Lubanga kikome aye ogonyo tyen lok me nyinge bot laticce ma lagen Moses. I kare ma Moses openyo Lubanga pi nyinge, Jehovah ogamo ni: ‘Atwero doko gin mo keken ma amito.’ (Nia 3:14) Baibul me Rotherham bene ogonyo tyeng man ni: “Abidoko kit gin mo keken ma amito.” Pi meno Jehovah twero doko gin mo keken ma mitte me cobo yubbe.

Ka onongo in iromo doko kit gin mo keken ma imito kono? Onongo kono itimo gin ango pi luremi? Ka ngat acel i kin-gi kome odoko lit atika, itwero doko daktar ma ladiro ma cango two. Ka laremi mukene orwenyo limme, idoko ngat ma olony ci ikonnye. Ki lok ada, tekowa me miyo kony nok tutwal. Wan ducu tekowa nok. Ka imedde ki kwano Baibul, ibibedo ki ur me neno kit ma Jehovah doko kwede gin mo keken ma mitte me cobo cikkene. Dok cwinye yom me tic ki tekone pi jo ma gimarre. (2 Tekwaro 16:9) Jo ma pe gingeyo nyinge pe gitwero niang kit pa Jehovah mamwonya magi.

Nen kene ni nying me Jehovah-ni omyero kitti kwede i Baibul. Ngeyo tyen lokke kacel ki bedo agonya me tic kwede i worowa konyo matek me moko wat macok ki Jehovah ma obedo Wonwa me polo.a

Kit ma Lanebi Daniel Otito pi Bino pa Meciya Con

LANEBI Daniel okwo ma onongo pud odong mwaki makato 500 me nywalo Yecu. Kadi bed kit meno, Jehovah onyuto bot Daniel lok ma onongo bikonyo me ngeyo kare ma kibiwiro iye Yecu nyo kibicime macalo Meciya, nyo Kricito. Kitito ki Daniel ni: ‘Dok omyero inge dok ibed ki ngec matut ni nia ki i miyo lok me roco ki gedo Jerucalem odoco nio wa kom Meciya latela, bibedo cabit abiro, ki bene cabit pyerabicel wi aryo.’​—Daniel 9:25.

Me ngeyo kare me bino pa Meciya, omyero kong wange ka ma kicako kwano iye kare me bino pa Meciya. Ma lubbe ki lok pa lanebi man, kwano kare man ocakke ‘ki i miyo lok me roco ki gedo Jerucalem odoco.’ En lok man me ‘miyo lok-ki’ otimme awene? Ki bot Nekemia ma bene obedo laco Baibul-li, kimiyo lok me gedo cel me rumo Jerucalem odoco “i mwaka me pyer­aryo me loc pa kabaka Aritakcec.” (Nekemia 2:1, 5-8) Jo ma gingeyo lok me tekwaro gimoko ni i mwaka 474 K.M.P. aye Aritakcec onongo dong oloyo loc pi mwaka acel. Pi meno mwaka me pyeraryo me locce obedo i mwaka 455 K.M.P. Man aye mwaka ma omyero kicak kwano iye lok pa lanebi Daniel-li, i mwaka 455 K.M.P.

Daniel onyuto kare ma onongo bikato me o wa i bino pa “Latela Meciya.” Lok pa lanebi man waco ni ‘cabit abiro, ki bene cabit pyerabicel wiye aryo’​—ma ducu ribbe doko cabit 69. Kare man lac ma rom mene? Pol pa Baibul ma kigonyo ginyuto ni magi pe gubedo cabit me nino abiro-ni keken, ento ni gubedo cabit ma gicung pi mwaki aye. Nyo tye ni, cabit acel cung pi mwaki abiro. Lakit tam man me keto mwaki abiro calo cabit acel-li, nyo me keto mwaki abiro calo dul acel-li onongo obedo gin ma ngene maber bot Lujudaya me kare macon. Me labolle, onongo gikwero mwaka me Cabit i nge mwaki abiro abiro. (Nia 23:10, 11) Pi meno, cabit 69 ma tye i lok pa lanebi-ni, gidoko mwaki 7 ma gitye i dul 69, nyo ka inyayogi ducu dong gidoko mwaki 483.

