PWONY ME 2

Lok Kit ma Iloko Kwede Jwi

Luka 6:45a

GIN ME ATIMA: Lok kit ma iloko kwede jwi, i yo ma nyuto kit ma iwinyo kwede i kom gin ma itye ka lok iye-ni ki jo ma tye ka winyi.

Leg bot Lubanga dok iyubbe maber adada. Leg bot Lubanga wek okonyi pe me keto tammi i komi kekeni, ento i kom kwenani. Mak lok ma pigi tego ma imito titone i wii. Pe ikwan lok akwana ento lok lok ma a ki i cwinyi.

Ka ibikwano lok ma i Baibul nyo bukkewa, nge lok ma iye maber wek ikwan mapwot. Ka itye ka kwano lok pa jo mukene, kwan i yo ma nyuto kit ma giwinyo kwede ento pe dok i yo me goga tutwal.
Lok gin ma a ki i cwinyi. Tam i kom tyen lok mumiyo lokki pire tek bot jo ma tye ka winyi. Ket tammi i komgi. Ci kit ma icung kwede, kit ma itiyo kwede ki cingi, ki kit ma wangi nen kwede binyuto cwiny me lirem ma itye kwede.

Lok i yo ma iloko kwede jwi ento pe ilok atata. Lok i yo me woro kun itiyo ki leb ma rwatte dok matir.
Nen jo ma itye ka lok kwedgi. Nen wang dano ka itye ka lok kwedgi ka pe obicwero cwinygi. Ka itye ka miyo pwony i wi abam, nen ngat acel ci ikob i kom ngat mukene, ma ka neno dano ducu lawang acel.