Lapeny pa Lukwan Bukkewa

Pingo lok ma Matayo ocoyo madok i kom kit ma Yecu okwo kwede i kare ma en pud tidi dok pat ki ma Luka ocoyo?

Lok ma Matayo ocoyo i kom kit ma Yecu okwo kwede i kare ma en pud tidi dok pat ki ma Luka ocoyo pien gin ducu guketo cwinygi me tito tam ki gin mutimme i kom jo mapat pat.

Matayo oketo cwinye tutwalle i kom lok ma kwako Yucepu. En otito gin ma Yucepu otimo i kare ma oniang ni Maliam ogamo ic, kit ma lamalaika otitte kwede i wang lek gin ma otimme i kom Maliam, ki dong kit ma Yucepu olubo tira ma lamalaika omine. (Matayo 1:19-25) Tito bene kit ma lamalaika owaco kwede ki Yucepu i wang lek ni en kacel ki jo ma i gange myero gungwec i Ejipt ki dok kit ma en olubo kwede ki tira meno. Matayo dok otito lek mukene ma lamalaika waco ki Yucepu ni odok cen i lobo Icrael dok en odok cen ci omoko tamme me bedo i Najaret. (Matayo 2:13, 14, 19-23) I cura aryo mukwongo me Jirine, Matayo olwongo nying Yucepu tyen aboro kulu ento olwongo nying Maliam tyen angwen keken.

Ento kitungcel, Luka oketo tamme i kom Maliam. En otito kit ma lamalaika Gabriel olimo kwede Maliam, kit ma Maliam olimo kwede Elicabet ma onongo bene obedo watte, ki dong kit ma en opako kwede Jehovah. (Luka 1:26-56) Otito bene kit ma Cimeon otito bot Maliam kit ma Yecu bideno can i anyim. Lacen, Luka otito gin ma otimme i kare Yecu kacel ki jo me ganggi gucito i ot pa Lubanga i kare ma en tye ki mwaka 12. Luka dok otito lok ma Maliam owaco ento pe pa Yucepu, en bene ocoyo kit ma gin mutimme-ni ogudo kwede Maliam. (Luka 2:19, 34, 35, 48, 51) I cura aryo mukwongo i jiri pa Luka, en otiyo ki nying Maliam tyen 12 kulu, ento nying Yucepu tyen 3 keken. Pi meno, Matayo otito tam pa Yucepu ki gin ma en otimo. Luka otito tam pa Maliam ki jami ma otimme i kwone.

Kit ma kinyuto kwede kwaro pa Yecu bene patpat i jiri aryo magi. Matayo ocoyo kwaro pa Yucepu dok onyuto ni Yecu, macalo latin ma Yucepu ogwoko calo mege bene tye ki twero me leyo kom ker pa Daudi. Pingo? Pien Yucepu obedo lakwar Kabaka Daudi ki tung bot wode Solomon. (Matayo 1:6, 16) Ento, Luka ocoyo kwaro pa Maliam dok onyuto ni Yecu onongo tye ki twero me leyo kom ker pa Daudi “i kit me kom.” (Jo Roma 1:3) Pingo? Pien Maliam onongo obedo lakwar Kabaka Daudi ki tung bot wode Natan. (Luka 3:31) Ento pingo Luka pe oketo nying Maliam macalo nyar pa Eli? Pien co keken aye ma onongo kiketo nyingi i doggola moni. Pi meno, ka Luka oketo nying Yucepu macalo wod pa Eli, dano giniang ni pien Yucepu onongo obedo cwar nyare.​—Luka 3:23.

Kit ma kiryeyo kwede kwaro Yecu i Jiri pa Matayo ki pa Luka nyuto ka maleng ni Yecu obedo Meciya ma Lubanga ociko pire-ni. Onongo dano gingeyo ni Yecu obedo lakwar Kabaka Daudi dok kadi wa Luparicayo ki Lupwony Cik bene pe gitwero kwero meno. Kit ma Matayo ki Luka gunyuto kwede kwaro Yecu jingo niyewa dok weko wabedo labongo akalakala mo keken ni cikke pa Lubanga ducu bicobbe kakare.