Baibul Loko Kwo pa Dano

LAMEGO mo ma owok ki i kwo matek i kare me tinone onongo tyen lok me kwo nining? Gin ango ma oweko lajemo mo me wibye ojuko tim gero dok odoko latit lok me kwena maber? Kwan gin mutimme i komgi wek inong lagam pi lapeny magi.

“Onongo Amito Nongo mar Ki Lirem.”—INNA LEZHNINA

MWAKA MA KINYWALE IYE: 1981

LOBO MA A KI IYE: RUSSIA

KWONE MACON: OWOK KI I PEKKI MALIT I KARE MA PUD TIDI

KWONA MACON: Kinywala ma ita oding woko dok lunyodona bene gitye ludingit. Kwo onongo mit adada i mwaka abicel mukwongo me kwona. Ento lunyodona gupokke woko. Kadi bed ni onongo pud atidi, aniang gin mutimme-ni dok man ocwero cwinya adada. Ma gupokke, babana ki omera madit gumedde ki bedo i boma me Troitsk, ento mamana odak i Chelyabinsk dok ocito kacel kweda. I nge kare mo mamana onyomme ki laco mukene. Laco meno onongo lamero dok maro goyo an ki mamana kare ducu.

I 1993, omera madit opoto i pii ci oto woko. Tone oturowa atura. Mamana ocako mato kongo dok ocako gona bene. Acako yenyo kwo mayot. Onongo amito nongo mar ki lirem. Pi meno, acako cito i kanica mapatpat wek anong kwecwiny, ento pe anongo.

KIT MA BAIBUL OLOKO KWEDE KWONA: Ma atye mwaka 13 latin kwan lawota mo ma onongo tye Lacaden pa Jehovah obokka ododo mogo me Baibul. Onongo amaro pwonyo lok i kom jo mogo ma gitito pigi i Baibul, me labolle Nua ki Yubu ma gutiyo pi Lubanga kadi bed ni onongo gitye ka wok ki i kwo matek. I nge kare manok, acako kwano Baibul ki Lucaden ki cito i cokkegi.

Kwano Baibul oyabo wanga oweko acako niang lok ada mapol. Ogudo cwinya adada me niang ni Lubanga tye ki nyinge. (Jabuli 83:18, NW.) Cwinya obedo yom adada i kare ma aneno kit ma Baibul otito kore ki kore jami ma onongo bitimme “i kare me agikki.” (2 Temceo 3:1-5) Abedo ki yomcwiny adada me niang gen me nicer. Tam kong—pud dok abineno omera!—Jon 5:28, 29.

Ento pe jo ducu gubedo ki yomcwiny calo an. Mamana ki babana onongo pe gimaro Lucaden pa Jehovah. Dok gutemme me diya wek ajuk kwano Baibul woko. Onongo amaro gin ma atye ka pwonyone, dok amoko tamma pe me juko kwano Baibul.

Onongo pe yot me kanyo lyeto pa jo gangwa. Gin mukene ma bene oturo cwinya aye to pa omera matidi ma onongo acito kwede i cokke pa Lucaden pa Jehovah. En bene oto i pii. Kadi bed kit meno, Lucaden pe guweka kena. Ki i kin Lucaden, anongo mar ki lirem ma abedo ka yenyone pi kwona ducu. Onongo angeyo ni meno aye dini me ada. I mwaka 1996, anongo batija macalo Lacaden pa Jehovah.

ADWOGI MABER MA ANONGO: Anyomme ki omego mo maber adada ma nyinge Dmitry, dok wabedo kacel dong pi mwaki abicel. Watye ka tic kacel pi Jehovah i jang gang kal pa Lucaden pa Jehovah i St. Petersburg. Motmot, neno pa lunyodona i kom niyena olokke.

Atye ki pwoc madit adada ni angeyo Jehovah! Tic pire oweko anongo tyen lok me kwo.

“Onongo Atye ki Lapeny Mapol ma Nyweno Wiya.”—RAUDEL RODRÍGUEZ RODRÍGUEZ

MWAKA MA KINYWALE IYE: 1959

LOBO MA A KI IYE: CUBA

KWONE MACON: ADWII ME WIBYE

KWONA MACON: Kinywala ki i Havana, i lobo Cuba, dok adongo i kabedo mo ma opong ki lucan ki lutim gero. Ma awoto ki dongo acako bedo ki miti i tuku me dongo bunia.

