Kit ma Mar pa Jehovah Konyowa me Loyo Lworowa

1. Kodi lworo mene ma watwero bedo kwede?

TAM kong i kom jami magi ma otimme i kwo pa Lucaden mogo. Nestor ki dakone María, onongo gimito tic ka ma can lutit kwena tye iye.b Me timo meno, onongo mitte ni gudwok piny rwom me kwogi. Ento gubedo ki lworo ni pe gibibedo ki yomcwiny ka gikwo ki cente manok keken. I kare ma awobi ma nyinge Biniam odoko Lacaden pa Jehovah i lobo ka ma kiketo kigeng i kom ticwa, en oniang ni macalo ngat acel i kin jo pa Lubanga, kitwero keto aunauna i kome. Meno omine lworo adada. Ento onongo en tye ki lworo makato i kom kit ma luganggi gibidok kwede iye ka guniang i kom dinine manyen. Laminwa Valérie kinongo ni tye ki two kanca mo marac adada, dok en obedo ka yelle me nongo daktar mo ma twero yange labongo medo remo i kome. Pe tye me ur ni, en obedo ki lworo ni eromo to woko.

2. Pingo mitte ni wati matek me loyo lworo ma watye kwede?

² Tika in kikomi dong ibedo ki kodi lworo meno? Pol pa wan dong wabedo kwede. Ka pe wapwonyo kit me loyo lworo ma watye kwede, waromo moko tam maraco ma twero weko wat i kinwa ki Jehovah doko goro. Ki lok ada, meno aye gin ma Catan mito. En bene tute me tic ki lworowa wek watur cik pa Jehovah, kadi wa cik me tito kwena maber-ri. (Yabo 12:17) Catan kite rac, cwinye col, dok tek. Ento pud iromo gwokke ki i kome. I yo ma nining?

3. Ngo ma bikonyowa me loyo lworowa?

³ Ka watye ki gen matek ni Jehovah marowa dok kare ducu en tye atera me konyowa, Catan pe bionyo bwura mo keken i komwa. (Jab. 118:6) Me labolle, laco Jabuli 118 okemme ki pekki mogo matego adada i kwone. En onongo tye ki lumone mapol, kadi wa jo mogo ma gitye ki rwom madongo (tyeng 9, 10). I kare mukene, en obedo ki par matek adada (tyeng 13). Dok Jehovah bene onongo omine pwod magwar (tyeng 18). Kadi bed kit meno, en pud obedo ki kare me pako Jehovah ki wer ni: “Pe abilworo gin mo.” Ngo mumiyo en owinyo calo etye i te gwok pa Lubanga? En oniang ni kadi bed Jehovah omine pwod, ento Wonne ma tye i polo marre matek. Laco jabuli-ni onongo tye ki gen ni kadi bed ekat ki i peko ma nining, Lubangane ma marre tutwal-li kare ducu tye atera me konye.—Jab. 118:29.

4. Kodi lworo mene ma watwero loyone ka ce waye ni Lubanga marowa?

⁴ Mitte ni wabed ki gen matek ni Jehovah marowa. Gen meno bikonyowa me loyo lworo adek mapatpat, ma gin aye, (1) lworo ni pe wabitwero miyo jami ma mitte pi lupacowa, (2) lworo dano, ki (3) lworo to. Omege ki lumege ma kiloko i komgi i paragraf mukwongo gubedo ki teko me loyo lworogi pien onongo giye ni Lubanga marogi.

LWORO NI PE WABIT WERO MIYO JAMI MA MITTE PI LUPACOWA

5. Ariya macalo mene ma twero kelo par matek tutwal bot lawi ot? (Nen cal ma i pok ngeye.)

⁵ Lawi ot ma Lakricitayo tero ticce me gwoko jo me ode calo gin ma pire tek adada. (1 Tem. 5:8) Ka in lawi ot, twero bedo ni ibedo ki lworo tutwal i kare man me Korona-ni ni ibirwenyo ticci woko. Nyo ibedo ki lworo ni pe ibitwero miyo ginacama ki kabedo pi jo me otti. Oromo bedo ni ibedo bene ki lworo ni ka irwenyo ticci, pe dong ibitwero nongo mukene. Nyo calo Nestor ki María, ma kiloko i komgi con-ni, gwok ibedo ki tam ni pe iromo kwo ki cente manok. Catan obedo ki kare me gengo dano mapol ki tic pi Jehovah pien gin bene gitye ki lworo meno.

