1. Watwero tic ki lega ma kicoyo i Matayo 6:9-13 i ticwa me pwony nining?

DANO mapol giwaco ki wigi Lega pa Rwotwa. Ka watye i ticwa me pwony i ot ki to, pol kare waloko i kom lega man me tiro tam pa rwod ot wek okonye me niang ni Ker pa Lubanga gamente ma tye ada dok biloko lobo doko paradic. Nyo watwero lok i kom kwac me acel ma tye i lega man me nyuto ni Lubanga tye ki nyinge dok myero “giwor.”​—Mat. 6:9.

2. Wangeyo nining ni Yecu onongo pe mito ni wabed ka nwoyo lega man nyig lok ki nyig lok i cawa ducu ka watye ka lega?

² Tika Yecu onongo tye ka wacci omyero wabed ka nwoyo lega man nyig lok ki nyig lok kit ma kitimo kwede i dini pa Lukricitayo ata-ni? Pe. Ma peya Yecu omiyo lega man macalo lapor, en owaco ni: ‘Ka wutye ka lega pe wubed ka nwoyo lok acel-li.’ (Mat. 6:7) Lacen, en dok onwoyo lega man kun tiyo ki nyig lok mapat pat. (Luka 11:1-4) Pi meno Yecu okonyowa me niang jami ma myero waleg pigi ki dok mene ma pire tek ma myero wacak kwede. Ki lok ada, pore adada me wacone ni lega man tye macalo lapor.

3. Lapeny mene ma watwero penye kwedgi ka watye ka nyamo lega man ma tye macalo lapor-ri?

³ I pwony man ki ma lubo, wabinyamo jami ma onongo Yecu tye ka wacone i lega man ma tye macalo lapor-ri. Ka watye ka nyamone, penye kekeni ni, ‘Lega man ma tye macalo lapor-ri twero konya nining me yubo legana? Ma dong pire tek loyo, tika atye ka kwo ma lubbe ki lega man?’

“WONWA MA TYE I POLO”

4. Nyig lok man ni “Wonwa[-ni]” poyo wiwa i kom gin ango, dok i yo ma nining ma Jehovah tye ‘Won’ jo ma gitye ki gen me kwo i lobo?

⁴ Nyig lok man ni “Wonwa,” ento pe ni “Wora,” poyo wiwa ni meno watye i kin ‘omegiwa’ ma gimare i kingi adada. (1 Pet. 2:17) Man pud dong twon mot madit ya! Lukricitayo ma kiwirogi ma gitye ki gen me kwo i polo macalo litino pa Lubanga gilwongo Jehovah ni ‘Wonwa’ i yo ma dok pat. (Rom. 8:15-17) Lukricitayo ma gitye ki gen me kwo i lobo bene gitwero lwongo Jehovah ni ‘Wonwa.’ En aye Ngat ma Ominigi Kwo, dok en bene miyo jami ma mitte bot jo ducu ma giwore. Ka jo ma gitye ki gen me kwo i lobo-ni nongo dong gipe ki roc dok gugwoko gennegi i atematema me agikki, ci kibilwongogi ni lutino pa Lubanga.​—Rom. 8:21; Yabo 20:7, 8.

5, 6. Mot ango ma lunyodo gitwero miyone bot litinogi, ki dok gin ango ma myero latin acel acel otim ki mic man? (Nen cal ma tye i pot karatac 23.)

