Ka ma Kikwanyo Iye Pwony pi Yub me Cokke
© 2022 Christian Congregation of Jehovah’s Witnesses
JANUARI 2-8
LONYO MA TYE I LOK PA LUBANGA | 2 LUKER 22-23
“Pingo Myero Ibed Ngat ma Mwol?”
w00-E 9/15 29-30
Yocia Obedo ki Cwak pa Jehovah Pien En Onongo Mwol
Nicakke odiko con, jo ma gitye ka roco ot pa Lubanga gubedo ka tic ki mit kom. Labongo akalakala mo Yocia opwoyo Jehovah ni lutic magi gitye ka roco ot pa Lubanga ma kwarigi ma kitgi raco-ni gubalo. Ka tic medde ki wot anyim, Capan obino ka miyo ripot. En onongo omako buk adola mo i cinge! Dok owaco ki Kabaka ni Lalamdog Madit Ilkia onongo ‘buk me cik pa Jehovah ma yam omiyo ki Moses.’ (2 Tekwaro 34:12-18) Gin gunongo gin mo ma pire tek adada—labongo akalakala mo, man onongo obedo buk me cik ma kikobo ki i got apada ma Jehovah omiyo ki Moses-ni!
Yocia onongo tye ki miti me winyo lok ducu ma i buk-ki. I kare ma Capan tye ka kwano buk meno, kabaka Yocia obedo ka lwodo kit ma cik magi gudo kwede en kacel ki jo ma tye i te locce. Gin ma ogudo cwinye loyo aye kit ma buk me cik-ki onongo tito kit ma woro me ada pire tek kwede ki dong can ma bipoto i kom Luicrael ka gudonyo i woro me goba. I kare ma en oniang ni pe kibedo ka lubo cik ducu, Yocia oyeco bongone ci ociko Ilkia, Capan, ki dong jo mukene-ni ni: ‘Wucit, wupeny dok Jehovah pi lok ma i buk man ma kityeko nongone-ni. Akemo pa Jehovah kara olyetti i komwa matek, pien kwariwa pe gubedo ka woro lok ducu ma i buk man.’—2 Luker 22:11-13; 2 Tekwaro 34:19-21.
w00-E 9/15 30 para. 2
Yocia Obedo ki Cwak pa Jehovah Pien En Onongo Mwol
Lutic pa Yocia gucito bot lanebi ma dako ma nyinge Kulda ma onongo bedo i Jerucalem ci gudwogo ki ripot. Kulda otittigi lok ma Jehovah owaco ni, can ma kiloko iye i buk ma kinongo-ni bipoto i kom rok ma lujemo-ni. Ento pien Yocia omwolle i nyim Lubanga Jehovah, en pe bineno can meno. En bito ci kiyike i lyelle ki kuc.—2 Luker 22:14-20; 2 Tekwaro 34:22-28.
Yenyo Lonyo me Cwiny
w01-E 4/15 26 para. 3-4
Itwero Timo Gin Matir Kadi Bed ni Iwok ki i Kwo Matek i Kare me Tinoni
Kadi bed jami maraco otimme i kom Yocia i kare me tinone, en omedde ki timo jami matir i wang Jehovah. En obedo laloc maber adada ma oweko Baibul oloko i kome ni: ‘Pe tye kabaka mo ma rom kwede ki i kin luker ducu ma gutelo nyime, ma yam kong olokke bot Jehovah ki cwinye ducu ki kwone ducu, ki tekke ducu kun lubo cik pa Moses ducu; dok pe tye dano mo ma olubo ngeye ma obedo ma rom kwede.’—2 Luker 23:19-25.
Lanen maber pa Yocia-ni twero cuko cwiny jo ma guwok ki i kwo matek i kare me tinogi. Pwony ango ma wanongo ki i lanen pa Yocia? Ngo ma okonyo Yocia me yero yo matir ki dong lubone?
