Dul Lok me Apar Wi Abongwen
Medde ki Tito Lok pa Lubanga ki Tek Cwiny
1. (a) Kwena maber ango ma lupwonnye pa Yecu gupwonyo, ento Lujudaya mukene guwinyo nining iye? (b) Lapeny ango ma watwero penyo-ne?
COK cok mwaka 2,000 i ngec, ma giwiro Yecu Kricito Wod pa Lubanga me bedo Kabaka me kuro loyo lobo-ni. Gineko Yecu pi tim roro pa lukworre me dini, ento Jehovah gire ocere woko ki i lyel. Kwo me labed naka dong kombeddi twere pi Yecu. I kare ma lupwonye pa Yecu gupwonyo lok man me kwena maberri, ci, aunauna ocakke cut. Jo mukene gimako-gi ci giketogi i buc, dok bene gipwodogi kun kijuko-gi pe me medde ki lok i nying Yecu. (Tic pa Lukwena 4:1-3, 17; 5:17, 18, 40) Ngo ma gutimo? Ka obed in, kono onongo itimo ngo? Dok onongo pud ibimedde ki pwony ki tekcwiny?
2. (a) Kit kwena maber mene ma myero watit pire i karewa ni? (b) Anga-gi ma gimiyogi tic me tito lok man me kwena maberri?
2 I mwaka 1914 giketo Kabaka me Ker pa Lubanga, Yecu Kricito, me bedo laloc i polo ‘i dye lumone-ne.’ (Jabuli 110:2) Ka dong, gibolo Catan ki Jogi-ne woko piny i ngom. (Niyabo 12:1-5, 7-12) Cutcut kare me agikki me yub me jammi me kare-ni otugi cakke. Ka kare man otum, Lubanga binginyo kit me kwo me kare man ma Catan aye loyo ni woko ducu ki pete tere. (Daniel 2:44; Matayo 24:21) Jo ma bibwot, gibitwero bedo ki kwo ma pe tum i wi lobo i paradic. Ka ijolo kwena man maberri, ci in bene ibimaro nywakone ki jo mukene. (Matayo 24:14) Ento kit jol ango ma i tamo ni gibijoli kwede?
3. (a) Dano tye ka jolo kwena me Kerri nining? (b) Lapeny ango ma myero wakemme kwede?
3 Ka icito ka tito lok man me kwena maber me Kerri, jo mukene gibijolone ento pol pa dano pe giketo iye cwinygi. (Matayo 24:37-39) Jo mukene gibicayi nyo gibijuki. Yecu ociko ni adegadega twero bino ki bot wadi-ni kikome. (Luka 21:16-19) Twero bene bino ki i gang tic nyo i cukul. I but lobe mukene, gamente ogengo tic pa Lucaden pa Jehovah woko. Dong ka i rwatte ki peko meno, ibimedde ki tito lok pi Ker pa Lubanga ki tekcwiny dok ma nongo ‘i cung matek liking i kom niye-ni’?—1 Jo Korint 16:13.
Pe Waketo Gen i Tekowa Kenwa
4. (a) Me nyuto ni wan lutic pa Lubanga ma lugen, gin ango ma mitte ma pire tek? (b) Pingo kacokke pa Lukricitayo obedo gin ma pire tek mada?
4 Gin ma pire tek me bedo latic ma lagen pa Jehovah aye keto gen i jammi ma en miyo me cwiny. Cokke aye obedo gin acel ki i kin-gi. Ginacoya cikowa me bedo labongo wilwic mo iye. (Jo Ibru 10:23-25) Jo ma gimedde ki bedo Lucaden pa Jehovah ma lugen gidine mada me bedo tye kare ducu i kacokke ki luwotgi. I cokke man, ngecwa medde i Ginacoya. Dok bene, pwocwa pi niang i kom ngec matye atir dongo ki ngeyo yo ma myero wati kwede medde matut. Weko wanyiko cok ki utmegiwa ma Lukricitayo i ribbe me woro dok bene jingo cwinywa me timo mitti pa Lubanga. Cwiny pa Jehovah miyo tela i kacokke, dok bene pi cwiny meno, aye weko Yecu bedo i kinwa.—Matayo 18:20; Niyabo 3:6.
5. Ka kigengo tic pa Lucaden pa Jehovah woko, ngo ma gitimo pi cokke?
5 In mono i woto i cokke kare ducu, dok i keto jammi ducu ma iwinyo gipwonyo i tic? I kare mukene, ka kigengo tic pa Lucaden pa Jehovah, bedo ber me timo kacokke ki wel dano mo manok dok bene i kin gangi. Kabedo ki cawa twero bedo pat pat dok pe bibedo i kit ma nongo omyero obed kwede-ni, cokke mukene oromo timme wa wor. Kadi bed cawa man pe opore nyo rac mada ki bot jo mukene, utmego ki lumego ma lugen giketo tek me bedo tye i cokke ducu.