Kombeddi dong gin ma myero watim aye me timo curane. Ka wakwano mwaki 483 cakke ki i mwaka 455 K.M.P. ci kelowa wa i mwaka 29 K.M. Meno aye obedo mwaka ma kibatija iye Yecu kikome ci odoko Meciya!a (Luka 3:1, 2, 21, 22) Lok pa lanebi me Baibul man mono pe ocobbe i yo me aura mada?

[Lok ma tye piny]

[Dayagram/Cal ma tye i pot karatac 198]

(Pi kit ma kiyubo ni onen kwede, nen buk)

‘CABIT PYERABIRO’

Mwaki 490

Cabit 7 Cabit 62 Cabit 1

(Mwaki 49) (Mwaki 434) (Mwaki 7)

Yecu Kricito​—Meciya ma Kiciko Pire

ME KONYOWA wek wange Meciya, Lubanga Jehovah otiyo ki lunebi mapol me Baibul me miyo ngec matut i kom nywal, tic, ki to pa Lalar ma kiciko pire-ni. Lok pa lunebi me Baibul magi ducu gucobbe i kom Yecu Kricito. Lok magi ducu gubedo atir i yo me aura mada. Me laporre, kong wanenu lok pa lunebi mogo manok ma guloko i kom nywal ki dongo pa Meciya.

Lanebi Icaya oloko con ni Meciya onongo bibedo lakwar Kabaka Daudi. (Icaya 9:7) Ada kinywalo Yecu i dogola pa Daudi.​​—Matayo 1:1, 6-17.

Lanebi pa Lubanga mukene, Mika, oloko con ni latin man mot mot bibedo laloc dok ni kibinywale i “Beterekem Eprata.” (Mika 5:2) I kare ma kinywalo Yecu, onongo tye boma aryo i Icrael ma kilwongo ni Beterekem. Acel onongo tye cok ki Najaret i tung kumalo me lobo meno, ki dok mukene-ni onongo cok ki Jerucalem ma tye i Judaya. Beterekem ma tye i nget Jerucalem-mi onongo con kilwongo ni Eprata. Kinywalo Yecu i boma meno, man orwatte ki lok ma lanebi-ni oloko con!​​—Matayo 2:1.

Lok pa lanebi mukene me Baibul onyuto con ni kibilwongo Wod pa Lubanga “nia ki i Ejipt.” Kitero Yecu ma onongo latin matidi i Ejipt. Kidwoke cen inge to pa Kerode kun cobo lok pa lanebi-ni.​​—Kocea 11:1; Matayo 2:15.

I lok ma kicanogi i pot karatac 200, ginacoya ma kiketo i te wilok ma tye ni “Lok pa Lunebi” tye ki lok matut ma mako Meciya. Tim ber ipor lok magi ki ginacoya ma kiketogi ite wilok ma tye ni “Cobbene.” Timo meno bijingo niyeni ni Lok pa Lubanga kara obedo lok ada.

Ka itye ka ngiyo ginacoya magi, pe wi owil ni lok pa lunebi magi kicoyogi mwaki miya mapol ata ma peya kinywalo Yecu. Yecu owaco ni: “Lok ducu ma gicoyo i koma i cik pa Moses, ki i lunebi, ki i jabuli myero ocobbe kakare.” (Luka 24:44) Kit ma itwero mokone ki i Baibulli, gin ducu gucobbe​​—kore ki kore!

[Cart i pot karatac 200]

LOK PA LUNEBI MA MAKO MECIYA

JAMI MA OTIMME LOK PA LUNEBI COBBENE

Kinywalo ki i kaka pa Juda cakki 49:10 Luka 3:23-33

Pe guketo niye i kome Icaya 53:1 Jon 12:37, 38

Lok Ada ma Tye i Kom Won, Wod, ki Cwiny Maleng

JO MA giye i kom pwony me Triniti giwaco ni Lubanga tye opokke iye adek​—Won, Wod, ki Cwiny Maleng. Ni ngat acel acel ki i kin jo adek-ki rom aroma ki luwote-ni, ki ni gin ducu gubedo won twer ducu, dok gitye labongo acakkigi. Pi meno, ma lubbe ki pwony me Triniti, Won obedo Lubanga, Wod bene obedo Lubanga, ki Cwiny Maleng bene obedo Lubanga, ento kun nongo bedo Lubanga acel keken.