⁵ Lunyodo gimiyo bot lutinogi mot mamwonya ka gipwonyogi me lega ki dok neno Jehovah macalo Wonwa me polo ma paro pigi. Omego mo ma tye ka tic macalo laneno me adwol i lobo South Africa owaco ni: “Nicakke i kare ma wanywalo iye anyirawa, onongo alego kacel kwedgi kare ducu nikwanyo ka ape gang. Gin pol kare giwaco ni wigi pe po i kom nyig lok ma atiyo kwede i cawa me lega i dyewor. Ento, gin guwaco ni wigi po i kom kit ma nongo pinye oling kwede, kit ma lega bot Wonwa me polo obedo gin ma pire tek dok leng kwede kun gibedo ma cwinygi opye mot dok nongo giwinyo agonya. Ma dong gupwonyo kit me lega litap, acuko cwinygi me lega ki dwan malongo wek abed ki kare me winyo kit ma gitito kwede bot Jehovah tamgi ki dok kit ma giwinyo. Man aye obedo kare maber ma atwero ngeyo kwede ki gin ma onongo tye i cwinygi. Man okonya me pwonyogi kit me keto jami ma pigi tego i legagi wek obed ma niange.”

⁶ Pe obedo me ur pien lutino anyira pa omego-ni gumedde ki dongo i yo me cwiny. I kom kareni lutino magi ducu gitye i tic pi kare malac kacel ki coggi dok ma cwinygi yom. Pe tye mot mo maber loyo ma lunyodo gitwero miyo bot litinogi makato konyogi me bedo ki wat macok ki Jehovah. Ento moko wat macok ki Jehovah cung i wi ngat acel acel. Man kwako pwonyo kit me maro nying Lubanga, ki dok tic kwede i yo ma nyuto woro.​—Jab. 5:11, 12; 91:14.

“GIWOR NYINGI MALENG”

7. Mot ango ma jo pa Lubanga gitye kwede, ento ngo ma mitte ki botwa?

⁷ Pud dong watye ki twon mot madit ya pe me ngeyo nying Lubanga keken ento bene me bedo “lwak ma gilwongo ki nyinge.” (Tic 15:14; Ic. 43:10) Walego bot Wonwa me polo kun wawaco ni: “giwor nyingi maleng.” Lega i yo macalo man beteri me kwayo Jehovah wek okonyi pe me timo nyo loko gin mo ma kelo lewic i kom nyinge maleng. Pe wamito ni wabed calo jo mogo i cencwari me acel ma pe gubedo ka keto i tic gin ma gipwonyo ki jo mukene. Lakwena Paulo ocoyo botgi ni: “Giyeto nying Lubanga i kin Lurok piwu.”​—Rom. 2:21-24.

8, 9. Mi labol ma nyuto kit ma Jehovah miyo kwede ki mot bot jo ma gimito lonyo nyinge wek obed leng.

⁸ Wamito ni walony nying Lubanga obedo maleng. I kare ma cware oto atura, laminwa mo acel ma bedo i lobo Norway odong ki latin awobine ma tye ki mwaka aryo. En otito ni: “Man obedo kare ma anongo kwo tek mada. Abedo ka lega nino ducu, cokcok i nge cawa ki cawa pi kero me bedo ma cwinya tek wek Catan pe obed ki tyen lok me yeto Jehovah pienni pe amoko tam matir nyo pe abedo lagen. Onongo amito lonyo nying Jehovah wek obed maleng, ki dok onongo amito ni woda onen wonne i Paradic.”​—Car. 27:11.

⁹ Jehovah tika ogamo legane? En ogamo. Lamego man onongo kero ki kony i bedo ki omege kacel ki lumege. Lacen i nge mwaki abic, en onyomme ki laelda. Wode ma dong tye ki mwaka 20 ni bene dong onongo batija. Lamego-ni owaco ni, “cwinya yom adada, pien cwara okonya me gwoko woda.”

10. Gin ango ma mitte wek kilony nying Lubanga obed maleng pi naka?

¹⁰ Ngo ma mitte wek kilony nying Lubanga obed maleng pi naka dok labongo alano mo keken? Wek meno otimme, Jehovah myero okwany jo ducu ma gikwero twero me locce akaka. (Kwan Ejekiel 38:22, 23.) Gibikwanyo roc ma tye i kom dano motmot. Pud dong watye ka kuro kare meno ma dano kacel ki lumalaika ducu gibiketo deyo i kom nying Jehovah! Ka dong i agikki, Wonwa ma lamar-ri ‘bicoko jami ducu i te locce.’​—1 Kor. 15:28.

