Dul Lok me Adek

Mak Lok pa Lubanga Matek

1. (a) Icrael macon guneno ada pa lok pa Lubanga nining? (b) Pingo meno obedo gin ma pire tek botwa?

“WUN bene wungeyo ki i cwinywu wa ki tipo komwu ducu ni, gin mabeco ducu ma yam Rwot Lubangawu ociko piwu gin ducu gucobbe kakare, pe tye acel mo ma pe otimme.” (Yocwa 23:14-16) Man aye gin ma Yocwa otito bot ludito pa Icrael i kare ma dong gugony i kabedogi i Lobo ma Kiciko pire. Ada, cikke pa Jehovah ogenne. Lok meno—kacel ki lok mukene me Baibul—kigwokogi piwa ni “wek wabed ki gen.”—Jo Roma 15:4.

2. (a) Kicoyo Baibul pi ‘teko pa Lubanga’ i yo ango? (b) Niang ni Baibul oa ki bot Lubanga miyo watimo gin ango?

² Kadi bed gitiyo ki dano ma romo 40 me coyo Baibul, Jehovah kikome aye Won Cocci. Man mono gonye ni en aye obedo ka tiro coyo gin ducu ma tye iye? Tye kit meno. En otimo man ki teko pa cwiny maleng, teko ma en tiyo kwede. Lakwena Paulo oloko i kom ada man ni: “Ginacoya ducu ma yam gicoyo, gicoyo pi teko pa Cwiny pa Lubanga . . . wek dano pa Lubanga obed muteggi, ma bene oyubbe i yo ducu, ma romo tiyo kit tic mo maber ducu.” Dano ma i kabedo ducu ma guye lok man , gilubo Baibul dok giyubo kwogi ma lubbe ki lok ma tye iye.—2 Temceo 3:16, 17; 1 Tecalonika 2:13.

Kony jo Mukene me Bedo ki Pwoc i Kome

3. Yo maber loyo me konyo jo mapol ma pud peya giye ni Baibul obedo Lok pa Lubanga aye me timo ngo?

³ Pol pa jo ma watito lok botgi pe ginywako tamwa ni Baibul obedo Lok pa Lubanga. Watwero konyogi nining? Yo maber pol kare aye, me yabo Baibul botgi kun wanyuti-gi maber gin ma tye iye. “Pien lok pa Lubanga obedo gin makwo, . . . bit bene kato pala lucwan ma lebe bit ryoryo woko . . . poko par ki tam mabecone ki maracone ma tye i i dano.” (Jo Ibru 4:12) “Lok pa Lubanga” pe obedo lok muto macon ma konye pe; tye kwo! Cikke me Baibul tye ka wot me cobbe labongo lageng mo. Teko me kwena me Baibul tiyo matek i cwiny dano makato kit lok mo mukene ma pat ma waromo loko-ne.

4. Kit lok ada ango ma Baibul tito ma oloko cwiny jo mogo i kom Baibul, dok pingo?

⁴ Neno nying Lubanga i Baibul omiyo jo mapol gungiyo iye matut. Jo mogo gumoko tamgi me kwano Baibul i kare ma ginyutigi gin ma Baibul waco i kom tyen lok ma omiyo kwo tye, pingo Lubanga oweko ni jammi maraco obed tye, gin ma tyen lok me jammi ma tye ka timme i kare-ni tye ka nyutone, nyo gen me bedo matwal i paradic i lobo. I kabedo me lobo ma tic me dini oywayo aunauna pa jogi i kom dano, lok ma Baibul tito i kom lok man ki kit ma dano twero nongo kwede yweyo okelo mitti botgi. Pingo lok magi gudo cwiny dano ma tye atir? Pien Baibul keken aye tye ki lagam ma gene i kom lok ma pirgi tego magi ducu.—Jabuli 119:130.

5. (a) Ka dano gukwero winyo lok me Baibul, i kare mukene mogo nongo obedo pingo? (b) Watwero konyo dano ma kit meno nining?

⁵ Ento, ka dano guwaco iwa ni gin pe gingeyo lok me Baibul kono? Meno mono dong twero juko lokwa woko? Pe, ka gin giye nyammo lok. Twero bedo ni gwok gineno Baibul calo buk pa Lukricitayo ata-ni. Kwo goba goba-gi ki donyo i lok me wibye, kacel ki bwolo lim pa dano, aye oromo bedo gin ma miyo gineno Baibul ki wang marac. Pingo pe ipeny ka gitamo kit meno? Kit ma lok me Baibul kwero kwede yo me lobo ma Lukricitayo ata-ni gilubo, kacel ki kit jammi mogo ma poko Lukricitayo ata-ni ki Lukricitayo kikome, twero medo mitigi.—Mika 3:11, 12; Matayo 15:7-9; Yakobo 4:4.

