Dul Lok me Angwen
Ngat ma Lunebi Ducu Gumiyo Caden i Kome
1. Lok ada ango ma obedo tye i kwo pa Yecu ma peya en odoko dano, ma nyuto wat i kin en ki Jehovah?
“WON maro Wod, ci nyutte gin ducu ma en tiyo.” (Jon 5:20) Wod pud dong olimo wat maber gin ki Jehovah Won ya! Wat ma cok meno ocakke i kare me cweye, mwaki alip mapol ata ma peya kinywale macalo dano. En onongo obedo Wod ma okwongo me cwec, ngat acel keken ma Jehovah kikome aye ocweyo. Kit gin mo keken i polo ki lobo, kicweyo kun kitiyo ki Wod me kayo me amara meno. (Jo Kolocai 1:15, 16) En bene otiyo calo Lok pa Lubanga, nyo Lalok madit, Ngat ma mitti maleng pa Lubanga kitito kun wok ki bote. Ngat meno, en Wod ma Lubanga onongo maro tutwal-li, en aye odoko laco Yecu Kricito.—Carolok 8:22-30; Jon 1:14, 18; 12:49, 50.
2. I kit yo ango ma lok pa lunebi me Baibul oloko kwede i kom Yecu?
2 Ma peya kigamo Wod me kayo pa Lubanga i ic calo dano, lwagi lok pa lunebi ma kicoyo piny oloko i kome con. Lakwena Petero otito bot Kornelio ni: ‘Lunebi ducu gubedo cadenne.’ (Tic pa Lukwena 10:43) Tic pa Yecu onongo kinyuto i Baibul tutwal ma oweko lamalaika mo otito ki lakwena Jon ni: “Lok me caden ma Yecu omiyo aye cwiny ma miyo lutit lok gitito lok pa Lubanga.” (Niyabo 19:10) Lok pa lunebi magi onyuto en atir calo Meciya. Gucimo kit ticce mapat pat me timo mitti pa Lubanga. Man ducu omyero obed gin me mitti tutwal botwa i kare-ni.
Gin ma Lok pa Lunebi Onyuto
3. (a) I lok macon ma tito anyim ma tye i Acakki 3:15, anga ma twol, “dako,” ki ‘likwayo twol’ ocung pire? (b) Pingo ‘goyo wii twol-li’ bedo gin me mitti mada bot lutic pa Jehovah?
3 Lakit lok calo pa lunebi-ni, ma okwongo, kiloko i nge jemo i Eden. Jehovah owaco bot twol ni: “Abiketo mone i kin in ki dako, ki i kin likwayi ki likwaye; en bigoyo wii, in ibitongo opunye.” (Acakki 3:15) Lok macon pi anyim meno onongo kiloko ada bot ngat ma twol ocung pire, Catan. “Dako” aye obedo dul pa Jehovah kikome ma lugen ma i polo, ma tye calo dakone. ‘Likwayo twol’ okwako lumalaika kacel ki dano ducu ma gitye ki cwiny pa Catan, jo ma gikwero Jehovah ki Jone. ‘Goyo wii twol-li’ tyen lokke ni neko Catan lajemo-ni matwal, ma obalo nying Jehovah dok okelo twon peko bot dano. Ento mono onongo anga ma pire tek i kin “likwayo” ma bigoyo goc-ci? Pi mwaki mia mapol, meno onongo obedo ‘mung maleng.’—Jo Roma 16:20, 25, 26.
4. Layin me kwaro pa Yecu konyo me nyuto en macalo Lakwaro-ni nining?
4 I nge mwaki 2,000 me kwo pa dano, Jehovah omedo lok mukene. En onyuto ni Lakwaro-ni bikatti ki i ot pa Abraim. (Acakki 22:15-18) Kadi ni obedo kit meno, ot ma onongo binywalo Lakwaro-ni pe ojenge i kom yub me tekwaro, ento i kom ngat ma nongo Lubanga oyero. Kadi bed ni Abraim onongo omaro wode Icmael ma Agar onywalo, Jehovah owaco ni: “Abimoko gicikkena ki Icaka, latin ma Cara aye binywalli.” (Acakki 17:18-21) Lacen kimoko gicikke meno pe ki Ecau, latin kayo pa Icaka, ento ki Yakobo, ma kakki 12 me Icrael oa ki i kome. (Acakki 28:10-14) I nge kare mogo, kinyuto ni Lakwaro-ni kibinywalo ki i kaka pa Juda, i ot pa Daudi.—Acakki 49:10; 1 Tekwaro 17:3, 4, 11-14.
