Bed ma Wangi Twolo Catan Mito Mwodi!

1. Tit kong kit ma cwec me cwiny odoko kwede Catan?

EN ONONGO tye ki wat maber ki Jehovah i kare mo acel. Ento lacen, lamalaika man ocako bedo ki cwiny ni dano myero guwore. Ma ka jwayo miti meno marac-ci woko ki i cwinye, en oweko odongo nio ka onywalo bal. (Yak. 1:14, 15) Wangeyo ni cwec meno me cwiny-nyi obedo Catan ma ‘pe ocung i ada.’ Ojemo i kom Jehovah dok odoko “won goba.”​—Jon 8:44.

2, 3. Lok magi ni “Catan,” “Larac-ci,” “min kulu macon-ni,” ki dok “min kulu madit” ginyuto gin ango madok i kom lamone ma kite rac loyo pa Jehovah?

² Catan odoko lamone ma dong kite rac loyo pa Jehovah dok bene en pe larem dano nicakke i kare ma en ojemo iye. Watwero niang kit ma Catan rac kwede ka waneno kit ma Baibul loko i kome. Catan te lokke ni “Lajemo,” ma nyuto ni cwec man me cwinyi pe cwako twero me loc pa Lubanga; ento en dagi dok tye ka lweny matek i kome. Ma dong rac loyo, Catan mito giko loc pa Jehovah.

³ Kit ma kicoyo kwede i Niyabo 12:9, kilwongo Catan ni Larac-ci ma te lokke ni “Lakwot Nying.” Man poyo wiwa ni meno Catan obedo ka balo nying Jehovah kun waco ni meno en lagoba. Lok man ni “min kulu macon-ni” poyo wiwa i kom gin ma Catan otimo i poto me Eden i kare ma otiyo ki twol me bwolo Kawa. Ka kilwongo Catan ni “min kulu madit[-ti],” nongo kitye ka waco ni meno en ngat mager, cwinye col, dok kite rac adada. En mitine ducu tye me juko yub pa Jehovah wek pe ocobbe ki dok me tyeko jo pa Lubanga.

4. Gin ango ma wabinyamo i pwony man?

⁴ Ki lok ada, Catan aye pud dong tye ka keto ariya madit loyo i gwoko genewa. Pi tyen lok matir, Baibul cikowa ni: “Wugwokke, wuki piny, pien lakworwu Catan tye ka wirre macalo labwor ma kok, kun yenyo dano me amwoda.” (1 Pet. 5:8) Ma lubbe ki cik meno, pwony man binyamo jami adek madok i kom Catan me nyuto tyen lok mumiyo omyero wagwokke ki i kom lamone ma kite rac loyo pa Jehovah kacel ki Jone.

CATAN TEK

5, 6. (a) Mi labol ma nyuto ni cwec me cwiny gitye “jo matek.” (b) I yo ma nining ma Catan tye ki ‘twero me kelo to’?

⁵ Cwec me cwiny ma kilwongogi ni lumalaika gitye “jo matek.” (Jab. 103:20, NW) Gin gitek adada dok giryek giloyo dano. Tye kono ni, lumalaika ma lugen gitiyo ki tekogi i yo maber. Me labolle, lamalaika acel pa Jehovah oneko lumony pa jo Aciria ma romo 185,000 kulu i dyewor acel keken​—man obedo gin ma pe twere pi dano acel keken dok pe yot bene kadiwa pi mony mapol. (2 Luker 19:35) I nino mukene, lamalaika mo acel otiyo ki teko dok ki dirone me gonyo lukwena pa Yecu ki i mabuc. Kadi bed ni askari onongo gitye cok, gin pe guniang kit ma lamalaika pa Jehovah oyabo kwede dog ot buc, ocwalo lukwena woko, ki dok oloro dog ot buc meno!​—Tic 5:18-23.

⁶ Kadi bed ni cwec me cwiny ma lugen gitiyo ki tekogi i yo maber, ento Catan tiyo ki tekone me timo jami maraco. Ki lok ada, en tye ki teko dok tiyo kwede me doro kwo pa dano! Ginacoya lwonge ni “lalo lobo man” ki dok “lubanga me lobo man.” (Jon 12:31; 2 Kor. 4:4) Catan Larac-ci bene tye ki ‘twero me kelo to.’ (Ibru 2:14) Man pe te lokke ni en neko dano ducu atir atir. Cwiny me nek ma en tye kwede-ni oromo lobo man ducu. Medo i kom meno, dano ducu gibalo dok gito pien Kawa oye bwola pa Catan dok Adam bene pe owinyo dog Lubanga. (Rom. 5:12) I yo ma kit meno, Larac-ci onongo tye ki ‘twero me kelo to.’ En aye ngat ma Yecu olwongo ni “lanek.” (Jon 8:44) Ada, Catan tye lamonewa matek adada!