6. Ngo ma Catan mito ni waye?

⁶ Catan yelle matek wek watam ni Jehovah pe paro piwa dok ni en pe bikonyowa me miyo jami ma mitte pi lupacowa. Macalo adwogine, twero weko wayelle matek me gwoko ticwa. Waromo bene timo gin mo keken wek pe warweny ticwa kadi bed ni balo watwa ki Jehovah.

7. Yecu ocuko cwinywa ki lok mene?

⁷ Yecu, ma ngeyo Won maber loyo ngat mo keken, ocuko cwinywa ni Lubanga “ngeyo gin ma [wamito] ma nongo peya [wapenye].” (Mat. 6:8) Dok Yecu ngeyo ni Jehovah tye atera me miniwa gin ma mitte. Macalo Lukricitayo, wan wabedo jo me ot pa Lubanga. Jehovah obedo Lawi otwa, dok waromo bedo ki gen ni en bitimo gin ma ociko ki luwi odi ducu ni gutim, ma nonge i 1 Temceo 5:8.

8. (a) Ngo ma twero konyowa me loyo lworo ma watye kwede ni pe wabitwero miyo jami ma mitte pi lupacowa? (Matayo 6:31-33) (b) Nen cal ma tye. Watwero lubo lanen pa luot ma gitye ka kelo cam bot laminwa-ni nining?

⁸ Ka ce waye ni Jehovah marowa dok maro lupacowa bene, man biweko wabedo ki gen ni wabibedo ki jami ducu ma mitte. (Kwan Matayo 6:31-33.) Jehovah tye ki miti me miyowa jami ducu, dok en pud dong obedo Lami mic ma lamar dok ma cinge yot ya! I kare ma en ocweyo lobo, en otimo makato mere miyowa gin ma wamito me bedo kwo. En ocweyo jami mapol i lobo kany wek wanong mitte. (Acak. 2:9) Kadi bed i cawa mukene watye ki jami ma mitte me kwo keken, wiwa myero opo ni, tyen lok mumiyo watye ki jami magi aye pien Jehovah aye ominiwa. (Mat. 6:11) Myero kare ducu wiwa opo ni gin ma Jehovah biminiwa welle dit makato gin mo keken ma wajalo kombeddi. Dok i kare me anyim, en bimiyo botwa kwo ma pe tum. Meno aye gin ma Nestor ki María guniang iye.—Ic. 65:21, 22.

9. Ngo ma itwero pwonyo ki i labol pa Nestor ki María?

⁹ Nestor ki María onongo gitye ki ot maber kacel ki dog tic madongo i lobo Colombia. Gin guwaco ni, “Watamo i kom dwoko rwom me kwowa piny wek wamed ticwa pi Jehovah, ento onongo watye ki lworo ni pe wabibedo ki yomcwiny ka ce wakwo ki cente manok keken.” Ngo ma okonyogi me loyo lworogi? Gutamo i kom yo mapol ma Jehovah onyuto kwede marre pigi. Ki gen matek ni en kare ducu bigwokogi, gin guweko dog ticgi ma culle ber-ri woko. Gucato otgi dok gukobo i but lobogi ka ma can lutit kwena tye iye. Giwinyo nining pi tam ma gumoko-ni? Nestor owaco ni: “Waneno ada pa lok ma nonge i Matayo 6:33. Pe tye jami mo keken ma orem botwa. Dok watye ka kwo ma cwinywa yom i kare-ni.”

LWORO DANO

10. Pingo pe tye me ur ni dano gilworo dano luwotgi?

¹⁰ Nicakke ma Adam ki Kawa gujemo i kom Jehovah, dano gukelo pekki mapol i kom dano luwotgi. (Latit. 8:9) Me labolle, dano ginywaro twerogi, lutim aranyi gitimo tim bwami marac adada, lutino ma lukolo i gang kwan giyeto dok gibwuro lutino kwan luwotgi, dok jo mukene gitero lupacogi ki gero marac adada. Dong pe tye me ur ni dano gilworo dano luwotgi! Catan tiyo ki kodi lworo man nining i komwa?

11-12. Catan tiyo ki lworo ma watye kwede i kom dano mukene nining me bwurowa?

¹¹ Catan tiyo ki lworo ma watye kwede i kom jo mukene wek wajuk tito kwena nyo timo gin mukene ma Jehovah mito ni watim. I te twero pa Catan, gamente mapatpat guketo kigeng i kom ticwa dok guketo aunauna i komwa. (Luka 21:12; Yabo 2:10) I lobo pa Catan-ni, dano mapol giloko lok goba maraco i kom Lucaden pa Jehovah. Jo ma giye goba magi gitwero nyerowa nyo bene lweny i komwa. (Mat. 10:36) Tika watye ki ur i kom diro pa Catan man? Pe wacel. En obedo ka tic ki diro magi cakke wa i cencwari me acel.—Tic 5:27, 28, 40.

