Ker pa Lubanga Obedo Gin Ango?

GIN MA BAIBUL WACO

“Lubanga me polo biketo ker mukene ma ri nakanaka ma pe gitwero balone.”—Daniel 2:44, Acholi Baibul.

“Gimiyo botwa latin laco; gibimiyo en tingo twero me loc i wi gwoke.”—Icaya 9:6.

BER PA LOK MAN PIRI

• Gamente matir ma bikeli adwogi maber.—Icaya 48:17, 18.

• I lobo manyen ma bino-ni, wabinongo kwo me yotkom ki yomcwiny.—Niyabo 21:3, 4.

TIKA ADA WATWERO GENO GIN MA BAIBUL WACO?

Watwero, olo pi tyen lok aryo:

• Yecu onyuto gin ma Ker pa Lubanga bitimone. Yecu opwonyo lulub kore me lega ni Ker pa Lubanga obin dok ni kiti miti pa Lubanga i lobo kany. (Matayo 6:9, 10) Yecu bene onyuto kit ma Lubanga bigamo kwede lega meno.

  I kare ma Yecu tye i lobo, en opito jo ma kec nekogi, ocango lutwo dok ocero jo muto! (Matayo 15:29-38; Jon 11:38-44) Macalo ngat ma bibedo Laloc me Ker pa Lubanga, Yecu onyuto gin ma Ker meno bitimone pi jo ma bibedo i te locce.—Niyabo 11:15.

• Jami ma tye ka timme i lobo nyuto ni Ker pa Lubanga dong cok bino. Yecu otito ni ma peya Ker-ri okelo kuc i lobo, lobowa-ni bibedo ki lweny, kec ki oyengyeng.—Matayo 24:3, 7.

  Waneno timme pa jami magi i kare-ni. Pi meno, watwero bedo ki gen ni Ker pa Lubanga bigiko pekki magi ducu.