5. I kare ma Yecu ocako ticce i wi lobo, kit jammi ango ma onyuto ni en obedo Meciya?
5 Kit lok mukene mene ma kimiyo me nyuto Lakwaro-ni? Pi mwaki ma okato 700, Baibul otuco Beterekem woko con calo kabedo me nywalo Lakwaro-ni macalo dano. Onyuto bene ni Lakwaro-ni onongo dong okwo cakke “i kare macon mada,” cakke wa i kare ma kicweye i polo. (Mika 5:2) Karene kikome me bino i wi lobo macalo Meciya onongo bene dong kitito woko bot lanebi Daniel. (Daniel 9:24-26) Dong i kare ma kiwiro Yecu ki cwiny maleng, me doko Ngat ma Kiwiro pa Jehovah, dwan Lubanga kikome ma oa ki i polo onyuto en atir kamaleng macalo Wode. (Matayo 3:16, 17) Adada Lakwaro-ni dong kinyuto! Pi meno, oweko Pilipo owaco ma cwinye tek ni: “Watyeko nongo ngat ma Moses yam ocoyo pire i cik, ma lunebi bene gucoyo pire, en aye Yecu.”—Jon 1:45.
6. (a) Ma lubbe ki Luka 24:27, lulub kor Yecu gucako niang ngo? (b) Anga ma obedo ngat ma pire tek i kin ‘likwayo dako,’ dok goyo wii twol-li tyene obedo ngo?
6 I nge meno, lulub kor Yecu gucako niang ni lok pa lunebi mapol i kome onongo kara ginyammo woko i Ginacoya. (Luka 24:27) Otugi nen bene kamaleng ni Yecu aye obedo ngat ma pire tek i kin ‘likwayo dako,’ ngat ma bigoyo wii twol-li, nginyo kwo pa Catan giko woko. Cikke pa Lubanga pi jammi ma cwiny dano mito matek tutwal-li ducu, dong bicobbe i Yecu.—2 Jo Korint 1:20.
7. Medo i kom ngeyo Ngat ma lok pa lunebi oloko i kome, gin ango mukene ma mito wange ni mitte?
7 Ngeyo man omyero okel adwogi ango i komwa? Baibul otito pi Laetiopia mo ma kikolo ma onongo obedo ka kwano lok pa lunebi i kom Lalar ki Meciya. Ki ngeng, en openyo Pilipo latit lok me kwena maber ni: “Lanebi oloko lok man i kom anga?” Dong ngat ma kikolo-ni pe oweko lok-ki ogik kenyo i kare ma en ongeyo lagamme. I nge keto cwinye me winyo lok ma Pilipo otito ki diro, laco-ni oniang ni bedo ki pwoc pi cobbe pa lok pa lanebi man mito tic mo ki bote. En oniang ni myero enong batija. (Tic pa Lukwena 8:32-38; Icaya 53:3-9) Wan bene wajolo kit meno?
8. (a) Gin ango ma temo tyero Icaka ma Abraim otemo-ni onyuto? (b) Pingo Jehovah otito bot Abraim ni rok ducu binongo mot ki i kom Lakwaro-ni, dok man gudowa nining i kare-ni?
8 Tam bene, i kom lok pa Abraim me tyero Icaka, wode acel keken ma onywalo ki Cara. (Acakki 22:1-18) Meno onongo onyuto gin ma Jehovah bitimo—miyo Wode acel keken ma en ocweyo kikome: “Pien Lubanga con omaro lobo kumeno, omiyo iye Wode acel keken, wek dano ducu ma ye en owek to, ento obed ki kwo ma pe tum.” (Jon 3:16) Man miyowa gen matek ni kit ma Jehovah omiyo Wode acel keken ma en ocweyo kikome me cobo Yubbe-ni, En bene “bimiyowa jami ducu kacel kwede.” (Jo Roma 8:32) Gin ango ma mitte ki botwa? Kit ma kicoyo kwede i Acakki 22:18, Jehovah owaco bot Abraim ni rok ducu bilimo mot ki i kom Lakwaro-ni, “pien ityeko [Abraim] woro doga [dog Lubanga].” Wan bene omyero wawiny dog Jehovah ki Wode: “Dano ma ye Wod tye ki kwo ma pe tum; ngat ma pe winyo dog Wod, pe bineno kwo, ento kiniga pa Lubanga bedo i kome.”—Jon 3:36.