JANUARI 9-15
LONYO MA TYE I LOK PA LUBANGA | 2 LUKER 24-25
“Medde ki Bedo ma Wangi Twolo”
w01-E 2/15 12 para. 2
Nino me Ngolo Kop pa Jehovah Dong Tye Cok!
2 Labongo akalakala mo, lok pa lanebi Jepania ocuko cwiny Yocia me medde ki jwero woro goba ki i lobo Juda. Ento kadi bed kabaka otute matek me jwero woro goba ki i Juda, en pe ogiko tim maraco ducu ma onongo onya i kin Lujudaya-ni dok pe oculo pi bal pa kwarone Manace ma onongo “opongo i Jerucalem ki remo pa jo ma pe ki bal.” (2 Luker 24:3, 4; 2 Tekwaro 34:3) Pi meno, nino me ngolo kop pa Jehovah onongo wang ma obino.
w07-E 3/15 11 para. 10
Wi Lok Madongo ma Kikwanyo ki i Buk pa Jeremia
I mwaka me 11 me loc pa kabaka Jedekia ma obedo i mwaka 607 K.M.P., onongo Kabaka Nebukadnejar me Babilon dong orumo Jerucalem pi dwe 18. I nino dwe abiro me dwe me abic i mwaka me 19 me loc pa Nebukadnejar, Nebujaradan, ladit ma loyo wi lugwok kabaka “obino i Jerucalem.” (2 Luker 25:8) Nen calo Nebujaradan oa ki i kemane ma onongo tye i nge cel me Jerucalem ci ongiyo kit ma pinye tye kwede dok ogoyo pulan me jwerone. I nge nino adek, i dwe me apar, en ‘odonyo i Jerucalem’ ci owango woko ki mac.—Jeremia 52:12, 13.
Yenyo Lonyo me Cwiny
w05-E 8/1 12 para. 1
Wi Lok Madongo ma Kikwanyo ki i Buk pa Luker me Aryo
24:3, 4. Jehovah ‘pe otimo kica’ i kom Juda pi alii me remo ma Manace ooyo. Lubanga paro pi jo ma kinekogi labongo balgi. Watwero bedo ki gen ni Jehovah biculo kwor ki jwero jo ma gioyo remo pa jo ma pe ki bal.—Jabuli 37:9-11; 145:20.
JANUARI 16-22
LONYO MA TYE I LOK PA LUBANGA | 1 TEKWARO 1-3
“Baibul—Obedo Buk ma Tye ki Lok Ada, Ento Pe Buk me Ododo mo Ata”
w09-E 9/1 14 para. 1
Adam ki Kawa—Tika Gukwo Ada?
Me labolle, nen kong nying me tekwaro pa Lujudaya ma kicoyo i Baibul i buk me Tekwaro me Acel cura 1 me o i 9 ki dong Jiri pa Luka cura 3. Rekod me tekwaro ma kicoyo i buk me Tekwaro me Acel oloko i kom yalwak 48 ki Jiri pa Luka oloko i kom yalwak 75. Luka oryeyo nying kwari Yecu Kricito, dok buk me Tekwaro me Acel oryeyo nying luker ki lulamdog me Icrael. Bukke aryo-ni ducu loko i kom nying jo ma onongo gingene adada calo Solomon, Daudi, Yakobo, Icaka, Abraim, Nua, ki dong Adam. Jo ma kiryeyo nyinggi i bukke aryo-ni ducu gubedo jo ma gukwo ada dok Adam aye ngat ma okwongo bedo kwo.
w08-E 6/1 3 para. 4
Lok i kom Nua ki Pii Aluka—Otimme Ada
Bukke aryo me Baibul ma loko i kom nying me tekwaro-ni moko ni Nua obedo ngat ma okwo ada. (1 Tekwaro 1:4; Luka 3:36) Ejira ki Luka ma gucoyo nying me tekwaro magi onongo gubedo lutim kwed ma ludiro adada. Luka oryeyo nying kwari Yecu nio i kom Nua.
w09-E 9/1 14-15
Adam ki Kawa—Tika Gukwo Ada?
