Dul Lok me Pyeraryo
Wuket Nino pa Jehovah Macok i Cwinywu
1. Mono iwinyo nining i acakki-ni me ngeyo ni larre ki i abar wic me yub man macon-ni dong tye cok?
GIN me acel ma in i kwongo pwonyo-ne ma pire tek ki i Baibul aye ni Jehovah tye ki yub pi loko lobo ducu me doko paradic. I lobo manyen meno, lweny, turu cik, can, two, deno peko, ki to dong bibedo pe matwal. Kadi wa jo muto gibidwogo cen i kwo. Anyim man mwonya ba! Cok pa jammi man ducu nen i lanyut me tye pa Kricito macalo Kabaka ma dong ocakke i mwaka 1914, dok nicakke i kare meno dong watye kabedo i kare me agikki me lobo man marac-ci. I agikki me kare man, Jehovah dong bijwero yub me jammi man me kare ni woko ci bikelo lobo manyen ma ociko pireni!
2. “Nino madit pa Jehovah” obedo ngo?
2 Baibul lwongo kare man ma tye ka bino-ca ni, “nino madit pa Jehovah.” (2 Petero 3:10, NW) Nino meno obedo “nino me akemo pa Jehovah” i kom yub me jammi pa Catan ducu me lobo-ni. (Jepania 2:3, NW) Bigik ki “lweny me nino madit pa Lubanga Won twer ducu . . . , ma gilwongo ki i leb Ibru ni Armagedon,” ka ma kibijwero iye “luker ducu me lobo-ni.” (Niyabo 16:14, 16) Yo me kwoni mono nyuto ni in i tye ki niye labongo akalakala pi ‘nino pa Jehovah’ ma dong tye cokki?—Jepania 1:14-18; Jeremia 25:33.
3. (a) Awene ma nino pa Jehovah bibino iye? (b) Odoko dok ber nining ni Jehovah pe onyuto “nino meno ki cawa meno”?
3 Baibul pe otitiwa nino ma Yecu Kricito bibino iye kikome calo ngat ma Jehovah ocwalo pi Jwero yub pa Catan me kare-ni. Yecu otito ni: “Ento nino meno ki cawa meno, pe tye ngat mo ma ngeyo, kadi wa lumalaika ma i polo, kadi wa Wod, ento Lubanga Won kene aye ngeyo gire.” (Marako 13:32) Ka jo moni pe maro Jehovah, ci miyo gidiro nino meno woko cen ci gilokke ka yenyo jammi me kwo aye. Ento jo ma gimaro Jehovah adada gibitiyo bote ki cwinygi ducu, labongo paro pi awene ma agikki me yub me kwo man bibino iye.—Jabuli 37:4; 1 Jon 5:3.
4. Gin ango ma Yecu oloko macalo pwony?
4 Me ciko jo ma maro Jehovah, Yecu owaco ni: “Wugwokke, wangwu obed twolo ma nen, pien wun pe wungeyo nino ma kare biromo iye.” (Marako 13:33-37) En olegowa pe me weko cam ki mat nyo paro “lok me kwo” omwony tamwa ducu wek wiwa owil woko ki i nino man ma pire tekki.—Luka 21:34-36; Matayo 24:37-42.
5. Kit ma Petero otito kwede, ngo ma nino pa Jehovah bikelo?
5 Petero bene ominiwa pwony ma rom aroma me keto ‘nino pa Jehovah macok tutwal i tamwa, ma i nino meno polo bilyel woko ki lakalatwe bene bileny woko i mac.’ Gamente ducu pa dano—“polo”—ki dong dano maraco ducu me “lobo” ni ki “jammi ducu ma tye iye,” tam ki tim me lobo-ni, cwiny me bedo ki locken bot Lubanga ki kit me tim macilo ki mitti madwong pi jammi me kom kibijwerogi woko. Magi ducu gibileyo kakagi ki “polo manyen [Ker pa Lubanga me polo] ki lobo manyen [dano me lobo manyen]” ka ma “kit ma atir aye bibedo iye.” (2 Petero 3:10-13) Tim me nyobbo lobo-nu bicakke atura dok i cawa ma pe giyubbe iye.—Matayo 24:44.
Bed Atera pi Lanyut
6. (a) Lagam ma Yecu omiyo i kom peny pa lukwena-ne ocobbe i rwom ma rom mene i yub pa Lujudaya? (b) Yo ango ma dong but lagam pa Yecu ni okemme kwede ki jammi ma otimme dok ki kit ma ocako nen i mwaka 1914 cito kwede anyim?
6 Ma lubbe ki kare man ma watye ka kwo iye-ni, omyero wabed ki ngec ma oromo i kom jammi ma kenikeni ma tye lanyut me kare me agikki—‘agikki me yub man me kare ni.’ Ket i tammi bene kit ma Yecu omiyo kwede lagam bot lukwena-ne i kom penygi ma gicoyo i buk pa Matayo 24:3. Tye jammi mogo ma en onongo otito pirgi ma twero nonge i tyeng 4 nio wa i 22 ma dong ocobbe woko i rwom manok i kare me yub pa Lujudaya i kine ka mwaka 33 ki 70 K.M. Ento lok pa lunebi magi bene, gucobbe i yo madit cakke i mwaka 1914, i kare me bedo tye pa Kricito ki “agikki me yub me kare-ni.” Matayo 24:23-28 tito ngo ma onongo obitimme cakke i mwaka 70 K.M. nio wa i kare me bedo tye pa Kricito. Alokaloka ma gitito pire i Matayo 24:29–25:46 ni, dong tye ka timme i kare man me agikki.
