Lok pa Samuel, Teresa, ki Magdalene nyuto ni dano gilego pi tyen lok mapol mapat pat, mogo pigi tego ka iporo ki mukene. Jo mogo gilego ki cwinygi ducu ento mukene legagi gik i doggi keken. Ento, kadi bed gilego ni wek gikat peny i cukul nyo wek jo ma gicwako gulo tuko, Lubanga okonygi i kwogi me ot, nyo gilego pi tyen lok mapol mapat pat, dano milion mapol ata gitamo ni lega pire tek. Ki lok ada, kwed ma kitimo nyuto ni kadi wa jo ma gipe i dini mo keken gilego kare ki kare.

In tika ilego? Ka tye kumeno, ci ngo ma ilego pire? Kadi bed imaro lega nyo pe, iromo penye kekeni ni: ‘Lega mono konya ki ngo? Tika tye ngat mo ma winyo lega?’ Laco mo acel ma tye lacoc owaco ni lega tye “yat mo me cango two . . . obedo calo lok ki rec ma gigwoko paco i gilaci.” Ludaktari mogo bene gitye ki kodi tam ma kit meno, gin giwacci lega obedo “yo mukene me cango two.” Tika jo ma gilego gitimo gin mo ma konye pe nino ducu nyo kece ginongo adwogi maber?

Ento, Baibul wacci lega pe obedo mere calo yat mo me cango two. Baibul dok bene wacciwa ni tye ngat mo ma winyo lega ma kilego i yo matir dok pi jami ma mitte kikome. Tika man lok ada? Kong wanenu gin ma moko lok man.

Jo mogo gitamo ni lega obedo gin ma balo kare pa dano pien pe tye ngat mo ma winyo lega. Jo mukene gutemo lega ento gitamo ni pe kigamo legagi. Dano mo acel ma wacci Lubanga pe okati ki tam i kom anga ma etamo ni Lubanga obedo ento lacen olego ni: “Titta kong mung mo matidi.” Ento en owaco ni Lubanga “oling pe ogamo legane.”

Ki tungcel kono, Baibul cuko cwinywa ni Lubanga tye dok en winyo lega. Baibul owaco lok man bot jo mogo wacon ni: “Rwot [Jehovah] bitimowu kica ka ce owinyo kakowu; ka owinyo ci en bigamo dogwu.” (Icaya 30:19) Wang Baibul mukene waco ni: “Cwinye bedo yom i kom lega pa jo ma kitgi atir.”​—Carolok 15:8.

Baibul bene loko i kom jo mogo ma gulego matek ci kigamo legagi. Tyeng mo acel wacci Yecu olego lega me “bako doge . . . bot ngat ma yam twero lare”ci “Lubanga bene owinye.” (Jo Ibru 5:7) Labol mukene nonge i Daniel 9:21 ki 2 Tekwaro 7:1.

Ci dong, pingo jo mogo gitamo ni legagi pe kigamo? Wek kigam legawa, omyero waleg bot Jehovaha keken, Lubanga me Baibul ento pe bot lubanga mukene nyo kwariwa ma guto. Lubanga bene mito ni walege kun “walubo gin ma en mito”​—i jami ma en cwakogi. Lubanga cuko cwinywa ni ka walego kumeno ci ‘ebiwinyo legawa.’ (1 Jon 5:14) Pi meno, wek kiwiny legawa, mitte ni myero wange Lubanga me Baibul dok wapwony mitine.

Dano mapol giye ni lega pe obedo mere tim mo ata me dini ento ni Lubanga winyo lega dok gamo bene. Laco mo ma nyinge Isaac ma bedo i lobo Kenya owaco ni: “Alego ni myero kikonya wek aniang Baibul. I nge kare manok, ngat mo obino bota ci oye konya me niang Baibul.” I lobo Philippines, lamego mo ma nyinge Hilda onongo mito weko mato taa. I nge temone pi kare mogo ento pe otwere, cware omiye tam ni, “Pingo pe ileg Lubanga wek okonyi?” En oketo tam meno i tic ci owacci: “Abedo ki ur madit i kit ma En okonya kwede. Obedo calo iwacci acako winyo ni miti me taa tye ka rweny woko ki i cwinya.”

Lubanga tika romo bedo ki miti me konyi ki i pekoni ka ilego ma lubbe ki mitine?

Lubanga mito ni wat maber obed i kinwa ki en.

