Tika Igeno ni Jehovah Kare Ducu Timo Jami ma Atir?

1-2. (a) Pingo jo mapol i kare-ni ginongo ni tek me geno jo ma gitye ki twero? (b) Gin ango ma wabinyamo i pwony man?

I KARE-NI, jo mapol ginongo ni tek me geno jo ma gitye ki twero. Gutyeko neno ni gamente kacel ki cik ma gicomo pol kare gwoko lulonyo ki jo ma gitye ki twero, ento pe gimiyo kony muromo bot lucan. Baibul waco atir ka maleng ni: “Dano ma tye ki twero loyo jo mukene ki tek.” (Latit. 8:9) Medo i kom meno, lutela dini mogo bene gitimo jami maraco dok man oweko jo mukene gurwenyo gengi woko i kom Lubanga. Pi meno, ka watye ka kwano Baibul ki ngat mo, mitte ni wakonye me pwonnye me geno Jehovah ki jo ma en ocimogi i lobo kany.

² Ngene kene ni, pe lutino kwan me Baibul keken aye myero gupwonnye me geno Jehovah ki dulle. Kadi bed dong watiyo pi Jehovah pi mwaki mapol, omyero pe warweny genwa woko ni yo ma Jehovah timo ki jami aye ber loyo ducu. I kare mukene, jami mogo twero timme ma temo gennewa i kom Jehovah. I pwony man, wabinyamo kabedo adek mapatpat ma kitwero temo iye niyewa: (1) ka watye ka kwano lok mogo ma kicoyo i Baibul, (2) ka wanongo tira ma oa ki i dul pa Jehovah, ki (3) ka wakemme ki kwo matek i anyim.

GEN JEHOVAH KA ITYE KA KWANO BAIBUL

3. Lok mogo ma kicoyo i Baibul twero temo genwa i kom Jehovah nining?

³ Ka wawoto ki kwano Lok pa Lubanga, waromo bedo ka penyo pingo Jehovah otero ngat moni i yo mo ki pingo en omoko tam mogo. Me labolle, i buk me Wel, wakwano ni Jehovah ongolo to i wi Laicrael mo pi coko yen i nino me Cabat. I buk me aryo pa Camuel, wapwonyo ni mwaki mapol lacen, Jehovah otimo kica ki Kabaka Daudi pi timo abor kacel ki nek. (Wel 15:32, 35; 2 Cam. 12:9, 13) Waromo pennye kekenwa ni, ‘Pingo Jehovah otimo kica ki Daudi pi nek kacel ki abor ento ongolo to i wi laco mukene ca pi bal mo ma nen calo tidi?’ Me gamo lapeny meno, nen kong jami adek ma omyero watam iye ka wawoto ki kwano Baibul.

4. Acakki 18:20, 21 ki Nwoyo Cik 10:17 jingo genwa nining i kom ngolo kop pa Jehovah?

⁴ Baibul pol kare pe miyo ngec ducu ma lubbe ki gin moni mutimme. Me labolle, wangeyo ni Daudi ongut pi balle ki cwinye ducu. (Jab. 51:2-4) Ento laco ma oturo cik me Cabat-ti onongo obedo kodi dano ango? Tika en ongut pi bal ma otimo? En mono onongo kong oturo cik pa Jehovah i kare mukato? Tika en onongo ocayo nyo bene okwero lok ma kicikke kwede kong con? Baibul pe tittiwa. Ento, watwero bedo ki gen i kom lok man: Jehovah “pe ki bal mo.” (Nwo. 32:4) Pol kare dano gimoko tam ma lubbe ki lok pa jo mukene, tam marac ma gitye kwede i kom jo mukene, nyo gin mo mukene, dok meno aye oweko gingolo kop alenga. Ka kiporo ki wan dano, Jehovah moko tamme kun jenge i kom lok ada. (Kwan Acakki 18:20, 21; Nwoyo Cik 10:17.) Ka wawoto ki pwonyo lok i kom Jehovah ki rwomme me kit ma atir, ci wabimedde ki dongo genwa i kom ngolo koppe. Kadi bed lok mo ma wakwano ki i Baibul oweko wabedo ki lapeny ma pe watwero gamone kombeddi, watye ki ngec muromo i kom Lubangawa ma weko wabedo ki gen ni “gin ducu ma Rwot [Jehovah] tiyo tye atir.”—Jab. 145:17.

5. Roc ma watye kwede gudo kit ma wangolo kwede kop nining? (Nen bene bok ma wiye tye ni “Roc ma Watye Kwede Weko Pe Waneno Jami Kakare.”)

