya!” Ento cutcut awacce ni: “Pe amito!” Apoyo wiye ni an dong atye ka kwo ma lubbe ki cik me Baibul. (1 Jo Korint 6:18) En owacca ni cik me Baibul i kom tim tarwang pire pe tek, dok omedde ki diya ni omyero wamedde ki winye. Ento, adonyo i rumma ci aloro doggola woko. I kare-ni, cwinya yom me wacci, nicakke ma adoko Lacaden pa Jehovah i 1958, abedo ka gwoko gennena kun amedde ki kwona manyen-ni.

ADWOGI MABER MA ANONGO

Awinyo calo atwero coyo buk kulu i kom adwogi mabeco ma anongo pi lubo tira me Baibul! Adwogi mabeco mogo aye ni atye ki lurem mabeco mapol, atye ki tyen lok me kwo, ki dong yomcwiny me ada.

Pud amaro tuku, ento en aye dong pe gin ma pire tek loyo i kwona. I kare ma atye ka tuku baseball anongo yweka ki cente, ento jami meno pe gurii pi naka. Kadi bed kit meno, watta ki Lubanga ki dong mot me bedo i kin utmege ma gunotte i kingi birii pi naka. Baibul waco ni: “Lobo tum woko ki mitine ducu; ento ngat ma tiyo gin ma Lubanga mito ri nakanaka.” (1 Jon 2:17) I kare-ni, dong amaro Lubanga Jehovah kacel ki jone makato gin mo keken!