¹² Lworo aunauna ma a ki bot gamente pe obedo yo acel keken ma Catan tye ka tic kwede. Jo mukene gitye ki lworo i kom kit ma lupacogi gibidok kwede iye ka ce gudoko Lucaden pa Jehovah. I cawa mukene gibedo lwor i kom lok man loyo ma kigoyogi agoya. Gimaro wadigi matek dok gimito ni wadigi gumar Jehovah dok guti pire. Cwinygi cwer adada ka giwinyo wadigi loko marac i kom Lubangawa me ada ki jo ma wore. Ento i kare mogo, wadi ma onongo kong gidag lok ada, lacen gucako tic pi Jehovah. Ento ket kong ni wadiwa gukwerowa pi niyewa manyen-ni kono? Wabidok iye nining?

13. Bedo ki tekcwiny ni Jehovah marowa twero konyowa nining ka ce lupacowa gukwerowa? (Jabuli 27:10)

¹³ Watwero nongo kwe cwiny ki i lok ma tye i Jabuli 27:10. (Kwan.) Ka wiwa opo i kom kit ma Jehovah marowa kwede, pe wabibedo ki par pi gin ma bitimme, kadi bed jo gangwa gukwerowa woko. Dok wabedo ki gen ni en biminiwa bakacic pi ciro can. Jehovah bimiyo botwa jami ducu ma mitte me kwo, bikonyowa me bedo ma wiwa opye mot dok cwinywa yom, dok bikonyowa me bedo cok kwede! Meno aye gin ma omego Biniam, ma kiloko i kome con-ni oniang.

14. Ngo ma itwero pwonyo ki i labol pa Biniam?

¹⁴ Biniam odoko Lacaden pa Jehovah kadi bed onongo en ngeyo ni gamente tye ka keto aunauna magwar i kom Lucaden i lobogi. Nen kong kit ma bedo ki ngec ni Jehovah marre okonyo kwede Biniam me loyo lworo ma en tye kwede i kom dano. En owaco ni, “Aunauna meno obedo marac adada ma loyo kit ma onongo atamo kwede. Ento gin ma onongo alworo ma loyo aunauna pa gamente obedo adage ma oa ki i pacowa. Onongo atye ki lworo ni tam ma amoko me doko Lacaden pa Jehovah bituro cwiny babana ma onongo pe obedo Lacaden ki dok ni lupacowa pe gibiwora matwal.” Kadi bed kit meno, Biniam onongo tye ki tekcwiny ni Jehovah kare ducu gwoko jo ma En marogi. Biniam otito ni: “Atamo i kom kit ma Jehovah onongo okonyo jo mukene me kanyo can lim, adage, ki dong tim gero marac. Aniang ni ka amoko matek i kom Jehovah, en bigoyo laane i koma. I kare ma kimaka tyen mapol dok bene kigoya marac, aneno ki wanga ni Jehovah kare ducu konyowa ka watye lugen bote.” Pi gin mutimme i kome-ni, Biniam obedo ki kare me ngeyo Jehovah macalo Wonne kikome ki Jone macalo lupacone kikome.

LWORO TO

15. Pingo pe obedo gin marac me lworo to?

¹⁵ Baibul ye ni to obedo lakwor. (1 Kor. 15:25, 26) Watwero bedo ki par matek ka watamo i kom to, tutwalle ka ce wan nyo ngat mo ma wamaro kome lit matek. Pingo walworo to? Pien Jehovah ocweyowa ki miti me kwo pi naka. (Latit. 3:11) Ento lworo to romo konyowa me gwoko kwowa. Me labolle, twero tugo cwinywa me camo cam mabeco, ryeyo ler, yenyo kony pa ludaktar ki nongo yat ka mitte, ki me gwokke ki keto kwowa ka mading tuko tuko.

16. Catan twero tic ki lworo ma watye kwede pi to nining?

¹⁶ Catan ngeyo ni wamaro kwowa. Dok en owaco ni, wabijalo gin mo keken ma watye kwede, kadiwa liremwa ki Jehovah, me gwoko kwowa. (Yubu 2:4, 5) Ento Catan lagoba! Kadi bed kit meno, kit macalo en aye “ngat ma tye ki twer i kom to,” Catan tiyo ki lworo ma watye kwede i kom to me wek wakwer Jehovah woko. (Ibru 2:14, 15) I kine mukene, jo ma gitye i te twero pa Catan giminiwa bwura ni gibinekowa woko ka ce pe wakwero niyewa. Nyo i kare mukene, Catan twero neno ka kwowa tye ka mading pien wamito kony me yotkom ci en tiyo ki kare meno me keto dic i komwa wek wakwer niyewa woko. Ludaktar nyo lupacowa ma pe gubedo luye gitwero keto lyeto i komwa ni waye kimed remo i komwa, ma meno turo cik pa Jehovah. Nyo ngat mo romo bitowa me ye yo me cango mo ma turo cik ma igi lac me Baibul.