“KER MERI OBIN”

11, 12. I 1876, Jehovah okonyo Lukricitayo ada me niang gin ango?

¹¹ Ma peya Yecu odok i polo, lukwenane gupenye ni: “Rwot, i kare man en aye ibidwoko iye ker bot jo Icrael bo?” Lagam ma Yecu omiyo nyuto ni kare onongo peya oromo pigi me ngeyo awene ma Ker pa Lubanga bicako iye loc. En owaco ni lupwonnyene myero guket cwinygi i tic ma pire tek me tito kwena. (Kwan Tic pa Lukwena 1:6-8.) Pi meno, Yecu opwonyo lulub kore me kuro Ker pa Lubanga ma tye ka bino-ni. Meno aye gin mumiyo nicakke wa i kare pa lukwena, Lukricitayo gitye ka lega pi Ker-ri ni obin.

¹² Ma dong kare cok romo pi Yecu me cako loc i polo, Jehovah okonyo jone me niang mwaka ma loc meno bicakke iye kikome. I 1876, Charles Taze Russell ocoyo pwony mo acel i magajin ma kilwongo ni Bible Examiner. Pwony meno ma onongo wi lokke tye ni: “Kare pa Lurok: Bigik Awene?,” onyuto ni 1914 obedo mwaka ma pire tek. Pwony man otito ni “mwaka abiro” ma tye i buk pa Daniel-li rom aroma ki “kare pa Lurok” ma Yecu oloko pire-ni.a​—Dan. 4:16; Luka 21:24.

13. Ngo ma otimme i 1914, dok jami ma gubedo ka timme nicakke i kare meno gimoko gin ango?

¹³ I 1914, lweny otuge i kin lobbe ma gitye i Ulaya​—lweny man onya ci oromo wi lobo ducu. I kare ma lweny man cok gik i 1918, kec magwar otwenyo dano dok two aburu oneko dano mapol makato ma kinekogi i lweny man. Pi meno, ‘lanyut’ magi ma Yecu omiyogi me nyuto ni en dong etye ka loc macalo Kabaka manyen-ni, gucako cobbe. (Mat. 24:3-8; Luka 21:10, 11) Tye lanyut mapol ma moko ni ‘gimiyo lalukana’ bot Rwot Yecu Kricito i 1914. En “ocito woko kun loyo lweny.” (Yabo 6:2) En oryemo Catan kacel ki jogine ki i polo i kare ma otugu lweny i komgi ci obologi i lobo kany. Nicakke i kare meno, dano gucako neno kit ma lok man tye ka cobbe kwede: “Wun lobo ki nam, wubineno can malit atika, pien Ladot dong olor piny obino woko piny botwu ma tye ki akemo madwong, pien ngeyo ni karene tye manok!”​—Yabo 12:7-12.

14. (a) Pingo pud pire tek ni waleg wek Ker pa Lubanga obin? (b) Tic ango ma watye kwede me atima?

¹⁴ Lok ma kicoyo i Niyabo 12:7-12 konyowa me niang pingo jami maraco gucako timme i lobo i kare ma Yecu odoko Kabaka ma loyo Ker pa Lubanga. Yecu ma en aye Kabaka me Ker pa Lubanga ocako loc i dye lumonene. Ka peya en otyeko lwenye kun jwayo jami ducu maraco ki i lobo, pud wabimedde ki lega wek Ker pa Lubanga obin. Medo i kom meno, myero wakwo i yo ma lubbe ki lega meno kun bene wamedde ki tito kwena me Ker-ri. Yecu owaco ni: “Lok man me kwena maber me ker pa Lubanga gibitito i wi lobo ducu, me bedo caden bot rok ducu; ka dong lacen agikki piny bibino.”​—Mat. 24:14.

