• Angagi ma Gubedo Lucaden pa Jehovah?
    Wi Lubele—2015 | Sektemba 1
    • Dako mo tye ka neno Lucaden pa Jehovah ma gitye ka miyo caden ki lalor bukke i ticwa me pwony

      LOK MA I POK NGEYE

      Angagi ma Gubedo Lucaden pa Jehovah?

      “Wan ki Mike onongo wangene pi mwaki mapol. En obedo Lacaden pa Jehovah. Ento kare ducu onongo pe aniang lok i kom dinine. Jehovah mono en anga? Pingo Lucaden pa Jehovah pe gikwero nino madongo? Mike tika tye i dini goba?”—Becky, California, lobo Amerika.

      “I kare ma jiranina ocako kwano Baibul ki Lucaden pa Jehovah, abedo ka penye kekena ni: ‘Nying man ni Lucaden pa Jehovah-ni te lokke ngo? Nying man pud dong rac ya pien pe opore me bedo nying dini!’”—Zenon , Ontario, lobo Canada.

      “An ki dakona atamo ni Lucaden pa Jehovah gubino me nywarowa kit ma pe wawoto kwede i lega-ni. Kit ma onongo dong wangeyo ni dini mogo madongo gipe ki lok ma twero konyowa-ni, dong twere nining ki Lucaden pa Jehovah me bedo ki jami mogo ma twero konyowa.”—Kent, Washington, lobo Amerika.

      “Ki lok ada, onongo pe angeyo angagi ma jo magi gubedo ki gin ma nyingi cung pire.”—Cecilie , Esbjerg, lobo Denmark.

      Romo bedo ni inenogi gitye ka pwony i doggola ki doggola nyo i dye lwak, poko bukke ma jenge i Baibul, ki dong cako kwano Baibul me nono ki dano. Oromo bedo ni ngat acel i kingi aye ma omini magajin man. Kadi bed kumeno, pud itwero penye ni angagi ma gubedo Lucaden pa Jehovah. Twero bedo ni tammi rwatte ki pa jo ma kiloko i komgi malo-ni.

      Iromo nongo lagam kikwene ka ce itye ka penye ki lapeny macalo magi? In itwero pwonyo jami ma Lucaden pa Jehovah giye nining, kit ma ginongo ki cente me cobo ticgi me pwony ki gwoko nyo gedo odi me legagi, ki dong pingo gibino i paconi ki dok giloko kwedi i dye lwak?

      Cecilie, lamego ma waloko i kome malo-ni owaco ni: “Akwano lok mapol i kom Lucaden pa Jehovah ki i Intanet.” En omedo ni: “Awinyo lok goba mogo kacel ki jami maraco mapol ma kiloko i komgi. Macalo adwogine, acako bedo ki tam marac i kom Lucaden pa Jehovah.” Ento lacen, en oloko ki ngat acel i kin Lucaden pa Jehovah en kikome ci obedo ki yomcwiny pien kigamo lapeny mapol ma en onongo tye kwede.

      Tika imito nongo lagam matir ma lubbe ki lapeny ma itye kwede i kom Lucaden pa Jehovah? Wacuko cwinyi me nongo lagam ki ka ma genne—ki bot Lucaden pa Jehovah, jo ma gigoyo magajin man. (Carolok 14:15) Wageno ni pwony ma gilubo man gibikonyi me niang angagi ma wan wabedo, gin ma waye ki dong tic ma watimo.

  • Lucaden pa Jehovah Gubedo Kit Dano Ango?
    Wi Lubele—2015 | Sektemba 1
    • Lucaden pa Jehovah ma gua ki i rok mapat pat gitye ka motte i Ot me Ker

      LOK MA I POK NGEYE | ANGAGI MA GUBEDO LUCADEN PA JEHOVAH?

      Lucaden pa Jehovah Gubedo Kit Dano Ango?

      Wan wabedo dini ma tye i twok lobo ducu dok pe waribbe ki dini mukene. Kadi bed ni gang kalwa madit tye i lobo Amerika, pol pa Lucaden pa Jehovah gibedo i lobbe mapol mapat pat. Ki lok ada, welwa kato milion aboro kulu dok wapwonyo dano ki Baibul i lobbe makato 230. Watimo man ma lubbe ki lok ma Yecu owaco ni: “Lok man me kwena maber me ker pa Lubanga gibitito i wi lobo ducu.”—Matayo 24:14.