Me labolle, nen kong pwony mo me Baibul ma pire tek adada bot jo ma maro cito i ot lega—ginkok pa Yecu. Ma lube ki pwony man, Yecu Kricito omiyo kwone ma pe ki roc-ci macalo ginkok me laro dano ki i bal. (Matayo 20:28; Jon 3:16) Kit ma wangeyo kwede, ginkok obedo cente ma kiculo me koko gin moni nyo wilo gin mo ma onongo orweny. Meno aye gin muweko Baibul waco ni Yecu obedo ‘ginkok ma rwatte litap.’ (1 Temceo 2:6) Watwero penye ni, rwatte litap ki gin ango? Baibul miyo lagamme ni: “Pien macalo dano ducu to i Adam, en i kit yo acel-lu dano ducu kibimiyogi kwo i Kricito.” (1 Jo Korint 15:22) Kwo ma pe ki roc ma Yecu omiyo me laro jo ma luwiny-nyi rwatte litap ki kwo ma pe ki roc ma Adam orwenyo i kare ma otimo bal i poto me Eden. (Jo Roma 5:12) Dong nen ka maleng ni, ka onongo Adam pe okwo ada, onongo ginkok pa Yecu Kricito konye bibedo pe.
Yenyo Lonyo me Cwiny
it-1-E 911 para. 3-4
Rekod me Tekwaro
Nying Mon. Onongo kicoyo nying mon i rekod me tekwaro ka mitte keken. I Acakki 11:29, 30, kiloko i kom Carai (Cara) nen calo pien lakwar Abraim ma kiciko pire-ni onongo bia ki bot Cara ento pe dako pa Abraim mukene-ni. Nen calo kiloko i kom Milka i rekod meno pien en onongo obedo daa Labeka dako pa Icaka. Meno onongo tye ka nyuto ka maleng ni Labeka obedo wat pa Abraim, pien Icaka onongo myero pe onyom dako ki i rok mukene. (Acak 22:20-23; 24:2-4) I Acakki 25:1, kiloko i kom Ketula dako pa Abraim ma en onyomo lacen. Man nyuto ni Abraim onyomo dako mukene i nge to pa Cara dok ni onongo pud tye ki kero me nywal i nge mwaki 40 ma Jehovah oweko gunywalo latin i yo me tango. (Rom 4:19; Acak 24:67; 25:20) Dok bene onongo nyuto wat ma jo Midian ki jo Arab gitye kwede ki Luicrael.
Kicoyo bene nying Lea, Lakeri, angeca pa Yakobo ki dong lutino ma gunywalo. (Acak 35:21-26) Man konyowa me niang kit ma Lubanga obedo ka tero kwede lutino man lacen. Kicoyo nying mon mukene bene i rekod me tekwaro pi tyen lok acel-li. Ka onongo kibimiyo ginaleya bot mon ci onongo kicoyo bene nyinggi i rekod me tekwaro. (Wel 26:33) Tamar, Rakab, ki Ruth bene kicoyo nyinggi i rekod me tekwaro. Mon magi ducu onongo gutimo gin mo ma kite dok pat ma oweko gitye i kin daa Meciya, ma en aye Yecu Kricito. (Acak 38; Ruth 1:3-5; 4:13-15; Mat 1:1-5) Kicoyo bene nying mon mogo i buk me 1 Tekwaro 2:35, 48, 49; 3:1-3, 5.
JANUARI 23-29
LONYO MA TYE I LOK PA LUBANGA | 1 TEKWARO 4-6
“Legana Nyuto Gin Ango i Koma?”
w10-E 10/1 23 para. 3-7
‘Lawiny Lega’
Jabej onongo obedo laco ma maro lega. En ocako ki lego Jehovah pi laane. Ci dong okwaye pi jami adek ma onyuto ni en tye ki niye matek i kom Jehovah.