6. Wanyuto nining ni waketo genwa i kom Jehovah, dok man twero konyowa me lok ki tekcwiny nining?
6 Gen i kom Jehovah dongo ka kare ducu wamiyo cwinywa bote i lega matut, kun wangeyo ni kony ma wamito ducu a ki bote. In itimo meno? Yecu olego kare ducu i kare me ticce i lobo. (Luka 3:21; 6:12, 13; 22:39-44) Dok i dyewor ma onongo peya kigure i kom yat, en ociko lupwonnyene ni: “Wuki, wuleg Lubanga, wek pe wudony i abita mo.” (Marako 14:38) Ka warwatte ki jo ma cwinygi nok i kom kwena maberri, romo kelo atematema me dok cen ki ngewa i ticwa me Kerri. Ka dano cayowa nyo giunowa, waromo winyo cwiny me weko pwony woko me temo loyo peko mogo. Ento ka walego pi cwiny pa Lubanga me konyowa pi medde anyim ki tito lok ki tekcwiny, ci gibigwokowa pe me dok cen i atematema meno.—Luka 11:13; Jo Epeco 6:18-20.
Lok Me Miyo Caden ki Tekcwiny ma Kicoyo Piny
7. (a) Pingo gin ma gicoyo piny i buk me Tic pa Lukwena pire tek botwa? (b) Mi lagam i kom peny ma giketo i agikki me paragraf man, kun i tito kit ma ngec man twero konyowa kwede.
7 Lok ma gicoyo piny i buk me Tic pa Lukwena obedo gin ma pire tek mada pi wan ducu. Tito kit ma lukwena ki lupwonnye mogo ma yam con ma gubedo dano calo wan, gubedo lucaden pa Jehovah ma lugen dok ma cwinygi tek. Kong wanenu but jammi meno ma gicoyo piny-nyi kun watiyo ki kony ma i ginacoya ma gitiyo kwede. Ka watye ka timo meno, par kit ma itwero nongo kwede kony ki i gin ma itye ka kwano-ni.
Lukwena mono onongo gubedo jo ma gupwonnye matek mada? Onongo gubedo jo ma kinywalogi ma gipe ki lworo mo kadi bed gin ango otimme? (Jon 18:17, 25-27; 20:19; Tic pa Lukwena 4:13)
Ngo ma okonyo Petero me lok ki tekcwiny i nyim kot pa Lujudaya ma onongo con gungolo to i wi Wod pa Lubanga kikome? (Matayo 10:19, 20; Tic pa Lukwena 4:8)
Ngo ma Lukwena gubedo ka timone i cabit ma onongo gikelogi i nyim lukiko pa Lujudaya? (Tic pa Lukwena 1:14; 2:1, 42)
I kare ma luloc gumiyo rukca me juko lok ki nying Yecu, Petero gin ki Jon gudok iye nining? (Tic pa Lukwena 4:19, 20)
I nge gonyogi ki i buc, lukwena dok gulokke pi nongo kony ki bot anga? Gin mono gulego ni aunauna-ni myero ojuke woko, nyo nining? (Tic pa Lukwena 4:24-31)
Yo ango ma Jehovah omiyo ki kony i kare ma jo ma gidag lupwonnye-ni gutemo juko tic me kwena maberri? (Tic pa Lukwena 5:17-20)
Lukwena gunyuto nining ni giniang tyen lok ma omiyo gigonyogi? (Tic pa Lukwena 5:21, 41, 42)
Kadi bed onongo Lupwonnye guket ata pi aunauna, ngo ma gin gumedde ki timone? (Tic pa Lukwena 8:3, 4; 11:19-21)
8. Adwogi maber ango ma onen ki i tic me tito lok me ker ma lukwena yam gutimo, dok man kono gudu wan nining?
8 Tic me tito lok man me kwena maberri pe obedo me nono. Lupwonye ma welgi romo 3,000 gunongo batija i Pentekote me mwaka 33 K.M. “Lwak jo mapol ma guye gumedde bot Rwot, co wa ki mon.” (Tic pa Lukwena 2:41; 4:4; 5:14) Mot mot, kadiwa laket aunauna matek i kom jo pa Lubanga, Caulo me Taruco, odoko Lakricitayo ma ocako miyo caden pi lok ada ki tekcwiny. Kibin kiloko nyinge ni Paulo. (Jo Galatia 1:22-24) Tic man ma ocakke i cencwari ma okwongo-ni pe ogik. Dong omedde matek mada i kare man me agikkini dok bene dong oromo i wi lobo ducu. Watye ki mot me nywako lok man, dok ka watye ka timo man, watwero nongo pwony ki lanen pa lucaden ma lumwolo ma gukwongo tic con guweko botwa.