      Ka mo keken ma wakwo iye, wan walubo cik me kabedo meno. Kadi bed kumeno, pe waluto wiwa i lok me wibye. Watimo man pien walubo lok ma Yecu owaco ni Lukricitayo ‘pe jo me lobo.’ Pi meno, wan pe waluto wiwa i lok me wibye nyo wadonyo i lweny mo keken. (Jon 15:19; 17:16) I kom lok, i kare me Lweny me II me Wi Lobo, Lucaden pa Jehovah mapol kitweyogi i buc, kiunogi ki dong marac loyo kinekogi pienni gukwero cwako tung ka mo keken. Dano mo ma otiyo macalo bicop i lobo Germany i kare mukato angec ocoyo ni: “Giromo waco labongo lewic ni gin keken aye gukwero timo jami ma turo cik pa Lubanga i kare ma Nazi Germany (1933-45) tye ka loc.”

      “[Lucaden pa Jehovah] gikwo ma lubbe ki cik me Baibul. Watwero tic ki kodi jo magi ma gigenne-ni kadi wa i opic mogo madongo me wibye—ento pe gubiye dog tic macalo meno. . . . Gilubo cik pa gamente ento giye ni Ker pa Lubanga keken aye bicobo peko ducu ma dano gitye ka denone.”—Nová Svoboda gajeti me lobo Czech Republic.

      Kadi bed kumeno, wan pe wakanne akana. Yecu olego bot Lubanga pi lulub kore ni: ‘Pe alego ni myero ikwanygi woko ki i lobo.’ (Jon 17:15) Pi meno, iromo nenowa ka watye ka tic, wilo jami, nyo wacito i cukul.

  • Gin Ango ma Lucaden pa Jehovah Giye Iye?
    Wi Lubele—2015 | Sektemba 1
    • Luot ma gin Lucaden pa Jehovah gitye ka kwano Baibul ki lutinogi

      LOK MA I POK NGEYE | ANGAGI MA GUBEDO LUCADEN PA JEHOVAH?

      Gin Ango ma Lucaden pa Jehovah Giye Iye?

      Lucaden pa Jehovah giye ni: “Ginacoya ducu ma yam gicoyo, gicoyo pi teko pa cwiny pa Lubanga. Konyo.” (2 Temceo 3:16) Wan watiyo ki Baibul me ngeyo lok i kom Lacwecwa ki dok me kwo kwo ma tye ki tyen lok.

      Baibul waco ni: “Wek gunge ni, in keni aye ma nyingi Rwot [Jehovah], in aye Ngat Mamalo Twal ma loyo wi lobo-ni ducu.” (Jabuli 83:18) Pi meno, waworo Lubanga Jehovah keken dok wan macalo Lucadenne watute wek dano gunge nyinge.—Icaya 43:10-12.

      Macalo Lukricitayo, wan waye ni Yecu “Wod pa Lubanga,”a ma obino i lobo ci odoko Meciya. (Jon 1:34, 41; 4:25, 26) I nge tone, kicere me kwo i polo. (1 Jo Korint 15:3, 4) Lacen, en odoko Kabaka me Ker pa Lubanga. (Niyabo 11:15) Ker meno aye gamente kikome ma bikelo Paradic i lobo. (Daniel 2:44) Baibul waco ni: “Jo mamwol aye gibicamo lobo; gibibedo ki yomcwiny pi lonyo madwong ma gibilimo.”—Jabuli 37:11, 29.

      “Ka guwano ki i Baibul, gin giye ni Lubanga nongo tye ka lok kwedgi. Ka peko odiyogi, gikwanyo lok pa Lubanga ci giyenyo yo me cobo pekki magi ki iye. . . . Ki botgi, Lok pa Lubanga pud kwo.”—Lok pa latela dini Katoli, ma nyinge Benjamin Cherayath, ma kicoyo i gajeti me Münsterländische me lobo Germany

      Lucaden pa Jehovah giye ni cik ma igi lac me Baibul romo konyo dano kadiwa i kareni. (Icaya 48:17, 18) Pi meno, walubo cik magi ma igi lac-ci ki cwinywa ducu. Me labolle, wan pe wamato taa nyo watiyo ki yadi mogo calo jayigi-ni pien Baibul cikowa me gwokke ki tim mogo ma nyweno tamwa ki dok cido komwa. (2 Jo Korint 7:1) Wagwokke bene ki tim mogo ma Baibul okwero lajwac calo mero, tim tarwang ki dong kwalo jami.—1 Jo Korint 6:9-11.

      a Baibul bene waco ni Yecu “Wod acel keken pa Lubanga” pien kikwongo cweyo en dok Jehovah ocweye en kikome.—Jon 3:18; Jo Kolocai 1:13-15.

  • Wanongo Cente Kikwene me Cobo Ticwa?
    Wi Lubele—2015 | Sektemba 1
    • Ngat mo ma tye ka bolo mot i canduk me bolo mot

      LOK MA I POK NGEYE | ANGAGI MA GUBEDO LUCADEN PA JEHOVAH?

      Wanongo Cente Kikwene me Cobo Ticwa?