Mukwongo, Jabej olego Jehovah ni ‘omi wang lobone obed malac.’ (Tyeng 10) Laco man onongo pe obedo lama ngom ma mito jami pa jo mukene. Lega man nen calo onongo pe kwako wang ngom keken ento kwako bene dano. Twero bedo ni en onongo mito ni kinya wang ngomme wek obed ma romo luworo me ada mapol.
Me aryo, Jabej olego ni Lubanga ‘obed kacel kwede.’ Lubanga tiyo ki tekone me konyo jo ma wore. (1 Tekwaro 29:12) Me nongo jami ma en mito-ni Jabej ojenge i kom Lubanga ma cinge pe cek dok twero laro jo ma tye ki niye i kome.—Icaya 59:1.
Me adek, Jabej olego ni Lubanga ‘ogwoke ki i kom jami maraco wek pe owane.’ Lega pa Jabej ni, ‘wek gin marac pe owane-ni’ nen calo pe nyuto ni en olego Lubanga wek gin mo marac pe otimme i kome ento ni Lubanga ogwoke wek pe ebed ki kumo ki dong turcwiny mukato kare woko ka gin marac otimme.
Lega pa Jabej onyuto ni en paro pi woro me ada dok tye ki niye ki gen i kom Lawiny lega. Jehovah odok i lega man nining? Baibul ogiko lok man kun waco ni: “Ci Lubanga oye gin ma en olego.”
Yenyo Lonyo me Cwiny
w05-E 10/1 9 para. 7
Wi Lok Madongo ma Kikwanyo ki i Buk me Tekwaro me Acel
5:10, 18-22. I kare pa Kabaka Caulo, kaki me Icrael ma tye tung kunyango me Jordan guloyo lweny i kom jo Agri kadi bed wel jo Agri onongo dodogi tyen aryo kulu. Man otimme pien twoni oteka lweny me kaki magi gujenge i kom Jehovah pi kony. Wan bene omyero wagen Jehovah ki cwinywa ducu ka wamedde ki lweny i kom lumonewa ma gitego-ni.—Jo Epeco 6:10-17.
JANUARI 30–FEBUARI 5
LONYO MA TYE I LOK PA LUBANGA | 1 TEKWARO 7-9
“Ki Kony pa Jehovah, Itwero Cobo Tic Matek”
w05-E 10/1 9 para. 8
Wi Lok Madongo ma Kikwanyo ki i Buk me Tekwaro me Acel
9:26, 27. Lulevi ma onongo gigwoko dog ot pa Lubanga onongo gitye ki tic ma pire tek adada. Onongo gin aye gigwoko layab me kabedo maleng ma i ot pa Lubanga. Gin onongo gigenne adada dok onongo giyabo doggola nino ducu. Wan bene kiminiwa tic ma pire tek adada me tito kwena bot dano ma i wang ticwa wek wakonygi me bino ka woro Jehovah. Omyero wabed jo ma genne dok waket cwinywa i ticwa calo Lulevi ma onongo gigwoko dog ot pa Lubanga-ni.
w11-E 9/15 32 para. 7
Tika Itwero Bedo Calo Finekaci ka Itye ka Wok ki i Ariya?
I kare pa Luicrael macon, Finekaci onongo tye ki tic mo madit adada; ento kadi bed kit meno en oloyo ariya ma en okemme kwede ducu pien en onongo cwinye tek, tye ki niang matut, dok jenge i kom Jehovah. Tute pa Finekaci me gwoko jo pa Lubanga onyuto ni en tye ki cwak pa Jehovah. Lacen i nge mwaka 1,000, ki teko pa cwiny maleng Ejira ocoyo ni: ‘Finekaci wod pa Eleajar en aye obedo ladit ma loyogi; onongo Jehovah tye kwede.’ (1 Tekwaro 9:20) Meno aye kit ma jo ma gitelo jo pa Lubanga i kare-ni kacel ki Lukricitayo ducu ma lugen myero gubed kwede.
Yenyo Lonyo me Cwiny
w10-E 12/15 21 para. 6
Wer Bot Jehovah!
