PWONY ME 15
Pingo Myero Imedde ki Pwonyo Lok i kom Jehovah?
1. Medde ki kwano Baibul bikeli adwogi maber nining?
Labongo akalakala mo, kwano pwony me Baibul ma pigi tego man myero bed ojingo mar-ri pi Jehovah. Mar man mito ibed ka dongone. (1 Petero 2:2) Gen ma itye kwede pi kwo ma pe tum jenge i medde-ni ki nyiko cok bot Lubanga kun ikwano Lokke.—Kwan Jon 17:3; Juda 21.
Kit ma itye ka dongo kwede i ngec pa Lubanga-ni, niyeni bene bimedde ki dongo. Niyeni bimiyo iyomo cwiny Lubanga. (Jo Ibru 11:1, 6) Biweko ikuno balli dok iloko kwoni doko maber.—Kwan Tic pa Lukwena 3:19.
2. Ngec ma itye kwede i kom Lubanga bimiyo ikonyo jo mukene nining?
Itwero kwayo Jehovah wek ibed ki wat macok kwede
Adada, ibibedo ki miti me nywako gin ma ipwonyo ki jo mukene—wan ducu wanongo yomcwiny i tito kwena maber-ri. Kit ma itye ka medde ki kwano Baibul, ibipwonyo kit me tic ki Baibul me tito niye ma itye kwede i kom Jehovah ki kwena maber-ri.—Kwan Matayo 24:14; Jo Roma 10:13, 14.
Jo mapol gicako nywako kwena maber-ri bot luremgi nyo wadigi. Ka itye ka lok kwedgi, ti ki diro. Ma ka waccigi ni pe gitye ki niye matir, tit botgi pi cikke pa Lubanga. Wi myero opo ni mwolo ki alokaloka ma iketo i kwoni gudo cwiny dano loyo gin ma iloko.—Kwan 2 Temceo 2:24, 25.
3. Wat maber ango ki Lubanga ma twero keli yomcwiny?
Bedo Ka kwano Lok pa Lubanga bikonyi me dongo i yo me cwiny. Mot mot, itwero dongo wat macok ki Jehovah. Ibibedo dano pa Lubanga dok nongo itye i kin jo me ode.—Kwan 2 Jo Korint 6:18.
4. Itwero medde ki dongo i yo me cwiny nining?
Ka imedde ki kwano Lok pa Lubanga ci ibidongo i yo me cwiny. (Jo Ibru 5:13, 14) Peny Lacaden pa Jehovah acel mo wek okwan Baibul kwedi ki buk me Baibul Twero Pwonyowa Gin Ango? Ka imedde ki kwano Lok pa Lubanga, yo me kwoni bene biwoto ki doko maber.—Kwan Jabuli 1:1-3; 73:27, 28.
Kwena maber-ri a ki bot Jehovah, Lubanga ma layomcwiny. Itwero nyiko cok bote ka ibedo cok ki jone. (Jo Ibru 10:24, 25) Ka imedde ki tuteni me yomo cwiny Jehovah, ibinyuto ni imito nongo kwo ma en aye kwo kikome—kwo ma pe tum. Nyiko cok bot Lubanga obedo gin maber loyo ma pud dong itwero timone.—Kwan 1 Temceo 1:11, NW; 1 Temceo 6:19.