Tika Omyero Adyer Kwona Bot Lubanga Dok Anong Batija?

1. Lapeny ango ma iromo penye kwede i nge kwano buk man?

DONG ipwonyo lok ada me Baibul mapol i kare ma ibedo ka kwano buk man, calo cikke pa Lubanga me miyowa kwo ma pe tum, kit ma jo muto gitye kwede, ki gen me nicer. (Latitlok 9:5; Luka 23:43; Jon 5:28, 29; Niyabo 21:3, 4) Romo bedo ni dong icako cito i cokke pa Lucaden pa Jehovah dok iye ni gilubo woro me ada i kwogi. (Jon 13:35) Gwok nyo icako dongo wat macok ki Jehovah, dok imoko tammi me tic pire. Pi meno, iromo penye kekeni ni, ‘Ngo ma myero dong atim me tic pi Lubanga?’

2. Ngo mumiyo laco mo me Etiopia onongo mito nongo batija?

² Meno aye gin ma laco mo me lobo Etiopia ma okwo i kare pa Yecu otamo. Kare mo i nge cer pa Yecu, lakwena pa Yecu ma nyinge Pilipo otito kwena bot laco man. Pilipo onyuto bote ni Yecu aye obedo Meciya. Gin ma Laetiopia man opwonyo ogudo cwinye adada, mumiyo en owaco cutcut ni: “Nen pii dong ene! Gin ango ma genga limo batija?”​—Tic pa Lukwena 8:26-36.

3. (a) Cik ango ma Yecu omiyo bot lulub kore? (b) Batija mono omyero kitim nining?

³ Baibul pwonyo ni ka imito tic pi Jehovah, myero kong inong batija. Yecu owaco bot lulub kore ni: ‘Wucilok jo me rok ducu gudok jo ma luba, kun wubatijagi.’ (Matayo 28:19) Yecu bene onyuto lanen maber ki nongo batija. Kiluto kome ducu i pii, ento pe kionyo pii nyo kikiro pii akira i wiye. (Matayo 3:16) I kareni bene ka kibatija Lakricitayo moni, myero kilut kome kulu i te pii.

4. Batijani mono nyuto gin ango bot jo mukene?

⁴ Ka inongo batija, ci meno nyuto bot jo mukene ni imito bedo larem Lubanga dok imito tic pire. (Jabuli 40:7, 8) Pi meno, itwero penye kekeni ni, ‘Ngo ma myero atim wek anong batija?’

NGEC KI NIYE

5. (a) Ngo ma myero kong itim ma peya inongo batija? (b) Pingo cokke pa Lukricitayo obedo gin ma pire tek?

⁵ Ma peya inongo batija, myero kong inge Jehovah gin ki Yecu. Dong icako ngeyo jo aryo magi ki i kwanni me Baibul. (Kwan Jon 17:3.) Ento meno keken pe romo. Baibul wacci myero “wuniang matut i gin ma en [Jehovah] mito.” (Jo Kolocai 1:9) Cokke pa Lucaden pa Jehovah bikonyi me dongo wat macok ki Jehovah. Meno tyen lok acel ma pire tek mumiyo omyero ibed tye i cokke kare ducu.​—Jo Ibru 10:24, 25.

6. Myero mono ibed ki ngec me Baibul ma rom mene ka wek ibed ma ipore pi batija?

⁶ Tye kono ni Jehovah pe oketo macalo cik ni myero inge Baibul ki pete tere ducu ka wek ibed ma ipore me nongo batija. En pe omito ni laco Laetiopia-ni kong onge jami ducu ma peya onongo batija. (Tic pa Lukwena 8:30, 31) Dok pud wabimedde ki pwonyo lok i kom Lubanga Jehovah pi naka. (Latitlok 3:11) Ento me wek inong batija, myero kong inge dok i ye pwony ma pigi tego me Baibul.​—Jo Ibru 5:12.

7. Kwanni me Baibul mono okonyi nining?

⁷ Baibul wacci: “Labongo niye pe twerre me yomo cwinye.” (Jo Ibru 11:6) Pi meno myero ibed ki niye ma peya inongo batija. Baibul tito ni i kare ma jo mogo ma gibedo i boma macon me Korint guwinyo pwony pa lulub kor Yecu “guye bene, ci gibatijagi.” (Tic pa Lukwena 18:8) I yo acel-lu, kwanni me Baibul okonyi me dongo niye i cikke pa Lubanga ki teko pa ginkok pa Yecu, ma romo larowa ki i bal ki to.​—Yocwa 23:14; Tic pa Lukwena 4:12; 2 Temceo 3:16, 17.

NYWAK LOK ADA ME BAIBUL KI JO MUKENE

8. Ngo ma bitugo cwinyi me nywako jami ma ipwonyo ki jo mukene?

⁸ Ka imedde ki kwanni me Baibul kun ineno kit ma konyi kwede i kwoni, niyeni bidongo doko matek. Ibibedo ki miti me tito bot jo mukene jami ma itye ka pwonyone. (Jeremia 20:9; 2 Jo Korint 4:13) Ento angagi ma myero inywak kwedgi jami magi?