6 Jehovah otiyo ki lunebine me tito ki jone ni myero gupake ki wer. Lulevi ma onongo gitye luwer onongo pe gitiyo tic ma Lulevi mukene-ni gitimo wek gubed ki cawa muromo me coyo wer ki dong pwonyone.—1 Tekwaro 9:33.
FEBUARI 6-12
LONYO MA TYE I LOK PA LUBANGA | 1 TEKWARO 10-12
“Jing Mitini me Tic pi Lubanga”
“Pwonya Wek Ati Gin ma Imito”
12 Pore bene me lubo lanen pa Daudi pien en obedo ki pwoc i kom cik pa Jehovah dok mitine onongo tye me kwo ma lubbe ki cik pa Lubanga. Nen kong gin mutimme i kare ma Daudi onongo mito mato pii ma kitwomo “ki i wang it me Beterekem.” Lulweny adek pa Daudi guketo kwogi ka mading ci gucito gukelo pii ki i boma meno ma onongo jo Piliciti gugamo woko-ni. Ento, “Daudi pe omato; otingo oliyo piny i nyim Rwot [Jehovah].” Pingo? Daudi otito ni: “Pe obed kumeno ki i nyim Lubangana, an pe myero atim kit man. An aye dok amato remo pa jo-ni? Pien gukelo pi dyero komgi.”—1 Tekwaro 11:15-19.
13 Daudi onongo ngeyo ni Cik pa Jehovah waco ni remo omyero kiony woko piny ento pe kicam. En bene oniang tyen lok mumiyo omyero kitim kumeno. Daudi onongo ngeyo ni “kwo pa ringo tye i remo.” Ento man onongo obedo pii, pe remo. Pingo Daudi okwero matone? En oniang tyen lok ma tye i cik meno, ni Jehovah tero remo calo gin ma pire tek. Ki bot Daudi, pii meno onongo rom aroma ki remo pa co adek-ki. Pi meno, piine onongo pe matte ki tung bote. Ma ka matone, en omoko tamme me onyone woko i ngom.—Levi 17:11; Nwo. 12:23, 24.
Wek Cik ma Igi Lac Opwony Cwiny ma Ngoli Kop
5 Ka wamito ni cik pa Lubanga okonywa, pe omyero wakwangi akwana nyo wangegi angeya keken ci otum. Myero wamar dok wawor cikke. Baibul wacciwa ni: “Wukwer gin marac, wumar gin maber.” (Amoc 5:15) Ento watwero timo meno nining? Myero wapwonnye me neno jami kit ma Jehovah neno kwede. Kong waket kit man. Go kong ni itye ki peko me nino, ci daktar ocikki ni icak camo cam maber, irye ler, dok ilok kwoni i yo mukene. I nge lubo tamme, inongo adwogi maber! Ibiwinyo nining i kom tam ma daktar omiyo-ni?
6 I yo acel-li, Lacwecwa omiyo botwa cik ma weko kwowa bedo maber dok gwokowa ki i adwogi marac me bal. Me labolle, Baibul pwonyowa ni pe myero walok lok goba, wakwal kwo, wadony i tim me tarwang nyo tim me jok jok, dok pe wabed jo mager. (Kwan Carolok 6:16-19; Niyabo 21:8) Ka wanongo adwogi maber ma bino pi lubo cik pa Jehovah, ci marwa pire ki pi cikke dongo.
Yenyo Lonyo me Cwiny
it-1-E 1058 para. 5-6
Cwiny
Tic pi Jehovah ki ‘Cwinywa Ducu.’ Wek adunu pa ngat moni oti maber, myero obed olu, ento cwiny dano twero pokke gire. Daudi olego ni: ‘Mi abed ki cwiny acel me lworo in,’ man nyuto ni cwiny ngat moni twero pokke ka odok i kom maro ki lworo Lubanga. (Jab 86:11) Ngat ma kit meno pe tiyo pi Lubanga ki cwinye ducu. (Jab 119:113; Yabo 3:16) Ngat moni bene twero bedo ki cwiny aryo kun temme me tic pi rwodi aryo, nyo nongo loko ki doge nono ento gin ma i cwinye pat. (1Tekwaro 12:33; Jab 12:2) Yecu okwero kit cwiny me goba-goba meno.—Mat 15:7, 8.
