Nicakke i dwe me abongwen, kit me cako lok manyen ma wiye tye ni “Pwony Lok Ada” bikatti i Yub me Cokke me Kwowa ki Ticwa. Mitiwa tye me nywako lok ada me Baibul ki dano, kun watiyo ki lapeny ki ginacoya.

Ka waneno ni dano moni tye ki miti, ci watwero dongo mitine pi lim mukene ki miyo bote ginakwana mo nyo watwero nyuto vidio me jw.org. Omyero wayelle me dok cen i nge nino manok mo keken me medde ki nyamo lokwa. Kit me cako lok manyen-ni kacel ki pwony pa lutino kwan i bute me Tute Matek i Tic me Pwony bijenge i kom “wot wiye wiye” ma tye i agikki me dul acel acel, i buk me Baibul Twero Pwonyowa Gin Ango? Ki i buk man, watwero nongo lapeny ki ginacoya mukene ma waromo tic kwede ka wadok cen ka lim nyo watye ka kwan ki latin kwan kun watiyo ki Baibul keken.

Tye yo acel keken ma tero dano i kwo. (Mat 7:13, 14) Kit ma waloko ki dano ma gia ki i dini ki kabedo mapatpat, omyero walok i kom pwony me Baibul ma gudo cwinygi. (1Tem 2:4) Ka wadongo ngecwa i kom pwony mapatpat me Baibul ki dirowa me “tero lok me ada i yo [ma] atir,” ci yomcwinywa bimedde, dok wabinongo adwogi maber ki i pwonyo lok me ada bot jo mukene.​—2Tem 2:15.

Dano i twok lobo lung gimito kwe cwiny. (Latit 4:1) Pi dwe me Sektemba kulu, wabiyelle matek me poko magajin me Wi Lubele ma loko i kom kit me nongo kwe cwiny. Wuter magajin man i kabedo ducu. Ento, kit ma wamito lok ki dano wang ki wang wek wakwe cwinygi, pe wabiweko magajin man i paci ma danone pe gang.

GIN MA ITWERO WACONE

“Wan ducu wamito kwe cwiny i kare mogo. Ento watwero nongone ki kwene? [Kwan 2 Jo Korint 1:3, 4.] Wi Lubele man nyamo kit ma Lubanga miyo kwede kwe cwiny.”

Ka ngatti onyuto miti dok ogamo magajin, . . .

NYUT VIDIO ME PINGO MYERO IKWAN BAIBUL?

Ci inyut kit ma wakwano kwede Baibul ki dano.

CIB TE GUTI ME DOK CEN KA LIM

Wek lapeny ma ibigamone ka idok cen calo, “Pingo Lubanga weko dano deno can?”