17. Ma lubbe ki Jo Roma 8:37-39, pingo pe omyero walwor to?

¹⁷ Kad bed pe wamito to, wangeyo ni Jehovah pe bijuko marowa kadi bed kwowa dong orwenyo. (Kwan Jo Roma 8:37-39.) Ka lurem Jehovah guto, en po i komgi, calo pud gitye kwo. (Luka 20:37, 38) En tye ki miti matek me dwokogi cen i kwo. (Yubu 14:15) Jehovah oculo wel madit adada “wek dano ducu . . . obed ki kwo ma pe tum.” (Jon 3:16) Wangeyo kit ma Jehovah marowa kwede dok paro piwa. Dong me kaka kwero Jehovah i kare ma nongo komwa lit nyo kitye ka bwurowa ki to, wajenge i kome pi kwe cwiny, ryeko, ki dong teko. Meno aye gin ma laminwa Valérie gin ki cware gutimo.—Jab. 41:3.

18. Ngo ma itwero pwonyo ki i labol pa laminwa Valérie?

¹⁸ I kare ma laminwa Valérie onongo tye ki mwaka 35, kinongo ni en tye ki two kanca mo manyen dok kite pat adada. Tam kong kit ma mar pa Jehovah okonye kwede me loyo lworone i kom to. En otito ni: “I kare ma aniang ni atye ki two kanca, obedo me ur madit adada bot an ki cwara. Onongo mitte ni kitim ayango madit i koma wek amedde ki bedo kwo. Awoto bot ludaktari mapol, ento gin ducu gukwero lok me ayango labongo medo remo. Lworo omaka matek, ento pi lubo cik pa Lubanga, akwero lok me medo remo i koma woko! Pi kare me kwona ducu, Jehovah onyuto bota mar madit adada. Onongo dong atye ki kare me nyuto marra pi Jehovah bene. Kare ducu ka awinyo lok marac ma oa ki bot ludaktar, onongo weko amoko tamma matek me yomo cwiny Jehovah dok pe me weko Catan loyo. I agikkine, anongo ayango maber labongo medo remo i koma. Kadi bed pekona me yotkom pud tye ka medde, Jehovah kare ducu miniwa jami ma mitte. Me labolle, i cokkewa i tum cabit ma peya ludaktar gutita pi twona, wanyamo pwony ma wiye tye ni ‘Lweny ki Pekki me Kare-ni ki Tekcwiny.’c Pwony man okweyo cwinywa tutwal. Wakwano teretere dok wanwoyo. Pwony macalo man kacel ki medde ki timo jami calo bedo i cokke kare ducu ki tito kwena okonyo an ki cwara me bedo ma wiwa opye mot ki dok me moko tam mabeco.”

KIT ME LOYO LWOROWA

19. Ngo ma cokcok-ki bitimme?

¹⁹ Ki kony pa Jehovah, Lukricitayo ma i but lobo-ni ducu gubedo ki teko me loyo lworogi kacel ki cung matek i kom Catan. (1 Pet. 5:8, 9) In bene itwero. Macok cok-ki, Jehovah bimiyo twero bot Yecu ki luloc luwote me “turo tic pa Catan woko.” (1 Jon 3:8) I nge meno, “pe tye ngat mo ma bimiyo” jo pa Lubanga ma gitiyo pire i lobo kany “gibedo lwor.” (Ic. 54:14; Mika 4:4) Ento me o wa i kare meno, mitte ni wati matek me loyo lworo ma watye kwede.

20. Ngo ma bikonyowa me loyo lworowa?

²⁰ Omyero wamedde ki dongo genwa ni Jehovah maro dok gwoko luticce. Gin ma bikonyowa me timo meno aye lwodo lok kacel ki lok ki jo mukene i kom kit ma Jehovah ogwoko kwede luticce i kare macon. Dok waromo ketone i wiwa kit ma en okonyowa kwede me kanyo kare ma kwo obedo tek. Ki kony pa Jehovah, watwero loyo lworowa!—Jab. 34:4.