Gin Mumiyo Wamito ni Kilarwa

Nicakke wacon, dano mapol guleko kit maber kwede me bedo ma komi yot calo kom bulu kun gikwo pi naka. Ento cwercwiny madit ma watye kwede aye ni: Wan wato woko. Lok mamalo ma Yubu owaco mwaki alip adek makato angecci pud tye lok adada i kareni.

Miti me kwo pi naka tye matek adada dok dano ducu gitye kwede. Baibul wacciwa ni Lubanga oketo miti me kwo pi naka i cwinywa kacel ki cwiny me ngeyone. (Latitlok 3:11) Pi meno, tika itamo ni pore pi Lubanga ma lamar me keto i cwinywa miti ma pe watwero cobone? Ka lagammi tye ni pe, nongo igamo kakare. Lok pa Lubanga lwongo to ni lakwor ki bene ocikke ni “gibityeko woko.”​—1 Jo Korint 15:26.

Ngene kene ni to obedo lakwor. Ngat ma wiye kwiri wing wing pe ye to. Ka gin marac tye ka bino, olo to wawene, wakanne nyo wangweco woko. Ka komwa lit, watute ki kerowa ducu wek wacang woko. Watimo jami ducu ma twere wek wagwokke ki i jami ma weko komwa bedo lit.

Tika tye tyen lok mo mucwiny ma miyo waye ni lakworwa man ma dong ori tutwal-li gibityekone woko? Ada, tyen lok mucwiny tye. Lacwecwa Lubanga Jehovah, pe ocweyo dano ni myero gukwo pi mwaki manok keken ci guto woko. To onongo pe tye i yubbe i kare ma ocweyo dano. En onongo mito ni dano gukwo pi naka i lobo, dok en bicobo gin ma oyubo.​—Icaya 55:11.

Ci dong, to gibityekone nining? Pi mwaki mapol, dano gutemo yo mapat pat me gengo dano wek pe guto ento tutegi-ni pe onyako nyige. I kareni, dano pud gitye ka yenyo yo me gengone. Lucayan guyubo yadi agwera ki mukene mapat pat me cango two mogo. Gin gungiyo i yo matut gin ma tye i nyig kom (cell) jami makwo. I kareni, dano i kabedo mapol gikwo pi mwaki mapol makato i cencwari acel angec. Ento inongo ni peya kijwayo to. Kit ma Baibul waco kwede, dano ducu ‘gibidok i apwa.’​—Latitlok 3:20.

Kwena maber tye ni omyero pe wajenge i kom ryeko pa dano ni gin aye gibityeko peko man ma dong ori tutwal-li. Lubanga Jehovah oketo yub ni myero kilarwa nyo kilarwa ki i to, dok ngat ma pire tek i yub man aye Yecu Kricito.