En Mito ni Jo Ducu Gularre
1. Watwa ki Lubanga cung i kom ngo?
1 Kica pa Lubanga ma pe wapore pire oyabo yo me larre. Miti pa Jehovah tye ni ‘jo ducu gularre dok gunge lok me ada.’ (1 Tem. 2:3, 4) Watwa ki Lubanga pe cung i kom rangi del komwa rwom me kwowa, diro me ticwa, nyo kit ma wanen kwede ki woko, ento cung i niyewa i kom ginkok pa Yecu. (Jon 3:16, 36) Kit ma wan watiyo kacel ki Lubanga-ni, omyero wawek cwiny me apokapoka ma weko waromo kwero jo ma Jehovah tye ki miti me jologi obedi.
2, 3. Ngo ma romo konyowa wek pe wangol macek ni dano moni pe biworo Jehovah pi kit ma nongo en nen kwede ki woko?
2 Pe Ingol Kop: Jehovah neno kit ma cwiny dano tye kwede labongo kit apokapoka mo. (1 Cam. 16:7) En bene neno gin maber ma gitwero timone. Pi meno, en neno jo ma gitemme me yomo cwinye calo jo ma pigi tek tutwal bote. (Ag. 2:7) Wan mono waneno dano kit ma Lubanga nenogi kwede?
3 Dano mukene ma warwatte kwedgi i kare me wot i pwonywa, guromo nen i yo ma miniwa lworo. Oromo bedo ni nongo gurukke macilo, nyo i yo ma pe opore, ma yer tikgi onyem, nyo nongo guketo lagit i umgi nyo i del dogi. Mukene nongo odigi peke. Jo mukene guromo bwurowa. Meka ka ngolone macek ni dano ma kit meno pe biworo Jehovah, omyero wanyut cwiny maber, “pien wan ki komwa yam kong wabedo luming, jo ma pe luwiny; yam warwenyo woko ata.” (Tito 3:3) Ka wangeyo lok man, ci wabibedo ki miti me tito kwena bot dano ducu, kadi wa bot jo ma nen calo pe gupore.
4, 5. Pwony ango ma wanongo i kom lanen pa Yecu ki pa Paulo?
4 Lanen me Cencwari me Acel: Yecu Kricito omiyo kare-ne me konyo jo ma onongo dong gipe ki gen mo. (Luka 8:26-39) Kadi bed en onongo pe cwako tim maraco, en bene onongo ngeyo ni dano twero moko woko i yo me kwo maraco. (Luka 7:37, 38, 44-48) Pi meno, en onyuto niango pi peko pa dano oweko ‘kica obedo ka make i komgi, pien onongo gitye calo romi ma gipe ki lakwat.’ (Mar. 6:34) Dong omyero pe walubu lanen pa Yecu-ni?
5 Kicelo lakwena Paulo ki kidi, kipwode, ka kibole i buc. (Tic 14:19; 16:22, 23) Kit alany macalo magi mono okelo kiniga i cwinye, ma oweko en ocako tamo ni etye ka balo karene i kin lurok ki kakki mogo ata? Ku. En onongo ngeyo ni jo ma mwol giromo nonge i kin kaka mo keken, dok onongo omoko tamme me yenyogi. Meno aye mono kit ma wan bene waneno kwede dano ma gua ki i kabedo ki i tekwaro mapat pat ma gitye i wang ticwa?
6. Adwogi ango ma bino pi jol maber ma wamiyo bot jo manyen ma gibino i kacokkewa?
6 Jolo Jo Mukene i Kare-ni: Jo pa Lubanga mapol gitye ki yomcwiny pi jol maber ma utmego ki lumego gumiyo boti i kacokke labongo paro kit ma onongo ginen kwede ki woko. Laco mo ma onongo pe oyubo yer tike dok yer wiye ojany oony wa i wi gwoke, bongi ma oruko-gu cilo, obino i Ot me Ker i lobo Germany. Kadi bed onongo lok marac winye i kome ni en obedo dano marac, ento kijole ki jol ma lamal. Man oyomo cwinye mada omiyo en dok odwogo cen inge cabit acel. Pi kare manok keken, en oyubbe odoko maleng, oweko mato taa ka dok bene gunyomme ite cik. Pe ocwalo kare malac, gin kacel ki lutinogi ducu gucako woro Jehovah.
7. I yo ango ma watwero lubo kwede kit pa Lubanga ma pe poko kin dano-ni?
7 Pi man dong walubu lanen pa Lubanga ma pe poko kin dano-ni, kun wacwalo lwongo bot ngat mo keken me bino me nongo larre ma bino pi kica pa Lubanga ma pe wapore pire.
[Boro buk i pot karatac 3]
““Lubanga pe poko kin dano, ento en jolo dano ma i rok ducu ma gilworo en ki ma gitiyo gin ma tye atir.”—Tic 10:34, 35.