7. (a) Pingo wan ki acel acel myero wabed ma wangwa twolo i kit ma piny ma kombeddi tye ka cobbo kwede lanyut meno? (b) Gam lapeny ma tye i agikki me paragraf man, kun i nyuto kit ma lanyut man tye ka cobbe kwede cakke wa i mwaka 1914.
7 Wan ducu ki acel acel myero wabed ma wangwa twolo i kom timme pa jammi magi ki kit cwiny mogo me kareni matye ka cobbo lanyut man. Kubo timme pa Jammi magi ki lok pa lunebi ma i Baibul, bikonyowa me keto nino pa Jehovah bedo macok i cwinywa. Bikonyowa bene me ciko jo mukene ki leb ma mit pi nino meno ma dong tye cok tutwal-li. (Icaya 61:1, 2) Kun nongo watye ki tam magi i cwinywa, kong dong wanenu lapeny magi odoco ma tito wiye wiye but lok i kom lanyut meno, kit macalo gicoyo kwede i buk pa Matayo 24:7 ki Luka 21:10, 11.
Yo ma pat ango ma kitito kwede pi lweny i kin ‘rok ki rok wade ka ker ki ker wade’ ma ocobbe nicakke i mwaka 1914? Ngo ma otimme cakke i kare meno?
I mwaka 1918, kit two gemo ango ma oneko dano ma okato lweny me wi Lobo Me I? Kadi bed dano dong tye ki ngec matut i kom yat me cango two, two ango ma pud tye ka neko dano mapol?
Kec tye i rwom ma lakwene i lobo kadi bed ngec pa lucayan odongo dong matek i cencwari ma okato-ni?
Ngo ma miyo ibedo labongo akalakala ni gin ma 2 Temceo 3:1-5, 13 tye ka tito-ne ni, pe obedo kwo ma onongo tye ka timme con, ento tito kwo maraco ma tye ka medde ameda i kare man ma agikki cokki?
Poko Kin Dano
8. (a) Ngo mukene, ma gitito i Matayo 13:24-30, 36-43 ma Yecu okubo ki agikki me yub me kare-ni? (b) Labol pa Yecu ni te lokke ngo?
8 Tye jammi mogo ma pirgi tego ma Yecu okubo ki agikki me yub me kare ni. Me acel ki i kin-gi aye obedo poko “lutino me ker” ki i kom “lutino pa Larac.” Yecu oloko gin man i labolle i kom poto bel ma lakworre obino ci ocoyo iye doo. I lokke me labol-li, “bel” ocung pi Lukricitayo ma kiwirogi. “Doo” meno obedo Lukricitayo ma giwaco ni gibedo Lukricitayo ento ticgi nyuto ni gubedo “lutino pa larac” pien gimoko i kom lobo ma Larac aye lalocce-ni. Gipoko Jo magi woko ki i kom “lutino me ker [pa Lubanga]” kun giwekogi me anginya. (Matayo 13:24-30, 36-43) Pokke man mono dong otimme?
9. (a) Inge Lweny me wi Lobo Me I, pokke madit ango ma otimme i kom jo ma onongo giwacci gibedo Lukricitayo? (b) I yo ango ma Lukricitayo ma giwirogi gunyuto kwede ni gin ada gibedo lutic pi Ker?
9 I nge Lweny me wi Lobo Me I, gipoko jo ma onongo giwacci gibedo Lukricitayo i dul aryo me: (1) Lupwonye pa Lukricitayo ata-ni ki jo ma lubogi, ma gukatti woko kamaleng ki cwak matek i kom Wilobe Mugure (kombeddi United Nation) dok bene pud gumoko i kom dul man, ka me (2) Lukricitayo me ada ma gukwo inge lweny meno ma gumiyo cwakgi ducu pi Ker pa Lubanga ki pa Meciya, pe bot rok me lobo ni. (Jon 17:16) Jo magi gunyute ka maleng ni gin lutic me Ker pa Lubanga ki mako tic me pwony me ‘kwena man maber me ker’ i wi lobo ducu. (Matayo 24:14) Okelo adwogi ango?
10. Adwogi ma okwongo ango ma obino ki i tic me pwony me Ker?
10 Ma okwongo, obedo coko udong jo ma giwirogi ki cwiny pa Lubanga, ma gitye ki gen me bedo ki Kricito calo luker me Ker me polo. Kadi bed ni gin onongo gitye ma guket ata i kin lurok, ento gicokogi i dul acel ma oribbe. Tyeko keto alama i kom jo magi dong onyiko cok.—Niyabo7:3, 4.
11. (a) Tic me coko dano ango ma tye ka medde, dok ma rwatte ki lok pa lunebi mene? (b) Cobbe pa lok pa lunebi man nyuto ngo?
