Dul Lok me Apar Wi Abiro
Pwony Kit me Lworo Lubanga i Paco
1. Keto tira ma a ki i Lok pa Lubanga i tic ogudo nyom mapol nining?
JEHOVAH aye Ocako yub me nyom, Lokke miyo tira maber loyo pi luot. Macalo adwogi me tic ki tira meno, jo mapol gujingo nyomgi matek. Ki pwoc madit, jo mogo ma onongo gibedo mere kacel calo jo ma gunyomme, gukwanyo kare me cito ka diyo cingi wek nyomgi obed i te cik. Mukene guweko tim me cot woko. Co ma yam lugero ma onongo giyelo mon ki lutinogi dong gupwonyo mwolo ki ber kit.
2. Kwo me ot i kit pa Lukricitayo kwako ngo?
2 Kwo me ot i kit pa Lakricitayo kwako jammi mapol, calo jammi ma watimo me neno-ni nyom-wa omyero omok matwal, jammi ma watimo me cobo gin ma mitte piwa me atima i ot, ki kit ma watero kwede jo me otwa. (Jo Epeco 5:33–6:4) Kadi bed ni wangeyo ngo ma Baibul loko i kom kwo me bedo i ot, keto pwony ma i Baibul i tic twero bedo gin ma dok pat. Pe tye ngat mo i kinwa ma mito bedo calo jo ma Yecu ongolo kop i komgi pi turo cik pa Lubanga. Jo ma kit meno gitamo goba goba ni moko i dini moni keken mere romo. (Matayo 15:4-9) Pe wamito lworo Lubanga i kitwa ma nen ki woko keken ma pe waketo i tic i otwa. Meka meno, wamito nyuto lworo Lubanga kikome, ma en aye “Lonyo madit tutwal-li.”—1 Temceo 5:4; 6:6; 2 Temceo 3:5.
Nyom Myero Ori pi Kare ma Romene?
3. (a) Ngo ma tye ka timme i kom nyom mapol, ento ngo ma myero wayubbe matek me timone? (b) Ti ki Baibul ma megi me gamo lapeny magi ma kiryeyo piny i te paragraf man.
3 Mar matek i kin lunyom tye ka doko goro medde ameda. Jo mukene ma nongo gunyomme pi mwaki mapol giketo kenygi woko ka dok ginyomme odoco. Pe bene obedo gin manyen me winyoni jo matino ma pud gunyomme anyoma gupokke woko inge kare mo manok keken. Labongo paro pi jammi ma jo mukene timo, omyero wabed ki mitti me yomocwiny Jehovah. Dong, kong waneno lapeny magi ki Ginacoya mogo me ngeyo gin ma Lok pa Lubanga waco i kom ri pa nyom.
Ka laco ki dako gunyomme, omyero gunge ni gibibedo kacel pi kare ma romene? (Marako 10:6-9; Jo Roma 7:2, 3)
Gin ango keken ma twero keto keny dok ye ki dano me nyom odoco, ma tye atir i nyim Lubanga? (Matayo 5:31, 32; 19:3-9)
Jehovah winyo nining pi nyom maket ma pe a ki i twero me lokke? (Malaki 2:13-16)
Baibul mono cwako pokke macalo yo me cobo peko me nyom? (1 Jo Korint 7:10-13)
Kit kwo ango ma weko pokke twere? (Jabuli 11:5; Luka 4:8; 1 Temceo 5:8)
4. Pingo nyom mukene rii?
4 Pingo nyom mukene bedo maber mada, dok rii? Nyiko kare me nyom nio ka lumit nyom dong gutegi obedo tyen lok acel, ento pire tek mada bene me nongo ngat ma imaro ma nywako tam acel kwedi dok ma nyammo kop ma pirgi tego ducu kamaleng. Ma pire dit loyo kono, obedo ngat ma maro Jehovah dok woro Lokke calo gin me tyeko peko. (Jabuli 119:97, 104; 2 Temceo 3:16, 17) Lakit dano-nu pe bibedo ki tam ni, ka jammi pe owoto maber, ci yatte mere pokke nyo keto keny. En pe bitiyo ki goro pa lawote pi yenyo yo me weyo tic ma kemme. Ento, en biciro peko mapol dok yenyo kit yo me cobone.
5. (a) Mwolo i kom Jehovah make ki nyom nining? (b) Kadi bed warwatte ki adegadega, magoba ango ma bino pi lubo kit pa Jehovah?