9. Ka watye ki pwoc pi gen me kwo ma pe tum ma twere pi gitum pa Yecu, ci wabitimo gin ango?
9 Ka wapwoyo gen me kwo ma pe tum ma kimiyo twere pi gitum pa Yecu, ci wabitimo jammi ma Jehovah otito botwa ma owok ki i Yecu. Magi kwako marwa i kom Lubanga ki i kom luwotwa. (Matayo 22:37-39) Yecu onyuto ni marwa pi Jehovah bimiyo wapwonyo jo mukene ‘me gwoko gin ducu ma dong Yecu otyeko cikowa.’ (Matayo 28:19, 20) Dok wabinywako mar meno ki lutic pa Jehovah luwotwa kare ducu i “cokke kacel” kwedgi. (Jo Ibru 10:25; Jo Galatia 6:10) Dok, ma dok i kom winyo Lubanga ki Wode, pe omyero watam ni gin gimito ni dong wabed labongo roc mo. Buk pa Jo Ibru 4:15 waco ni, Yecu macalo Lalam dog madit, twero “winyo arem kacel kwedwa pi gorowa.” Man pud dong kweyo cwinywa ya, tutwalle ka walego Lubanga kun wawoto ki i Kricito pi kony me lweny ki gorowa!—Matayo 6:12.
Nyut Niye i Kom Kricito
10. Pingo larre mo pe bot ngat mukene mapat ki Yecu Kricito?
10 I nge cimo atir bot kot madit pa Lujudaya ma i Jerucalem kit ma lok pa lunebi ma i Baibul ocobbe kwede i kom Yecu, lakwena Petero omoko tamme matek ni: “Pe tye larre mo i ngat mukene, pien pe tye nying mo mukene i wi lobo man ma gimiyo ki wan dano ma myero walarre iye.” (Tic pa Lukwena 4:12) Kit ma jo ma oa ki i Adam ducu lubalo, to-gi pe tye ki kit wel mo ma twero bedo macalo gin-kok pi ngat mo. Ento Yecu onongo pe ki roc mo, dok kwo-ne onongo obedo me gitum me wel. (Jabuli 49:6-9; Jo Ibru 2:9) En omiyo gin-kok bot Lubanga ma welle rwatte ki kwo ma roc mo pe iye ma Adam orwenyo con ca. (1 Temceo 2:5, 6) Man oyabo yo piwa me nongo kwo ma pe tum i lobo manyen pa Lubanga.
11. Tit kit ma gitum pa Yecu twero konyowa kwede.
11 Ginkok-ki bene oyabo yo piwa me nongo kony mukene, kadi i kare-ni. Me labolle, kadi bed wan lubalo, gitum pa Yecu weko watwero bedo ma cwinywa leng pien ni kiweko balwa woko. Man okato gin ma gitum me lee okelo bot Luicrael kit ma onongo mitte i te Cik pa Moses-ni mabor ata. (Tic pa Lukwena 13:38, 39; Jo Ibru 9:13, 14; 10:22) Kadi bed kit meno, omyero waye ada ni gitum pa Kricito ni mitte tutwal pi wan ka wek kibiweko balwa: “Ka ce wawaco ni wape ki bal, meno nongo wabwolle abwola kenwa, lok ada nongo pe i iwa. Ka watuco balwa, en genne dok kite atir, biweko balwa, dok bilwoko tim maraco ma tye i komwa ducu.”—1 Jon 1:8, 9.
12. Pingo lutte i te pii obedo gin ma pire dit pi leng cwiny i nyim Lubanga?
12 Lubal gitwero nyuto niyegi i kom Kricito ki i kom gitumme nining? I kare ma dano me cencwari me acel gudoko jo ma oye, gin gutimo meno i nyim lwak. Nining? Gunongo batija. Pingo? Pien Yecu ociko ni omyero gibatija lupwonnyene ducu. (Matayo 28:19, 20; Tic pa Lukwena 8:12; 18:8) Dano mo pe romo kwero jammi me mar ma Jehovah omiyo kun wok ki i Yecu, ka ada ogudo cwinye. En biyubo kit me kwone kit ma mitte, dyere bot Lubanga i lega, ci nyuto dyerene ki lutte i te pii. Nyuto niye i yo ma kit man aye miyo en ‘lego Lubanga pi bedo ki leng cwiny.’—1 Petero 3:21.