Lurem pol kare giloko i kingi wek gidong wat maber. I yo acel-li, Lubanga bene mito ni walok kwede wek wat maber obed i kinwa ki en. En wacci: “Wubibino bota wulega, an abiwinyo legawu.” (Jeremia 29:12) Ka nongo iloko ki Lubanga, ‘ibinyike cok bote, ci en bene binyikke cok boti.’ (Yakobo 4:8) Baibul miniwa gen ni: “Rwot [Jehovah] tye cok bot jo ducu ma kok bote” (Jabuli 145:18) Ka wamedde ki lega bote, ci wat i kinwa ki en bidongo doko matek.

Lubanga mito ni ekonyi.

Yecu owaco ni: “Anga i kinwu ma won latin, ma ka latinne olege ni omiye kwon, ci bimiye gweng? Nyo ka olege ni omiye rec, ci bimiye twol? Dong ka ce wun . . . wungeyo miyo mot mabeco bot litinowu, ci Wonwu ma tye i polo pe bimiyo jami mabeco makato ducu bot jo ma lege!” (Matayo 7:9-11) Ada, Lubanga mito ni ileg bote pien ‘en tamo piri’ dok mito ni ekonyi. (1 Petero 5:7) Dok en bene mito ni itit pekoni bote. Baibul wacciwa ni: “Pe wubed ki par i kom gin mo, ento i lok ducu wumi Lubanga onge gin ma wumito i lega ki i bako dogwu kacel ki miyo pwoc bene.”​—Jo Pilipi 4:6.

Dano gitye ki miti i yo me cwiny.

Jo ma gukwano lok kom dano i yo matut giwaco ni dano milion mapol ginongo ni lega pire tek. Kadi wa jo mogo ma giwacci Lubanga peke nyo gikalakala ka Lubanga tye giwinyo bene kumeno.a Man moko ka maleng ni kicweyo dano me bedo ki miti i yo me cwiny. Yecu owaco ni: “Dano pe bibedo kwo ki kwon keken, ento bedo kwo ki lok ducu ma a ki i dog Lubanga. (Matayo 4:4) Yo acel ma watwero cobo ki miti meno aye me lega bot Lubanga kare ki kare.

Adwogi maber ango ma wanongo ka wajolo lwongo pa Lubanga ni meno myero waleg bote?

Ma peya icako timo gin mo keken, pol kare iromo penye ni, ‘Adwogi maber ango ma abinongo?’ Ento tika nyuto ni waparo piwa keken ka watiyo ki kodi lapeny man ka odok i lok me lega? Pe kumeno. Pol kare wamito niang ka ce lega konyowa. Kadi wa Yubu ma kite onongo ber-ri kare mo openyo ni: “Ka ce nene ogamo doga i kare ma alwonge.”​—Yubu 9:16.

I pwony mukato-ni, waneno caden ma moko ni lega pe obedo mere tim mo me dini nyo yat me kweyo wiwa. Lubanga me ada winyo lega. Ka walego i yo matir dok pi jami ma rwatte ki mitine, ci en winyo legawa. Ki lok ada, en cuko cwinywa ni myero wanyikke cok bote. (Yakobo 4:8) Pi meno, adwogi maber ango ma wanongo ka waweko lega bedo yo me kwowa? Kong wanenu adwogi mogo maber ma wanongo.

Wic mupye mot.

Tika par kacel ki atematema gibwoyi woko ka itye i peko? I kare ma kit man, Baibul cuko cwinywa ni “wuleg Lubanga ma pe wukeng” ki dok ni “i lok ducu wumi Lubanga onge gin ma wumito.” (1 Jo Tecalonika 5:17; Jo Pilipi 4:6) Baibul kweyo cwinywa ni ka walego bot Lubanga, ci ‘kuc pa Lubanga ma kato ngec pa jo ducu gwoko cwinywa ki tamwa maber.’ (Jo Pilipi 4:7) Wabedo ma wiwa olo opye ka watito par ma i cwinywa bot Wonwa me polo. Ki lok ada, en cuko cwinywa me timo meno. Jabuli 55:22 wacci, “Kel pekoni ducu bot Rwot [Jehovah], ci en bikonyi.”

Dano mapol i twok lobo lung gitye ki wic ma opye mot. Lamego mo ma nyinge Hee Ran , ma a ki i lobo South Korea owaco ni: “Kadi bed peko odiya ma rom mene, ka ce alego pire, ci awinyo ni atye agonya dok anongo ni atye ki kero me kanyone.” Lamego mo bene ma nyinge Cecilia, ma bedo i lobo Philippines otito ni: “Macalo mego, atamo tutwal pi lutino anyirana kacel ki mamana ma dong pe ngeya pi lit kome-ni. Ento pienni alego, man okonya me timo jami mogo labongo bedo ki par mapol. Angeyo ni Jehovah bikonya me gwokogi.”