Ngat ma mito yomo cwiny Lubanga myero pe obed ki cwiny ma opokke nyo ma nucunucu ento myero oti pi Jehovah ki cwinye ducu. (1Tekwaro 28:9) Man mito tute matek pien cwiny dano opong ki jami maraco dok kemo bal keken. (Jer 17:9, 10; Acak 8:21) Gin ma konyowa wek wati pi Lubanga ki cwinywa ducu aye: lega (Jab 119:145; Koko 3:41), kwano lok pa Lubanga nino ducu (Ejira 7:10; Car 15:28), tito lok me kwena maber ki mit kom (por ki Jer 20:9), ki dong ribbe kacel ki jo ma tiyo pi Jehovah ki cwinygi ducu.—Por ki 2Luker 10:15, 16.
FEBUARI 13-19
LONYO MA TYE I LOK PA LUBANGA | 1 TEKWARO 13-16
“Lubo Tira Kelo Adwogi Maber”
w03-E 5/1 10 para. 12
Tika In Bene Ipennye ni, ‘Jehovah Tye Kwene?’
12 I kare ma kidwoko Canduk me Gicikke i lobo Icrael dok kibedo ka gwokone pi mwaki mapol i Kiriat-jearim, Kabaka Daudi onongo mito ni kikob Canduk meno i Jerucalem. En openyo ludito me Icrael ni ‘ka ce ber botgi dok Jehovah bene cwako ci kitwero kobo Canduk me Gicikke i Jerucalem.’ Ento en pe openyo me niang miti pa Jehovah i kom lok meno. Ka onongo en otimo meno, ci onongo pe kibiketo Canduk me Gicikke i wi gadigadi. Onongo kono Lulevi ma gia ki i doggola pa Kokat aye gutingo i wi gwokgi kit ma Lubanga otito kwede con. Kadi bed Daudi onongo maro penyo dog Jehovah, ento en pe otimo meno i wang-ngi. Adwogine obedo marac adada. Ma omiyo lacen Daudi owaco ni: ‘Jehovah otugge i komwa pien pe yam wapenyo doge i kit ma cik mito.’—1 Tekwaro 13:1-3; 15:11-13; Wel 4:4-6, 15; 7:1-9.
w03-E 5/1 11 para. 13
Tika In Bene Ipennye ni, ‘Jehovah Tye Kwene?’
13 Lacen ma dong Lulevi gukobo Canduk me Gicikke ki i ot pa Obed-edom gutero i Jerucalem, kiwero wer mo ma Daudi aye ogoyo. Wer meno onongo tye ki lapo wic ni: ‘Wuyeny Jehovah dok wuyeny tekone, wubed i nyime nakanaka. Wupo i kom tic me aura ma en otiyo ducu, tango ma yam en otimo ki kop ma ongolo.’—1 Tekwaro 16:11, 12.
Yenyo Lonyo me Cwiny
w94-E 9/1 18 para. 17
Wubed ki Yomcwiny i Jehovah!
17 Tye me yomcwiny adada me nongo jo ma mwol ma gimito pwonyo lok i kom Jehovah! Ki lok ada, jo ma gitiyo pi Jehovah ki cwiny matir ginongo ni tic me tito kwena me Ker-ri keligi yomcwiny kare ducu. Man tye ada pien tyen lok ma pire tek loyo me bedo Lacaden pa Jehovah aye me pako nyinge ki dong ilo malo Twerone macalo Laloc Madit Loyo. (1 Tekwaro 16:31) Ngat ma ngeyo lok meno, bedo ki yomcwiny kadi bed dano pe guye kwena ma en otittigi. En ngeyo ni tito kwena bot jo ma pe gitye luye bigik woko i nino mo; ento wabipako nying Jehovah pi naka.