“GITI GIN MA IMITO I LOBO”

15, 16. Watwero kwo ma lubbe ki lega ma wakwayo ni miti pa Lubanga otimme i lobo kany nining?

¹⁵ Mwaki 6,000 angec, onongo kitimo miti pa Lubanga i lobo. Meno aye gin mumiyo Jehovah oloko ki yomcwiny madit i nge neno jami ducu ma en ocweyogi kun waco ni: “tye mabeco twatwal.” (Acak. 1:31) Nicakke i kare ma Catan ojemo iye, dano manok keken aye gutimo miti pa Lubanga i lobo. Ento watye ki mot madit i kareni me bedo kwo kun wanywako itimo tic ma Lucaden makato milion aboro kulu gitye ka timone kun gilego ni miti pa Lubanga otimme i lobo dok bene gitute me kwo ma lubbe ki legagi. Gikwo i yo ma yomo cwiny Lubanga ki dok gitiyo ki mit kom i ticgi me loko dano me doko lupwonnye.

¹⁶ Me labolle, laminwa mo ma kibatija i 1948, dok onongo tiyo calo lamiconari i lobo Afrika owaco ni: “Ma lubbe ki lega ma ki miniwa macalo labol, kare ducu onongo alego ni jo ducu ma gitye ki miti me pwonyo lok ada myero ki oo botgi dok bene kikonygi me ngeyo Jehovah ma peya agikki piny oo. Medo i kom meno, ka ayubbe me miyo caden bot ngat moni, kong alego bot Jehovah pi ryeko wek atit bote lok i yo ma gudu cwinye. Ki dong ma dok i kom jo ma gitye ki miti ma kio botgi, alego ni Jehovah ogo laane i kom tutewa me konyogi.” Lamego man ma mwakane tye 80 ni obedo ki kare me konyo jo mapol me ngeyo Jehovah. Tika itwero tam i kom utmegiwa mogo ma guteggi ma gitye ka tute ki mit kom itiyo miti pa Jehovah?​—Kwan Jo Pilipi 2:17.

17. Iwinyo nining ma lubbe ki gin ma Jehovah bitimone i kare me anyim pi dano ki dong lobo?

¹⁷ Nikwanyo ka Jehovah ojwero lumone ducu ki i lobo, pud wabimedde ki lega wek mitine otimme. I ngeye, wabineno ka lobo-ni doko paradic dok dano bilion mapol kibicerogi. Yecu owaco ni: “Pe wuur lok man; pien kare bibino ma jo ducu ma tye i lyel biwinyo iye dwane [Yecu], ci gibikatti woko.” (Jon 5:28, 29) Man pud dong bibedo kare me yomcwiny adada ka wabijolo jowa me amara ma kicerogi! Lubanga ‘bijwayo pig wangwa woko ducu.’ (Yabo 21:4) Pol pa jo ma kibicerogi-ni gitye “jo ma kitgi pe atir,” ma gukwo dok guto labongo pwonyo lok ada i kom Lubanga Jehovah gin ki Wode. Bibedo twon mot madit atika me pwonyo jo ma kibicerogi-ni ki ngec madok i kom miti kacel ki yub pa Lubanga wek gubed ma gupore me nongo “kwo ma pe tum.”​—Tic 24:15; Jon 17:3.  

18. Miti ma pigi tego ango ma dano gitye kwedgi?

¹⁸ Ka Ker pa Lubanga obino, ci bilonyo nying Lubanga doko leng dok dano ducu ma i lobo gibiworo Jehovah ma nongo gunote kacel. Pi meno, lagam pi kwac adek mukwongo ma tye i lega ma Yecu omiyo macalo lapor-ri bicobo miti ma pigi tego ma dano gitye kwede. Ki tungcel, watye bene ki miti angwen mukene ma kitito pigi i lega ma Yecu omiyo macalo lapor-ri. Miti angwen magi kibinyamogi i pwony ma lubo man.