6. (a) Kit jammi ango ma omiyo in kikomi i ye ni Baibul obedo Lok pa Lubanga? (b) Kit lok anyama ango mukene ma kitwero tic kwede me konyo dano mukene me niang ni Baibul ada oa ki bot Lubanga?

⁶ Ki bot jo mukene, nyammo lok ma nyuto atir ni Baibul kicoyo pi teko pa cwiny pa Lubanga romo miyo kony. Gin ango ma nyuto boti kamaleng ni Baibul oa ki bot Lubanga Jehovah? Mono obedo lok me Baibul kikome ma nyuto ka ma Baibul oa ki iye? Nyo mono ni Baibul tye ki lwagi lok pa lunebi ma nyuto ngec matut pi jammi ma tye anyim ma pe twero a ki i teko pa dano? (2 Petero 1:20, 21) Nyo mono ni kadi bed dano 40 aye gucoyo Baibul i kin kare ma romo mwaki 1600, ento lok ma i Baibul rwatte i yo me aura tutwal? Nyo pien ni lokke rwatte arwata ki ngec me cayan ka i poro ki coc mukene me karene? Nyo tyero lok atir labongo umo gin mo ma lucocce gutyero aye? Nyo kit ma gitute kwede ma gwa me temo balone woko? Kit jammi mo keken ma in kikomi inongo ni yomocwinyi itwero bene tic kwede me konyo jo mukene.a

Kwano Baibul-wa

7, 8. (a) Wan omyero wabed ka timo ngo ki Baibul? (b) Medo i kom kwano Baibul piwa kenwa, gin ango ma dok mitte? (c) In ki komi iniang yub pa Jehovah nining?

⁷ Medo i kom konyo jo mukene me ye Baibul, wan kikomwa myero wakwany kare me kwano Baibul kare ducu. In itye ka timo meno? I kin buke ducu ma kigoyo, Baibul keken aye ma pire tek loyo ducu. Ngene kene, man pe tyene ni ka wakwano piwa kenwa, dong nongo pe wamito gin mo mukene mapat. Ginacoya ciko dano i kom koone ken. Omyero watam ni pe watwero ngeyo jammi ducu ka wangiyo tere piwa kenwa. Kwan piwa kenwa kacel ki bedo i kacokke pa jo pa Lubanga kare ducu mitte me bedo Lakricitayo ma ocwiny.—Carolok 18:1; Jo Ibru 10:24, 25.

⁸ Ma make ki lok man, Baibul tito lok pi ladit mo me Etiopia ma onongo tye ka kwano lok ki i buk pa Icaya. Lamalaika mo omiyo Lakricitayo Pilipo openyo laco-ni ni: “In iniang lok ma ikwano-ni?” Ki mwolo, Laetiopia-ni ogamo ni: “Aniang ningning kono, ka ngat mo pe okonya?” En owaco ki Pilipo ni ogonye tyen lok me Ginacoya-ni. Ka kany, Pilipo onongo pe obedo mere lakwan Baibul pire kene, ma omiyo tamme i kom Ginacoya-ni. En onongo kubbe ma cok tutwal ki dul kacokke ma nen pa Lubanga. Meno aye oweko en otwero konyo Laetiopia-ni me nongo kony ki i pwony ma Jehovah onongo tye ka miyone kun wok ki i dulle meno. (Tic pa Lukwena 6:5, 6; 8:5, 26-35) I yo acel-li i kare-ni, pe tye ngat mo ma niang yub pa Jehovah atir kene kene. Wan ducu wamito kony ma Jehovah miyo ki mar ma woto ki i dulle ma nen man.

9. Kit yub ango me kwano Baibul ma twero konyo wan ducu?

⁹ Me konyowa me niang Baibul, dul pa Jehovah miyo lok ma ocung i Ginacoya mabeco i buke mapat pat. Medo i kom meno, kiyubo yub me kwano Baibul piwa i Cukul me Tiokraci i kacokke pa Lucaden pa Jehovah i wi lobo ni ducu. Kony madit twero nonge i kwano Ginacoya Maleng piri keni. (Jabuli 1:1-3; 19:7, 8) Ket kero ma pat atika me kwano Baibul kare ducu. Kadi bed in pe iniang jammi-ne tutwal, niang Ginacoya ducu wiye wiye bimiyo kony. Me labolle, ka ikwano pot karatac angwen nyo abic keken i nino acel acel, itwero tyeko kwano Baibul i kine ka mwaka acel.