9. (a) Paulo otiyo ki kare-ne nining pi miyo caden? (b) I kit yo ango ma in i poko kwede lok man me kwena me Kerri bot jo mukene?
9 I kare ma Paulo opwonyo ada i kom Yecu Kricito, ngo ma en otimo? “Ocako tuco lok i kom Yecu i kacokke cut kun waco ni, En Wod pa Lubanga.” (Tic pa Lukwena 9:20) En omiyo pwoc pi kica pa Lubanga ma pe opore pire, en bene oniang ni dano ducu gimito kwena maber ma en olimo ni. Paulo obedo Lajudaya, i kit me te kwaro me kare meno, en ocito i kacokke-gi pi miyo caden. En bene opwonyo lok man i dog ot ki dog ot dok onyammo lok ki dano wa i cuk-gu. Dok en onongo opong wa ki mitti me cito ka manyen pi tito lok man me kwena maberri.—Tic pa Lukwena 17:17; 20:20; Jo Roma 15:23, 24.
10. (a) Paulo onyuto nining ni kadi ni en onongo cwinye tek, ento onongo en emiyo caden i yo me niang? (b) Yo ango ma wan watwero poro kwede kit pa Paulo ka watye ka miyo caden bot wadi, jo ma watiyo kwedgi, nyo lutino kwan luwotwa?
10 Paulo obedo ki tekcwiny ki niang, kit ma wan bene omyero wabed kwede. Bot Lujudaya, en otiyo ki cik ma Lubanga ocikke kwede bot kwarogi. Bot Lugrik en otiyo ki jammi ma gin onongo gingeyo. I kare mukene en otiyo ki jammi ma en okato ki iye i kare me pwonyo ada calo yo me miyo caden. En owaco ni: “Meno ducu atiyo pi lok me kwena maber, wek an bene anywak gum mo ma a iye kacel kwedgi.”—1 Jo Korint 9:20-23; Tic pa Lukwena 22:3-21.
11. (a) Ngo ma Paulo otimo pi gengo yoko wiye ki jo ma dage? (b) Awene ma wan waromo poro kwede lanen pa Paulo ni, dok nining? (c) Teko me medde ki tito lok ki tekcwiny a ki kwene?
11 I kare ma aunauna omiyo onen calo dok onongo ber ki Paulo me cito ka pwony i kabedo ma pat pi kare mo kong, en otimo kit meno meka ka bedo ka yoko wiye ki jo ma onongo gidage. (Tic pa Lukwena 14:5-7; 18:5-7; Jo Roma 12:18) Lewic gire pe omake pi tito lok me kwena man maberri. (Jo Roma 1:16) Kadi bed Paulo orwatte ki tim mogo me ngala, ki me gero ma pe opore-gu, en onongo ‘mic pa Lubanga me tekcwiny’ me medde ki tito lok man. En otito ni: “Ento Rwot ocungo ka ngeta, ka dong omiya teko me tuco lok kakare, wek lurok ducu guwiny.” (1 Jo Tecalonika 2:2; 2 Temceo 4:17) Latela wi kacokke pa Lukricitayo, Yecu, pud tye ka medde ki miyo teko ma mitte me timo tic ma en oloko pire pi karewa ni.—Marako 13:10.
12. Ngo ma nyuto tekcwiny pa Lukricitayo, dok man a ki kwene?
12 Watye ki yo ducu me medde ki loko lok pa Lubanga ki tekcwiny, kit macalo Yecu ki lutic pa Lubanga mukene ma lugen gutimo i cencwari ma okwongo. Man pe tyen lokke ni omyero wabed jo ma pe ryek nyo watemme me rido lok me kwena man tek tek bot jo ma pe gimito. Ento pe kono ni omyero wagik tic man woko pien ni dano pe ki mitti iye; nyo aunauna miyo watwero juko lok woko. Macalo Yecu, wacimo Ker pa Lubanga ma en aye gamente matir pi lobo ducu. Waloko labongo myel kom mo pien wan aye wabedo lucungu pi Jehovah, Won Twer ducu, dok bene pien lok ma watito-ni pe obedo megwa ento a ki bote. Dok marwa pi Jehovah aye omyero omiwa teko me telowa pi miye pak.—Jo Pilipi 1:27, 28; 1 Jo Tecalonika 2:13.
Nyammo wi Lok ma Kineno
• Pingo pire tek me nywako lok man me kwena me Kerri ki dano ducu ma twero winyo, ento adwogi ango ma omyero wange ni twero bino?
• Wanyuto nining ni wan pe wageno tekowa kenwa i tic pi Jehovah?
• Pwony ma pire tek ango ma wanongo ki i buk me Tic pa Lukwena?
[Cal ma tye i pot karatac 173]
Macalo yam con, lutic pa Jehovah ma komkare-ni gitito lok pa Lubanga ki tek cwiny