Onongo aryek i gang kwan, dok lunyodona gucuko cwinya me cito i univaciti. Ma adonyo i univaciti, acako bedo ki cwiny ni myero kitim alokaloka i lok me wibye me lobowa. Pi meno amoko tamma me jemo. An ki latin kwan lawota mo wacito ka lweny i kom abili, pien onongo wamito mayo mudukune. Wawano wi abili meno marac adada. Man oweko kimakowa i buc ci kingolo kop me to i wiwa dok onongo kibicelowa acela ki muduku. Onongo atye mwaka 20 keken, dok onongo dong acok to!

Ma atye i ot buc kena, abedo ka poro gin ma abitimo ka dong kimito cella. Onongo pe amito ni anyut lworo mo keken. Ento ki tungcel, onongo atye ki lapeny mapol ma tye ka nyweno wiya. Abedo ka pennye kekena ni: ‘Pingo lobo opong ki tim maraco kacel ki ngolo kop alenga? Kwo mono dong kite en?’

KIT MA BAIBUL OLOKO KWEDE KWONA: Kiloko kop me to ma onongo kingolo i wiwa ci kitweyowa i buc pi mwaki 30. Ma atye i buc i kare meno, arwatte ki Lucaden pa Jehovah ma onongo bene kitweyogi i buc pi niyegi. Ogudo cwinya adada me neno tekcwiny pa Lucaden magi kadi bed ni onongo bene gimaro kuc. Kadi bed ni kitweyogi i buc labongo tyen lok matir, onongo cwinygi pe kec dok pe gitye ki kiniga.

Lucaden magi gupwonya ni Lubanga tye ki yub pi dano. Gunyuta ki i Baibul ni Lubanga biloko lobowa doko paradic ka ma turo cik ki ngolo kop alenga pe iye. Gutita ni lobo bipong ki jo mabeco keken dok gibiminigi kare me kwo pi naka labongo roc.—Jabuli 37:29.

Onongo amaro jami ma atye ka pwonyone ki bot Lucaden, ento kwona onongo pat adada ki meggi. Onongo atamo ni pe atwero cung ma pe acwako tung ka mo i lok me wibye nyo loko lema tung cel wek kidong. Pi meno, amoko tamma me kwano Baibul pira kena. Ma atyeko, aniang ni Lucaden pa Jehovah keken aye gikwo calo Lukricitayo macon.

Kwano Baibul oweko aniang ni myero alok kwona. Aniang ni omyero alok kit ma aloko kwede pien onongo amaro tic ki leb maraco. Dok onongo mitte bene ni ajuk mato taa. Onongo myero ajuk bene cwako tim me wibye. Onongo pe yot me timo alokaloka magi, ento ki kony pa Jehovah, aloko kwona motmot.

Gin ma dong obedo tek loyo me timone aye juko kinigana. Pud alego bot Jehovah wa tin wek amedde ki juko kinigana. Anongo kony madit adada ki i wang Baibul mogo calo Carolok 16:32, ma waco ni: “Ngat ma kiniga pe mako oyot ber loyo twon oteka, ngat ma loyo tam ma i cwinye kene loyo ngat ma omayo gang kulu.”

I mwaka 1991, anongo batija macalo Lacaden pa Jehovah. Kiluta i pii ma kionyo i pipa ma onongo tye i buc. I mwaka ma lubo kigonyo an kacel ki lumabuc mogo dok kicwalowa i lobo Spain pien onongo watye ki wadiwa mogo kunnu. Ma ao i Spain, acito i cokke pa Lucaden pa Jehovah cutcut. Lucaden ma kunnu gujola calo onongo dong abedo i kingi pi mwaki mapol, dok gukonya me cako kwo i Spain.

ADWOGI MABER MA ANONGO: Cwinya yom me tic kacel ki dakona ki anyirana pi Lubanga. Atye ki mot me tic ki pol pa cawana me konyo jo mukene me pwonyo lok me Baibul. I kine mukene atamo i kom kare ma onongo kicok neka-ni dok abedo ki pwoc i kom jami mabeco ducu ma anongo nicakke i kare meno. Pe atye kwo keken, ento bene atye ki gen. Atye ka kuro lobo Paradic ma kiciko pire-ni—ka ma tim maraco ki ‘to bibedo pe iye.’—Niyabo 21:3, 4.

[Lok madongo]

“Ogudo cwinya adada me niang ni Lubanga tye ki nyinge”

[Cal]

An kacel ki cwara wanongo yomcwiny i nywako bukke ki vidiowa bot ludingit