10. (a) In ikwano Baibul i kare mene? (b) Anga mukene ma omyero gubed i yub me kwano Baibul, dok timone kare ducu pire tek pingo?

¹⁰ Itwero kwano Baibul-li i kare mene? Kadi iketo dakika 10 nyo 15 pire nino ki nino, ibinongo iye kony madit atika. Ka pe, olo twal ket yub me aluba pi kare ducu pi cabit acel acel, ci imok i lubo yub meno. Ka inyomme woko, wutwero nongo mit me kwano Baibul kacel ki lawoti-ni. Ka lutino tye ma dong gutegi ma giromo kwan, gin giromo leyo kwanone ki dwan ma longo. Kwano Baibul omyero obed calo kit me kwo, calo camo dek. Kit ma in ingeyo kwede ni ka kit me cam pa dano moni tye marac, kit me yot kome bene bedo marac. Kwowa me cwiny, bene tye kit meno. Dong kwowa me labed naka, jenge i kom bedo ka cam ki i “lok ducu ma a ki i dog Lubanga kare ducu.”—Matayo 4:4.

Gin ma Wamito

11. Gin ango ma omyero omi wakwan Baibul, dok ki kit tam ango?

¹¹ Gin ango ma miyo wakwano Baibul? Gin ma wamito omyero pe obed mere pi kwanone me tyeko pot karatac madwong. Tamwa omyero obed me ngeyo Lubanga maber makato wek marwa pi woro en obed ka medde ameda. (Jon 5:39-42) Cwinywa myero obed calo pa lacoc me Baibul mo ma owaco ni: “Pwonya wek ange yoni ducu, ai Rwot; mi angegi maber.”—Jabuli 25:4.

12. (a) Pingo nongo “ngec ma atir” mitte, dok tute ango ma mitte ka watye ka kwan me nongo ngec meno? (b) Tic ki yo me tam angwen mene ma romo konyo-wa me tamo matut i kom gin ma wakwano i Baibul? (Nen bok i pot karatac 30.) (c) Nyut lok magi kun nongo igamo lapeny ma kimiyo i paragraf. Nen ginacoya ma kicimo ento pe kicoyo lokke kany.

¹² Ka watye ka nongo pwonnye ki bot Jehovah, mitiwa omyero obed me nongo “ngec ma atir.” Labongo meno, wabiromo keto Lok pa Lubanga i tic i yo maber i kwowa nyo titone maber bot jo mukene nining? (Jo Kolocai 3:10, NW; 2 Temceo 2:15) Me nongo ngec ma atir, omyero wakwan ki diro, dok ka lok me kabedo moni tut, omyero wakwan tyen makato acel woko wek waniang tyene. Ka watero lwodo lok ma wakwano-ni i cwinywa kun, watamo i kome i yo mapat pat wabinongo adwogi maber. Kinyuto kit yo me tam angwen mapat pat i pot karatac 30. Tam i kom dul me Ginacoya mapol magi kun itiyo ki yo me tam acel nyo makato. Ka itye ka gamo lapeny ma i pot karatac ma obilubo-ni, ibineno kit ma man tye ada kwede.

(1) Pol kare, dul Ginacoya ma i kwano twero tito boti gin mo i kom nga ma Jehovah obedo. Me labolle, i Jabuli 139:13, 14, waniang kit ma Jehovah paro kwede pi ngat ma peya kinywalo ni: “In aye ma iketo dul me koma ducu, dok icweyo woko kacel ki i i maa. Abipaki, pien in aye ma myero gilwori dok itye me aura. Ticci ducu ma itiyo obedo tic aura! Ingeya maber twatwal.” Tic me cwec pa Jehovah pud dong obedo gin me aura ya! Kit yo ma kicweyo kwede dano nyuto marre madit atika piwa.

Ma lubbe ki gin ma kitito i Jon 14:9, 10, ka wakwano kit ma Yecu otero kwede jo mukene, i adane nongo watye ka neno kit ma Jehovah kikome kono otimo kwede. Ka watye ka tamo i kom lok meno, waromo moko nining i kom Jehovah pi jammi ma kicoyo i Luka 5:12, 13 ki Luka 7:11-15?