1-3. Pingo laminwa oniang labongo akalakala ni Jehovah ngeyo gin ma emito?

LANA wiye pe biwil i kom gin mutimme i nino mo acel i kare ma olimo lobo Germany i 2012 i kare me oro. En owinyo ni Lubanga ogamo jami aryo ma elego pigi. En olego lega me acel i kare ma tye ka wot ki gar me cito i bar [lek] dege. Lamego-ni olego Jehovah ni myero oyabbe yo wek etit kwena. En olego lega me aryo i kare ma oo i bar dege ci oniang ni wotte kikobo orwone. Lana openyo Jehovah ni okonye pien centene onongo dong cok tum woko dok onongo mito nongo ka mo ma myero ebut iye i dyewor meno.

² I kare ma Lana peya otyeko legane, en owinyo ka ngat mo penye ni, “Lana, itye ka timo gin ngo kany?” Man obedo awobi mo ma gukwano kwede i cukul acel. Awobi-ni onongo tye kacel ki minne gin ki dadane (tatere), ma gitye ka lwokke i wotte me cito i South Africa ki dege. I kare ma oniang peko pa Lana, Elke ma obedo min awobi-ni olwonge me bedo i pacogi. Elke gin ki minne gugwoko Lana dok gubedo ka penye lok i kom niyene ki dong ticce macalo ngat ma tye i tic pi kare malac.

³ I nge camo cam me odiko, Lana ogamo lapenygi kun tiyo ki Baibul dok ogamo ngec madok i komgi wek ngat mo omedde ki kwan kwedgi. Lana odwogo paco ci omedde ki tic macalo painia marii. En oniang ni ngat ma ‘gamo lega-gu ducu’ onongo ngeyo gin ma emito dok bene okonye.​—Jab. 65:2.

4. Miti macalo mene ma wabinyamogi i pwony man?

⁴ Ka peko mo oturowa atura calo ngok gwok, waromo lega labongo ayela pi kony dok Jehovah cwinye yom me gamo lega pa ngat ma tye lagen bote. (Jab. 34:15; Car. 15:8) Ento, ka walwodo lok i kom lega ma Yecu omiyo macalo lapor-ri, wabinongo ni tye jami mapol ma pigi tego ma wamitogi ma i kine mukene wiwa wil woko i komgi. Me labolle, tam kong i kom jami mukene ma wamitogi i yo me cwiny ma kitito pigi i kwac adek ma gugiko i lega ma tye macalo lapor-ri. Tika tye jami mukene ma waromo timogi wek wakwo ma lubbe ki kwac me angwen, madok i kom camwa me nino ducu?​—Kwan Matayo 6:11-13.

“MIWA TIN CAMWA ME TIN”

5, 6. Pingo Yecu opwonyowa me penyo pi “camwa” me tin kadi bed ni watye ki cam muromo?

⁵ Yecu opwonywa ni omyero waleg pi “camwa” ento pe pi “camma” me tin. Victor, laneno me adwol ma bedo i Afrika owaco ni: “Pol kare apwoyo Jehovah ki cwinya ducu ni an kacel ki dakona pe wabedo ki par mapol ka ce wabicamo orwone, nyo ka ngat mo biculo ot ma wapango. Omegiwa ki lumegiwa gigwokowa nino ducu. Ento legana tye ni jo ma gikonyowa-ni myero gubed ki kero me lweny ki can cente ma diyogi.”

⁶ Ka watye ki cam ma romo terowa pi nino mapol, watwero tamo pi omege ma gitye i can nyo peko. Omyero pe waleg pigi keken ento bene watim jami ma lubbe ki legawa. Me labolle, waromo nywako jami ma watye kwede ki luye luwotwa ma gimito kony. Watwero bene miyo motwa pi konyo tic ma kwako wi lobo ducu kare ki kare, kun nongo wangeyo ni cente meno kitiyo kwede i yo maber.​—1 Jon 3:17.

