In mono ingeyo Lucaden pa Jehovah adi? Lucaden pa Jehovah mukene gitye jiranini, lutic luwoti, nyo lutino kwan luwoti, nyo gwok dong wanywako Baibul kacel kwedi. Wan mono wabedo angagi, dok wanywako lok i kom niyewa ki dano ducu pingo?

Wan gire watye dano me nino ducu. Waa ki i gangi mapat pat dok kwowa patpat. Jo mukene i kinwa onongo yam gilubo dini mapat, dok mogo onongo pe giye i kom Lubanga. Ento, ma pud peya wadoko Lucaden pa Jehovah, kong wangiyo matut pwony ma tye i Baibul. (Tic pa Lukwena 17:11) Waye ni gin ma wapwonyo-ni tye ada, ci wamoko tamwa piwa kenwa me woro Lubanga Jehovah.

Wanongo adwogi maber ki i kwano Baibul. Calo dano ducu, myero walweny ki pekki kacel ki gorowa. Ento ka watute me keto pwony me Baibul i tic nino ki nino, ci kwowa biyubbe doko ber i yo ma nen woko ka maleng. (Jabuli 128:1, 2) Meno aye tyen lok acel mumiyo watito ki jo mukene jami mabeco ma wapwonyo ki i Baibul.

Walubo pwony pa Lubanga. Pwony magi me Baibul-li, gikonyowa me kwo maber kun waworo jo mukene, dok bene gimiyo wanyebo kit mabeco calo bedo lugen ki lukica. Giweko dano dongo makwiri dok ki yotkom kun gikelo note pa jo me ot ki kit matir. Pien waniang ni “Lubanga pe poko kin dano,” watye jo me ot ma ginonge i twok lobo ducu dok niyewa aye ribowa, miyo pe wadonyo i apokapoka me kaka nyo wibye. Kadi bed ni watye dano me nino ducu, watye dul pa dano ma kite dok pat.—Tic pa Lukwena 4:13; 10:34, 35.

• Lucaden pa Jehovah girom aroma ki jo mukene i yo ma nining?

• Lucaden pa Jehovah gunongo pwony ango ki i kwangi me Baibul?

Dano mapol gitamo ni Lucaden pa Jehovah obedo nying dini mo manyen. Ento, mwaki makato 2,700 angec, lutic pa Lubanga me ada onongo kilwongogi ni gin ‘lucadenne.’ (Icaya 43:10-12) Nio wa i mwaka 1931, onongo kilwongowa ni Lutino Kwan me Baibul. Pingo wan wacako tic ki nying man ni Lucaden pa Jehovah?

Nying man nyuto Lubangawa. Ma lubbe ki bukke macon ma kicoyogi, nying Lubanga, Jehovah, nonge i Baibul cokcok tyen alip abiro kulu. I pol pa Baibul ma kigonyogi, kileyo nying man ki nying dog tic calo Rwot nyo Lubanga. Ento, inongo ni Lubanga me ada onyutte bot Moses kun tiyo ki nyinge Jehovah, nyo Yawe ma lubbe ki Baibul mukene, en owacci: “Man aye nyinga matwal.” (Nia 3:15, nen coc ma tye i tere piny) I yo ma kit man, en onyuto atir ni pe erom ki lubange mapol me goba. Watye ki awaka madit atika pien watiyo ki nying Lubanga maleng.

Nying man nyuto tic ma watimo. Dano mapol i kare mukato angec, cakke ki i kom Abel laco ma kite atir-ri, gumiyo caden ni gitye ki niye i kom Jehovah. Pi cencwari mapol, Nua, Abraim, Cara, Moses, Daudi, kacel ki jo mukene gubedo i kin “lwak caden mapol.” (Jo Ibru 11:4–12:1) Kit macalo ngat moni romo miyo caden i kot me cwako ngat ma pe labal-li, wan bene wamoko tamwa me tito lok ada i kom Lubangawa.

Walubo lanen pa Yecu. Baibul lwongo Yecu ni “caden ma genne ki me ada.” (Niyabo 3:14) Yecu bene owacci ‘emiyo nying Lubanga ongene’ ki dok ni ebedo “caden me lok me ada” i kom Lubanga. (Jon 17:26; 18:37) Pi meno, jo ma ada gilubo kor Kricito omyero guti ki nying Jehovah dok bene gutit pire. Man aye gin ma Lucaden pa Jehovah gitye ka tute me timone.

• Pingo Lutino Kwan me Baibul gucako tic ki nying man ni Lucaden pa Jehovah?

• Jehovah dong otiyo ki lucaden i lobo kany pi kare ma rom mene?

• Lacaden pa Jehovah mene ma dong ngene loyo?