9, 10. (a) Iromo cako nywako jami ma ipwonyo ki i Baibul ki angagi? (b) Ngo ma myero itim ka imito cako tito kwena kacel ki kacokke?

⁹ Iromo bedo ki miti me nywako gin ma itye ka pwonyo ki wadini, luremi, jiranini, nyo lutic luwoti. Meno ber, ento myero itim ki cwiny me kica dok i yo me mar. I nge kare mo, ibibedo ma ipore me tito kwena kacel ki kacokke. Ka dong iwinyo ni itye atera me cako tito kwena ki kacokke, ci iromo waco pi mitini bot Lacaden ma tye ka pwonyi Baibul-li. Ka en tamo ni ipore dok itye ka kwo i yo ma lubbe ki cik me Baibul, ci wun aryo-ni wubirwatte ki luelda aryo me kacokkewu.

¹⁰ Ngo ma bitimme i cokke meno? Luelda magi gibilok kwedi me neno ka iniang dok i ye pwony ma pigi tego me Baibul, ka ilubo gin ma Baibul pwonyo i kwoni me nino ducu, dok ka ada imito doko Lacaden pa Jehovah. Wi opo ni luelda gitye ki tic me gwoko jo ducu me kacokke, kadiwa in bene, pi meno pe ilwor lok kwedgi. (Tic pa Lukwena 20:28; 1 Petero 5:2, 3) I nge cokke man, luelda gibiweko ingeyo ka itwero cako tito kwena kacel ki kacokke.

11. Pingo pire tek adada ni ilok yo me kwoni ma peya icako tito kwena kacel ki kacokke?

¹¹ Luelda guromo tito boti ni myero kong ilok yo me kwoni ma peya icako tito kwena kacel ki kacokke. Pingo pire tek adada ni ilok yo me kwoni? Kit ma waloko bot jo mukene i kom Lubanga-ni, wacung pi Jehovah dok omyero wakwo kwowa i yo ma kelo deyo bote.​—1 Jo Korint 6:9, 10; Jo Galatia 5:19-21.

NGUT PI BALLI DOK ILOKKE

12. Pingo dano ducu myero gungut pi balgi?

¹² Tye gin mo mukene ma myero itim ma peya kiye ni inong batija. Lakwena Petero owacci: ‘Wungut, wudwog cen, wek balwu gijwa woko.’ (Tic pa Lukwena 3:19) Ngut pi bal te lokke ngo? Te lokke ni cwinyi cwer pi gin marac ma itimo. Me labolle, ka ibedo ka timo tim tarwang, ci mitte ni myero kong ingut pi balli. Dok kadi bed itute matek me timo gin matir pi kwoni ducu, myero bene ingut pi balli pien wan ducu watimo bal dok omyero waleg Lubanga wek otimwa kica.​—Jo Roma 3:23; 5:1.

13. Lokke obedo gin ango?

¹³ Tika romo me koko ange keken pi gin ma itimo? Pe. Petero bene owacci myero ‘idwog cen’ nyo ilokke. Man te lokke ni myero ikwer tim maraco ma ibedo ka timone dok icak timo gin matir. Me labolle, go kong ni itye ka wot i kabedo mo pi tyen mukwongo. I nge wot pi kare mo, iniang ni kara irweny woko. Ngo ma ibitimone? Labongo akalakala mo ibijuko wotti, ilokke, ci icako wot i yo matir. I yo acel-lu, ka imedde ki kwanni me Baibul, itwero niang ni tye jami mogo ma ibedo ka timogi ma omyero iwek woko. Bed atera me ‘lokke’​—nyo yubo ka ma mito aloka​—ci icak timo gin matir.

DYERE PIRI KENI

14. Idyero kwoni bot Lubanga nining?

¹⁴ Gin mukene ma pire tek ma myero itim ma peya inongo batija aye me dyere piri keni bot Jehovah. Ka itye ka dyere bot Jehovah, ilego lega bote kun icikke ni ibiworo en keken dok ibiketo timo mitine bedo gin ma pire tek loyo i kwoni.​—Nwoyo Cik 6:15.

15, 16. Ngo ma tugo cwiny dano me dyere bot Lubanga?

¹⁵ Cikke me tic pi Jehovah keken obedo calo cikke me bedo ki ngat mo ma imaro pi kwoni ducu. Go kong ni laco ki nyako moni gitye ka winye. Ka laco-ni woto ki ngeyo ni anyaka meno obedo ngat maber, marre pire dongo dok en cako bedo ki miti me nyomo nyako-ni. Kadi bed moko tam me nyom pe obedo gin mayot, laco-ni tye atera me timone pien en maro anyaka-ni.

¹⁶ Ka imedde ki pwonyo lok i kom Jehovah, marri pire bidongo dok ibibedo ki miti me tic pire. Man bitugo cwinyi me lega bote kun icikke me tic pire. Baibul wacci ngat mo keken ma mito lubo Yecu “myero okwong kwerre kekene.” (Marako 8:34) Meno tyen lokke ngo? Te lokke ni iketo bedo lawiny bot Jehovah calo gin mukwongo i kwoni. Gin ma Jehovah mito pire tek loyo mitini ki yubbi.​—Kwan 1 Petero 4:2.