Kwe cwiny ki kero i kare me atematema.

Tika itye ilyeto magwar nyo peko mo ma tye ka keto kwoni ka mading? Lega bot “Lubanga ma kweyo cwiny dano ducu” miyo wawinyo agonya. Baibul waco ni en “kweyo cwiny jo ma tye ki can mo mapatpat.” (2 Jo Korint 1:3, 4) Me labolle, i nino mo acel ma Yecu cwinye otur adada, en “orumo conge piny, olego.” Adwogine obedo nining? “Lamalaika ma oa ki i polo onen bote kun miye tek.” (Luka 22:41, 43) Nekemia ma onongo obedo laco ma lagen-ni, jo maraco guketo bura i kome i kare ma otemo yubo ot pa Lubanga. En olego ni: “Ento kombeddi, ai Lubanga, dong imiya abed matek.” Jami mutimme i ngeye nyuto ni Lubanga ada okonye wek olweny ki lworone kun cobo ticce. (Nekemia 6:9-16) Reginald ma bedo i lobo Ghana otito gin mutimme i kome ma lubbe ki legane ni: “Ka alego, tutwalle i kare ma atye i peko, awinyo calo iwacci dong atito pekona bot ngat mo ma romo konya dok cuko cwinya pe me bedo ki par mapol.” Ada, Lubanga twero konyowa ka walego bote.

Ryeko mua ki bot Lubanga.

Tam mogo ma wamokogi gigudowa kacel ki jo ma wamarogi pi kare me kwowa ducu. Wan watwero moko tam matir nining? Baibul waco ni: “Ka ce tye ngat mo i kinwu ma ryekone nok, myero en oleg Lubanga ma miyo bot jo ducu ki yomcwiny, kun pe twono ngat mo; ci bimiye.” (Yakobo 1:5) Ka walego pi ryeko, Lubanga twero tic ki cwiny mere maleng me tirowa wek wamok tam me ryeko. Ki lok ada, waromo lega atir atir pi cwiny maleng pien Yecu owacciwa ni: “Wonwu ma tye i polo pe bikatowu, bimiyo cwiny maleng makato bot jo ma lege?”​—Luka 11:13.

Yecu bene onongo ni mitte tutwal me lega bot Wonne pi kony i kare ma mito moko tam ma pire tek. Baibul wacciwa ni i kare ma Yecu mito yero co 12 ma myero gubed lukwenane, en “obedo ka lego Lubanga dyewor benebene.”​—Luka 6:12.

Calo Yecu, dano mapol i kareni gibedo ki gen ka guneno kit ma Lubanga gamo kwede ki legagi wek gimok tam matir. Regina ma bedo i lobo Philiphines otito pi pekki mapol ma ekato ki iye calo nongo jami ma mitte pi en ki dong konyo jo me ode i nge to pa cware, rweyo dog ticce, ki dong pito lutino anyirane aryo. Ngo ma okonye me moko tam matir? En owaco ni, “Alego bot Jehovah wek en okonya.” Kwabena, ma bedo i Ghana, otito gin mumiyo elego Lubanga ni okonye, “Arwenyo ticca me gedo ma onongo kela cente madit adada.” I kare ma tye ka tam i kom ngo ma myero etim, en owaco ni: “Alego bot Jehovah teretere wek otira amok tam matir.” En omedo ni: “Atamo ni Jehovah okonya me yero tic ma weko agwoko watta ki en dok anongo jami ma mitte.” In bene itwero nongo kony pa Lubanga ka ilego bote ma lubbe ki jami ma romo balo wat i kin in ki en.

Wanyamo jami mogo manok nok ma nyuto kit ma lega romo konyowa kwede. (Me labolle, nen bok ma wiye tye ni, “Adwogi Maber ma Lega Keliwa.”) Ento wek inong kony ma a ki i lega, omyero kong i nge Lubanga kacel ki mitine. Ka meno aye gin ma imito, ci wacuko cwinyi me penyo Lucaden pa Jehovah wek gukwan Baibul kwedi.a Man romo bedo yo mukwongo ma itwero nyikke kwede cok bot ngat ma ‘gamo lega-gu ducu.’​—Jabuli 65:2.