11 Ka dong i te tela pa Kricito, tic me coko “lwak mapol ata . . . ma gua ki i rok ducu ki i kaka ki dano ducu me wi lobo ki leb ducu” ocakke. Jo magi gudoko “romi mukene” ma bibwot ki i “twon can madit atika” me donyo i lobo manyen pa Lubanga. (Niyabo 7:9, 14; Jon 10:16) Tic man me pwonyo lok me Ker pa Lubanga wa i agikki ni tye ka medde wa i kare man. Ki mwolo madit, lwak mapol me romi mukene-ni, dong kombeddi welgi oo i milion mapol ata. Gin gitye ka konyo kor udong jo ma kiwirogi ki cwalo kwena man me Kerri bot lwak. Kwena man dong gitye ka winyo pire i rok ducu.
Gin ma Bitimme i Anyim?
12. Myero kitim tic ma rom mene ma peya nino pa Jehovah oo?
12 Jammi mamalo magi ducu tye macalo lanyut ma pirgi tego ni wan dong watye cok ki agikki dok ni nino madit pa Jehovah dong cok. Ento lok pa lunebi mogo pud dok odong ma myero ocobbe ma peya nino madit ki ma kelo lworo ocakke? Eyo. Me acel, poko dano pi lok ma make ki Ker pud peya ocobbe ducu. I kabedo mukene ma gulimo aunauna magwar pi mwaki malac, kombeddi wel lupwonye manyen tye ka medde. Kadi wa i kabedo ma dano gukwero iye kwena maberri, kica pa Jehovah pud tye ka nen i ticwa me miyo caden. Ci, omyero wamedde ki tic do! Yecu ocikowa ni ka ticci otum, ci agikki dong bibino.
13. Kit ma gicoyo kwede i 1 Jo Tecalonika 5:2, 3, gin me aura ango ma bitimme, ki ngo ma myero watim?
13 Lok pa lunebi mukene ma pire tek ma Baibul otito pi anyim aye ni: “Ka dano giwaco ni, ‘Kuc tye, piny okwe mot, gin mo marac pe,’ to biturogi atura calo arem me nywal ma oturu dako muyac, ka larre biloyogi woko.” (1 Jo Tecalonika 5:2, 3) Wabikuro neno kit ma cwalo kwena man ni “kuc tye, piny okwe mot” bicobbe kwede. Ento pe tyen lokke ni luloc me lobo gibicobo peko pa dano ducu maber. Jo ma giketo nino pa Jehovah cok i cwinygi pe gibibwologi ki kwena meno. Gin ngeyo maber ni inge meno cut, can madit atika bipoto.
14. Kit jammi ango ma bitimme i kare me twon can madit atika, dok bibedo kore ki kore i yo ma nining?
14 I acakki me twon can madit atika-ni, luloc bilokke woko i kom Babilon Madit, ma en aye dini goba me wi loboni ducu, ci gibineke woko. (Matayo 24:21; Niyabo 17:15, 16) Inge meno, lurok gibilokke ka lweny i kom jo ma gimiyo deyo i kom twero pa Jehovah ma malo, meno dong bitugu akemo pa Jehovah me lokke ka lweny i kom gamente me wibye ki jo ma cwakogi, adwogine bibedo jwerogi kwicikwici. Meno ducu bitum i Armagedon ma en aye dong bigiko te twon can madit atika ni. Ci, Catan ki jogine gibibologi i twon bur matut, ma pe gibitwero bwolo dano doki. Man bigiko nino madit pa Jehovah kun kibiilo nyinge malo mada.—Ejekiel 38:18, 22, 23; Niyabo 19:11–20:3.
15. Pingo bibedo twon ding wic ka ce watamo ni nino pa Jehovah pud bor mada?
15 Agikki me yub me kare man bibino i nino-ne kikome nitap, kit ma Lubanga oyubo kwede. Pe dok bigalle. (Kabakuk 2:3) Po ni, nginyo Jerucalem i mwaka 70 K.M. obino oyot mada, i kare ma Lujudaya onongo gitamo ni pe bitimme iye, i kare ma gin gutamo ni peko dong okato woko. Kadi Babilon macon kono? Onongo tek calo got, ma onongo gene gire mada, dok girumo ki cel ma lamal. Ento opoto i dye wor acel keken. Dong, ma rom aroma ki yub me kwo me kare ni, nginyo-ne bene bibino atura mada. Ka meno bitimme, ber onongowa watye ma waribbe kacel i woro me ada, kun nongo waketo nino pa Jehovah macok i cwinywa.
Nyammo wi Lok ma Kineno
• Pingo pire tek mada me keto nino pa Jehovah macok i cwinywa? Watwero timone nining?
• Poko dano ma tye ka timme-ni mako wan ducu ki acel acel nining?
• Ngo ma pud tye i anyim ma peya nino pa Jehovah ocakke? Ci, dong ngo ma wan ducu ki acel acel myero wabed ka timone?
[Cal ma tye i pot karatac 180, 181]
Cokcokki, kare me agikki dong bitum ki jwero te yub pa Catan