⁵ Pol kare pe wangolo kop atir pien watye ki roc. Lubanga ocweyowa i calle, pi meno wamito ni wanen ka kitero jo mukene maber. (Acak. 1:26) Ento, pien watye ki roc, pol kare wangolo kop alenga, kadi bed watamo ni wangeyo jami ducu mutimme. Me labolle, wi opo i kom kit ma kiniga omako kwede Yona pi tam ma Jehovah omoko me nyuto kica bot jo me Nineve. (Yon 3:10–4:1) Ento, tam kong adwogi maber ma obino pien Jehovah onyutigi kica. Kilaro kwo pa jo me Nineve makato 120,000 kulu! I agikkine, Yona aye onongo ongolo kop alenga i wi jo Nineve, ento pe Jehovah.

6. Pingo pe mitte ni Jehovah otit botwa tyen lok mumiyo en omoko tam moni?

⁶ Pe mitte ni Jehovah otit bot dano pingo en omoko tam moni. Tye ada gire ni, i kare mukato angec, Jehovah oye ni luticce mogo gutit kit ma giwinyo kwede madok i kom tam ma en omoko nyo mito mokone. (Acak. 18:25; Yon 4:2, 3) Dok i kare mogo, en onongo tito pingo emoko tam moni. (Yon 4:10, 11) Kadi bed kit meno, pe mitte ni Jehovah otit botwa pingo en omoko tam moni. Macalo Lacwecwa, pe mitte ni en onong cwak ki botwa ma peya en otimo gin moni, nyo i nge timone.—Ic. 40:13, 14; 55:9.

GEN JEHOVAH KA INONGO TIRA

7. Gin ango ma timone twero bedo tek botwa, dok pingo?

⁷ Labongo akalakala mo, wan ducu waye ni Jehovah kare ducu timo gin ma atir. Ento, watwero nongo ni tek me geno co ma en ocimogi. Watwero bedo ki akalakala ka ada jo ma gitye ki twero i dul pa Jehovah gilubo tira ma Jehovah miyo nyo gitimo jami ki wigi. Twero bedo ni jo mogo ma gukwo i kare me Baibul bene gubedo ki tam ma kit man. Tam kong i kom labol pa jo ma kiloko i komgi i paragraf me 3. Wat pa laco ma oturo cik me Cabat-ti onongo twero pennye kekene ka ada Moses openyo dog Jehovah ma peya kingolo to i wi laco-ni. Ki larem Uria ma jo Kit, ma dakone otimo abor ki Daudi, onongo twero tamo ni Daudi otiyo ki twerone macalo Kabaka me weyo to ma nongo opore ki balle. Jehovah geno jo ma en ocimogi me telo wi dulle ki kacokke. Dong ka wan pe wageno co magi, pe watwero waco ni wageno Jehovah.

8. Gin ango ma kiloko pire i Tic pa Lukwena 16:4, 5 marom aroma ki kit ma kacokke pa Lukricitayo tiyo kwede i kare-ni?

⁸ I kare-ni, Jehovah doro but dulle ma i lobo-ni kun tiyo ki “lagwok ot ma lagen dok maryek.” (Mat. 24:45) Calo lukiko madit me cencwari me acel, lagwok ot man doro tic pa jo pa Lubanga i wi lobo ducu dok miyo tira bot luelda me kacokke. (Kwan Tic pa Lukwena 16:4, 5.) Luelda bene gitute matek me neno ni gilubo tira meno i kacokke. Wanyuto ni watye ki gen i yo ma Jehovah timo kwede ki jami ka walubo tira ma wanongo ki i dulle kacel ki bot luelda.

9. Awene ma watwero nongo ni tek me cwako tam ma luelda gumoko, dok pingo?

⁹ I kare mogo, watwero nongo ni tek me cwako tam ma luelda gumoko. Me labolle, i mwaki mogo macok cok-ki, kacokke mogo kiribogi kacel, ma man oweko kacokke mukene kicwalogi i adwol mukene. I kine mukene, luelda gupenyo lutit kwena mogo me cito i kacokke mukene wek kabedo ma i Ot me Ker opong maber. Ka kipenyowa ni wacit i kacokke manyen, waromo nongo ni tek adada me weko luremwa ki wadiwa. Tika luelda ginongo tira atir ki bot Lubanga ma tittigi ka kwene ma omyero gucwal iye latit kwena acel acel? Pe. Dok meno twero weko bedo tek piwa me lubo tira ma wanongo. Ento Jehovah geno ni luelda gitwero moko tam ma kit meno, dok wan bene omyero wagengi.b

10. Pingo omyero wacwak tam ma luelda gumoko? (Jo Ibru 13:17)

¹⁰ Pingo omyero wacwak tam ma luelda gumoko kadi bed tam meno pe rwatte ki mitiwa? Pien ka watimo kit meno, wakonyo me gwoko note ma tye i kin jo pa Lubanga. (Ep. 4:2, 3) Kacokke bedo maber ka jo ducu ma iye gilubo tam ma luelda gumoko. (Kwan Jo Ibru 13:17.) Ma dong pire tek loyo, wanyuto ki Jehovah ni wagene ka watiyo kacel ki jo ma en geno me gwokowa.—Tic 20:28.