5 Catan pyem ni ka wadeno can ci wabiweko yo pa Jehovah woko. (Yubu 2:4, 5; Carolok 27:11) Ento Lucaden pa Jehovah mapol gudeno can pi bedo ki luot ma yelogi pi worogi, ento gin pe guweko kwonge-gi me nyom. Gimedde ameda ki moko-gi i kom Jehovah ki cikke. (Matayo 5:37) Jo mukene ma guciro can gunongo yomcwiny me ribbe kacel ki luotgi i tic pi Jehovah inge mwaki mapol me adegadega! (1 Petero 3:1, 2) Pi Lukricitayo mogo ma luotgi pe onyuto cwiny me lokke, nyo ma luotgi owekogi pien gubedo lutic pa Jehovah, gin bene gingeyo ni gibinongo mot pi nyuto lworo i kom Lubanga i pacigi.—Jabuli 55:22; 145:16.
Ngat Acel Acel Myero Oti ma Kamege
6. Me bedo ki nyom maber, yub ango ma myero me awora?
6 Adada, wek kwo obed maber i nyom tye jammi ma mitte ma kato bedo kacel keken. Gin ma pire tek ma mitte ki tung bot ngat acel acel aye woro yub me tela pa Jehovah. Man miyo jammi woto kore ki kore dok kelo kwo ma opye mot i paco. I 1 Jo Korint 11:3 wakwano ni: “Ento amito wunge ni wi laco acel acel en aye Kricito, wi dako aye cware, ki wi Kricito aye Lubanga.”
7. Telo wi jo ma paco omyero owot nining?
7 In ineno ngo ma tyeng meno oloko i acakkine? Adada, laco acel acel tye ki latel Wiye, Kricito, ma en myero omine i tere. Man nyuto ni laco omyero otel tela-ne i kit pa Yecu. Kricito mine i te twero pa Jehovah, maro kacokke tutwal, dok gwoko bene. (1 Temceo 3:15) En bene “odyero iye wa-kwone kulu.” Yecu pe obedo lawake dok onongo pe wany, “ento lamwolo dok ngat ma cwinye leng.” Jo ma gimine i te telane ‘gilimo yweyo i kwogi.’ Ka laco tero luode i yo meno, nongo nyuto ni en tye ka mine i te tela pa Yecu. Dako ma Lakricitayo myero onge ni, bedo ber mada ki me yweyo me mine i te tela pa cware ki tic kwede kacel.—Jo Epeco 5:25-33; Matayo 11:28, 29; Carolok 31:10, 28.
8. (a) Pingo cawa mukene kit pa Lukricitayo pe twero kelo adwogi maber i paci mogo? (b) Myero watim ango ka watye i kit me kwo meno?
8 Kadi ningo, peko binen. Cwiny me dago bedo ka lubo gin ma ngat mukene aye cimo, oromo bedo ni nongo dong omoko woko ma peya ngat moni me ot-ti ocako keto cik me Baibul i tic. Yo me mwolo nyo kit me mar cawa mukene pe oromo loko kit cwiny man. Wan wangeyo ni Baibul oloko ni, ‘waweku dong keccwiny ducu, ki wang ic ki kiniga, daa i wi dano mukene, yet, kacel ki raccwiny ducu.’ (Jo Epeco 4:31) Ento ka jo ot mukene pe giniang gin mukene ma pat ki daa kono, ngo ma myero gitim? Pe rac, Yecu pe oporo kit pa lubura ki lubit dog, ento en oketo genne i kom Wonne. (1 Petero 2:22, 23) Ka kit atematema mo onen ki paco, bed macalo lanyut pi lworo Lubanga ki lego lega bot Jehovah wek okonyi meka ka lubo yo pa jo me lobo.—Carolok 3:5-7.
9. Me kaka yenyo bal, Lukricitayo ma co mapol gupwonnye me timo ngo?
9 Alokaloka pol kare pe bino oyot, ento pwony me Baibul ada tiyo ka watiyo kwede mot dok kare ducu. Co mapol gunongo ni nyomgi oyubbe i kare ma gucako niang kit ma Yecu otiyo kwede ki kacokke meno. Kacokke meno pe ocoko jo ma gipe ki roc. Ento, Yecu gire marogi, nyuto lanen maber pirgi, dok tiyo ki Ginacoya me konyogi me dongo. En ojalo kwone pi kacokke. (1 Petero 2:21) Lanenne ocuko cwiny co mapol ma Lukricitayo me telo tela maber ki dok okonyo yo me roco nyomgi. Man kelo adwogi mabeco ma kato bedo ka yenyo bal nyo kwero lok ki ngat ma wunyomme kwede.
