Kwano Brocuwa me Wubed ma Wukiyo Piny!

Kacokke ducu me wi lobo bikwano brocuwa me Wubed ma Wukiyo piny! Bicakke i cabit me nino dwe 23, me dwe me Abic nio wa i nino dwe 20, me dwe me Abicel mwaka 2005 i Cokkewa me Kwano Buk. Tim ber i ti ki peny magi ka itye ka yubbe pi kwano nyo doro cokke me kwan man. I kare me kwan man, kwan ginacoya ma kiketo kit ma cawani twero kwede.

Cabit me Nino Dwe 23 Dwe me Abic

◼ Pot karatac 3-4: I kin jami ma kiryeyogi kany-nyi, mene ma dong ogudo kwoni tutwal? Gin ango ma nyuto ni jami magi pe obedo gin ma timme i kabedo acel keken?

◼ Pot karatac 5: Ngo ma miyo ibedo labongo akalakala ni Lubanga paro pi dano? Gin ango ma twero nyuto ni wan bene ada waparo pi Lubanga ki pi yubbe?

◼ Pot karatac 6-8: Gin ango ma Matayo 24:1-8, 14 loko i kom kit ma lobo tye kwede kombeddi? Kit ma kinyuto kwede i 2 Temceo 3:1-5, wan watye ka kwo i kare ango? Man kono obedo kare me agikki me ngo? Ngo ma miyo ibedo labongo akalakala ni Baibul ada obedo Lok pa Lubanga? Ker mene ma wan watito pire-ni?

◼ Pot karatac 9-10: Pingo mito kong watam matut i kom tam ma wamoko nino ki nino ki jami ma waterogi ni pigi tego i kwo? (Rom. 2:6; Gal. 6:7) Ka itye ka nyamo lapeny ma tye i pot karatac 10, ginacoya mene ma bino i tammi ma omyero okel alokaloka i kwoni?

Cabit me Nino Dwe 30 Dwe me Abic

◼ Pot karatac 11: Pingo mitte ni wan bene omyero watam i kom lapeny ma kipenyo i pot karatac man? (1 Kor. 10:12; Ep. 6:10-18) I yo ango ma lagam ma wamiyo i kom peny magi nyuto ni walubo tira pa Yecu ma tye i Matayo 24:44?

◼ Pot karatac 12-14: ‘Kare me ngolo kop’ ma kitito pire i Niyabo 14:6, 7 ni, obedo gin ango? Tyen lok man ni ‘wulwor Lubanga wumi deyo bote-ni’ obedo gin ango? Babilon Madit obedo gin ango, dok gin ango ma bitimme i kome? Gin ango ma myero watim kombeddi i lok ma kwako Babilon Madit? Gin ango mukene ma kitito con ma make ki kare me ngolo kop? Ka pe wangeyo “nino kadiwa cawa” ma Lubanga bingolo iye kop ci kelo adwogi ango i komwa? (Mat. 25:13)

◼ Pot karatac 15: Lok ma mako twero mamalo twal obedo lok ango, dok gudowa ki acel acel nining?

◼ Pot karatac 16-19: “Lobo manyen” ki “Polo manyen” gubedo gin ango? (2 Pet. 3:13) Anga ma ocikke me kelo jami magi? Alokaloka ango ma polo ki lobo manyen bikelo? Tika wan wabinongo iye mot mo?

Cabit me Nino Dwe 6 Dwe me Abicel

◼ Pot karatac 20-1: Cik ango ma mako ngwec ma Yecu ociko kwede jo ma lubo kore i cencwari me acel? (Luka 21:20, 21) Awene ma onongo ngwec meno twere kwede? Pingo onongo mitte pi oyot me ngwec woko labongo galle? (Mat. 24:16-18, 21) Pingo jo mapol pe gitero lok ma cikogi calo gin ma pire tek? I yo ma nining ma jo me lobo China ki Philipines gularo kwede kwogi pi winyo cik? Pingo lubo lok ma Baibul cikowa kwede i kom agikki me yub me kare man mitte me oyot? Ngo ma omyero watim kit ma lok man mitte me oyot-ti? (Car. 24:11, 12)

◼ Pot karatac 22-3: Pingo dano mapol i lobo Australia i mwaka 1974, ki i lobo Colombia i mwaka 1985 pe gutero can ma onongo obipoto calo gin ma pire tek, dok adwogi ango ma obedo tye? Ka in kono, onongo kono itero lok man nining, dok pingo? Gin ango ma nyuto ni in onongo kono ibedo ki winy i kare pa Nua? Ping dano onongo gimaro bedo i boma macon me Codom? Wan kono watwero nongo kony ka watamo matut i kom gin ma otimme i kom Codom-mi nining?

Cabit me Nino Dwe 13 Dwe me Abicel

◼ Pot karatac 24-7: Ti ki “Peny i Kom Lok ma Kineno” i pot karatac 27.

Cabit me Nino Dwe 20 Dwe me Abicel

◼ Pot karatac 28-31: Ti ki “Peny i Kom Lok ma Kineno” i pot karatac 31.

Yub me kwano brocuwa-ni bikonyowa me ‘bedo ma wangwa twolo’ wek ‘wabed ma wayubbe.’ Ticwa me pwony-nyi omyero onyut ni watero gin ma lamalaika oloko ni: ‘Wulwor Lubanga, wumi deyo bote, pien karene me ngolo kop dong oromo,’ calo gin ma mitte me oyot.—Mat. 24:42, 44; Yabo. 14:7.