11. Ngo ma twero konyowa me jingo genwa i kom tira ma wanongo ki bot luelda?

¹¹ Watwero jingo genwa i kom tira ma wanongo ki bot luelda ka wiwa po ni gin gilego pi cwiny maleng ka gitye ka nyamo lok ma gudo kacokke. Ginyamo bene cik ma igi lac me Baibul dok gingiyo tira ma dul pa Jehovah omiyo. Gitye ki miti me yomo cwiny Jehovah ki miyo gwok ma pud dong ber loyo bot jone. Omege magi ma lugen-ni gingeyo ni Jehovah tye ki miti madwong adada i kom kit ma gigwoko kwede romine. (1 Pet. 5:2, 3) Tam kong i kom lok man: I lobo man ma opong ki apokapoka pi kaka, dini, ki tim me wibye, jo pa Jehovah gitye ma gunote i woro Lubanga acel me ada. Man twere keken pien Jehovah tye ka goyo laane i kom dulle!

12. Jami ango ma omyero luelda gutam iye matut ka gimito moko ka ce ngat moni ada ongut i kom balle?

¹² Jehovah omiyo bot luelda tic ma pire tek adada me gwoko kacokke wek obed maleng. Ka Lakricitayo mo otimo bal madit, Jehovah mito ni luelda gumok ka ngat meno omyero omedde ki bedo i kacokke nyo pe. I kin jami mukene mapol, mitte ni gunen ka ngat meno ada ongut i kom balle. En twero waco ki doge ni engut i kom balle, ento tika ada en dag bal ma en otimo-ni? Tika en omoko tamme pe me nwoyo balle? Ka tyen lok mumiyo en otimo bal obedo ni pien en onongo tye ki lurem maraco, tika en tye atera me weko lurem magi? Luelda gilego bot Jehovah, gingiyo jami ducu mutimme ki gin ma Baibul waco, dok gingiyo kit ma labalo-ni winyo kwede pi bal ma en otimo. I nge meno gimoko ka ce labalo-ni myero omedde ki bedo i kacokke nyo pe. I kare mogo, twero mitte ni kiryeme woko ki i kacokke.—1 Kor. 5:11-13.

13. Par ango ma watwero bedo kwede ka kiryemo laremwa macok nyo watwa ki i kacokke?

¹³ Gin ango ma romo temo genwa i kom luelda? Ka ngat ma kiryemo ki i kacokke-ni pe obedo laremwa macok nyo watwa, twero bedo yot piwa me jolo tam ma luelda gumoko. Ento gwok nyo watwero bedo ki tam mapat ka ngat ma kiryemo-ni obedo watwa nyo laremwa macok. Waromo bedo ki par ni luelda pe gungiyo jami ducu mutimme maber, nyo waromo bedo ka pennye ka ce gumoko tam ma Jehovah kikome onongo bimoko. Ngo ma romo konyowa me bedo ki neno mupore i kom tam ma gumoko?

14. Ngo ma romo konyowa ka luelda gumoko ni omyero kiryem laremwa nyo watwa mo ki i kacokke?

¹⁴ Omyero wiwa opo ni ryemo ngat moni ki i kacokke obedo yub pa Jehovah ma kelo adwogi maber bot kacokke dok romo konyo labalo-ni bene. Ka kiweko labalo ma pe ongut pi balle omedde ki bedo i kacokke, ci en twero weko jo mukene bene gicako timo bal. (Gal. 5:9) Medo i kom meno, en pe oromo neno rac pa balle, dok pe bineno pingo omyero elok tamme ki kite wek enong cwak pa Jehovah odoco. (Latit. 8:11) Watwero bedo ki gen ni ka luelda tye ka moko ka ce omyero kiryem ngat moni ki i kacokke, gitero ticgi man calo tic ma pire tek adada. Giniang ni, calo lungolkop ma i lobo Icrael i kare macon, gin ‘pe gingolo kop pi dano ento pi Jehovah.’—2 Tekwaro 19:6, 7.

