Dul Lok me Aryo

Mi Deyo Bot Jehovah Calo Lubanga Acel me Ada

1. Anga aye obedo Lubanga acel me ada?

BAIBUL waco ni kadi bed tye jammi ma ginen calo gubedo lubanga, “tung botwa Lubanga tye acel, en Lubanga Won.” (1 Jo Korint 8:5, 6) ‘Lubanga ma tye acel-li’ aye Jehovah, Lacwe jammi ducu. (Nwoyo Cik 6:4; Niyabo 4:11) Yecu oloko i kome ni ‘Wora ki Wonwu.’ (Jon 20:17) En oye lok pa Moses, ma waco con ni: “Yam ginyuto botwu wek wunge ni: ‘Rwot aye Lubanga; pe tye mo mukene doki.’” (Nwoyo Cik 4:35) Rwom pa Jehovah dit tutwal makato kit jammi mo keken me awora calo cal jok ma dano kiketo calo lubanga, nyo lakworre Catan Larac, “lubanga me lobo man.” (2 Jo Korint 4:3, 4) Gin ma pokke madit tutwal ki jammi magi aye, kit ma Yecu olwongo kwede Jehovah ni, “Lubanga acel keken me ada.”—Jon 17:3, NW.

2. Ka watye ka kwano lok i kom Lubanga, omyero ogud kwowa nining?

² Jo ma gipwonye dok gipwoyo kit pa Lubanga mamwonya, kacel ki jammi ma en dong otimo ki ma pud obitimo pi wan, ginyiko cok bote. Ka margi woto ki dongo pi Jehovah, ginongo ni myero gimiye deyo. I yo ma nining? Yo me acel aye me tito lok i kome bot jo mukene. Jo Roma 10:10 waco ni: ‘Dano tuco ki doge, ka dong miyo Lubanga larre.’ Yo mukene aye me poro en i tic ki lok. Jo Epeco 5:1 waco ni: “Wulub kit pa Lubanga, pien wun lutinone ma en maro.” Me timo man maber, omyero wange kit ma Jehovah ada tye kwede.

3. Kit Lubanga ma pirgi tego obedo ngo?

³ Lok ma nyuto kit Lubanga ma pirgi tego tye i kabedo ducu i Baibul. Kite angwen mucwiny loyo aye ryeko, ngolo kop atir, teko, ki mar. ‘En tye ki ryeko.’ (Yubu 12:13) “I yone ducu ngolo kop atir.” (Nwoyo Cik 32:4, NW) En “tekone dwong twatwal.” (Icaya 40:26) “Lubanga aye mar.” (1 Jon 4:8) Kadi bed kit meno, i kit Lubanga angwen-ni, mene aye dong dit loyo, ma nyuto kit pa Lubanga kikome ma loyo mukene-ni?

“Lubanga Aye Mar”

4. Kit madit mene pa Lubanga aye omiyo en ocweyo jammi ducu ki gin ducu ma kwo?

⁴ Tam kong gin ma omiyo Jehovah ocweyo jammi ducu ki jo ma obedo cwiny ki dano. Ryeko nyo teko mono aye omiyo en otimo meno? Pe, kadi bed Lubanga otiyo ki kite magi, ento pe kite magi aye omiyo en otimo meno. Dok ngolo kop atir-re pe omitte wek en onywak mot me kwo ki jo mukene. Kono do, mar madit pa Lubanga aye omiyo en onywako mit me kwo ki jo ma ryek mukene. Mar aye oweko en oketo yub ni dano ma luwiny omyero gubed pi nakanaka i Paradic. (Acakki 1:28; 2:15) Mar omiyo en oyubo me kwanyo lam marac ma bal pa Adam okelo i kom dano.

5. Ma lubbe ki Baibul, kit Jehovah mene ma giwaco ni en obedo, dok pingo?

⁵ Pi meno, i kin kit Lubanga ducu, mar-re aye dong dit loyo. Obedo kite nyo cwiny kite kikome. Kadi bed ryeko, ngolo kop atir, ki teko, pirgi tek, Baibul pe omedo ki waco ni Jehovah aye dong obedo acel mo i kin-gi. Ento Baibul waco ni en aye mar. Ada, Jehovah aye mar kikome. Man aye mar ma bino pi lubo cik ma malo, pe pi kit ma ngat moni winyo kwede. Cik me ada ki kit ma atir me mar pa Lubanga aye telo mar man. Obedo mar me rwom ma malo atika, kit ma onyute ki bot Lubanga Jehovah kikome ni. Mar ma kit meno obedo gin ma nyuto bedo labongo wanya mo dok kare ducu woto kacel ki tic ma nyuto.