13. Ka waniang ni watimo bal, omyero watim gin ango pire, dok pingo?
13 Ngene kene, kadi i nge man, kit maraco binyute. Ci dok ngo mukene? Lakwena Jon owaco ni: “Acoyo waraga man botwu wek pe wupot i bal; ento ka ngat mo obalo, watye ki lakony ma cung piwa bot Lubanga Won, en Yecu Kricito ma kite atir. Dok en kikome bene obedo gitum pi kwanyo balwa.” (1 Jon 2:1, 2) Man mono tyene ni kadi bed watim kit bal mo keken, ka walego bot Lubanga pi weko bal, jammi ducu bibedo maber? Pe dong ni tye kit meno. Lagony me weko bal aye obedo kuno bal. Kony bene romo mitte ki bot luelda, ma gitye ki ngec madwong i kacokke pa Lukricitayo. Wek waket tek me kwero nwoyo gin marac ma nongo otimme, omyero kong waye rac-ce ka dok cwinywa ocwer pire. (Tic pa Lukwena 3:19; Yakobo 5:13-16) Ka watimo man, watwero bedo ma cwinywa tek i kony pa Yecu ki i nongo cwak pa Jehovah odoco.
14. (a) Tit kit yo ma gitum pa Yecu konyowa kwede. (b) Ka ada watye ki niye ci wabitimo gin ango?
14 Gitum pa Yecu oyabo yo pi kwo ma pe tum i polo pi “romi manok,” dul me aryo pa lakwaro ma i Acakki 3:15. (Luka 12:32; Jo Galatia 3:26-29) Oyabo bene yo me kwo ma pe tum i paradic i lobo pi dano bilion mukene. (Jabuli 37:29; Niyabo 20:11, 12; 21:3, 4) Kwo ma pe tum obedo “mot ma Lubanga miyowa . . . i Yecu Kricito Rwotwa.” (Jo Roma 6:23; Jo Epeco 2:8-10) Ka watye ki niye i kom mot meno dok wapwoyo kit yo ma kimiyo twere kwede, ci wabinyuto man ka maleng. Niang kit ma Jehovah otiyo ki Yecu i yo me aura me timo Mitine ki kit ma pire tek pi wan ducu me lubo kor tyen Yecu macok tutwal, biweko waketo tic me pwony pa Lukricitayo bedo gin ma pire tek i kwowa. Niyewa binyute i cwiny matek ma watito kwede pi mot mabeco pa Lubanga.—Tic pa Lukwena 20:24.
15. Niye i Yecu Kricito obedo gin ma kelo ribbe nining?
15 Niye man pud dong ber, dok kelo ribbe ya! Kelo bedo ki wat ma cok ki Jehovah, ki Wode, kacel ki ngat man ki lawote i kacokke pa Lukricitayo. (1 Jon 3:23, 24) Miyo wabedo ma cwinywa yom ni Jehovah ki kica omiyo bot Wode “nying ma tye malo makato nying mukene ducu [nikwanyo nying Lubanga keken], wek gin ducu ma tye i polo ki i lobo, kadi wa gin ducu ma tye piny i te lobo, gurum conggi piny me woro nying Yecu, leb ducu myero otuc bene ni, Yecu Kricito aye Rwot, kun kelo deyo bot Lubanga Won.”—Jo Pilipi 2:9-11.
Nyammo wi Lok ma Kineno
• I kare ma Meciya obino, pingo kit me ngeye onongo tye atir kamaleng bot jo ma ada giye Lok pa Lubanga?
• Kit jammi mene ma omyero watim me nyuto pwocwa pi gitum pa Yecu?
• I kit yo ango ma gitum pa Yecu dong otyeko konyowa kwede? Man konyowa nining ka walego bot Jehovah pi weko bal?
[Cal ma tye i pot karatac 36]
Yecu owaco bot lulub kore ni omyero gupwony jo mukene me lubo cik pa Lubanga