Tika dong ipenye ki lapeny magi? Ka ada, ci nge ni pe itye keni. Dano mapol i loboni gitye ka penye ki lapeny ma pigi tego i kwo. Tika itwero nongo lagamgi?

Dano milion mapol giwacci, “Twere!” Pingo? Pien gunongo lagam ma yengogi pi lapenygi ki i Baibul. Tika imito ngeyo gin ma Baibul waco? Ka imito ci itwero nongo adwogi maber ki i yub me nono me kwano Baibul ma Lucaden pa Jehovah gitye kwede.a

Ki lok ada, ka odok ilok me kwano Baibul, jo mukene giwacci: “Atye ki tic mapol.” “Niang Baibul tek.” “Pe amito rwako nguta i gin ma pe aniang.” Ento jo mukene dok tamgi pat. Gin gitiyo ki kare meno me niang pwony me Baibul. Nen kong labol magi manok-ki:

• “Abedo ka lega i Katoli, Purutanti, Sikh, Budda, ki dong akwano lok me dini i univaciti. Kadi bed kumeno, lapenya mapol madok i kom Lubanga pe kigamogi. I nino mo acel, Lacaden pa Jehovah obino i pacona. Pien lagam ma en omiyo ki i Baibul ogudo cwinya adada, man oweko aye ni kikwan Baibul kweda.”​—Gill, England.

• “Abedo ki lapeny mapol madok i kom kwo, ento pe ayeng ki lagam ma lakwata omiyo. Ma ka meno, Lacaden pa Jehovah mo ogamo lapenya kun tiyo ki Baibul. I kare ma en openya ka amito pwonyo jami mukene mapol, aye cutcut.”​—Koffi, Benin.

• “Onongo atye ki miti madit adada me ngeyo gin ma timme ka ngat moni oto. Onongo aye ni meno jo muto gitwero wano jo ma kwo, ento bene onongo amito ngeyo gin ma Baibul pwonyo. Pi meno, acako kwano Baibul ki larema mo ma onongo tye Lacaden.”​—José, Brazil.

• “Atute me kwano Baibul ento onongo pe atwero niang. Lacen, Lucaden pa Jehovah gubino i pacona ci gutita kore ki kore lok mapol ma lunebi gucoyo i Baibul. Man oweko abedo ki miti me pwonyo jami mapol.”​—Dennize, Mexico.

• “Abedo ka tamo ka ada Lubanga paro pira. Pi meno, amoko tamma me lega bot Lubanga ma oweko kicoyo Baibul. Orwone Lucaden gubino i pacona, ci aye ni kikwan Baibul kweda.”​—Anju, Nepal.

Lok magi gipoyo wiwa i kom lok ma Yecu owaco ni: “Gitye ki gum [yomcwiny] jo ma gingeyo ni gin lucan i lok me cwiny.” (Matayo 5:3) Ada, dano kicweyogi ki miti me ngeyo Lubanga. Lubanga keken aye twero cobo miti meno, dok en timo man kun tiyo ki Baibul.

Pi meno, kwano Baibul ki ngat moni kwako gin ango? Adwogi maber ango ma itwero nongone ki iye? Lapeny magi kibigamogi i pwony ma lubo man.

Lucaden pa Jehovah gingene adada pi ticgi me tito kwena i dye lwak. Ento tika onongo i ngeyo ni watye ki yub me kwano Baibul ki dano i twok lobo-ni lung?

I 2014, Lucaden makato 8,000,000 kulu i lobbe 240 gubedo ka kwano Baibul ki dano ma welgi cokcok romo 9, 500,000 dwe ki dwe.a Ada, wel jo ma watye ka kwano Baibul kwedgi kato wel dano ma i lobbe 140!

Wek tic man ocobbe kakare, Lucaden pa Jehovah gigoyo cokcok bilion acel ki nucu Baibul, bukke, magajin, ki dong bukke mukene ma gikonyo me kwano Baibul i leb ma romo 700 mwaka ki mwaka! Tic man me goyo bukke ma pire tek tutwal-li konyo dano mapol wek kikwan Baibul kwedgi i leb ma gimito.

LAGAM PI LAPENY MA POL KARE KIPENYOGI MADOK I KOM YUBWA ME KWANO BAIBUL KI DANO

Yub man me kwano Baibul ki dano-ni woto nining?

Wayero pwony mapat me Baibul dok wanyamo wang Baibul mogo ma giloko i kom pwony meno. Me labolle, Baibul gamo lapeny mogo calo: Lubanga en anga? Kite tye nining? Tika nyinge tye? En bedo kwene? Tika waromo nyikke cok bote? Peko ma tye aye ngeyo ka ma lagam pi lapeny magi gitye iye ki i Baibul.

Me konyo dano wek gunong lagam pi lapeny magi, pol kare watiyo ki buk me Baibul Mono Ada Pwonyo Gin Ango?b ma tye ki pot karatac 224. Buk man kicoyo tutwalle me konyo dano wek guniang pwony ma pigi tego me Baibul. Man kwako lok i kom Lubanga, Yecu Kricito, gin mumiyo dano deno can, nicer, lega ki dong mukene mapol.

Kwene ki dok awene ma kwan man romo timme iye?

Kwan man romo bedo i cawa kacel ki kabedo ma itamo ni opore kwedi.

Kwan man ri pi cawa ma rom mene?

Dano mapol gikwanyo cawa acel nyo makato cabit ki cabit wek kikwan Baibul kwedgi. Ento kwanne romo tero cawa manok nyo malac. Wakwano kwedi i cawa ma pe balo yubbi. Jo mukene gikwano pi dakika 10 nyo 15 i cabit ki cabit.

Culle tye ciling adi?

Kwan man kacel ki bukke ma watiyo kwedgi gitye me nono. Man rwatte ki lok ma Yecu owaco bot lupwonyene ni: “Wun wugamo nono labongo cul mo, wumi bene nono labongo cul mo.”​—Matayo 10:8.

Tero kare ma rom mene?

Kiromo kwan kwedi nio ka dong pe imito. Buk me Baibul Mono Ada Pwonyo Gin Ango? tye ki dul 19. Itwero kwano dul mo keken nyo ducu i cipid ma imito.

Tika mitte ni adok Lacaden pa Jehovah?

Pe. Wangeyo ni ngat acel acel tye ki twero me yero gin ma en myero ebed ki niye iye. Ento, dano ma giniang pwony ma pigi tego me Baibul giromo moko tamgi me kwano Baibul.

Atwero nongo ngec mukene mapol kikwene?

Kabedowa me Intanet me jw.org miyo ngec matir madok i kom niye kacel ki tic pa Lucaden pa Jehovah.

Aromo penyo pi kwano Baibul nining?

• 

  Peny ki i www.pr2711.com/ach.

• Coo kun itiyo ki adrec ma kiketo i pot karatac 2 i magajin man.

• Peny Lucaden pa Jehovah ma gibedo cok kwedi.