7. Jogi gunyuto nining ni gitek giloyo dano?

⁷ Ka ce wajemo i kom Catan, ci nongo watye ka jemo i kom jo ducu ma gicwake dok gijemo i kom twero me loc pa Lubanga. Man kwako lumalaika mapol ma lujemo ma kilwongogi ni jogi. (Yabo 12:3, 4) Tyen mapol, jogi magi gunyuto ni gitek giloyo dano ma omiyo gitye ka weko dano gideno can malit. (Mat. 8:28-32; Mar. 5:1-5) Pe ibwon teko pa lumalaika magi maraco-ni nyo pa “ladit pa cen.” (Mat. 9:34) Labongo kony pa Jehovah, pe watwero loyo lweny i kom Catan.

CATAN GER ADADA

8. (a) Catan tye miti me timo gin ango? (Nen cal ma tye i pot karatac 9.) (b) Ki i neno ni, lobo-ni nyuto cwiny me gero pa catan nining?

⁸ Lakwena Petero oporo Catan ki “labwor ma kok.” Ma lubbe ki buk mo acel, nyig lok me leb Grik ma kigonyo ni “kok[-ki]” tere ni “koko pa lee mager ma kec neko.” Man nyuto ni Catan cwinye col dok kite rac adada! Kadi bed ni lobo ducu tye i te loc pa Catan, en tye calo labwor ma kec neko ma pud mito mwodo lee mapol. (1 Jon 5:19) Bot Catan, lobo tye mere calo “gin mo ma medo miti me cam.” En ociko wange tutwalle i kom Lukricitayo ma kiwirogi ma pud gitye i lobo kany kacel ki ‘romi mukene-ni.’ (Jon 10:16; Yabo 12:17) Catan oketo cwinye me mwodo jo pa Jehovah. Aunauna magwar ma Catan oketo i kom lulub kor Yecu i cencwari me acel nio kwede wa i kare-ni moko ni en tye ki cwiny me gero.

9, 10. (a) Catan otimo gin ango i kom jo Icrael i tutene me balo yub pa Lubanga? (Mi labol mogo.) (b) Pingo Catan onongo tye ki tyen lok ma pire tek me keto cwinye i kom jo Icrael macon? (c) Itamo ni Larac-ci winyo nining ka latic pa Jehovah mo otimo bal madit adada i kareni?

⁹ Catan onyuto cwiny me gero i yo mukene i tutene me balo yub pa Lubanga. Labwor ma kec neko kica pe mako i kom lee ma en mito mwodone. En pe paro pire ma peya oneko dok cwinye pe cwer ingeye. I yo acel-li, Catan onyuto ni epe ki cwiny me kica i kom jo ma en temme me mwodogi. Me labolle, itamo ni Catan Larac-ci owinyo nining ka en kare ki kare onongo neno Luicrael gitimo bal macalo donyo i tim tarwang ki dong bedo ki woro me jami? Tika iromo goyo i wi kit ma Catan cwinye obedo yom kwede pi adwogi marac ma obino pi tim me abor pa Jimri ki dong woro pa Gikaji?​—Wel 25:6-8, 14, 15; 2 Luker 5:20-27.

¹⁰ Catan onongo tye ki tyen lok ma pire me keto cwinye i kom jo Icrael me kare macon. Wi myero opo ni Meciya​—ngat ma bityeko Catan kun nyuto ni Jehovah aye tye ki twero me locci onongo bia ki i rok me Icrael. (Acak. 3:15) Catan onongo pe mito ni jo Icrael gubed ki cwak pa Lubanga dok man omiyo en otute matek wek ecidgi ki bal. Pe itam ni kica omako Catan i kom Daudi i kare ma otimo abor ki Batceba nyo i kare ma Moses okeng donyo i lobo ma Kiciko Pire. Ma ka meno, Catan bedo ki yomcwiny ka latic pa Lubanga mo timo bal madit adada. Ki lok ada, yomcwiny ma kit meno aye Catan tiyo kwede me yeto Jehovah.​—Car. 27:11.

