Yecu Mono Kinywalo i Dwe me Apar Wiye Aryo?
BAIBUL pe tittiwa awene ma kinywalo iye Yecu. Ento, miyowa tyen lok ma oromo ma miyo wamoko ni nywalle pe obedo i Dwe me Apar Wiye aryo.
Tam kong kit ma piny onongo tye kwede ka ma kinywalo iye Yecu i Beterekem i Dwe me Apar Wiye Aryo. Dwe pa Lujudaya me Kiclev (ma rwatte ki Dwe me Apar Wiye Acel ki Dwe me Apar Wiye Ariyo) onongo obedo dwe me ngico ki kot. Dwe ma lubo meno obedo Tibet (Dwe me Apar Wiye Ariyo ki Dwe me Acel). Man aye kare ma nongo piny ngic dong loyo i mwaka, ma kicel kicel piny make pee i wi cere mogo ma lamal. Kong wanenu gin ma Baibul waco i kom kit ma piny onongo tye kwede kunnu.
Laco Baibul Ejira onyuto ni Chislev onongo ada obedo dwe ma ngene pi ngico ki kot. Inge wacci lwak onongo gugure i Jerucalem “i nino dwe pyeraryo me dwe me abongwen [Chislev],” Ejira owaco ni “pi ngico omiyo kom dano acel acel obedo ka myel amyela.” Ma dok i kom kit ma piny onongo tye kwede i kare meno, jo ma gugure kunnu guwaco ni: “Obedo kare ma kot cwer iye madwong; pe watwero cung i dyekal ata kit man.” (Ejira 10:9, 13; Jeremia 36:22) Ngene kene ni lukwat ma onongo gikwo i but lobo me Beterekem onongo pe gitwero weko romigi buto woko i Dwe me Apar wiye Aryo!
Baibul kono tito ni, lukwat onongo gitye i tim ka gwoko romigi i dye wor ma kinywalo iye Yecu-ni. Dok Luka ma ocoyo Baibul bene onyuto ni i kare meno lukwat onongo “gibedo i tim, kun gigwoko romigi dyewor” i nget Beterekem. (Luka 2:8-12) Niang maber ni lukwat onongo gibedo i tim, pe wot me rweyo ler woko i dyeceng. Onongo gitye ki romigi i tim i dyewor. Dong kit ma kitito kwede ni onongo gibedo i tim-mi, tika rwatte ki piny me ngico ki kot i Beterekem i Dwe me Apar Wiye Aryo? Pe rwatte. Pi meno jami ma otimme i kare me nywalo Yecu nyuto ni pe kinywale i Dwe me Apar Wiye Aryo.a
Lok pa Lubanga titiwa nino ma Yecu oto iye kikome, ento pe miyo ngec mo ma nyuto atir nino ma kinywale iye. Man poyo wiwa i kom lok pa Kabaka Solomon ni: “Bedo ki nying maber ber kato moo me wel ma ngwece kur; ki nino me to pa dano, ber kato nino ma ginywale iye.” (Latitlok 7:1) Dong pe bedo gin aura ni Baibul miyo ngec matut i kom tic me pwony ki to pa Yecu ento miyo ngec manok keken i kom nino me nywalle.
[Lok ma tye piny]
a Pi ngec mukene, nen pot karatac 176-9 me Reasoning From the Scriptures, ma Lucaden pa Jehovah aye gucoyo.
[Cal ma tye i pot karatac 221]
I kare ma kinywalo Yecu, lukwat onongo gitye i tim ki romigi i dyewor