7. Yecu opwonyowa nining pe me ‘bedo ki par mapol pi nino ma diki’?

⁷ I kare ma Yecu tye ka lok i kom camwa me tin, nen calo en onongo tye ka lok i kom jami ma wamito i cawa meno. Pi meno en omedde ki tito kit ma Lubanga ruko kwede ki ature kun waco ni: “En pe birukowu makato, wun jo ma niyewu nok? Pi meno pe wubed ki par mapol kun wuwacci, . . . ‘Wabiruko ango?’” En odolo te lokke kun nwoyo kit ma tam ma emiyo-ni pire tek kwede ni: “Pe wubed ki par mapol pi nino ma diki.” (Mat. 6:30-34) Man nyuto ni ma ka bedo jo ma maro jami me kom, omyero wayeng ki jami ma watye kwedgi nino ducu. Jami magi kwako ot, nongo tic wek wagwok jo me odiwa, ki dong ryeko me moko tam matir ma lubbe ki yotkom. Ka ni waleg pi jami magi keken, ci man nyuto ni nongo jami me kom tye gin ma pire tek loyo botwa. Watye ki jami ma pigi tego i yo me cwiny ma wamitogi.

8. Lok ma Yecu owaco i kom camwa me tin poyo wiwa i kom gin ango? (Nen cal ma tye i pot karatac 28.)

⁸ Lok ma Yecu owaco i kom camwa me tin-ni myero opo wiwa ni wamito cam me cwiny. “Dano pe bibedo kwo ki kwon keken, ento bedo kwo ki lok ducu ma a ki i dog Lubanga.” (Mat. 4:4) Pi meno, omyero wamedde ki lega ni Jehovah bimedde ki pitowa ki cam me cwiny i karene kikome.

‘WEK BANYAWA’

9. I yo ango ma balwa obedo ‘banya’?

⁹ Pingo Yecu otiyo ki nyig lok ni ‘banya’ kun i kabedo mukene otiyo ki “balwa”? (Mat. 6:12; Luka 11:4) Mwaki 60 mukato angec, Wi Lubele otito ni: “Ka watimo bal, ci nongo watye ki banya madit ma myero wacul bot Lubanga. . . . Lubanga romo penyo pi kwowa ki botwa ka watimo bal. . . . En twero kwanyo kucce ki botwa, ma te lokke ni wabalo watwa kwede. . . . Omyero wabed luwiny me nyuto marwa pire; dok ka watimo bal ci nongo pe waculo banya me nyuto mar bote pien Lubanga pe maro bal.”​—1 Jon 5:3.

10. Gin ango ma twero weko Jehovah timo kica pi balwa, dok man myero omi wawiny nining?

¹⁰ Cwinywa pud dong yom adada ni Jehovah ocwalo Yecu me to macalo ginkok wek kitim kica pi balwa! Kadi bed ni Yecu omiyo ginkok man mwaki 2,000 mukato angec, omyero water ni obedo gin ma pire tek macalo mic ma pud kimiyo i kareni. “Gin kok me kwo pa dano welle dit mada” ma pe tye gin mo keken ma dano ma tye ki roc romo timone piwa me culone. (Kwan Jabuli 49:7-9; 1 Petero 1:18, 19.) Ada, omyero wamedde ki pwoyo Jehovah pi mic man ma pire tek tutwal-li. Medo i kom meno, nyig lok ni “balwa” ento pe “balla,” myero opo wiwa ni jo ducu ma giworo Jehovah gimito ginkok man. Ki lok ada, Jehovah mito ni pe watam pi wat ma tye i kinwa ki en keken ento pa jo mukene bene, ma man kwako wa jo ma gutimo bal i komwa. Pol kare, bal magi pe gidongo ma man giminiwa kare me nyuto ni ada wamaro utmegiwa dok watye atera me timmigi kica kit ma Lubanga otimiwa kica pi balwa-ni.​—Kol. 3:13.