FEBUARI 20-26
LONYO MA TYE I LOK PA LUBANGA | 1 TEKWARO 17-19
“Medde ki Bedo ki Yomcwiny Kadi Bed Cwinyi Otur”
w06-E 7/15 19 para. 1
Ket Cwinyi i kom Ber pa Dul pa Jehovah
DAUDI tye i kin jo ma ngene adada ma kiloko i komgi i Ginacoya me leb Ibru. En obedo lakwat, lawer, lanebi ki dong kabaka ma oketo genne ducu i kom Lubanga Jehovah. Mar matut ma Daudi tye kwede i kom Jehovah oweko en obedo ki miti me gero ot pi Lubanga. Ot meno onongo bibedo kabedo ma cung pi woro me ada i lobo Icrael. Daudi onongo ngeyo ni gero ot pa Lubanga bikelo yomcwiny ki mot bot jo pa Lubanga. Pi meno Daudi owero ni: ‘Dano ma in Jehovah iyero ka ikelo cok boti tye ki yomcwiny, me bedo i dyekal me kabedoni maleng! Wabiyeng ki jami ducu mabeco ma tye i odi, ma en aye kabedoni maleng.’—Jabuli 65:4.
Nong Yomcwiny i Mot me Ticci
11 I yo acel-lu, watwero medo yomcwinywa ka watute ki tekowa ducu i tic mo keken ma kiminiwa. ‘Mi kare-ni ducu’ i tic me tito kwena, kun bene itiyo kacel ki kacokke. (Tic 18:5; Ibru 10:24, 25) Cit i cokke ma nongo iyubbe maber me miyo lagam ma dongo jo mukene. Nen pwony mo keken ma kimiyo boti i cokke me dye cabit calo tic ma pire tek. Ka kilegi ni imi kony me tiyo tic mo i kacokke, gwok cawa dok ibed ngat ma genne. Pe itam ni tic ma kimiyo boti-ni pire pe tek dok pe mitte ni iter cawani ka timone. Tute matek me dongo dironi i ticci. (Car. 22:29) Ka itiyo matek pi Jehovah, watti kwede bidongo dok yomcwinyi bene bimedde. (Gal. 6:4) Bibedo yot boti bene me bedo ki yomcwiny kacel ki jo mukene ka gunongo mot me tic ma in onongo imito.—Rom. 12:15; Gal. 5:26.
Yenyo Lonyo me Cwiny
w20.02 12, bok
Wamaro Wonwa Jehovah Matek
Tika Jehovah Keto Cwinye i Koma?
Tika dong ipennye kekeni ni, ‘I kin dano bilion mapol ata ma gikwo i lobo-ni, pingo omyero Jehovah oket cwinye i koma?’ Ka ipennye kit meno, ci pe itye keni. Kabaka Daudi ocoyo ni: “Ai Rwot [Jehovah], dano gin ango ma miyo ipo pire? Dano adana ma mwa-ni pingo ibedo ka tamo pire?” (Jab. 144:3) Daudi onongo tye ki tekcwiny ni Jehovah ngeye maber. (1 Tekwaro 17:16-18) Dok Jehovah tiyo ki Lokke kacel ki dulle me cuko cwinyi ni eneno mar ma inyuto pire. Nen kong lok mogo ma tye i Baibul ma twero konyi me moko lok man:
• Jehovah oneni ma peya kinywali.—Jab. 139:16.
• Jehovah ngeyo gin ma tye i cwinyi dok en ngeyo gin ma itye ka tamone.—1 Tekwaro 28:9.
• Jehovah kikome aye winyo legani ducu.—Jab. 65:2.
• Jami ma itimo twero yomo cwiny Jehovah nyo cwero cwinye.—Car. 27:11.
• Jehovah kikome aye onyiki cok bote.—Jon 6:44.