PE ILWOR NI PE IBICOBO DYERE-NI

17. Pingo jo mukene gikwero dyere bot Jehovah?

¹⁷ Jo mukene pe giye dyere bot Jehovah pien gilworo ni pe gibicobo cikkegi me tic pire. Pe gimito turo cwiny Jehovah, nyo giromo tamo ni ka pe gudyere bot Jehovah, ci en pe bingolo kop i wigi pi jami ma gitimo.

18. Ngo ma bikonyi me loyo lworo mo keken ma itye kwede i kom turo cwiny Jehovah?

¹⁸ Marri pi Jehovah bikonyi me loyo lworo mo keken ma itye kwede i kom turo cwinye. Kit macalo itye ki mar i kome-ni, ibitiyo matek me gwoko cikkeni bote. (Latitlok 5:4; Jo Kolocai 1:10) Pe ibitamo ni timo miti pa Jehovah tek tutwal. Lakwena Jon ocoyo ni: “Maro Lubanga en aye gwoko cikke. Dok cikke pe nurowa.”​—1 Jon 5:3.

19. Pingo myero pe ilwor dyere bot Jehovah?

¹⁹ Pe dong tye ni myero ibed dano ma pe ki roc ka wek idyere bot Jehovah. En pe mito ni watim gin ma pe watwero timone. (Jabuli 103:14) En bikonyi me timo gin matir. (Icaya 41:10) Gen Jehovah ki cwinyi ducu, ci en “en bitiro yo ma iwoto iye bedo atir.”​—Carolok 3:5, 6.

TUCO DYERENI I NYIM LWAK PI NONGO LARRE

20. I nge dyero kwoni bot Lubanga, ngo mukene ma myero itim?

²⁰ In itamo ni itye atera me dyere bot Jehovah? Ka dong ityeko dyero kwoni bot Jehovah, nongo itye atera pi gin ma lubo. Myero dong inong batija.

21, 22. In itwero ‘tuco niyeni i dye lwak’ nining?

²¹ Wek lakub kin luelda me kacokkewu onge ni dong ityeko dyero kwoni bot Jehovah dok imito nongo batija. En biketo yub pi luelda me nyamo kwedi lapeny mogo ma mako pwony ma pigi tego me Baibul. Ka ce luelda magi gunongo ni ipore, ci gibiniangi ni dong iromo nongo batija i gure me adwol nyo gure madit pa Lucaden pa Jehovah. I gure meno, kibimiyo pwony ma nyamo tyen lok me batija. Lami pwony bipenyo jo ma mito nongo batija me gamo lapeny aryo mayot. Ka igamo lapeny aryo magi, nongo itye ka ‘tuco niyeni i dye lwak.’​—Jo Roma 10:10.

²² I nge meno, ibinongo batija. Kibiluto komi ducu woko i te pii. Batijani binyuto bot jo ducu ni in dong ityeko dyere bot Jehovah dok idoko Lacaden pa Jehovah.

TYEN LOK ME BATIJANI

23. Tyen lokke ngo me nongo batija “i nying Won ki Wod ki cwiny maleng”?

²³ Yecu otito ni lupwonyene gibinongo batija “i nying Won ki Wod ki cwiny maleng.” (Kwan Matayo 28:19.) Man tyen lokke ngo? Te lokke ni in iye twero pa Jehovah ki tic ma Yecu tye kwede ma lubbe ki yub pa Lubanga, dok iniang kit ma Lubanga tiyo kwede ki cwiny maleng me cobo mitine.​—Jabuli 83:18; Matayo 28:18; Jo Galatia 5:22, 23; 2 Petero 1:21.

24, 25. (a) Batija obedo lanyut me gin ango? (b) Ngo ma wabinyamone i dul me agikki?

²⁴ Batija obedo lanyut me gin mo ma pire tek adada. Ka kiluti i te pii, man te lokke ni dong ityeko to woko i yo me kwoni macon, nyo iweko timo jami ma lubbe ki kit kwoni macon. Ka ikatti woko ki i pii, meno te lokke ni dong ibicako kwo manyen me timo miti pa Lubanga. Man nyuto ni ibitiyo pi Jehovah cakke ki i nino meno. Wi opo ni pe idyere bot dano, dul, nyo tic mo. In idyero kwoni bot Jehovah.

²⁵ Dyereni bikonyi me dongo wat macok ki Lubanga. (Jabuli 25:14) Man pe te lokke ni ngat moni binongo larre pien ni dong kibatija en woko. Lakwena Paulo ocoyo ni: “Wuti tic me cobo larwu kenwu kenwu ki lworo kacel ki myelkom.” (Jo Pilipi 2:12) Batija obedo mere acakki mamwa. Ento itwero medde ki bedo cok ki Jehovah nining? Dul me agikki me buk man bigamo lapeny meno.