      Mwaka ki mwaka,wagoyo dok wapoko Baibul kacel ki bukke ma jenge i Baibul milion mapol adada. Wagedo dok watiyo ki jang gang kal ki macin me goyo bukke i twok lobo lung. Dano mapol girwatte i kacokke mapat pat i kabedo me woro ma kilwongo ni Odi me Ker ma kiyubogi maber. Anga ma culo pi jami magi ducu?

      Mot ma ngat moni miyo kun a ki i cwinye aye teno kor ticwa. (2 Jo Korint 9:7) I 1879, kicoyo i magajin man me aryo ni: “Ngat ma bicung i nge Zion’s Watch Tower [kit ma onongo kilwongo kwede magajin man] aye JEHOVAH dok magajin man pe bilego cente ki bot ngat mo keken.” Ma naka yam pud kitye ka lubo lok man.

      Mot ma kibolo kicwalo atir i jang gang kalwa nyo i canduk me bolo mot ma tye i Odi me Ker mapat pat. Pe wapenyo jo ma gibino ka lega ni gumi acel me apar nyo wapenyogi ni gucul pi bino ka lega nyo pi bukkewa. Pe kiculowa pi cito ka tito kwena, pwony i kacokke, nyo gedo kabedo me woro. Yecu owaco ni: “Wun wugamo nono labongo cul mo, wumi bene nono labongo cul.” (Matayo 10:8) Jo ducu ma gitiyo i jang gang kalwa nyo i gang kalwa madit, ma man kwako Lukiko Madit pa Lucaden pa Jehovah pe kiculogi pien gitye i dini ma jone gitiyo tic pi kare malac.

      “Ma lubbe ki tic ducu ma Lucaden pa Jehovah gitimo, cente ducu ma kibolo cung i kom mot ma kibolo kun ngat acel acel moko ciling adi ma myero ebol ki dok awene.’”—European Court of Human Rights, 2011

      Mot ma gibolo bene kitiyo kwede i kabedo ma peko ma poto atura otimme iye. Lukricitayo me kare macon cwinygi obedo yom me nywako jami ma gitye kwede ki jo ma gitye i peko. (Jo Roma 15:26) Wakonyo bene gedo odi pa jo ma gitye i peko, kabedo me woro, wamiyo cam, bongngi ki dong kony me ot yat.

  • Pingo Watito Kwena?
    Wi Lubele—2015 | Sektemba 1
    • Lucaden pa Jehovah gin aryo gitye ka tito kwena i wang ticgi Two of Jehovah’s Witnesses preach in a residential area

      LOK MA I POK NGEYE | ANGAGI MA GUBEDO LUCADEN PA JEHOVAH?

      Pingo Watito Kwena?

      Pe tye tic mo ma pud dong pokowa loyo ticwa me tito kwena—watito kwena i ot ki ot, i dye lwak, ki dong ka mo keken ma dano tye iye. Pingo watimo tic man?

      Lucaden pa Jehovah gitito kwena me kelo deyo i kom Lubanga ki dok wek nyinge ongene. (Jo Ibru 13:15) Walubo bene cik ma Yecu omiyo ni: “Pi meno dong wuciti wucilok jo me rok ducu gudok jo ma luba, . . . wupwonygi me gwoko gin ducu ma dong atyeko cikowu kwede.”—Matayo 28:19, 20.

      Medo i kom meno, wan wamaro luwotwa. (Matayo 22:39) Ki lok ada, wangeyo ni pol pa dano gitye ki dinigi dok pe ni dano ducu gijolo kwena ma watito-ni. Kadi bed kumeno, watamo ni pwony me Baibul laro kwo pa dano. Meno aye gin mumiyo ‘pe waweko pwonyo dano ki tito lok me kwena maber ni Yecu en aye Kricito,’ kit ma Lukricitayo me cencwari me acel gutimo kwede-ni—Tic pa Lukwena 5:41, 42.

      Antonio Cova Maduro ma okwano lok i kom kit ma dano gikwo kwede ocoyo lok i kom “kit ma Lucaden pa Jehovah gitute kwede kacel ki pekki ma giwok ki iye . . . , wek lok me ginacoya oo bot dano ma i twok lobo lung.”—gajeti me El Universal newspaper, lobo Venezuela

      Pol pa jo ma gikwano bukkewa pe gubedo Lucaden pa Jehovah. Dok bene dano milion mapol ma gikwano Baibul kwedwa gitye i dini mukene. Ento, cwinygi yom ni Lucaden pa Jehovah gitito kwena botgi.

      Ki lok ada, twero bedo ni itye ki lapeny mapol madok i kom Lucaden pa Jehovah. Wacuko cwinyi me nongo lagamme ki

      • Penyo ngat mo ma tye Lacaden pa Jehovah.

      • Cito i kabedowa me Intanet me www.pr2711.com.

      • Bedo tye i cokkewa ma kidonyo me nono iye dok bene kijolo dano ducu.

      Yecu oro lupwonnyene aryo ka tito kwena