Bok Me Lapeny

◼ Lucaden pa Jehovah mono myero gupok dwan ma kimako nyo karatac ma kiyubo me pwony?

Pwony ma kikwanyo ki i Baibul cuko cwinywa dok bene jingowa. (Tic 15:32) Pi meno, wamito ni wanywak ngec man me cuko cwiny jo ma nongo gubedo peke i kacokke. Kit ma dong jami me mako dwan tye mapol ata-ni, dano nongo ni mako dwan lumi pwony ki dok pokone bot jo ma mito yot mada. Jo mukene gugwoko dwan me pwony ma kimako mapol, kadiwa pwony ma kimiyo con, dok ki cwiny maber gipoko nyo ginyayo dwan ma kimako man bedo mapol ci gimiyo wa bot lurem. Mogo guyubo Kabedo me intanet ma giketo iye pwony ci ngat ma mito twero kobone.

Kono gire, pe kikwero ni kimak pwony macalo magi piwa kenwa nyo pi jo me otwa ma nongo gimito tic kwede. Medo i kom meno, luelda guromo yubone ni kimak pwony pi jo me kacokke ma gitye ki goro dok pe giromo bino i cokke. Ento, watye ki tyen lok maber mumiyo pe omyero wapok dwan ma kimako nyo karatac ma kiyubo me pwony.

Kit macalo pwony magi nongo kimiyo ma lubbe ki kop ma mako kacokke moni, kare mukene waromo niang tyen lok moni kilong, pien nongo pe wangeyo kwo me kacokke ma kimiyo iye pwony meno. Medo i kom meno, romo bene bedo tek botwa me ngeyo awene ki anga ma omiyo pwony man, wek wabed ki gen ni pwony meno tye kakare dok ki ngec ma atir. (Luka 1:​1-4) Pi man, poko karatac nyo pwony ma kimako romo bwolo jo mukene me ye nyo miyo woro ma pe opore.​—⁠1 Kor. 3:​5-7.

Lagwok ot ma lagen tiyo matek me miyo botwa cam me cwiny ‘muromo’ “i kare ma mitte.” (Luka 12:42) Man kwako wa pwony ma kiyubo pi lwak ma myero kimi i kacokke pa Lucaden pa Jehovah ki dwan ma kimako me pwony-gu ma kitwero kwanyone ki i Kabedo me intanetwa me jw.org. Wageno ni lagwok ot ma lagen kacel ki Lukikone Madit gibimiyo jami ducu ma wamito wek wacung matek i niye.​—⁠Tic 16:​4, 5.