PWONY ME 6

Tit Gin Mumiyo Ikwano Ginacoya Moni

Tic pa Lukwena 17:2, 3

GIN ME ATIMA: Pe ikwan mere wang ginacoya moni ci ikob i lok mukene. Yelle matek me neno ni jo ma gitye ka winyo lokki guniang kit ma ginacoya ma ikwano-ni kubbe kwede ki pwony ma itye ka miyone.

KIT ME TIMONE:

Wek nyig lok ma pigi tego gucung ka maleng. I nge kwano ginacoya moni, ket tam pa dano i kom nyig lok ma iye ma kubbe ki pwony ma itye ka miyone. Itwero timo man ki nwoyo nyig lok meno nyo penyo lapeny ma konyo dano me nongo nyig lok ma pigi tego-ni.

Ka ibitiyo ki nyig lok mapat me gonyo te ginacoya moni, nen ni jo ma tye ka winyo lokki pud gitwero niang kit ma lok ma tye i Baibul kubbe kwede ki pwony ma itye ka miyone.
Nwo lok ma pire tek. Ka itito tyen lok mumiyo ibikwano wang Baibul moni, ci i nge kwanone tit kit ma nyig lok ma pigi tego ma iye cwako kwede tyen lok meno.

Ka itye ka nyamo ginacoya moni, wek Baibul-li obed ayaba. Man bikonyo jo ma tye ka winyi me kubo lokki ki tyeng ma ikwano-ni.
Tit i yo mayot gin mumiyo ikwano ginacoya moni. Gwokke ki lok i kom jami mogo ma pe kubbe ki pwony ma itye ka miyone. Tam i kom gin ma dano dong gingeyo i kom pwony meno, ci mok tammi i kom jami adi ma ibiloko iye wek jo ma tye ka winyo pwonyi guniang maber.