11. Pingo Catan oketo cwinye i kom Cara?

¹¹ Catan onongo tye ki adegadega mapat i kom doggola ma Meciya myero oa ki iye. Me labolle, tam kong i kom gin mutimme i nge kare manok keken ma kiwacci Abram bidoko “rok madit.” (Acak. 12:1-3) I kare ma Abram gin ki Cara gitye i Ejipt, Parao oweko kikelo Cara pacone wek odok dakone. Ento, Jehovah ogwoko Cara kun larre ki i cing Parao. (Kwan Acakki 12:14-20.) Gin ma kit man bene otimme i Gerar, ma onongo odong kare manok me nywalo Icaka. (Acak. 20:1-7) Catan aye mono onongo tye ka kelo jami magi ducu? En mono onongo geno ni Cara, ma oweko gang mulony me Ur me bedo i kema-ni biye kwo me lonyo i gang kal pa Parao ki pa Abimelek? Tika Catan onongo tamo ni Cara bidonyo i tim me abor kun pe bedo lagen bot Abram gin ki Jehovah? Baibul pe tittiwa, ento watye ki tyen lok matir me ye ni Larac-ci onongo cwinye bibedo yom ka eweko Cara pe onywalo lakwaro ma kiciko pire-ni. Cwiny Catan onongo pe bingolle kop ka nyom pa Cara, nyinge kacel ki watte ki Jehovah oballe. Catan dong pud cwinye col dok kite rac ya!

12, 13. (a) Catan onyuto gerone nining i nge nywalo Yecu? (b) Itamo ni Catan neno jo matino ma gimaro Jehovah dok gitemme me tic pi Jehovah i kareni nining?

¹² Kinywalo Yecu mwaki miya mapol ata i nge to pa Abram. Pe myero itam ni Catan oneno latin lakere man macalo ngat maleng keken. Catan onongo ngeyoni latin man bidongo ci bibedo Meciya ma kiciko pire-ni. Ada, Yecu onongo tye bute mukwongo me lakwaro pa Abram, ngat ma onongo i anyim ‘bituro tic pa Larac-ci woko.’ (1 Jon 3:8) Tika Catan onongo tamo ni neko latin matidi obedo gin marac adada? Catan pe paro ka ce timo gin moni ber nyo rac. Catan otemme me neko Yecu i kare ma en pud tidi. Nining?

¹³ Cwiny Kabaka Kerode owang i kare ma lutyet ki lakalatwe gubino ka penyo pi “latin ma ginywalo me bedo kabaka pa Lujudaya-ni” dok mitine onongo tye me neko latin meno. (Mat. 2:1-3, 13) Wek mitine-ni ocobbe, en omiyo rukca me neko lutino awobe ducu ma gitye ki mwaka aryo dok kwede piny i Beterekem ki i kabedo muromo. (Kwan Matayo 2:13-18.) Yecu pud obwot ki i nek lumuku meno, ento man tittiwa gin ango i kom lamonewa Catan? Eni nyuto ka maleng ni Larac-ci pe neno kwo pa dano calo gin ma pire tek. Larac-ci pe paro kadi wa pi lutino. Ki lok ada, Catan tye “labwor ma kok.” Pe myero wii owil ni meno Larac-ci ger adada!

CATAN LABWOLA

14, 15. I yo ma nining ma Catan ‘oumo tam pa jo ma pe giye-nu’?

¹⁴ Catan tiyo ki bwola wek dano gujem i kom Jehovah, Lubanga ma lamar-ri. (1 Jon 4:8) Pien tiyo ki bwola, Catan gengo dano wek pe ‘gunge ni gin lucan i yo me cwiny.’ (Mat. 5:3) Pi meno, en ‘oumo tam pa jo ma pe giye-nu, wek pe gunen lengo me lok me kwena maber i kom deyo pa Kricito, ma en cal pa Lubanga kikome.’​—2 Kor. 4:4.