11. Pingo pire tek ni wabed ki cwiny me timo kica?

¹¹ Tye me cwercwiny ni wan macalo dano ma gitye ki roc, i kine mukene wamako luwotwa i cwinywa. (Levi 19:18) Ka watito lokke ka maleng, ci jo mukene giromo cako cwakowa dok man twero kelo apokapoka i kacokke. Ka waye ni kodi gin ma kit meno omedde, man nyuto ni nongo wape ki pwoc pi kica pa Lubanga kacel ki ginkok pa Yecu. Wonwa me polo pe bitimiwa kica pi ginkok pa Wode ka pe wanyuto cwiny me timo kica. (Mat. 18:35) Yecu oloko cutcut i kom timo kica i nge miyo lega ma tye macalo lapor-ri. (Kwan Matayo 6:14, 15.) Me agikki, wek wanong adwogi maber ki i kica pa Lubanga, omyero wagwokke pe wawek timo bal madongo odok kitwa. Miti ma watye kwede pe me weko timo bal odok kitwa cwalowa dok i kwac mukene.​—1 Jon 3:4, 6.

“PE ITERWA I ABITA”

12, 13. (a) Ngo mutimme i kom Yecu i nge kare manok keken ma kibatija en iye? (b) Pingo omyero pe wakok i kom jo mukene ka wapoto i atematema? (c) Gin ango ma Yecu ocobo pienni ogwoko gennene nio wa i to?

¹² Tamo gin mutimme i kom Yecu i nge kare manok keken ma kibatija en iye romo konyowa me niang kit ma kwac man ni, “pe iterwa i abita[-ni]” pire tek kwede. Cwiny maleng pa Lubanga otero Yecu wa i dye tim. Pingo? “Wek Catan obite.” (Mat. 4:1; 6:13) Tika man myero omi wabed ki ur? Pe wabedo ki ur ka waniang tyen lok mumiyo Lubanga ocwalo Wode i lobo. Meno otimme me cobo pyem ma obedo tye i kare ma Adam gin ki Kawa gukwero twero me loc pa Lubanga. Kare onongo mitte wek kigam lapeny mapol. Me labolle, tika onongo tye gin mo marac i kit ma Lubanga ocweyo kwede ki dano? Tika onongo twere pi ngat ma pe ki roc me ilo malo twero me loc pa Lubanga kadi bed tye i lyeto ma a ki bot “Larac”? Tika dano onongo gibibedo ki kwo maber ka gipe i te loc pa Lubanga kit ma Catan owaco kwede-ni? (Acak. 3:4, 5) Gamo lapeny magi mito kare dok binyuto bot cwec ducu ma giryek ni loc pa Jehovah keken aye bikelo adwogi mabeco.

¹³ Jehovah leng dok en pe bito ngat mo keken me timo gin marac. Ma ka meno, Larac-ci aye “Labit dano.” (Mat. 4:3) Larac-ci romo timo jami mogo ma ketowa i atematema. Ento, cung i wi ngat acel acel ka ce en biye ni Catan obite nyo pe. (Kwan Yakobo 1:13-15.) Yecu okwero cutcut bita ducu ki acel acel kun tiyo ki Lok pa Lubanga. Pi meno, Yecu oilo malo twero me loc pa Lubanga. Ento Catan bene pe oilo cinge. En okuro nio ka ‘kare mukene maber.’ (Luka 4:13) Yecu omedde ki kwero bita ducu pa Catan wek egwok gennene. Kricito omedde ki cwako twero me loc pa Jehovah kun bene nyuto ni dano ma pe ki roc twero gwoko genne kadi bed ni tye i atematema magwar. Ento, Catan pud temme me bwolo lulub kor Yecu kadi wa in bene.

