Jo Aboro Gubwot ki i Pii Aluka

Nua, jo me ode, ki lee gudonyo i yeya. Jehovah oloro doggola woko, ci kot ocako cwer. Kot ocwer matek adada ci yeya ocako kwang i wi pii. Mot mot, wi lobo ducu opong ki pii. Jo maraco ducu ma pe gudonyo i yeya guto woko. Ento Nua ki jo me ode onongo gitye labongo ayela mo i iye. Tika iromo goyo kit ma cwinygi obedo yom kwede pien ni guwinyo dog Jehovah?

Kot ocwer dok ocwer pi nino 40 dyewor ki dyeceng ka dong ocok. Mot mot, pii ocako dwon woko. I nge kare mo yeya man ogem i wi godi. Ento pii onongo pud tye ka weng, pi meno Nua ki jo me ode onongo pe gitwero a woko ki i yeya cutcut.

Mot mot, pii ocwiny woko. Nua ki jo me ode onongo dong gubedo i yeya pi mwaka acel ki wiye. Ci Jehovah owaccigi ni dong giromo katti woko ki i yeya wek gule lobo ma lutim maraco pe iye. Onongo gitye ki pwoc madit ni Jehovah olarogi, ci gunyuto pwoc man ki tyero gitum bot Jehovah.

Cwiny Jehovah obedo yom pi gityer man. En ocikke ni pe dok ebijwero jami ducu ma i lobo-ni ki pii aluka. Macalo lanyut me cikke man, en omiyo danyu nyo ataloka mukwongo onen i polo. Tika dong ineno danyu?

Jehovah owaco bot Nua ki jo me ode ni gunywal lutino gupong lobo ducu.