KIT MA GENO JEHOVAH I KARE-NI TYE KA PWONYOWA ME GENNE I ANYIM

15. Pingo mitte ni wagen tira ma oa ki bot Jehovah kombeddi makato kare mo keken?

¹⁵ Ka agikki me lobo man marac-ci woto ki nyiko cok, mitte ni wagen yo ma Jehovah timo kwede jami makato kare mo keken. Pingo? I kare me twon can madit atika-ni, twero bedo ni wabinongo tira ma romo nen calo tek me niang iye nyo lubone. Ngene kene ni, Jehovah pe bilok kwedwa ki acel acel. En nen calo biminiwa tira kun tiyo ki jo ma en ocimogi i lobo kany. Meno pe bibedo kare me bedo ki akalakala i kom tira nyo me bedo ka pennye ni, ‘Tira man ada oa ki bot Jehovah, nyo man obedo mere tam pa omege ma gitye ka telo wiwa?’ Tika ibigeno Jehovah kacel ki dulle i kare meno ma pire tek adada i tekwaro pa dano? Gin ma itamo i kom tira ma a ki bot omege ma kicimogi kombeddi bikonyi me ngeyo lagam pi lapeny meno. Ka igeno tira ma gimiyo botwa i kare-ni dok ilubo oyotoyot, ci nen calo ibitimo kit meno bene i kare me twon can madit atika-ni.—Luka 16:10.

16. Gin ango ma romo temo gennewa i kom ngolo kop pa Jehovah i anyim macok cok-ki?

¹⁶ Omyero bene watam matut i kom kit ma wabidok kwede i kom ngolo kop pa Jehovah i agikki me lobo man marac-ci. I kare-ni, watye ki gen ni jo mapol ma pe gitye ka tic pi Jehovah, ma i kine tye iye wadiwa ma pe gubedo Lucaden, gibimoko tamgi me tic pire ma agikki piny peya oo. Ento i lweny me Armagedon, Jehovah bitic ki Yecu me ngolo kop madok i kom anyimgi. (Mat. 25:31-33; 2 Tec. 1:7-9) Pe bibedo ticwa me moko anga ma myero onong kica pa Jehovah ki anga ma pe binongo. (Mat. 25:34, 41, 46) Tika wabigeno ngolo kop pa Jehovah, nyo wabijuko tic pi Jehovah woko pien pe wacwako tam ma en omoko? Nen ka maleng ni, omyero wajing genwa i kom Jehovah kombeddi wek wagene ki cwinywa ducu i anyim.

17. Wabinongo adwogi maber ango pi ngolo kop pa Jehovah i agikki me lobo man?

¹⁷ Go kong kit ma wabiwinyo kwede i lobo manyen ka waneno gin ma otimme macalo adwogi me ngolo kop pa Jehovah. Dini goba dong pe bibedo tye, kacel ki dul me biacara ma opong ki woro, ki dong gamente ma gudiyo dano dok gukelo pekki mapol i komgi pi kare malac. Two, tiyo, ki to pa jowa me amara dong bibedo jami mukato angec. Catan ki jogine kibitweyogi pi mwaka alip acel. Jami maraco ducu mutimme macalo adwogi me jemogi dong bibedo pe. (Yabo 20:2, 3) Pud dong wabibedo ki pwoc madit ya i kare meno ni wageno yo pa Jehovah me timo jami!

18. Pwony ango ma watwero nongo ki i labol pa Luicrael, kit ma kitito kwede i Wel 11:4-6 ki 21:5?

¹⁸ Tika kwo i lobo manyen pa Lubanga bikelo ariya mogo ma twero temo genwa i kom yo ma Jehovah timo kwede jami? Macalo labol, nen kong gin mutimme ma pe orii i kare ma kigonyo jo Icrael ki i opii i lobo Ejipt. Jo mogo gucako nguru pien gubedo ka paro cam mamit ma onongo gicamo kunnu, dok gucayo manna ma Jehovah omiyo botgi. (Kwan Wel 11:4-6; 21:5.) Tika wan bene watwero bedo ki tam acel-lu i nge twon can madit atika-ni? Pe wangeyo dit pa tic ma wabibedo kwede me lonyo lobo wek motmot walok odok paradic mamwonya. Nen calo tic bibedo tye madwong adada, dok kwo pe oromo bedo yot tutwal. Tika wabicako nguru pi jami ma Jehovah biminiwa i kare meno? Gin acel ma wangeyo ene: Ka watye ki pwoc pi jami ma Jehovah miyo botwa kombeddi, ci wabibedo ki pwoc makato i kare meno.

19. Tit kong wiye wiye lok ma pigi tego ma i pwony man.

¹⁹ Yo ma Jehovah timo kwede ki jamine kare ducu tye atir. Mitte ni waye meno i cwinywa. Mitte bene ni wabed ki gen i kom jo ma Jehovah ocimogi me lubo tirane. Wi pe owil i kom lok ma Jehovah oloko kun tiyo ki lanebine Icaya, ni: “Ka wubedo mot ki gen, wubinongo teko.”—Ic. 30:15.