6. Gin ango ma weko twere pi wan me poro kit Lubanga kadi bed rwomme lamal tutwal ki botwa?

⁶ Kit me mar man aye konyowa me poro Lubanga ma obedo kit man. Macalo dano ma luroc ma rwomgi piny, ma pe timo jammi atir, waromo tamo ni pe twere me poro en maber. Ento labol me mar madit pa Jehovah tye ka kany: En ngeyo gorowa dok pe paro ni wabed calo wape ki roc mo dong i komwa. En ngeyo maber ni wapong ki roc i kare-ni. (Jabuli 51:5) Meno aye gin ma omiyo Jabuli 130:3, 4 waco ni: “Ai Rwot, ka nene onongo i paro balwa, anga munongo twero cung i nyimi, in Rwot? Ento in iweko balwa.” Ada, Jehovah obedo “Lubanga ma lakica dok maro dano, kiniga pe make oyot, marre ma pe lokke dwong, en lagen mada.” (Nia 34:6) “Ai Rwot, in iber dok iweko bal pa dano.” (Jabuli 86:5) Tic pi Lubanga man me aura kacel ki neno mar-re ki kicane i kwowa pud dong kweyo cwinywa dok gonyo komwa ya!

7. Mar pa Jehovah twero nen i tic me cwecce nining?

⁷ Mar pa Jehovah twero bene nen i ticce me cwec. Tam kong pi jammi mabeco mapol ma Jehovah omiyo pi yomocwinywa, calo godi ma neno mit, bunga, kulu ki nam madongo atika. En omiyo botwa cam mapatpat mabeco ma mit dok gwoko komwa. Jehovah bene omiyo kit kodi ature mogo maleng mapat pat ma ngwecgi kur kacel ki kwai lee mapol ma nenogi mwonya mada. En oyubo jammi ma miyo yomcwiny bot dano, kadi bed ni pe onongo tye calo gin ma mitte ni myero en otim. Ada, kwo i lobo marac me kare man dok ma nongo watye ki roc, miyo pe wanongo mit pa cwecce ducu. (Jo Roma 8:22) Ento kong itam gin ma Jehovah bitimone piwa i Paradic! Lacoc me buk pa Jabuli oniangowa ni: “In iyabo cingi, ci imiyo gin makwo ducu giyeng.”—Jabuli 145:16.

8. Lanen me mar madit pa Jehovah i kom dano aye ango?

⁸ Gin ango ma dong obedo lanen madit me mar pa Jehovah pi dano? Baibul tito ni: “Pien Lubanga con omaro lobo kumeno, omiyo iye Wode acel keken, wek dano ducu ma ye en owek to, ento obed ki kwo ma pe tum.” (Jon 3:16) Mono ber kit dano aye oweko Jehovah otimo man? Jo Roma 5:8 gamo ni: “Ento Kricito yam oto piwa i kare ma pud wan lubalo; meno nyuto kit mar ma Lubanga marowa kwede.” Ada, Lubanga ocwalo Wode ma pe ki roc i lobo wek omi kwone macalo gitum me kok pi larowa ki i lam me bal ki to. (Matayo 20:28) Man oyabo yo pi dano ma gimaro Lubanga me nongo kwo ma pe tum. Ki mar madit, Lubanga miyo man bot dano ducu ma mito tiyo mitine, pien Baibul waco botwa ni: “Lubanga pe poko kin dano, ento en jolo dano ma i rok ducu ma gilworo en ki ma gitiyo gin ma tye atir.”—Tic pa Lukwena 10:34, 35.

