PWONY ME 11

Lok ki Mit Kom

Jo Roma 12:11

GIN ME ATIMA: Cuk cwiny jo ma gitye ka winyo lokki kun iloko ki mit kom.

Ket cwinyi iye. Ka itye ka yubbe me miyo pwony-nyi, tam matut i kom kit ma lokki pire tek kwede. Nge pwony ma iyubo-ni maber adada wek ilok gin ma a ki i cwinyi.
Tam pi jo ma biwinyo lokki. Lwod lok i kom adwogi maber ma jo mukene gibinongone ka guwinyo lok ma ibikwano nyo ibipwonyo-ni. Tam i kom kit ma itwero miyo kwede pwony-nyi i yo ma bidongo pwoc pa jo ma tye ka winyone.
Wek pwony-nyi obed ma okur mamit. Lok ki mit kom. Ti ki cingi kun iloko wangi me nyuto kit ma iwinyo kwede ki i cwinyi.

Gwokke wek pe iywa tam pa dano i komi kun ibedo ka tic ki cingi i yo acel keken. Ti ki cingi i yo ma rwatte ki gin ma itye ka wacone. Lok ki mit kom tutwalle ka itye ka pwonyo lok ma pire tek ki cuko cwiny jo ma tye ka winyi wek guket pwony meno i tic. Pe iol jo ma tye ka winyi kun iloko ki mit kom mukato kare woko cakke ki i acakki me pwony-nyi nio wa i agikkine.