Baibul otito con ni i nge to pa Kricito, lupwonye ma lugoba gibia ki i kin Lukricitayo me kare macon dok gibirubo pwony me ada ma tye i Baibul ki goba. (Tic pa Lukwena 20:29, 30) Ma kare okato, man ocobbe kakare. Lupwonye ma lugoba magi gudwanyo pwony pa Yecu ki tam pa lukamfiri, man omiyo Lukricitayo me gobagoba ocakke. (2 Temceo 4:3, 4) I yo ango ma wan watwero ngeyo kwede ni i kare-ni watye ki niango matir i kom gin ma Baibul ada pwonyo?

Kare pa Jehovah oromo me nyuto lok me ada. En otito con ni i ‘kare me agikki, ngec bene bimedde.’ (Daniel 12:4) I mwaka 1870, gurup mo pa jo manok ma gitye ka yenyo lok me ada guniang ni pwony pa dini mapol pe rwatte ki gin ma Ginacoya waco. Pi meno, jo magi gucako kwedo me niang pwony mapol kit ma onongo tye kwede con i Baibul, dok Jehovah okonyogi me niang ginacoya.

Jo ma gitye ki cwiny matir gukwano Baibul ki diro. Lutino Kwan me Baibul, ma dong kilwongogi ni Lucaden pa Jehovah i kareni, gutiyo ki yo me kwano Baibul ma wan bene pud watiyo kwede wa i kare-ni. Gubedo ka nyamo lok me Baibul ma lubbe ki pwony acel acel. Ka gunongo tyeng mo me Baibul ma pe giniang iye, onongo giyenyo tyeng mukene ma romo tito tyen ginacoya meno maber. Ka guo i niango ma rwatte ki Ginacoya ducu, ci gicoyo piny. Pien gutiyo ki Baibul, gin guniang odoco ada madok i kom nying Lubanga kacel ki Ker-ri, yubbe pi dano ki lobo, kit ma jo muto gitye kwede, ki dong gen me nicer. Kwed man ogonyogi ki i pwony me goba kacel ki tim mogo ma Baibul kwero.—Jon 8:31, 32.

I mwaka 1879 Lutino Kwan me Baibul guniang ni kare dong oromo me tito lok me ada i kin piny. Pi man, i mwaka meno, gucako goyo magajin me Wi Lubele Tito pi Ker pa Lubanga ma pud watye ka goyone wa tin. Kombeddi dong watye ka nywako lok ada me Baibul ki dano i lobe makato 240, dok i leb makato 750! Ngec me ada dong onya i kin piny makato kare mo keken!

• I nge to pa Kricito, ngo mutimme i kom pwony me ada ma tye i Baibul?

• Gin ango ma okonyowa me cako niang ada ma tye i Lok pa Lubanga doki?

Pi mwaki mapol, Lucaden pa Jehovah gutiyo tic me goyo ki poko Baibul mapat pat. Ento, dok waneno ni onongo mitte ni wagony Baibul manyen ma bikonyo dano wek “gunge lok me ada,” ma lubbe ki miti pa Lubanga pi dano ducu. (1 Temceo 2:3, 4) Pi man, i mwaka 1950 wacako goyo but Baibul me New World Translation ma niang iye yot, i leb Muno. Baibul man dong kigonyo kakare dok ki diro i leb makato 130.

Onongo mitte ni kigony Baibul ma niang iye yot. Leb lokke ka kare woto ki kato, omiyo pol pa Baibul ma kigonyogi i kare macon dong niang iye tek pien gitye ki lok mogo ma pe kitiyo kwede i kareni. Medo i kom meno, coc macon me Baibul ma tye kakare kinongogi i leb me Ibru, Aram ki Grik, mumiyo lugony leb dong gitwero niang iye maber.

Onongo mitte ni kigony Baibul ma tito lok pa Lubanga kakare. Ma ka gonyo Lok pa Lubanga ma lubbe ki tam pa jo moni, lugony Baibul myero gubed jo ma genne kun gilubo kit ma kicoyo kwede con. Ento kono, i pol pa Baibul, kikwanyo nying Jehovah woko.

Onongo mitte ni kigony Baibul ma kelo deyo i kom Ngat ma Oweko kicoyo. (2 Camuel 23:2) Kit ma kinyuto kwede i coc ma tye piny i pot karatac man, i Baibul me New World Translation, kidwoko nying Jehovah cen tyen ma romo 7,000 kulu kit ma onongo tye kwede i Baibul ma kicoyo ki coc macon. (Jabuli 83:18, NW) Kit ma lugony leb kong gukwedo lok pi mwaki mapol, Baibul man kwanone mit pien nyuto tam pa Lubanga atir. Kadi bed itye ki Baibul me New World Translation i leb ma megi nyo pe, wacuko cwinyi me keto yub pi kwano Lok pa Jehovah nino ducu.—Yocwa 1:8; Jabuli 1:2, 3.

• Pingo onongo mitte ni kigony Baibul manyen?

• Gin ango maber piwa me atima nino ducu ka wamito pwonyo miti pa Lubanga?