¹⁵ Yo acel ma pud dong ngene loyo ma Catan bwolo kwede ki dano aye dini goba. Cwinye yom adada ka neno dano giworo kwarigi muto, jami ma i kabedo murumogi nyo lee​—ngat mo keken nyo gin mapat ki Jehovah, Lubanga “ma lanyeko[-ni]!” (Nia 20:5) Kadi wa jo mapol ma gitamo ni gitye ka woro Lubanga i yo matir pud gumoko calo okwodo i pwony goba kacel ki kwer me tekwaro ma konygi pe. Man aye bene gin ma Luicrael gubedo ka timone i kare mukato angec. Jehovah otemo konyogi kun waco ni: “Pingo wubalo limwu i kom gin ma pe kwon, pingo kono wutyeko tekowu woko ka nongo gin ma pe yengowu? Wucik itwu atika i lokka, ci wucam cam maber, dok wubed ki yomcwiny pi cam ma miyu ma amiyowu.”​—Ic. 55:2.

16, 17. (a) Pingo Yecu owaco bot Petero ni: ‘Dok cen i ngeya in Catan’? (b) Catan twero bwolowa nining wek pe wabed ma wangwa twolo?

¹⁶ Catan romo bwolo kadi wa jo ma gitiyo ki mit kom pi Jehovah. Me labolle, nen kong gin mutimme i kare ma Yecu owaco bot lupwonnyene ni kicok neke. Ki cwiny maber, lakwena Petero otero Yecu cen ci owacce ni: ‘Par kong piri, Rwot! Gin macalo man pe bitimme i komi wacel.’ Yecu ogamo dog Petero ni: “Dok cen i ngeya in Catan!” (Mat. 16:22, 23) Pingo Yecu olwongo Petero ni “Catan”? Pien Yecu onongo ngeyo gin ma bitimme. Kare onongo dong oromo pi en me miyo kwone macalo gityer kun nyuto ni Larac-ci obed lagoba. Kit macalo kare man onongo pire tek tutwal i tekwaro pa dano-ni, onongo pe mitte ni Yecu obed ka ‘paro pire’ kekene. Cwiny Catan onongo bibedo yom ka Yecu pe obedo ma wange twolo.

¹⁷ Wan bene watye ka kwo i kare ma pire tek kit macalo agikki me lobo-ni woto ki nyiko cok-ki. Catan mito ni wabed ka ‘paro piwa’ kenwa kun waketo cwinywa i bedo ki kwo maber i lobo man. En mito ni wiwa owil ni pe watye ka kwo i kare me agikki dok wabed ma wangwa pe twolo. Pe iwek gin ma kit meno otimme i komi! Ma ka meno, omyero ‘ibed ma wangi twolo.’ (Mat. 24:42) Pe iwek Catan obwoli ni agikki piny pud bor adada​—nyo ni pe bibino matwal.

18, 19. (a) Catan romo bwolowa nining wek wabed ki tam ni meno Jehovah pe marowa? (b) Jehovah konyowa nining me bedo ma wagwokke kun bene wabedo ma wangwa twolo?

¹⁸ Catan bene temme me bwolowa i yo mukene. En mito ni waye ni Lubanga pe marowa dok pe twero timo kica pi balwa. Magi ducu gubedo yo ma Catan bwolo kwede ki dano. Tam kong, anga kikome ma Jehovah pe maro? Meno obedo Catan. Anga kikome ma pe kitwero timo kica pi balle? Lagamme pud tye ni Catan. Ento Baibul cuko cwinywa ni: “Lubanga gire pe ye gin ma pe tye kakare, wiye pe biwil i kom tic ma yam wutiyo, kadi ki mar ma wunyuto pire.” (Ibru 6:10) Jehovah tye ki pwoc madit ka watute me yomo cwinye dok ticwa pire pe to nono. (Kwan 1 Jo Korint 15:58.) Pi meno, omyero pe wawek Catan obwolwa.

¹⁹ Kit ma dong waneno kwede, Catan tek, ger, dok labwola. Wan watwero loyo lweny i kom lamone ma kit man nining? Jehovah pe weko wa ata labongo miniwa gwok ma mitte. Lokke tittiwa diro mapol ma Catan tiyo kwede dok ‘wan pe wakwiya dirone.’ (2 Kor. 2:11) Ka waniang diro ma Catan tiyo kwede, man konyowa me bedo ma wagwokke kun bene wabedo ma wangwa twolo. Ento bedo ki ngec keken i kom diro pa Catan pe romo. Baibul waco ni: ‘Wulweny matek ki Catan, ci en biringowu woko.’ (Yak. 4:7) Pwony ma lubo man binyamo kabedo adek ma waromo lweny iye i kom Catan ci waloyo.