9. Lok man ni Jehovah omiyo Wode macalo ginkok-ki omyero ogud kwowa nining?

⁹ Ada pa lok ni Jehovah omiyo Wode macalo gin-kok piwa, ma oyabo yo me nongo kwo ma pe tum piwa, omyero ogud kwowa i kare-ni nining? Omyero omi marwa i kom Lubanga Jehovah odony matut. Dok bene omyero owek wabedo ki winy i kom Yecu, ngat ma cung pi Lubanga. “[Yecu] yam oto pi dano ducu, wek jo makwo pe gumedde ki bedo kwo pirgi kengi, ento gubed ki kwo pi ngat ma yam oto ka ocer pirgi ca.” (2 Jo Korint 5:15) Pud dong obedo gin maber dok me yom cwiny ya, me lubo kor tyen Yecu, pien ni en obedo lanen maber tutwal me poro kit Jehovah! Man onyute i gin ma Yecu owaco bot jo ma mwol ni: “Wubin bota, jo ducu muol ki ma yec onurowu, ci abimiyo wuywe. Wuting yatta, ci wupwony kita, pien an awor, dok amwol bene i cwinya, mumiyo wun bene wubilimo yweyo i cwinywu. Pien yatta yot, ki yecca bene pe pek.”—Matayo 11:28-30.

Nyuto Mar pi Jo Mukene

10. Watwero nyuto mar i kom Lukricitayo luwotwa i yo ango?

¹⁰ Wan watwero nyuto bot Lukricitayo luwotwa ni watye ki kit mar ma Jehovah gin ki Yecu gitye kwede i komwa nining? Nen yo mapat pat ma waromo timo kwede man: “Mar diyo cwinye, dok lakica bene; mar pe lanyeko, pe wakke; pe nyatte, pe tiyo gin ma pe myero, pe yenyo gin mukemo en kene; pe bedo ki keccwiny, pe bedo kun keto cwinye i kom gin marac ma gitimo i kome; cwinye pe bedo yom i kom tim ma pe atir, ento cwinye bedo yom i lok ada. Mar diyo cwinye i kom jami ducu, ye lok ducu, dok bedo ki gen i kare ducu, keto tek bene me ciro jami ducu. Mar pe gik; ento lok atita bitum woko; kadi ki dumo leb bene bigik woko; kadi ngec bene bitum woko.”—1 Jo Korint 13:4-8; 1 Jon 3:14-18; 4:7-12.

11. Omyero wanyut mar pi anga mukene bene, dok nining?

¹¹ Omyero wanyut mar i kom angagi mukene, dok nining? Yecu owaco ni: “Pi meno dong wuciti wucilok jo me rok ducu gudok jo ma luba, kun wubatijagi i nying Won ki Wod ki [c]winy [m]aleng, wupwonygi me gwoko gin ducu ma dong atyeko cikowu kwede. Nen, atye kwedwu kare ducu, nio i agikki piny.” (Matayo 28:19, 20) Man mako nywako lok me kwena maber me paradic me lobo manyen pa Lubanga ma tye ka bino-ni ki jo ma pud peya gudoko Lukricitayo luwotwa. Yecu onyuto kamaleng ni marwa pe omyero obed pi jo ma nywako niyewa keken, pien en owaco ni: “Pien ka wumaro jo ma marowu keken, ci wubinongo iye kit pwoc ango? Lujog-mucoro kono pe gitimo ki meno? Ka ce imoto utmegini keken, ci nongo itimo gin ango maber makato jo mukene? Lurok ma pe gingeyo Lubanga-ni bene pe gitimo kit meno?”—Matayo 5:46, 47; 24:14; Jo Galatia 6:10.

“Wot i Nying Jehovah”

12. Gin ango ma omiyo nying Lubanga rwatte pi en keken?

¹² Yo mukene me weko Lubanga ma ada ongene aye, ngeyo nying Jehovaha ki tic kwede, ka dok pwonyo jo mukene ki nying man bene. Laco jabuli otito mitti ma i cwinye ni: “Ka weko dano gitwero ngeyo ni in, ma nyingi Jehovah, In keni aye ngat ma malo ma loyo ducu i wi lobo.” (Jabuli 83:18, NW) Tyen nying me Jehovah-ni obedo ni “En Miyo Timme.” En aye Layub Madit ma tyeko yubbe maber kare ducu. Lubanga me ada keken aye twero bedo ki nying meno, ento dano adana pe twero bedo kwede, pien pe ngeyo ngo ma twero timme i anyim. (Yakobo 4:13, 14) Jehovah keken aye twero waco ni lokke “bitiyo” jammi ma eciko pire. (Icaya 55:11) Dano mapol cwinygi bedo yom me neno nying Lubanga tyen ma okwongo i Baibul-gi ki ka gungeyo tyen lokke i karegi me kwano Baibul. (Nia 6:3) Gibinongo kony ki i man ka inen ‘guwoto i nying Jehovah nakanaka.’—Mika 4:5.