14. Gin ango ma myero watim wek pe wadony i atematema?

¹⁴ Ma lubbe ki pyem ma kikelo i kom twero me loc pa Lubanga, Jehovah pud oye ni Catan oti ki loboni me bitowa. Lubanga aye pe bitowa. Kitungcel, en tye ki gen i komwa dok mito konyowa. Pien Jehovah woro kerowa me moko tam piwa kenwa, man oweko en pe gengowa ka wamito donyo i atematema. Myero watim jami aryo​—wabed atera i yo me cwiny dok bene wadi cwinywa i lega. Jehovah gamo legawa nining?

15, 16. (a) Atematema macalo mene ma myero wagwokke kwedgi? (b) Anga ma myero wakok i kome ka wadonyo i atematema?

¹⁵ Jehovah miniwa cwiny mere maleng ma twero jingo cwinywa ki dok konyowa me cung matek i atematema. Lubanga tiyo ki Lokke kacel ki kacokke me cikowa me gwokke ki i jami maraco calo tic ki cawawa, centewa, ki kerowa i yo marac. Espen gin ki Janne gikwo i lobo mo ma olony adada i Ulaya. Pi mwaki mapol gubedo painia marii i kabedo mo i lobogi ka ma can lutit kwena tye iye. I kare ma gunywalo latingi me acel, gugiko ticgi macalo painia woko, kombeddi ni dong gitye ki latin me aryo. Espen owaco ni “pol kare walego bot Jehovah wek pe wadony i atematema kit ma i kom kareni dong pe watwero tero cawa malac i ticwa me tiokraci kit ma onongo watimo kwede con. Walego bot Jehovah wek okonywa me bedo ki mit kom i jami me cwiny ki bene i ticwa me pwony.”

¹⁶ Atematema mukene ma dok onya tutwal i kareni aye neno cal ma tugo miti me buto. Ka wadonyo i atematema meno, ci pe myero wakok i kom Catan. Pingo? Pien Catan ki jone pe gitwero diyowa tektek me timo gin mo keken ma pe wamito. Jo mogo gudonyo i atematema ma kit meno pien i cawa ducu gibedo ka lwodo lok i kom jami maraco. Ento wan bene watwero kwerone kit ma omege alip mapol gutimo kwede.​—1 Kor. 10:12, 13.

“LARWA KI BOT LARAC-CI”

17. (a) Waromo kwo ma lubbe ki legawa ni myero kilarwa ki i cing Larac-ci nining? (b) Yweyo madit ango ma wabibedo kwede cokcok-ki?

¹⁷ Wek wakwo ma lubbe ki legawa ni meno ‘kilarwa ki bot Larac-ci.’ Omyero watute matek ‘pe me bedo jo me lobo pa Catan’ ki dok ‘pe me maro lobo kadi ki gin ma tye iye.’ (Jon 15:19; 1 Jon 2:15-17) Meno obedo gin ma mito tute kare ducu. Pud dong wabibedo ki yweyo madit ya ka Jehovah ogamo legawa man kun kwanyo Catan kacel ki lobone marac-ci woko! Myero wiwa opo ni i kare ma kibolo Catan woko ki i polo, en onongo ngeyo ni meno edong ki kare manok. Pi cwercwiny madit ma en tye kwede, man oweko en tye ka tute ki kerone ducu me temo turo gennewa. Pi meno, myero wamedde ki lega matek wek kilarwa ki i cing Larac-ci.​—Yabo 12:12, 17.

18. Me bwot ki i agikki me lobo pa Catan-ni, gin ango ma myero wamedde ki timone?

¹⁸ Tika imito kwo i lobo ma Catan pe iye? Ka tye kumeno, ci medde ki lega ni Ker pa Lubanga olony nying Lubanga ki dok mitine otimme i lobo kany. Bed ka kwayo Jehovah kare ducu wek ocob mitini i yo me cwiny ki me kom. Ada, mok tammi me kwo ma lubbe ki lega man ma tye macalo lapor-ri.