10. (a) I yo ango ma laco nyo dako—kadi wa jo ma giwaco ni gibedo Lukricitayo—weko kwo bedo tek pi jo mukene i paco? (b) Ngo ma myero gitim pi yubo kwo meno?
10 Keti ka laco pe paro pi kit ma luode winyo kwede nyo bene pe kwanyo kare me yubo yub me nyammo kop me Baibul ki luode ki pi jammi mukene kono? Nyo ka dako pe winyo cware nyo yub pa Lubanga me mine i te twero pa laco kono? Jo mukene ginongo adwogi maber i nyammo kop me peko me ot ki mwolo. (Acakki 21:10-12; Carolok 15:22) Ento kadi bed adwogi ma onongo mitte pe ononge, ngat acel acel myero orib cinge i yubo kit me kwo me ot kun timo man ki nyako nyig me cwiny pa Lubanga i kwone. Omyero onyuto cwiny ni eparo pi jo mukene ma nongo tye i ot. (Jo Galatia 5:22, 23) Alokaloka twero bino, pe dong ni myero ikur lawoti okwong timo ticce, ento ka watimo tic ma kamegwa nongo wanyuto ni wan waketo lworo Lubanga i tic.—Jo Kolocai 3:18-21.
Kama Lagam Nonge Iye
11, 12. Ngo ma Jehovah omiyo me konyowa wek wabed ki kwo maber i ot?
11 Tye ka bedo mapol ma dano gidok iye pi nongo pwony i kwogi me ot. Ento wan wangeyo ni Lok pa Lubanga miyo tam maber loyo, cwinywa yom ni Lubanga konyowa me keto-ne i tic kun tiyo ki dulle ma nen. In mono itye ka nongo magoba ki i kony meno?—Jabuli 119:129, 130; Mika 4:2.
12 Medo i kom cito i kacokke ducu, in mono iketo yub me kwano Baibul ki luodi? Jo ot ma gitimo meno gitwero tic pi ribbe i worogi. Kwo me ot-gi doko ber ka giketo Lok pa Lubanga i tic i kit ma kwogi tye kwede.—Nwoyo Cik 11:18-21.
13. (a) Ka watye ki lapeny i lok kom kwo me ot, watwero nongo kony matir ki kwene? (b) Ngo ma myero onen i kom jammi ducu ma wamoko?
13 Itwero bedo ki lapeny i lok me kwo me ot. Me laporre, lok i kom lago nywal kono? Mono cik ye me oyo ic? Ka latin tye ki mitti manok i jammi me cwiny, mitte-ni myero en onywak i woro ki paco i rwom ma romene? Kityeko nyammo lapeny mapol kit magi i buk ma Lucaden pa Jehovah aye gucoyo. Pwonnye me tic ki buk ma konyo me kwano Baibul, ma i kine tye iye buk-lacim (index), pi nongo lagam. Ka ipe ki buk ma buk-lacim ocimo ni, tem yenyo-ne i kin bukke ma kigwoko-gi i Ot me Ker. Nyo kare mukene bene bukke magi twero nonge i kompiuta-ni. Itwero bene nyammo lapeny-nyi ma i tye kwede ki Lukricitayo ma gutegi ma co nyo mon. Ento pe dong i bed ki gen ni lagam me lapeny ducu binyuto kamaleng ngo ma myero i tim nyo pe. Pol kare in myero i mok tammi in keni, nyo kacel calo jo ma gunyomme. Ka dong, mok tam ma nyuto ni iketo pi lworo Lubanga i tic pe ki i wang lwak keken ento wa i paco bene.—Jo Roma 14:19; Jo Epeco 5:10.
Nyammo wi Lok ma Kineno
• Bedo ki mwolo i kom Jehovah kwako gwoko genewa i kom ngat ma wanyomo nining?
• Ka watye i lyeto pi peko me i ot, ngo ma bikonyowa me timo gin ma yomo cwiny Lubanga?
• Kadi bed jo mogo ma i ot gupoto, ngo ma watwero timo me yubone?
[Cal ma tye i pot karatac 155]
Tela pa laco myero obed ma pore ki kit pa Yecu
[Cal ma tye i pot karatac 157]
Bedo ka kwano Baibul ki luot kelo ribbe