“An Pe Amito Winyo Lokwu”
1 Meno aye kit ma jo mapol i kabedo mogo gikwero kwede winyo kwenawa. Ngo ma bikonyowa wek cwinywa pe odok cen ka warwatte ki jo ma pe gimito winyo lokwa i wang ticwa? Yo ango ma watwero tugo kwede mitigi i kom kwena maber-ri?
2 Bed ma Cwinyi Yom: Ngeyo tyen lok mumiyo jo mapol pe gimito winyo lokwa bikonyowa pe me rwenyo yomcwinywa. Jo ma nongo kipwonyogi ni dano gulokke ki i kom lee, nyo jo ma gudongo i kabedo ma dano gitamo ni Lubanga peke, pe giromo neno ber pa Baibul. Jo mukene nongo cwinygi oballe woko pi tim maraco ma gineno i dini. Mukene cwinygi bedo nok pien nongo kwo dong konye odoko pe woko botgi. (Ep. 2:12) Jo mukene ‘pe giketo cwinygi’ pien nongo gitye ki par mapol i kwogi.—Mat. 24:37-39.
3 Kadi bed jo mukene gikwero winyo lokwa, pud wabedo ki yomcwiny i ticwa me pwony, pien nongo wangeyo ni tutewa-ni kelo deyo i kom Jehovah. (1 Pet. 4:11) Medo i kom meno, kadi wa tito lok me ada-ni bot jo ma pe gineno berre bene jingo niyewa kenwa. Dong omyero watemme wunu me neno jo ma gitye i wang ticwa kit ma Jehovah nenogi kwede. Kica omakke pi jo me Nineve ma onongo pe “gingeyo poko kin cinggi ma lacuc ki ma lacam.” (Yon. 4:11) Kwena maber-ri mitte pi jo ma gikwo i wang ticwa! Pi meno omyero pe wail cingwa woko, ento omyero wayenyu yo me tugo mitigi i kom kwena me Baibul.
4 Lok i Kom Par pa Jo me Kabedo Meno: Iromo cako lokki ki kelo lok mo ma jo ma i kabedo meno giparo pire kun ipenyo tam pa rwed ot i iye. Winy lagamme maber, ci inyutte kwena me kwe cwiny ma tye i Baibul ma loko i kom par meno. I yo nge peko ma otimme i kabedo mo, Lacaden mo acel ocwalo kumune kun woto i doggola acel acel. En owacci: “Dano gucako yabo cwinygi me lok kweda. Nino eno-ni aloko ki dano labongo peko mo pien anyuto miti i komgi.”
5 Pekki ma tye ka yelo dano-ni Ker pa Lubanga aye bicobogi ducu. Temme me niang peko acel mo ma rwed ot paro pire loyo. En oromo ye ni ititte kwena me gen ma tye i Baibul. Ka okwero, ci gwok nyo biye winyone i “kare mukene.”—Tic 17:32.