13. Ngeyo nying Jehovah ki wot i nyinge, tyene obedo ngo?

¹³ I lok i kom nying Lubanga, Jabuli 9:10 waco ni: “Jo ma ngeyi gibiketo gengi i komi.” Man mito gin makato ngeyo nying Jehovah keken, pien meno pe tyene ni keto gen i kome. Ngeyo nying Lubanga tere ni pwoyo kodi Lubanga ango ma Jehovah obedo, woro twerone, winyo cikke, geno en i jammi ducu. (Carolok 3:5, 6) I kit yo acel-li, tyen lok me wot i nying Jehovah obedo dyere bote, dok omyero wacung pire macalo jo ma woro en, kun watiyo ki kwowa ma rwatte ki mitti pa Lubanga. (Luka 10:27) In mono itye ka timo meno?

14. Pi wan me bedo ka tic pi Jehovah nakanaka, gin ango ma mitte mapat ki nenone mere calo obedo tic atima?

¹⁴ Pi wan me tic pi Jehovah nakanaka, mito tyen lok ma miyo watimo ticce obed ma kato timone pien ni obedo tic ma myero kitim mere. Lakwena Paulo ocuko cwiny Temceo, ma dong onongo otiyo pi Jehovah pi mwaki ma lac, ni: “Pwonnye keni i kwo me lworo Lubanga.” (1 Temceo4:7) Kwo me lworo Lubanga bino pi cwiny me pwoc i kom Lubanga moni ma nongo watye ki lworo i kome-ni. ‘Lworo Lubanga’ nyute i worowa i yo mamalo i kom Jehovah kikome. Moko i kome nyuto marwa ki notewa kacel ki en ki yone. Miyo cwinywa mito ni ka twere, jo ducu gumi nyinge obed dit. Wan myero wadong kwo me lworo Lubanga i kwowa ka wamito wot i nying Jehovah, Lubanga acel me ada pi nakanaka.—Jabuli 37:4; 2 Petero 3:11.

15. Watwero miyo woro ki mar ma iye pe opokke bot Lubanga nining?

¹⁵ Me tic bot Lubanga i yo ma rwatte, myero wamiye woro ma pe iye opokke, kit ma en obedo “Lubanga ma mito mine me mar ma iye pe opokke.” (Nia 20:5, NW) Pe waromo maro Lubanga kun nongo bene wamaro lobo marac-ci, ma Catan aye lubangane-ni. (Yakobo 4:4; 1 Jon 2:15-17) Jehovah ngeyo maber tutwal kit dano ango ma nongo watye ka temme me bedo. (Jeremia 17:10) Ka ada wamaro kit ma atir, en neno meno ci konyowa me ciro pekowa me nino ducu. Konyowa ki cwinye maleng ma tye ki teko, ma miyo waloyo jammi maraco ma pol ata ma i lobo man. (2 Jo Korint 4:7) En bene bikonyowa me bedo ki gen me kwo ma pe tum i paradic i lobo. Meno pud dong obedo gin me akura ma mwonya ya! Wan omyero wabed ki pwoc madit pire dok wamine kenwa me tic bot Jehovah Lubanga acel keken me ada, ma biweko kwo ma pe tum twere.

16. Kit gin ango ma imito ni myero itim kacel ki lwak jo milion mukene?

¹⁶ Dano milion mapol i wi lobo ducu dong gutyeko ye lwongo pa lacoc me jabuli ma ocoyo ni: “Wuribbe kweda me pako dit pa Rwot, wek wapaku nyinge kacel!” (Jabuli 34:3) Jehovah tye ka lwongi me bedo i kin lwak ma gitye ka pake medde ameda i lobo ducu.

[Lok ma tye piny]

Nyammo wi Lok ma Kineno

• Jehovah obedo ngat ma kite tye nining? Wanongo kit gin ango maber ki i niang kite?

• Watwero konnyo jo mukene me niang lok ada i kom Lubanga nining?

• Ngeyo nying Jehovah ki wot i nyinge tyen lokke ngo?

[Cal ma tye i pot karatac 14]

Jehovah, ‘biyabo cinge ci cobo mitti pa jammi makwo ducu’ pi mar-re madit