(2) Nen kit ma meno loko kwede i kom wi lok madit me Baibul: ma obedo, ngene pa Ker madit pa Jehovah kacel ki lonyo nyinge ma bitimme i te Ker pa Yecu Kricito, Lakwaro ma kiciko pire.

Ejekiel ki Daniel gunyuto wi lok madit me Baibul kamaleng nining? (Ejekiel 38:21-23; Daniel 2:44; 4:17; 7:9-14)

Baibul nyuto Yecu calo Lakwaro ma kiciko pire kamaleng nining? (Jo Galatia 3:16)

Niyabo tito wi lok madito ma ogiko me Kerri nining? (Niyabo 11:15; 12:7-10; 17:16-18; 19:11-16; 20:1-3; 21:1-5)

(3) Penye keni kit ma itwero keto kwede jammi ma ikwano-ni i tic piri keni. Me labolle, wakwano i Nia nio wa i Nwoyo Cik i kom tim kwele ki jemo pa Icrael. Kunnu wakwano kit ma cwiny kacel ki tim maraco maca okelo kwede adwogi maraco. Pi meno, omyero omi wayom cwiny Jehovah ki kwero kobo lanen maraco pa jo Icrael. “Meno ducu yam otimme i komgi macalo lapo wic, ka dong gicoyo me cikowa, wan jo ma agikki piny oo i komwa-ni.”—1 Jo Korint 10:11.

Lok i kom Kain ma oneko Abel-li tye ki pwony ango piwa? (Acakki 4:3-12; Jo Ibru 11:4; 1 Jon 3:10-15; 4:20, 21)

Mono tam ma Baibul omiyo bot Lukricitayo ma gitye ki gen me polo-ni bene mako jo ma gitye ki gen me kwo ma pe tum i wi lobo? (Wel 15:16; Jon 10:16)

Kadi bed watye ki nying maber i kacokke pa Lukricitayo, pingo mitte ni omyero watam matek i kit me medde ki keto tam ma dong wangeyo ki i Baibul i tic i yo maber makato? (2 Korint 13:5; 1 Tecalonika 4:1)

(4) Tam kit ma iromo tic ki jammi ma itye ka kwanone me konyo jo mukene. Dano ducu giparo pi peko ma mako yot kom, pi meno watwero kwano jammi ma Yecu otimo ma nyuto jammi ma en bitimo ka en dong tye i Kerre: “Ci lwak dano gukelo bote luput ki lungolo, jo ma te lebgi oto, ki lutowang, ki lutwo mukene mapol, . . . ci en ocangogi.”—Matayo 15:30.

Anga ma lok i kom cer pa nya pa Yairo romo konyo-ne? (Luka 8:41, 42, 49-56)

13. Kit jammi ango ma watwero bedo ki gen me nongo-ne ka wamedde ki yub me bedo ka kwano Baibul kacel ki dul pa Jehovah?

¹³ Kwano Baibul dong pud bedo mit ya ka watamo i kom jammi angwen ma kitito malo-ni! Kwano Baibul pe obedo gin ma yot. Ento twero konyo-wa i kare me kwowa ducu, pien ka wakwano Ginacoya, bimiyo wadongo matek i yo me cwiny. Bedo ka kwano Baibul teretere nyikowa cok ki Jehovah Wonwa ma lamar, kacel ki omegiwa ma gubedo Lukricitayo. Bikonyo-wa me lubo tam ni “wumako lok me kwo dong matek.”—Jo Pilipi 2:16.

[Lok ma tye piny]

Nyammo wi Lok ma Kineno

• Pingo mono kicoyo dok kigwoko Baibul nio wa i karewa-ni?

• Watwero konyo jo mukene me niang ki bedo ki pwoc i kom Baibul nining?

• Pingo kwano Baibul teretere piri keni konyo? Bedo ka tic ki tam angwen mene ma romo miyowa kony me tamo matut i kom gin ma wakwano?

[Bok/Cal ma tye i pot karatac 30]

KA ITYE KA KWANO KA MO KI I BAIBUL, TAM I KOM KIT LOK MA ITYE KA KWANO-NI

Wacci i kom ngat ma Jehovah obedo

Mako kwede wi lok madit me Baibul ducu

Omyero ogud kwede kwoni

Itwero tic kwede me konyo jo mukene