• Ka ito, Jehovah ngeyi maber adada mumiyo en biceri woko. En bimini kom manyen ki adam macal ki ma itye kwede kombeddi. Ibibedo ki ngec ma onongo itye kwede con dok kiti bene bibedo marom.—Jon 11:21-26, 39-44; Tic 24:15.
FEBUARI 27–MARCI 5
LONYO MA TYE I LOK PA LUBANGA | 1 TEKWARO 20-22
“Kony Jo Matino me Cobo Ticgi”
“In Bene Myero Itit Bot Jo ma Genne”
8 Kwan 1 Tekwaro 22:5. Twero bedo ni Daudi otamo ni Solomon pud pe twero telo wi yub macalo meno. Ot pa Lubanga onongo myero “obed me deyo makato ducu,” Solomon onongo ‘tidi, dok pud peya tye ki ngec mo.’ Ento Daudi onongo ngeyo ni Jehovah bikonyo Solomon me timo tic man ma pire tek-ki. Pi meno, Daudi otimo jami ducu ma en twero me yubbe pi tic man.
“In Bene Myero Itit Bot Jo ma Genne”
7 Daudi onongo mito gero ot pi Jehovah ki cwinye ducu, dok twero bedo ni cwinye otur adada. Ento en pud okonyo wode Solomon me yubbe pi gero ot man. Daudi otute matek me yubo lutic ki yenyo nyonyo, mola, ryal, jabu, ki dong bao. En pe oketo cwinye tutwal i kom ngat ma kibipwoyo pi gero ot pa Lubanga, ma lacen kicako lwongone ni ot pa Solomon. Maka meno, en ocuko cwiny Solomon kun wacce ni: “Iyo latinna, Rwot [Jehovah] obed kwedi, wek ityek gero ot pa Rwot Lubangani, kit ma yam oloko kwede i komi-ni.”—1 Tekwaro 22:11, 14-16.
Lunyodo, Tika Wutye ka Konyo Lutinowu Wek Gunong Batija?
14 Ka luelda giloko maber i kom keto yub me tic pi Jehovah ci gikonyo kor lunyodo. Lamego mo wiye po i kom lok ma Omego Russell owacce i kare ma en tye ki mwaka abicel. En owaco ni, “En oloko kweda pi dakika 15 madok i kom yub ma atye kwede i ticca pi Jehovah.” Adwogine obedo nining? Lacen, lamego meno odoko lapainia dok otiyo macalo painia pi mwaki makato 70 kulu! Man nen ka maleng ni lok maber ki cuko cwiny twero kelo adwogi maber adada i kwo pa ngat moni. (Carolok 25:11) Luelda bene gitwero lwongo lunyodo kacel ki lutinogi me tic i Ot me Ker kacel kwedgi. Gitwero kwayo lutino me timo tic ma rwatte ki kerogi.
15 Jo mukene i kacokke gitwero miyo kony nining? Gitwero mako lirem ki lutino magi. Me labolle, itwero yenyo gin ma nyuto ni latin moni tye ka dongo wat macok ki Jehovah. Tika omiyo lagam matir i cokke, nyo kece omiyo pwony i cokke ma bedo i dye cabit? Tika otito kwena maber bot ngat mo i gang kwan, tika ocung matek ma onongo tye i atematema? Ka tye kumeno, pe igalle me pwoye! Watwero keto macalo yubwa me lok ki lutino ma peya cokke ocakke nyo i ngeye. Ka watimo meno, ci lutino gibedo agonya i kin jo me ‘kacokke.’—Jabuli 35:18.
Yenyo Lonyo me Cwiny
w05-E 10/1 11 para. 6
Wi Lok Madongo ma Kikwanyo ki i Buk me Tekwaro me Acel
21:13-15. Jehovah ociko lamalaika ni ojuk two gemo-ni woko pien En paro pi can ma jone tye ka kato ki iye. Ki lok ada, “kicane dwong” tutwal.